Zâwlneite Chu Entawn Atân Hmang Rawh—Nahuma
1. Nahuma lehkhabu aṭangin eng nge kan zir?
1 Hmân lai Ninevi khawpui tluchhia chuan Nahuma hrilh lâwk ang ngeiin Jehova’n A hmêlmate chungah phuba a la a, hmêlma rothap ber berte pawhin Ani chu an dodâl thei lo tih a târ lang a. (Nahum. 1:2, 6) Nahuma hrilh lâwkna bih chian lehzualna chuan rawngbâwlna kawngah zir tûr min pe a ni.
2. Engtin nge kan thuchah ken chu beisei awm tak kan nihtîr theih?
2 Thlamuanna leh Beiseina Pe Rawh: Han en thuak chuan, Nahuma lehkhabu chu hmân lai Assuria khawpui chapo tak, Ninevi chunga rorêlna thu puan chhuahna ngawr ngawr niin a lang a. (Nahum. 1:1; 3:7) Mahse, he thu puan chhuahna hi Jehova mite tân chuan chanchin lâwmawm tak a ni. “Thlamuantu” tih awmze nei Nahuma tih hming chuan Judate chu an hmêlmate tihboral an ni thuai ang tih a hriattîr a ni! Chu bâkah, ani chuan Jehova chu “mangan nîa kulh nghet” a ni tih a nemnghet bawk. (Nahum. 1:7) Keini pawhin thu kan hrilh hian, chanchin ṭha kan hrilh a, mi dangte chu Jehova hnêna inhumhimna zawng tûrin kan fuih a ni.—Nahum. 1:15.
3. Engtin nge entîrna leh tehkhin thu hmanna kawngah Nahuma chu kan entawn theih?
3 Entîrna leh Tehkhin Thute Hmang Rawh: Ninevi khawpui tâwp dân tûr chu Assuria ngeiin Aigupta khawpui Thebes (No-amon) a tihboral dân nêna khaikhin tûrin Jehova chuan Nahuma chu a thâwk khum a. (Nahum. 3:8-10) Mite hnêna he khawvêl kal hmang suaksual tâwpna chungchâng kan hrilh hian, Jehova’n a thusawite chu a tifamkim vek tih finfiahna Bible hrilh lâwknate chu kan sawi lang thei a ni. Entîr nân, B.C.E. 632-a Babulon leh Media chuan Ninevi khawpui an beih khân, ruah nasa taka a sûr avângin Tigri Lui chu a liam a, tihchim theih loh tûra ngaih kulh bang nghet hmun ṭhenkhat chu a chim ta a ni. Jehova sawi lâwk ang ngei chuan Ninevi khawpui chu lâk a ni ta thuai a ni.
4. Engtin nge rawngbâwlnaah fiah tak leh hriatthiam theiha thu kan sawi theih ang?
4 Fiah Tak leh Hriatthiam Theihin Sawi Rawh: Nahuma thu ziak dân chu fiah tak leh rilru khawih thei tak a ni a. A sawi tum chu a fiah hle a ni. (Nahum. 1:14; 3:1) Chutiang bawkin, kan ṭawngkam hman chu hriatthiam awlsam tak ni se kan duh a. (1 Kor. 14:9) I tlawh hmasak ber ṭumah i tlawh chhan chiang takin hrilh ang che. Mite Bible i zirpui hian Jehova leh a Thu-ah rinna nei tûrin ṭanpui la, an thu zirte an nunpui theih dân tûr hre tûrin ṭanpui bawk ang che.—Rom 10:14.
5. Nahuma hrilh lâwknaah eng thutiam nge kan hmuh?
5 Nahuma ziak a hmingpu lehkhabuah chuan Jehova thusawite a thleng famkim tih a rinzia fiah takin a lang chhuak a. Setana kal hmang tâwpna kan hnaih rualin, Pathian thupêk thlamuanthlâk tak: “Manganna chu a thleng nawn lo vang,” tih chu kan thlamuanpui a ni.—Nahum. 1:9, New World Translation.