Hunbi Kima Rawngbâwl A Hlimawmnate
1 Naupang i nih angin, i nakin hun tûr i ngaihtuah ṭhîn ngei ang. Thufingte 21:5 chuan, “mi taima ngaihtuahna chuan neihnunna lam chauh a pan” tih min hrilh a. Chuvângin, i thiltum chungchâng ngun taka ngaihtuah chu i hlâwkpui ang. I nakin hun tûr atâna ruahmanna i siam hunah hunbi kima rawngbâwl chungchâng ngaihtuah rawh. Engvângin nge?
2 An vânglaia pioneer lo thawk ṭhînte hnênah an pioneer thawh chungchânga an ngaih dân i zawh chuan: “Khâng lai hun kha ka dam chhûnga hun nuam ber a nih hi!” ti deuh hlîrin an chhâng ang che. Unaupa pakhat, a tleirâwl chhuah aṭanga hunbi kima rawngbâwlna avânga hlimna nei chuan a upat hnuah hetiang hian a sawi: “Vânglai hun han thlîr lêt a: ‘I vânglai hian i siamtu hre reng rawh’ tih fuihna thu fing tak ka zâwm a ni tia sawi theih chu a lungawithlâk hle,” tiin. (Thur. 12:1) Chutiang hlimna chu i vânglaia tawng ve thei tûr chuan, i nu leh pate nên tûn aṭanga ruahmanna ṭha tak in siam a ngai a ni.
3 Nu leh Pate U, Hunbi Kima Rawngbâwl Chu Sawimawi Rawh U: Fate ngaihtuahtu Pa ber angin, Jehova chuan in kalna tûr kawng a kawhhmuh che u a. (Is. 30:21) Chutianga hmangaih taka kaihhruaina chu pein, nangni Kristian nu leh pate tân entawn tûr ṭha tak a lo siam a ni. In fate chu an tâna ṭha ber tûr kawng mahnia thlantîr mai lovin, Jehova malsâwmna an dawn theih nân an kalna tûr âwm kawngah chuan fing takin zirtîr zâwk ang che u. Tichuan, an lo ṭhanlen hunah in zirtîrna chuan “a chhia leh ṭha fiah tûrin” a ṭanpui dâwn a ni. (Heb. 5:14) Puitling tawhte chuan anmahni thu tlûkna chu rin theih a ni lo va, an kawng tûr kawhhmuh tûrin Jehova an rinchhan a ngai tih an thiltawn aṭangin an hria a. (Thuf. 3:5, 6) Chu chu tleirâwl thiltawn la nei tlêm zâwkte tân chuan a pawimawh lehzual a ni.
4 Nu leh pate u, in fate chu an tleirâwl chhuah dâwn emaw, a aia hma emawah nakina an hna thawh tûr chungchâng chu tih tak zetin sawipui rawh u. School hotute, zirtîrtute, leh an ṭhian zirlai dangte chuan in fate chu khawvêl thil, sum leh pai lam ûm tûrin an fuih mai ang. In fate chu Lalram dah hmasa reng chunga an mamawh inenkawl thei tûra ṭanpuitu tûr school zirlaite thlang tûrin ṭanpui ang che u. (1 Tim. 6:6-11) Regular pioneer thawk chunga mamawh khawp inchâwmna hmuh nân high school thleng zir a, chhawr ṭangkai theih themthiamna emaw, kut hnathawh thiamna emaw zir chu a tâwk tlângpui a ni.
5 Tleirâwlte chu nupui pasal neih hma loh sawimawipui la. A hnua neih an duh pawhin, nupui pasal neih mawhphurhna rit zâwkte chu an la ṭha thei zâwk ang. (September 2003 Kan Lalram Rawngbâwlna kârzeh, “I Inpe Thei Ang Em?” tih thuziak paragraph 19-na chu en rawh.) Pioneer thawh chungchâng te, mamawh zualna hmuna rawng bâwl te, leh Bethel-a rawng bâwl te a ṭhatzia sawipuiin, naupang tê an nih lai aṭangin, Jehova tilâwm zâwng, mi dangte tâna hlâwkna thlen thei zâwng, leh anmahni hlimna neihtîr thei tûr zâwnga nun hman châkna chu an thinlungah tuh ang che.
6 Naupangte U, Hunbi Kima Rawngbâwlna Dah Hmasa Rawh U: Naupangte u, pioneer rawngbâwlna chu eng ang nge a nih in ngaihtuah buai a ngai lo. In school kal chhûng leh chawlh chhûnga a remchân hun apianga auxiliary pioneer thawkin eng ang nge a nih in hre thei a ni. Tichuan, pioneer rawngbâwlnain lungawina a thlenzia chu in hre mai ang!
7 Pathian inawpna pâwla unaupa tleirâwl chhuak chho i nih chuan, kohhranho rawngbâwltu nih theih dân ngun takin ngaihtuah ang che. (1 Tim. 3:8-10, 12) Chu bâkah, i kumin a tlin hunah chuan Bethel-a rawngbâwlna dîl emaw, Nupui La Nei Lote Tâna Bible School-a kal emaw chu i duh leh duh loh ngaihtuah bawk ang che. Pioneer rawngbâwlnaa i thiltawn chuan thil hlu tak, hun duan anga nun dân te, mahni invawn fel dân te, mi dangte nêna inrem taka awmho dân te, leh mawhphurhna chelh theih dânte chu a zirtîr ang che. Chûng zawng zawngte chuan, nakina rawngbâwlna chanvo hlu zâwk chelh thei tûrin a buatsaih dâwn che a ni.
8 Hunbi kima rawngbâwlna hlawhtling tak neih nâna thil pawimawh ber chu thlarau lam thila taihmâkna rilru neih hi a ni. Tirhkoh Paula pawhin chutiang rilru put hmang chu a sawimawi hle a; tin, chu miin a rah chhuah tûrte pawh hetiang hian a sawi chhuak bawk a ni: “A rulhna roluah tûr chu Lalpa hnên ata in hmu dâwn tih hriain, in tih apiang chu . . . Lalpa tân anga ti zâwkin, châk takin ti rawh u,” tiin. (Kol. 3:23, 24) Jehova chuan hunbi kima rawngbâwlnaah hlimna tam tak pein malsâwm che rawh se!