Isakan Nupui Ṭha A Nei

HE MILEMA hmeichhia hi tunge ni i hria em? A hming chu Rebeki a ni. A tawh dawn mek mipa hi Isaka a ni. A nupui a ni dawn. Engtinnge chu chu a lo nib?

E, Isaka pa Abrahama chuan a fapa tan nupui tha a duh a. Kanaan-a hmeichheho chuan pathian dik lote an biak avangin Isakan an zinga mi a neih chu a duh lo. Chuvangin Abrahama chuan a chhiahhlawh a ko va: ‘Ka laichinte chenna Harana kir a ka fapa lsaka tan nupui hmu turin ka duh che,’ a ti a.

Abrahama chhiahhlawh chuan sanghawngsei sawm a la a, khual hla tak chu a zin nghal a. Abrahama laichinte chenna hmun hnaih a thlenin tuichhunchhuahah a chawl a. Tuichhunchhuaha tui chawi tura khawpuia hmeichhiate lokal hun, chawhnu tlailam a ni. Tichuan Abrahama chhiahhlawh chu Jehova hnenah a tawngtai a: ‘Kei leh sanghawngseite tana tui chawitu hmeichhia chu Isaka nupui tura i thlan chu ni rawh se,’ tiin.

Tui chawi turin Rebeki a lo kal thuai a. Chhiahhlawhin tui a dilin a pe a. Tin a kal a, sanghawngsei tuihal zawng zawng kham khawp tui a chawi a. Sanghawngseite chuan tui tam deuh deuh an in vangin chu chu hna hahthlak tak a ni.

Chu chu Rebekin a tih zawh veleh, Abrahama chhiahhlawh chuan a pa hming a zawt a. An ina zan a riah theih dawn leh dawn loh a zawt bawk a. Ani chuan: ‘Ka pa chu Bethuela a ni a, kan hnena i thlenna turin hmun a awm,’ a ti a. Abrahama chhiahhlawh chuan Bethuela chu Abrahama unaupa Nahora fapa a ni tih a hria a. Tichuan a thingthi a, Jehovan Abrahama laichinte hnena a hruai vangin a hnenah lawmthu a sawi a.

Chumi zan chuan Abrahama chhiahhlawh chuan a lo kal chhan chu Bethuela leh Rebeki nuta Labana a hrilh a. Rebeki chu Isaka nei tura a kalpui an remti ve ve a. Amah an han zawhin Rebekin enge a sawi? ‘Aw le,’ a ti a, kal a duh a. Tichuan chumi tuk ngei chuan sanghawngsei chungah an chuang a, Kanaan ram hla taka zin tur chuan an kal ta a.

An lo thlen chuan tlailam a ni a. Rebeki chuan phula mipa kal a hmu a. lsaka a ni a, Rebeki a hmu chu a lawm a. A hma kum thum lekah a nu Sari a thi tawh a, a la lungchhe reng a. Mahse tunah chuan Isaka chuan Rebeki chu a hmangaih ta em em a, a hlim leh ta a.