‘Chipchiar Takin Hriattîr Rawh’—Apartment-a Thu Hrilin
1. ‘Chanchin ṭha chipchiar taka hriattîrnaah’ eng nge tel?
1 Tirhkoh Paula angin, kan duhzâwng chu “chanchin ṭha [“chipchiar taka” NW] hriattîr” hi a ni a. (Tirh. 20:24) Chuvângin, kan thu hrilhna biala mi a tam thei ang berte hnêna Lalram thuchah hriattîr chu kan tum a. Hei hian chhûngkaw tam tak chênhona apartment-a mi tam takte pawh a huam tel a. Chutiang ina chêngte va tlawh chu a châng chuan a harsa mai thei. Mahse, apartment-ah mi tam tak an khawsak avângin, chuta thu hrilh chu chanchin ṭha theh darhna hun remchâng ṭha tak a ni.
2. Engvângin nge apartment-a thu hrilhnaah fîmkhur thiamna leh rem hriatna lantîr chu a pawimawh?
2 Dân bawhchhiatna leh tha rum thawhna tâwk thei reng kan nih avângin, apartment tam tak chu kalh tlat a ni a, vêngtu emaw, enthlâkna camera-te emaw chu dah a ni hlawm a. (2 Tim. 3:1, 2) Chuta chêngte chuan, lêng tûra sâwm an nih loh chuan tuma luh an phal lo thei a ni. A bîk takin, in luahtute zînga pakhatin a sawisêl chuan manager emaw, security guard emaw chuan chu hmun chu chhuahsan tûrin min hrilh mai thei bawk. Chuvângin, fîmkhur thiam leh rem hriatna lantîr chu a pawimawh hle.
3. Engtikah nge apartment-a thu hrilh chu ṭha ber a, engvângin nge?
3 Thawh Hun Tûr: Thu hrilhna bial dangte ang bawkin, chhûngkuate ina an awm hun lai tûr âwma thu hrilh chu a ṭha ber a. In luahtu tam zâwkte awm loh huna kan kal chuan, chu chuan mite rinhlelh min kaitîr thei a ni. Thuchhuahtu tam tak chuan office bân hnu tlai lam leh Inrinni leh Chawlhni-ahte chuan mite chu an hmu ṭhîn a. Zîng hma tak, a bîk takin chawlhkâr tâwp zîng hma taka apartment tlawhna chuan manager hnêna sawisêl min hlawhtîr thei a ni.
4, 5. Engtin nge apartment inkalh chhûnga luhphalna kan hmuh theih ang?
4 Luh Phalna: Thuchhuahtute chuan rawngbâwlna an ṭan hmain manager emaw, apartment-a thawk mi dangte emaw chu an be pawp tûr a ni lo. Luh theih lohna apartment chuan luhna kawngkapui pâwnah inchhûnga mite biak pawh theihna intercom a neih chuan, chu chu in chhûnga lût a, inbiakna neih remti tuemaw zawn hmuh nân kan hmang ṭangkai thei a ni. Apartment awm dân azîrin, in chhûnga luh rem titu tuemaw kan biak zawh hnuah, chhûngkaw dangte kan tlawh nghâl thei pawh a ni thei. Mahse, apartment dangah chuan pâwna chhuak leh phawta intercom hmanga a dawta in biak leh chu a finthlâk mai thei bawk. Hetiang kawnga ṭumkhata in luahtu kan biak pawh zât tûr chungchângah rem hriatna kan hmang tûr a ni.
5 In luahtu ṭhenkhat chuan, intercom hmanga i va tlawh chhan i hrilh chu an duh zâwk mai thei a. Chutiang a nih chuan, nêlawm takin inhmêlhriattîr ang che. Intercom bulah in neitu hming a inziah chuan in neitu chu a hmingin bia la, tawifel takin, i thusawi tum chu sawi ang che.
6. Security guard nei ina thu kan hrilh hunah eng nge kan tih ang?
6 Security guard chuan apartment-a thu hrilh a rem tih loh chuan, ama hnêna thu hrilh chu kan tum thei a. Security guard tam tak chuan kan thu leh hla chhuahte chhiar chu nuam an ti hle a. Bible pawh kan zirpui hial thei a ni. Security guard chuan, tuina nei in luahtu pakhat tlawh tûra phalna min pêk chuan, chhûngkaw dangte tlawh loh chu a ṭha ber tlângpui ṭhîn a ni.
7. Apartment palai hnêna phalna dîl tûrin eng nge kan sawi theih?
7 A châng chuan, security guard chuan chu mi hmuna thu kan hrilh theih nân apartment thu neitute hnêna phalna la tûrin min ti mai thei a. Apartment thu neitu, president emaw, secretary emaw kan hmuh hunah, heti hian kan sawi thei ang: “Ka hming chu _________________ a ni a. Khawvêl pumah Jehova Thuhretute tia hriat kan ni. Kan vêngte hnêna thu ṭangkai tak tak, chhûngkaw nun hlim kan siam theih dân te, naupang enkâwl dân te, nuna lungkhamna hmachhâwn dân te, leh a ṭha zâwnga hma lam hun thlîr dânte hrilh chu kan duh a ni. [A mil tûr magazine emaw, thu leh hla chhuah dang emaw chu entîr rawh.] Rem i tih chuan, in neitute rei lo tê biak lawk kan duh a, an tui chuan thu leh hla chhuahte hi man chawi lovin an nei thei ang. An buai lai emaw, min be duh lo emawte chu kan be lui lo vang,” tiin. Kan inbiakna tih tâwp theih dân dang leh chu hei hi a ni: “In neitute hnêna hêng thute hrilh tûra min phalsak chuan kan lâwm hle ang. Tuina an neih chuan thu leh hla chhuahte chu man chawi lovin an nei thei ang,” tiin.
8. Kan thu hrilhna bag chungchângah rilrua kan vawn reng tûr chu eng nge ni?
8 Lan Dân leh Inchei Dân: Briefcase lian tak tak kan ken chuan, chu chuan mi mit a la thei a. Chuvângin, a tê zâwk ken emaw, engmah ken loh emaw chu kan tum thei a ni. Thuchhuahtu ṭhenkhat chuan thu leh hla chhuahte chu folder pan taka dahin, Bible chu an iptêah an ak mai thîn a ni.
9. Engtin nge hawihhâwmna kan lantîr theih a, chu chu engvângin nge a pawimawh?
9 Apartment-a i luh hunah, i pheikhawk tât fai la, ṭha takin kawngka khâr leh ang che. Chutianga hawihhâwmna lantîrna hmangin, in luahtute sawisêl kan tâwk lo deuh vang. Compound chhûnga i luh hnu chuan, gate bul vêla tawi khaw muanga hun khawhral ai chuan, kailâwn lam emaw, elevator lam emaw chu tum nei takin pan nghâl la, a nih loh leh i thu hrilhna tûr in chhâwng lam chu pan nghâl ang che. Hei hian a lo thlîrtute rinhlelhna a ti bo vang.
10. Engtin nge apartment chhûnga ṭûl lo taka thâwm neih chu kan pumpelh theih?
10 Apartment tam takah chuan thâwm a ring duh hle a. Chuvângin, in neitu hriat nuam tâwk bâka ringin ṭawng suh ang che. Thuchhuahtu dangte i biak hunah pawh ṭawng zawi la, rinhlelh i kai loh nân ṭawngkam dam leh ngaihthlâk nuam tâwk tûrin bia ang che. Chu bâkah, kawngka chu ring tak emaw, thu neih hmêl tak emawa kikna chuan a chhûnga awmte a tihlau thei a ni.
11. Bihthlâkna kaw nei kawngka kan kik hunah eng rawtnain nge min ṭanpui thei?
11 Kawngkhârah mi bihthlâkna kua a awm chuan, rawn en tute’n i thawhpui nêna an hmuh theih tûr zâwngin ding ang che u. Mi bihthlâkna kua chu en reng la, tuemawin a rawn en che tih i hriat hunah, phûr taka chibaiin, thu sawi ṭan nghâl ang che. Inchhûnga mi chuan ‘Tunge ni?’ tia a rawn zâwt a nih chuan, i hming leh i thawhpui hming hriattîr chu thil ṭha ber a ni thei ang. Chu chuan in neitu chu kawngka hawng tûrin ngaihṭhatna a neihtîr ang. A hawn lo che a nih pawhin, i thusawi chu pâwn aṭangin i sawi zawm thei ang.
12. Mi awm lohna ina thu leh hla chhuah kan hnutchhiah dâwnin eng nge kan hriat reng ang?
12 Ina An Awm Lohvin: Apartment hotute sawisêl ngun ber pakhat chu, kan thu leh hla chhuahte hi chhuat emaw, tual emaw aṭanga an chhar a ngai ṭhîn hi a ni. Kawngka pâwna thu leh hla chhuah kan hnutchhiahte chu awlsam takin chhuatah a tla thei a, bawlhhlawhah a chang thei ṭhîn. Chuvângin, mi awm lohna ina kan thu leh hla chhuahte kan hnutchhiahin, mite hmuh theih loh tûrin kan dah tûr a ni.
13. In neitu thinur tak kan tawng a nih chuan eng nge kan tih ang?
13 In Neitu Thinurte: In neitu thinur tak, security guard koh inring reng kan tawng a nih chuan, chu mi chhâwng chu chhuahsan a, ṭum danga tlawh leh chu a ṭha ber a. A nih loh leh, manager emaw, security guard-te emaw hmachhawn loh nân chu apartment chhuahsan chu a finthlâk bawk a ni. In neitu chuan nakina tlawh nawn tawh lo tûra min hrilh loh pawhin, a in number chu tlawh loh tûrte zînga chhinchhiah a, territory card zînga dah chu a ṭha zâwk ang. Tlawh loh tûr dangte ang bawkin, in neitu chuan tlawh loh a la duh reng leh reng loh hriat nân a khât tâwka biak pawh tûr a ni.
14, 15. Apartment thu neitu chuan chhuak tûra min tih chuan eng nge kan tih ang?
14 Chhuak Tûra Tih I Nih Chuan: A partment thu neitu te, security mi leh sa te, in thawm ṭhat lam ngaihtuahtu te, a nih loh leh thu neitu dang rêng rêngin chhuak tûra an hrilh che chuan, zawm nghâl chu a finthlâk a ni. A theih phawt chuan, thu buai min awrhtîr thei leh police hial kohna thlen thei inchal tauhna pumpelh chu kan duh a ni. A tlângpuiin, apartment-a thawkte chuan Jehova Thuhretute min haw lo va, an hna an thawk mai zâwk a ni.
15 A châng chuan, apartment palai tuemawin chhuak tûra a tih che hunah, ngilnei tak leh remhre takin i va tlawh chhan i hrilhfiah thei mai thei bawk. (1 Pet. 3:15) Chu in him taka dah tûr leh a chêngte hlim taka dah tûra a mawhphurhna chu kan hriatthiampui a ni. Ani chuan chuta thu hrilh zawm chu a phal mai thei a. Mahse, rem a tih loh pawhin, hnial buai lovin chhuahsan ang che. A remchang a nih chuan, in luahtute tâna lehkha thlâkna bâwmah a khat tâwka thu leh hla chhuahte thlâk phalna i dîl thei bawk ang. (Kol. 4:6) Chutiang thilthlengte chu service overseer hriattîr zêl tûr a ni.
16. Apartment emaw, apartment tam tak din khâwmna complex emawa thu hrilhnaah harsatna kan tâwk chho zêl a nih chuan eng nge kan tih ang?
16 Hun engemawti chhûng a liam hnuah, thuchhuahtute chuan chu apartment-a thu hrilh chu an tum leh chhin thei a. Thu an hrilh thei lo a nih pawhin, phone emaw, lehkha thawn emaw hmangin in luahtute biak pawh theih chu kan tum thei a ni. In luahtute hming leh phone number chu security office aṭanga lâk theih pawh a ni thei. Lehkha thawn i ziah hunah, Benefit From Theocratic Ministry School Education tih lehkhabu phêk 71-73 naa rawtna pêkte chu zui tlat ang che. Thuchhuahtu ṭhenkhat chuan chu apartment kawtah emaw, a kiang hnaiah emaw chuan mite hna thawka an kal hun leh an haw hun, zîng lam leh tlai lamahte kawtthlêra thu hrilhna an nei a ni.
17. Engvângin nge apartment-a thu hrilh chu a pawimawh?
17 He khawvêl suaksual tâwpna chu a lo thleng ṭêp tawh a. Jehova hming lam tute chauh chu chhandamin an awm ang. “A nih leh, an rin lohva chu engtin nge an lam ang? A thu an hriat lohva chu engtin nge an rin ang?” (Rom. 10:13, 14) ‘Chatuana nun duhna rilru dik tak nei’ mi tam tak chu apartment-ahte an khawsa a. (Tirh 13:48, NW) Fing thiam tak leh remhre tak niin, an hnênah chanchin ṭha kan thlen thei a ni.