“Naupangte U—Thlarau Lama In Thiltum Chu Eng Nge Ni?”
1 Jehova chuan hlimna nei tûr chuan hna awmze nei tak leh tihhlawhtlin theih tûr thiltum neih a ngai tih a hria a. (Genesis 1:28; 2:15, 19 en rawh.) Tûn laiah pawh, a mite hnênah thu hrilh leh zirtîrna hna a pe a ni. Paradis-a chatuana nun neih chu kan thiltum ber a ni bawk. Chu mi thleng tûra kan tha leh zung leh neih sumte hmang sual lo tûr chuan thlarau lama thiltum a tahtawl zêla kan neih chhoh a ngai a ni.—1 Kor. 9:26.
2 Naupangte Tâna Tihhlawhtlin Theih Tûr Thiltumte: Naupangte chuan an theihna ang zêlin theocratic thiltumte an nei tûr a ni a. (1 Tim. 4:15) Naupang ṭhenkhat chuan lehkha pawh an chhiar thiam hmain Bible hmingte sawi chhuak thei tûra an thiltum chu an hlen thei a ni. Chhûngkuaa zirna aṭangin naupangte chuan inkhâwm atâna inbuatsaih dân an zir a. Chutiang chuan inkhâwmnaa chhânna awmze nei tak pêk leh Theocratic Rawngbâwlna School-a tel an tumna chu an tihlawhtling thei a ni. Nu leh pate ruala thlawhhma rawngbâwlnaa an tel hian, baptisma chang lo thuchhuahtu ni thei tûra thu hrilh dân an zir a, Nu leh pate chuan an fate tân inpumpêk leh baptisma chan chu thiltumah an dahsak tûr a ni.
3 Naupan laiin Isua entawn tum rawh. Ani chuan kum 12 mi a nih lai pawhin thlarau lam thilte chu zalên takin a sawi thei a ni. (Lk. 2:42-49, 52) Mahnia zirna nei tûr te, Bible nî tina chhiar tûr te, leh Kristian inkhâwmna leh rawngbâwlnaa mi puitlingte kawm ziah ang chi mahni tâna thiltum ṭangkai takte insiamna chuan Isua anga mi dangte hnêna Pathian Ram chanchin zirtîr thiamna nei tûrin a ṭanpui ang che.