Governing Body Hnên Aṭanga Lehkha thawn
Unau Duh Takte U:
Kan Pa vâna mi Jehova chu hmangaihna chhinchhiahna ber a ni a. Chuvângin, Bible chuan: “Pathian chu hmangaihna a ni,” tiin a sawi a ni. (1 Joh. 4:8) Jehova chu Engkimtithei a ni nachungin, a Thu chuan “Pathian chu thiltihtheihna a ni,” tiin a sawi ngai lo. Ani chuan, a rorêlna chu hmangaihnaah a innghahtîr tlat a ni. Chu chuan a lamah min va hîp tak êm!
Jehova chuan a rawngbâwl tûrin min tilui lo hi a lâwmawm hle. Ani chu a thu neihna dik lo taka hmang mi a ni lo. Thinlung taka kan hmangaih vânga a rawngbâwl tûrin min duh a. Chutianga kan tih chuan, a rorêl dân chu a dikin, hmangaihna a ni tih kan rin vânga a rorêlna duh kan nihzia kan lantîr a ni. Chu chu mihring chanchin inṭan tirh aṭangin a lang nghâl a ni.
Jehova chuan, Adama leh Evi-te nupa chu a thu âwih mai tûra tihluih aiin, mahni ngeia duh thlang tûrin hun remchâng a pe a. Anni chuan Jehova hmangaihna tak tak leh an tâna a thiltihte hlutna an nei a nih chuan, Setana’n heltîr a tumna chu an do tûr a ni.
A hnuah, Mosia’n Israelte hnêna a thuchah hnuhnûng berah chuan: “Tûnah hian in hmaah nunna leh ṭhatna, thihna leh thil ṭha lo ka dah a,” tiin a sawi a. (Deut. 30:15) Mipuite chuan an nun dân tûrah zalên taka duh thlan theihna an nei a ni. Chutiang bawkin, Josua chuan Israel mite hnênah: “LALPA rawngbâwl hi ṭha lo âwm anga in hriat chuan vawiinah hian tu rawng nge in bâwl dâwn thlang mai rawh u,” tiin a sawi a. Mipuite chuan Josua hnênah: “LALPA Pathian chu kalsanin pathian dangte rawng chu kan bâwl loh tûrzia mai chu,” tiin an chhâng lêt a ni. (Jos. 24:15, 16) Chu chu tûn laia kan ngaih dân chiah a ni. Jehova kan hmangaih avângin, amah kalsan chu thil theih a ni lo.
Kristian kohhrana awm kan nih angin, zalênnain a ken telte chu kan hre chiang hle a. Upate chu zilhna leh thununna thleng pe tûra thu neihna pêk ni mah se, anni chuan midangte nun emaw, rinna emaw thunun chu an tum lo. Tirhkoh Paula chuan heti hian a ziak a ni: “In rinna chungah lalna kan nei, ka ti lo va, in lâwmna ṭanpuitu kan ni, ka ti zâwk a ni; rinnaa ding in ni si a,” tiin.—2 Kor. 1:24.
Thil engemaw chu tihluihna avânga tih aiin, tih kan duh avânga kan tih hian a lungawithlâk hle! Jehova chuan hmangaihna avânga thil ṭha ti tûrin min sâwm a. Chu mi pawimawhzia chu thlarauva thâwk khum Paula thuah a lang a ni: “Mi retheite châwm nân ka sum zawng zawng pe vek mah ila, ka taksa pawh kâng tûrin inpe mah ila, hmangaihna ka neih si loh chuan ka tân engmah a sâwt lo vang,” a tihah hian.—1 Kor. 13:3.
An thinlung zawng zawnga amah an hmangaihna avânga a rawngbâwltu kan unau maktaduai têlte hmuhna chuan Jehova thinlung a tilâwmin, ani chu a va chawimawi nasa tak êm!
Khawvêl leh khawvêl pêk chhuah mahni lungâwina tûr thilte aia Jehova hmangaihna lantîrtu, nangni naupangte leh tleirâwl zawng zawngte pawh tiamin, a rawngbâwltu zawng zawngte chu Jehova chuan a hmangaih êm êm a ni. Keini pawhin, kan hmangaih êm êm che u a ni tih ring tlat ang che u.—Lk. 12:42, 43.
Kum kalta khân unaupa te, unaunu te leh ṭhalaite chuan Jehova hmangaihna avângin chanchin ṭha theh darh nân dâr kâr 1,748,697,447 an hmang a. Hmangaihnain a chêttîr avângin, mi 77,82,346-te chu khawvêl pum huap thlawhhma rawngbâwlnaah an tel a ni. Tuia baptisma channa hmanga Jehova hnêna an inpumpêkna entîrtu mi thar 2,68,777 an awm avângin kan lâwm hle a, an zîngah ṭhalai tam tak an tel a ni. Chu mi awmzia chu, a chawhrualin chawlhkâr tin mi 5,168-in baptisma an chang tihna a ni a. Hei hian kan thinlung a va khawih tak êm!
He tâwpna hunah hian, Pathian mite chuan buaina tam tak te, harsatna te, tihduhdahna te, hrisel lohna te, leh ṭhenkhat chuan tarna te chu an hmachhawn a. Mahse, “hnungtawlh” emaw, “dawl lo” emaw chu kan tum ngai lo. In zain kan hmangaih hle a che u.—Heb. 10:39; 2 Kor. 4:16.
Inunaute,
Jehova Thuhretute Governing Body