Naupang Tête A Hmangaih

ISUAN heta naupang te tak te a kuah hi en teh. Isuan naupang tete a ngaihsak tak tak tih i sawi thei e. A entuate hi a tirhkohte an ni. Isuan an hnenah enge a sawi i hmu chhuak ang u.

Isua leh a tirhkohte chu hla taka zin lo thleng hlim an ni a. Kawnga an kal pahin a tirhkohte chu an inhnial a. Tichuan an zin haw hnuah Isuan: ‘Kawngah khan eng thuah nge in inhnial?’ tiin anmahni a zawt a. Taktakah chuan Isuan eng thu-ah nge an inhnial tih chu a hria a. Mahse tirhkohte chuan amah an hrilh dawn nge dawn lo tih hriat nan a zawt a ni.

Kawngah chuan an zingah tunge ropui ber tih chungchangah an inhnial avangin tirhkohte chuan an chhang lo va. Tirhkoh thenkhatin mi dang aia pawimawh nih an duh a. Ropui ber nih duh chu a dik lo tih Isuan engtinnge anmahni a hrilh ang?

Naupang te tak te a ko va, an vaia hmaah a dintir a. Tin a zirtirte hnenah chuan: ‘Hei hi hre ngei ngei turin ka duh che u a ni. In lamlet a, naupang te ang in nih loh chuan, Pathian ramah in lut ngai lo vang. He naupang anga inngaitlawm apiang lalrama ropui ber a ni ang,’ a ti a. Engvanginnge Isuan chu chu a sawi i hria em?

E, naupang te tak te chuan mi dang aia ropui zawk emaw pawimawh zawk nih emaw a lungkham lo. Chuvangin tirhkohte chuan chumi kawngah chuan naupang ang nih an zirin, ropui emaw pawimawh emaw nih thu-ah an inhnial tur a ni lo.

Isuan naupang te tak tete a ngaihsakzia a tihlanna hun dang pawh a awm a. Thla tlem te hnuah mi thenkhatin Isua hmu turin an fate an rawn hruai a. Tirhkohte chuan dan an tum a. Mahse Isuan a tirhkohte chu: ‘Naupangte ka hnenah rawn kaltir rawh u, dang suh u, Pathian ram chu anmahni ang mite ta a ni si a,’ tiin a hrilh a. Tin Isuan naupangte chu a pawm a, mal a sawm a. Isuan naupang te takte a hmangaih tih hriat chu a tha a ni lawm ni?