Rawngbâwlnaah Thiamna Tihmasâwn Rawh—Magazine Kawng Neiin

A Pawimawh Chhan: Kan magazine chhiar nuam titu mi tam tak hian Bible zir chu an duh lo va. An sakhuaah an lungâwi tâwk emaw, Bible zir nân hun an nei lo emaw an ni thei ang. Mahse, kan magazine-te an chhiar ziahna aṭangin Pathian Thu châkna an nei thei a ni. (1 Pet. 2:2) Thuziak eng emaw tak chuan an thinlung a khawih thei a, a nih loh leh an dinhmunte chu a inthlâkthleng thei a ni. Rei lo tê têa tlawh ziahna chuan min nêltîrin, an tuizâwng leh an ngaihven zâwngte hre tûrin min ṭanpui thei a. A tâwpah Bible zirna kan ṭan thei mai thei a ni.

A Tih Dan Tur:

Thla tin hian, a hnênah Vênnainsâng leh Awake! chhuak thar berte pe tûrin hun duan ṭha tak insiam rawh. Chu mi thla chhûng chuan i magazine hnutchhiah aṭanga thuziak pakhat chhiar châkna neihtîr nân, a nih loh leh chu mi thlaa pêk chhuah thu leh hla chhuah dang pêk nân i va tlawh leh thei a ni. Tin, chhinchhiahna ṭha tak nei rawh.—January 2014 Kan Lalram Rawngbâwlna, p. 3-na en rawh.
I tlawh dâwn apiangin inbuatsaih rawh. Magazine chu pe tawp lovin, in neitu chu biak tum la, a tuina i chawhthawh theih nân amah nêna inbiak pawhna ṭha neih tum ang che.
Zirna ṭan theihna tûr remchâng awm apiang chu ngaihven reng rawh. Magazine i pêk ṭhin tuemawin thu pakhat chungchânga Bible sawi dân a zâwt che a nih chuan, a chhânna petu lehkhabu chu pe la, sawipui ang che. I chhuahsan hmain in thusawi nêna inkûngkaihna nei zawhna pakhat hnutchhiah la, i tlawh leh hunah chu chu sawipui rawh. Bible emaw, Bible zirna tûr lehkhabu emaw hmanga rei lo tê têa sawihona in nei thlap thlap a nih chuan Bible zirna i kaihruai tihna a ni. In neitu chu Chanchin Ṭha brochure chu i pe tawhin, chu mi hmanga Bible zirna kan neih dân tâwi têin i entîr tawh ngai em? Engvângin Nge Bible I Zir Ang? tih leh Bible Zirnaah Engte Nge Thleng Ṭhîn? tih kan video-te chu i hmuhtîr tawh em? Miin tûn hmain zirna neih chu duh lo mah se, dinhmunte chu a inthlâkthleng thei a. Zirna neihpui leh tum chu a sâwt ang em?

Tûn Thla Chhûng Hian Tichhin Rawh:

Magazine kawnga i telh theih tûrte chu chhinchhiah la. Magazine chhuak thar berte chu pein, a chhuak leh tûrte pawh i pêk leh tûr thu hrilh ang che.