Nun leh Rawngbâwlna Inzirna Lehkhabu Atâna Thu Lâk Chhuahnate
MARCH 6-12
PATHIAN THU AṬANGA RO HLUTE | JEREMIA 1-4
“Chhan Chhuak Tûr Chein I Hnênah Ka Awm”
(Jeremia 1:6) Tin, kei chuan, “E, Lalpa PATHIAN, ngai teh, thu ka sawi thiam lo, ka naupang si,” ka ti a.
Jeremia Angin Inring Rengin Awm Rawh
4 Jehova hnên ata râlvêngtu hna a dawn khân Jeremia chu kum 25 mi vêl a nih a rinawm a. (Jer. 1:1, 2) Mahse, kum lama upa tawh leh thu neihna sâng tak chelh hnam hruaitute be tûra tling lo hle nia inhriain, naupang maiah a inngai a ni. (Jer. 1:6) Ani chuan demna thu khauh tak leh rorêlna râpawm tak chanchin puan tûr a nei a, chu chu a bîk takin puithiam te, zâwlnei der te, rorêltu te, leh ‘mahni kawng ṭheuhva hawi’ a, ‘kumkhuaa hnungtawlh tûra tawlhthlute’ hnêna puan tûr a ni. (Jer. 6:13; 8:5, 6) Lal Solomona biak in ropui, kum zabi li dâwn lai biakna dik hmunpui lo ni tawh ṭhîn chu tihchhiat a ni ang a. Jerusalem leh Judai ram pawh tihṭiau a ni ang a, a chhûnga chêngte pawh sala hruai an ni bawk ang. Jeremia puan chhuah tûr thuchah chu a hmanhmawhthlâk tih a chiang hle!
(Jeremia 1:7-10) LALPA erawh chuan ka hnênah heti hian a ti a: Ka naupang, ti suh, ka tirhna che apiang hnênah i kal ang a, thu ka pêk che apiang i sawi tûr a ni. 8 Anmahni avângin hlau suh la, chhan chhuak tûr chein i hnênah ka awm e, tih hi LALPA thu chhuak a ni. 9 Tichuan, LALPA chuan a han ban a, ka kâ a khawih a, tin, LALPA chuan ka hnênah, “Ngai rawh, i kâah ka thute ka dah ta, 10 En teh, hnamte leh lal ram chungah te, pawt chhuak tûr te, ṭhiat tûr te, tichhe tûr te, paih thla tûr te, siam ṭha tûr leh din tûrin hemi nîah hian ka dah che a ni,” a ti a.
(Jeremia 1:17-19) Chuvângin puan veng la, tho la, thu ka pêk zawng zawng che chu an hnênah va sawi rawh; an hmâah zâm suh la, chutilochuan an hmâah ka tizâm ang che. 18 Ngai rawh, he mi nîah hian a ram pum puite, Juda lalte, a hotute a puithiamte leh chumi rama mi lakah chuan khawpui kulh nei leh thîr ban leh ngên bangah ka siam che hi. 19 An bei ang chia, mahse an hneh lo vang che: chhan chhuak tûr chein i hnênah ka awm si a, tih hi LALPA thu chhuak a ni.
Tu Thu Nge I Awih—Pathian Thu Nge Mihring Thu?
18 Pathian chuan zâwlnei Jeremia hnênah: “Chhan chhuak tûr chein i hnênah ka awm e,” a ti a. (Jeremia 1:8) Engtin nge Jehova’n tihduhdahna aṭangin tûn laiah min chhanchhuah theih? Gamaliela anga rorêltu thleibîk nei lote chu a awmtîr thei a. A nih loh pawhin, min dodâltu thuneitu sual tak chu mi nunnêm zâwkin rin loh takin a thlâk mai thei. Mahse, a châng chuan Jehova’n a mite chu tihduhdahna an tuar pawh a phal thei bawk a ni. (2 Timothea 3:12) Pathianin tihduhdahna kan tawrh a phal chuan, tuar chhuak thei tûrin chakna min pe reng ang. (1 Korinth 10:13) Pathianin eng pawh lo phal sela, a tâwpa a rah chhuah tûr chu kan ringhlel lo: Pathian mite dotute chuan Pathian an do va, Pathian dotute chuan an hneh ngai dâwn lo, tih chu.
jr-E 88 ¶14-15
“Mi Chaute Chu Ka Titlai Ta A”
MI CHAUTE CHU I TIHARH ANG EM?
14 Jeremia tihchaka a awm leh “mi chaute” a tihchak dân hi kan ngaihtuah tûr a ni. (Jer. 31:25) Zâwlnei hian a bîk takin Jehova hnên ata chakna a hmu a. Jehova’n: ‘Khawpui kulh neiah ka siam ang che . . . An bei ang chia, mahse an hneh lo vang che: chhan chhuak tûr chein i hnênah ka awm si a, tih hi LALPA thu chhuak a ni,’ tia a hrilh che i hriat chuan i phûr dân tûr chu han ngaihtuah teh. (Jer. 1:18, 19) Chhan ṭha tak avângin Jeremia’n Jehova chu, “ka chakna leh ka kulhpui, mangan nîa ka inhumhimna,” tiin a sawi a ni.—Jer. 16:19.
15 Jehova’n Jeremia hnênah: “I hnênah ka awm si a,” a tih hi chhinchhiah tlâk tak a ni. Tuemawin fuih a ngai tih i hriat chuan i tih theih ṭhenkhat i hria em? Kristian unaupa emaw, unaunu emaw, a nih loh leh chhûngkhat laina emawin chutianga fuihna a mamawh tih hriat chu thu hran a ni a, chutianga an mamawh phuhrûksak chu thu dang a ni. Dinhmun hrang hrangah, Jeremia tâna Pathian tih ang tih chu a ṭha ber ṭhîn a—chu chu mi retheite awmpui hi a ni. A châng chuang, thusawi zung zung aiin fuihna thute sawi chu a ṭha zâwk a. Mi tinghet tûra ngun taka thusawi a nih chuan ṭawngkam tlêmtê pawh ni se a ṭha zâwk a ni. Ṭawngkam thiam tak i nih kher a ngai lo. I ngaihvenzia, i tawrhpuizia leh Kristian hmangaihna i neihzia lantîrtu ṭawngkam tluangtlam tak takte hmang rawh. Chutiang ṭawngkamte chuan nghawng ṭha tak a nei thei a ni.—Thufingte 25:11 chhiar rawh.
Thlarau Lam Lunghlute Laih Chhuahna
(Jeremia 2:13) Ka miten thil pahnih an tisual si, kei, nunna tuikhur hi mi kalsan a, tuikhuah an ker a, tuikhuah khi, tui tling thei lo tûr chu.
(Jeremia 2:18) Nile tuite in tûra Aigupta kawng i zawh hi, eng nge i tân hlâwk dâwn ni? Luipui tui in tûra Assuria kawng i zawh pawh hi, eng nge i tân hlâwk dâwn ni?
Jeremia Bu Aṭanga Thu Pawimawh Hrilhfiahna
2:13, 18. Israel rinawm lote chuan thil sual pahnih an ti a ni. Malsâwmtu, kaihruaitu, leh chhanhimtu bul ber Jehova chu an kalsan a. Tin, Aigupta leh Assuria sipaite nêna ṭan rual dân zawngin, entîr nei mahni tuikhuah chu an ker a. Tûn laiah pawh, mihring finna leh ngaih dân leh khawvêl politic-te duhzâwk avânga Pathian dik kalsan chu, “nunna tuikhur” chu “tuikhuah khi, tui tling thei lo” nêna thlâkthlengna a ni.
(Jeremia 4:10) Tin, kei chuan, “A, Lalpa PATHIAN, he mite leh Jerusalem hi nasa takin i bum a nih hi, muanna in nei ang,’ i ti a, khandaihin nunna a chhun tâk zâwk si hi,” ka ti a.
Jeremia Bu Aṭanga Thu Pawimawh Hrilhfiahna
4:10; 15:18—Eng kawngin nge Jehova’n hel hmang a mite chu a bum? Jeremia hun lai chuan, ‘dâwt thu hril’ zâwlneite an awm a. (Jeremia 5:31; 20:6; 23:16, 17, 25-28, 32) Jehova chuan thuchah dik lo an puanchhuah chu a dang lo a ni.
Bible Chhiar
(Jeremia 4:1-10) “Aw Israel, i lamlêt chuan, ka hnênah ngei i lo lêt tûr a ni,” tih hi LALPA thu chhuak a ni. “I tenawmnate ka mithmuh lohva i dah bova, 2 Tihtakzeta, thurêl dik tak hmanga, fel taka, LALPA a nuna a nun chhûng chu, tia chhia i chham chuan, hnamte chu amahah chuan engthâwl an inti ang a, amah chu an chhuang tawh ang,” 3 Juda mite leh Jerusalem hnênah LALPA in Pathian chuan heti hian a ti e: In lei khêk chu let ula, hlîng zîngahte chi theh suh u. 4 Nangni Judai rama mi leh Jerusalema chêngte u, LALPA tân in serh tan ula, in thinlung serh tan rawh u, chutilochu in thil sual tihte avângin, ka thinurna chu mei angin a chhuak ang a, tuma ṭhelh theih lohvin a kâng dah ang e. 5 Judai ramah hril ula, Jerusalemah puang rawh u, ram pumah chuan tawtawrâwt hâm ula, ring takin au rawh u. “Rawn inkhâwm ula, kulh nei khawpuiahte i lût ang u,” ti r’u. 6 Zion lamah puanzâr khai ula, hlimna zawngin tlân ula, muang suh u, hmâr ata thil ṭha lo ka rawn thlen dâwn, chhiatna nasa tak mai chu. 7 Ngaw hnuai pik ata sakeibaknei a chhuak e, hnamte tichhetu tûr chu; a hmun ata a chhuak ta, a lo kal mêk e, i ram tiṭiau tûr leh, i khawpuite chêngtu nei lo khawpa tiram tûrin. 8 Chumi avâng chuan saiip puan fêng ula, ṭap ula, chiau vawng vawng rawh u; kan laka LALPA thinurna nasa tak mai chu a la kiang si lo va. 9 “Chumi nîah chuan heti hi a lo ni ang,” tih hi LALPA thu chhuak a ni: “Lal thinlung a zâm zo vang a, hotute thinlung pawh; puithiamte chu an hrilhai ang a, zâwlneite chuan mak an ti êm êm ang.” 10 Tin, kei chuan, “A, Lalpa PATHIAN, he mite leh Jerusalem hi nasa takin i bum a nih hi, muanna in nei ang,’ i ti a, khandaihin nunna a chhun tâk zâwk si hi,” ka ti a.
MARCH 13-19
PATHIAN THU AṬANGA RO HLUTE | JEREMIA 5-7
“Pathian Duhzâwng Tih Chu An Bânsan”
(Jeremia 6:13-15) A tê ber aṭangin a lian ber thleng pawhin mi tin duhâmnain an khat si a; zâwlneite leh puithiamte meuh pawh, mi tin hlemhle takin an che a ni. 14 Ka mite hliamte chu, ngaihsam takin, “A ṭha alâwm, a ṭha alâwm,” tiin an thawi a, a ṭha hauh si lova. 15 Thil tenawm an tih pawhin an zak em ni? Hnai lo ve, an zak tawp lo va, an hmai pawh a sen hek lo: chuvângin tlute zîngah chuan an tlu ve ang: anni ka hrem hunah chuan paihthlâkin an awm ang, LALPAN a ti.
w88-E 4/1 11-12 ¶7-8
Jeremia—Pathian Rorêlna Puangtu Zâwlnei Lâr Lo Tak
7 “An bei ang chia, mahse an hneh lo vang che” tiin Jehova’n a vaukhân a. (Jeremia 1:19) Engvângin nge Judate leh an hruaitute chuan he zâwlnei hi beih an duh? A thusawi chuan lungawi tâwk an intihna leh an biakna a sawichhiat vâng a ni. Jeremia chuan pehhêl deuh hlekin: “Ngai teh, LALPA thu chu an tân thil hmuhsitawm a ni a, lâwmna rêng an nei ta lo. A tê ber aṭangin a lian ber thleng pawhin mi tin duhâmnain an khat si a; [nungchang leh thlarau lam hlutna nei tûra kaihruai tûr] zâwlneite leh puithiamte meuh pawh, mi tin hlemhle takin an che a ni,” tiin a sawi a ni.—Jeremia 6:10, 13.
8 Anni hian hnamte chu inthawina hlân tûrin an kaihruai a. Biakna dik thiltihahte chuan an tel ve a; mahse, thinlung tak erawhin an ti lo. Rilru dik taka tih aiin tih ṭhin dân pângngai ang maiin an ti a ni. Chutihrualin, Juda sakhaw hruaitute chuan mite chu, “A ṭha alâwm, a ṭha alâwm” tiin thil ṭha lo pui chu ṭha angin an rintîr a ni. (Jeremia 6:14; 8:11) Ni e, mite chu Pathian nêna inrem nia ring tûrin an tihder a. Jehova chhan chhuah hnam an ni a, khawpui thianghlim leh biak in an neih avângin lungngaih tûr engmah awm lovin an ngai a ni. Mahse, Jehova’n chutiang chuan a thlîr em?
(Jeremia 7:1-7) LALPA hnên ata Jeremia hnêna thu lo thleng chu: 2 LALPA in kawngkâah chuan ding la, chutah chuan he thu hi puang la, heti hian ti rawh: ‘Nangni Juda mi zawng zawng, LALPA be tûra hêng kawngkâa lûtte chuan LALPA thu hi ngaithla rawh u.’ 3 Sipaihote LALPA chuan heti hian a ti: in awm dân leh in thiltihte chu siam ṭha ula, he hmunah hian ka chêntîr ang che u. 4 ‘Hei hi LALPA in, LALPA in, LALPA in a nih hi,’ tih dâwt thute hi ring suh u. 5 In awm dân leh in thiltihte chu in siam ṭhat tak meuhva, mi leh a ṭhenawm kâra thu dik taka in rêlsak a, 6 hnam dang mite, pa nei lote, hmeithaite in hnehchhiah lohva, he hmunah hian mi fel thisen in chhuah lohva, in ṭhat lohna tûra pathian dangte in ûm hek loh chuan, 7 he ram, hmâsâng ata in thlahtute hnêna ka pêkah hian kumkhuain ka chêntîr ang che u.
w88-E 4/1 12 ¶9-10
Jeremia—Pathian Rorêlna Puangtu Zâwlnei Lâr Lo Tak
9 Jehova’n Jeremia chu biak in kawngkâa mipui hmuha va ding a, biak ina lûtte hnênah A thuchah hrilh tûrin thu a pe a. Heti hian a hrilh a ni: “‘Hei hi LALPA in, LALPA in, LALPA in a nih hi,’ tih dâwt thute hi ring suh u! . . . Dâwt thu, sâwtna awm hlei lo chu,” tiin. Juda mite chuan an biak in an chapopui rualin rinnain an kal lova, hmuh theihin an kal zâwk a ni. Hêng Jehova vaukhânna thu: “Vân ka ṭhutphah a ni a, lei ka ke nghahchhan a ni: in eng ang nge mi saksak ang?” tih hi an theihnghilh tawh a ni. Lei leh vâna Lal Chungnungber Jehova chu biak in eng anga ropui pawh ni se, chutiangah chuan a chêng lo!—Jeremia 7:1-8; Isaia 66:1.
10 Jeremia chuan tlâng hriata a thusawi chu heti hian a sawi zawm a: “Rûkruin, tualthatin, uirêin, dâwta chhia chhamin Baal hnênah rimtui hâlin, pathian dang, in hriat ngai lohte ûmin, . . . hêng thil tenawm zawng zawngte hi ti zêl chungin, ‘Chhan chhuah ka ni ta,’ in ti dâwn em ni?” tiin. Pathian hnam thlan Juda mite chuan biak inah inthawinate an hlan chhûng chuan eng ang nungchang pawh nei se Pathianin a ngaihdam an ring a. Mahse, Pathian chu hmangaihna nei tak pain fa neihchhun leh duat sual a thlêm anga an ngai a nih chuan na taka tihharh an tâwk ngei ang.—Jeremia 7:9, 10; Exodus 19:5, 6.
(Jeremia 7:8-15) Ngai rawh u, dâwt thu, sâwtna awm hlei lo chu in ring zâwk a. 9 Rûkruin, tualthatin, uirêin, dâwta chhia chhamin Baal hnênah rimtui hâlin, pathian dang, in hriat ngai lohte ûmin, 10 tin, he in, keima hming ngei vuahah hian ka hmâah lo dingin, hêng thil tenawm zawng zawngte hi ti zêl chungin, “Chhan chhuah ka ni ta,” in ti dâwn em ni? 11 He in, ka hming ngei vuah hi, in mithmuhah suamhmangte pûk ang em ni? Ngai teh u, kei, keimah ngei hian ka hmu alâwm, tih hi LALPA thu chhuak a ni. 12 Atîra ka hming ka chêntîrna, ka hmun Silo-ah chuan kal teh u, ka mi Israel suahsualna avânga ka thiltih chu va en rawh u. 13 Tûnah hian hêng thil zawng zawngte in tih a, zîng tak taka thova in hnêna thu ka sawi ka sawite hi in ngaihthlâk lohva, ka lam che ua, in chhân loh avâng hian. 14 Silo chunga ka tih ang khân he in, ka hming vuah, nangmahni leh in thlahtute hnêna ka hmun pêk, in rin ṭhin chungah hian ka ti dâwn a ni. 15 In unau zawng zawng, Ephraim chi pum pui meuh pawh ka paih chhuak ang khân ka mithmuh ata ka paih chhuak ang che u, tih hi LALPA thu chhuak a ni.
jr-E 21 ¶12
“Ni Hnuhnûnga” Rawngbâwlna
12 Jehoiakima lal ṭan tirh laiin, Jehova’n Jeremia chu biak ina va kal tûr leh Judate an suahsualna avânga va dem tûrin a hrilh a. Jehova biak in chu anmahni humhim theituah an ngai a. ‘Rûkrûk te, tualthah te, uirê te, dâwta chhechhama Baal hnêna rimtui hâl te, pathian dang, an hriat ngai loh ûmte’ an bânsan loh chuan Jehova’n a biak in chu a kalsan ang. Puithiam Lal Elia hun laia Silo-a awm biak bûk a kalsan ang khân a dera amah chibaibûktute chungah pawh chutiang chuan a ti ang. Juda ram chu “a ṭiau dâwn si a.” (Jer. 7:1-15, 34; 26:1-6) Jeremia’n chu thuchah sawi tûrin huaisenna a neih a ngaih dân tûr chu ngaihtuah rawh! Mi langsârte leh mi hmingthangte hmaah pawh chutiang chuan a tih ngei a rinawm. Tûn laia unaunu leh unaupate pawhin kawtthlêra thu hrilhnaa tel tûrin, a nih loh leh mi hausa leh mi liante hnêna thu va sawi tûrin huaisenna engemaw chen an neih a ngai a. Chuvângin, hei hi kan ring thei a ni: Pathianin Jeremia a ṭanpui ang bawkin keini pawh min ṭanpui ngei ang tih hi.—Heb. 10:39; 13:6.
Thlarau Lam Lunghlute Laih Chhuahna
(Jeremia 6:16) LALPA chuan heti hian a ti: Kalkawngahte ding ula, en rawh u, kawng ṭha awmna kawng hlunte chu zâwt rawh u, tah chuan kal ula, in thlarau tân chawlhna in hmu ang; anni erawh chuan, “Tah chuan kan kal lo vang,” an ti a.
Pathian Nên I Lêng Dûn Ang Em?
11 Pathian Thu chu chutiang takin kan inkaihhruaitîr tak tak em? A châng chânga tih tak zeta mahni inenfiah chu a manhla a ni. Chutianga ti tûra min ṭanpuitu tûr Bible châng pakhat chauh han ngaihtuah teh: “LALPA chuan heti hian a ti: Kalkawngahte ding ula, en rawh u, kawng ṭha awmna kawng hlunte chu zâwt rawh u, tah chuan kal ula, in thlarau tân chawlhna in hmu ang,” tih chu. (Jeremia 6:16) Hêng thute hian kawng ṭhuama châwla a pan lam tûr zâwt khual zin mi chu min hriat chhuahtîr thei a. Thlarau lam thila sawi chuan Israel rama hel hmang Jehova mite chuan chutiang bawka an tih chu a ngai a ni. Anni chuan “kawng hlunte” an zawn a ngai a. Chu “kawng ṭha” chu Israel hnamin âtthlâk taka a pênsan tâk, an pi leh pu mi rinawmte lo zawh tâk kawng hi a ni. Lungchhiatthlâk takin, Israel chuan he Jehova hriattîrna duhawm tak hi luhlul takin a chhâng lêt a. Châng ngai bawk chuan, heti hian a sawi zawm a ni: “‘Tah chuan kan kal lo vang,’ an ti a,” tiin. Mahse, tûn laia Pathian mite’n chu zilhna an chhân lêt dân chu a dang daih thung a ni.
(Jeremia 6:22, 23) Tin LALPA chuan heti hian a ti: Ngai rawh u, hmar lam ram ata mite an lo kal e, lei hmun tâwp ata hnam ropui tak mai an lo thawk chhuak e. 23 Thal ngul leh fei an keng a, nunrâwng tak, zahngaihna rêng rêng nei lo an ni, an thâwm chu tuipui ri hum hum ang a ni a; sakawr chungahte an chuang a, mi tin râltu mi anga inthuamin, aw, zion fanu, an rawn bei dâwn a che.
w88-E 4/1 13 ¶15
Jeremia—Pathian Rorêlna Puangtu Zâwlnei Lâr Lo Tak
Juda Chuan Man A Pe
15 B.C.E. 632 bâwr vêl khân, Assuria chuan Kaldai leh Medes a hneh a, tichuan Aigupta chuan Juda chhim lamah thu a nei vak tawh lo a ni. Juda tâna thil hlauhawm ber chu hmâr lam rûntute hnên aṭangin a lo thleng ang. Chuvângin, Jeremia chuan a unau Juda mite chu chanchin ṭha lo a hrilh a ngai a! “Ngai rawh u, hmar lam ram ata mite an lo kal e . . . nunrâwng tak, zahngaihna rêng rêng nei lo an ni. . . . mi tin, râltu mi anga inthuamin, Aw, zion fanu, an rawn bei dâwn a che,” tih thu hi. Chutih hun laia khawvêl thuneitu ding lai chu Babulon a ni a. Ani chu rinna nei lo Juda hrem nâna Pathian hmanrua a ni.—Jeremia 6:22, 23; 25:8, 9.
Bible Chhiar
(Jeremiah 5:26–6:5) Ka mite zîngah mi suaksual an awm si a, sava vehtuin a chân angin an châng reng a, thang an kam a, mite an âwk a. 27 Bâwm savaa khat ang maiin, an inte chu bumnain a khat a, chuvângin an lo lian a, an hausak phah ta a. 28 An lo thau va, an lo hnûm a, a ni, an suahsualna thiltihte chuan chin tâwk a nei lo, pa nei lote hmuingîlna tûrin an lamah an ṭang lo va. 29 Hêng thil avângte hian ka hrem lo vang em ni? tih hi LALPA thu chhuak a ni: hetiang hnam chungah hian ka nunna chuan phuba a la dâwn lo vem ni? 30 Chu ramah chuan thil mak tak leh râpthlâk tak a lo awm ta; 31 Zâwlneite chuan dâwt thu an hril a, puithiamte chuan an thu thuin ro an rêl a, ka mite chuan chutiang tih chu an duh a ni. A tâwpah chuan engtin nge in tih tâk ang le?
6 Benjamina fate u, Jerusalem chhûng ata in himna tûrin tlân bo ula; Tekoa-ah tawtawrâwt hâm ula Beth-hakkermah hriattîrna chhuah rawh u. Hmâr lam ata chhiatna a lo thawk e, tihchhiatna nasa tak mai chu. 2 Zion fanu hmel ṭha tak leh no tak chu ka tibo vang. 3 Berâmpute, an berâm rualte nên a hnên an lo thleng ang a, a vêlah an puan inte an kaih ang a, mahni hmun ṭheuhvah an tla ang. 4 Amah do tûrin inpuahchah rawh u, tho ula, chhûn laiah i bei ang u, kan tân a va pawi em! nî a lo her ta a, tlai lamhlim a lo sâng ta. 5 Tho ula, zânah i bei mai ang u khai! A in ṭha ṭhate i tichhia ang u.
MARCH 20-26
PATHIAN THU AṬANGA RO HLUTE | JEREMIA 8-11
“Mihringte Chuan Jehova Kaihhruaina Nên Chauh Hlawhtlinna An Nei Thei”
(Jeremia 10:2-5) 2 LALPA chuan heti hian a ti: hnamte awm dân zir suh la, vâna chhinchhiahnate vângin zâm hek suh u; 3 Mite dânte chu engmah lo mai a ni si a, ramhnuaiah thing an kit a, hreipuia mi themthiam kutin an chei a, 4 Tangkarua leh rangkachakin an cheia, a chêt loh nân thîrkilhna leh tubohvin an kilh a. 5 Leipuia sava hlauh tûr milim mai an ni a. An ṭawng thei lo. Mahniin an kal theih loh avângin, put sawn an ngai ṭhîn; anni chu hlau suh u, thil chhia an tithei lo va, thil ṭha an tithei hek lo.
(Jeremia 10:14, 15) 14 Mi tin an mawl a, hriatna an nei lo, rangkachak chhertu pawhin a lem chher chu a zahpui a. A milim chhûn chu dâwt mai a ni si, anmahniah thaw pawh a awm lo. 15 Engmah lo mai an ni, bumna hna mai, an hremna hunah an bo mai ang.
it-1-E 555
Fanghma
Fanghma chînna hmunahte chuan lungphun te, thing tlâwn te, leh chutiang thil ang chite chu an dah ṭhîn a, zâwlnei Jeremia’n “leipuia sava hlauh tûr” chûng nunna nei lote chu milem bia hnam dang mite siam milim nên a khaikhin a ni.—Jer. 10:5.
(Jeremia 10:6, 7) Aw LALPA, nang ang tumah an awm lo ve, i ropui a, i hming chaknain a thang lian e. 7 Aw hnamte lal, tuin nge ṭih lo vang che? Chu chu i phu reng si a. Hnamte mi fing zawng zawng zîngah te, an ram rêng rêng zîngah pawh, nang ang rêng an awm lo ve.
(Jeremia 10:10-13) LALPA erawh chu Pathian tak a ni, Pathian nung chatuana Lal a ni e, a thinurin lei a nghîng a, hnamten a thinrimna an tuar lo. 11 An hnênah hetiang hian inti tûr a ni: Pathiante, lei leh vân siamtu ni hlei lote chu lei ata an boral ang a, vân hnuai aṭangin an bo vek ang. 12 A thiltihtheihnain lei a siam a, a finnain khawvêl a din a, a remhriatnain vân a tiparh a. 13 A aw a chhuah chuan, vânah tui a ri hum hum a, kâwlkil ata chhûm a chhohtîr a, ruah sûr nân kâwl a phêttîr a, a robâwm ata thli a tlehtîr a.
Tûn Laiah Tute’n Nge Pathian Chawimawi?
10 Vân lamah khian i mit i lên chho emaw, he leia thil siamte i en kual vêl emaw pawh ni se, Siamtu a awm tih chu a chiang a ni. (Jeremia 10:12) Vân lam thil siamte thusawi chu lâwm takin kan pawm ve tûr a ni: “Nang, kan Lalpa leh kan Pathian, ropuina te, chawimawina te, thiltihtheihna te chu hmu tlâk i ni e; nangin engkim i siam . . . si a,” tih chu. (Thu Puan 4:10, 11) Mahse, scientist tam takte chuan an tisa mita hmuin, thil siamte chu mak ti hlawm hle mah se, ‘an thinlung mitin’ Siamtu a awm tih finfiahna chu an hmuh hmaih a ni. (Ephesi 1:18) Hetiang hian entîrna kan pe thei ang: Thil siam mawi dân leh pian hmangte ngaisâng hle si a, a Siamtu Ropui hnâwl chu lem ziak ṭha tak ngaisâng taka thlîr hnua lem ziaktu a awm tih hnâwl ang tlukin thil inâwm lo tak a ni. Chuvângin, Pathian awm ring lotute chuan ‘chhuanlam tûr rêng an nei lo’ pawh hi a mak lo ve!
(Jeremia 10:21-23) Berâm vêngtute chu an mâwl a, LALPA râwn nachâng an hre lo; chuvâng chuan an hmuingîl lo, an berâm rualte an darh zo. 22 Ngai rawh u, thâwm chu a lo thleng, hmâr lam ata buaina ropui tak mai, Juda khawpuite tiṭiauvin, Sihal chênna hmuna chantîr tûrin. 23 Aw LALPA, mihring awm dân chu, mahni thu mai a ni lo tih ka hre ta: tungchhova kal mihringah hian, a pheikhai hruai tûr a awm lo.
w15-E 9/1 15 ¶1
Pathian Chungah I Beidawng Em?
Tûn lai khawvêl dinhmun hrehawm tak hian mihringte inawpna hi a hlawhchham tih chiang takin a târ lang a. Khawvêl sawrkârte chuan remna te, muanna te, hlimna te a thlen theih loh mai bâkah, leilung hi an tichhe zâwk mah a ni. Hei hian Bible thu: “Tungchhova kal mihringah hian, a pheikhai hruai tûr a awm lo,” tih a dikzia a nemnghet a ni. (Jeremia 10:23) Pathian awpna chauhvin remna tluantling, hlimna, leh mihringte hlawhtlinna a thlen thei, chu chu Pathian thiltum a ni si a.—Isaia 45:18.
Thlarau Lam Lunghlute Laih Chhuahna
(Jeremia 9:24) A chhuang apiang erawh chuan hei hi chhuang rawh se, kei LALPA hi, ngilneihna te, rêldikna te, felna leia hmang ṭhîntu chu ka ni tih mi hriat a, a hriat thiamna chu; hêng thilte hi ka lawmzâwng a ni si, tih hi LALPA thu chhuak a ni.
Jehova Hnaih Zel Rawh
16 Thil dikte chapopui, a nih loh leh chhuan chu thil ṭha tak a ni thei a. Entîr nân, Jehova Thuhretu kan ni chu engtik lai pawhin kan chhuang tûr a ni. (Jer. 9:24) A âwm tâwka mahni inzahderna chuan thutlûkna ṭha siam tûr leh nungchang lama tehna kan neihte tihniam lo tûrin min pui ang. Mahse, kan thil thlîr dân emaw, kan dinhmun emaw dah sân lutukna chuan Jehova min hlattîr thei a ni.—Sâm 138:6; Rom 12:3.
(Jeremia 11:10) An thlahtu, ka thu ngaithla duh lotute khawlohna lamah chuan an lêt leh a; pathian dangte rawng bâwl tûrin an kal a: Israel chhûngte leh Juda chhûngte chuan an thlahtute hnêna ka thuthlung siam chu an bawhchhe ta.
Jeremia Bu Aṭanga Thu Pawimawh Hrilhfiahna
3:11-22; 11:10-12, 17—B.C.E 740-ah Samari chu a tlâwm tawh chung pawhin, engvângin nge Jeremia chuan a thu puanchhuahah hmâr lam hnam sâwm lalram chu a telh? B.C.E. 607-a Jerusalem tihchhiatna chu Judai ram chauh ni lo, Israel hnam pum pui chunga Jehova rorêlna lantîrna a nih vâng a ni. (Ezekiela 9:9, 10) Hnam sâwm lalram a tlûk chhiat hnua Pathian zâwlneite tun din lehna thuchah kenah Israelte an la telna chuan, Jerusalem-in Judai ram mai ni lovin, hnam sâwm Israel lalram ai pawh a la awh zêl a ni tih a târ lang.
Bible Chhiar
(Jeremia 11:6-16) Tin, LALPA chuan ka hnênah, “Juda khawpuiahte leh Jerusalem khawlaiahte hêng thu zawng zawng hi puang la, ‘He thuthlung thute hi ngaithla ula, zâwm rawh u. 7 In thlahtute Aigupta ram ata ka hruai chhuah nî ata tûn thlengin ka ṭawngka chhuak âwih rawh u,’ tiin ka hriattîr ṭhîn a. 8 Mahse an âwih lo va, beng an dawh hek lo, mi tin, mahni thinlung sual ang zêlin an awm ta zâwk a. Chuvângin hêng thuthlung thu, ti tûra thu ka pêk, an tih loh zawng zawng hi an chungah ka rawn thlen ta a ni,” a ti a. 9 Tin, LALPA chuan ka hnênah, “Juda mite leh Jerusalema chêngte zîngah phiarrûkna a awm. 10 An thlahtu, ka thu ngaithla duh lotute khawlohna lamah chuan an lêt leh a; pathian dangte rawng bâwl tûrin an kal a: Israel chhûngte leh Juda chhûngte chuan an thlahtute hnêna ka thuthlung siam chu an bawhchhe ta. 11 Chuvângin LALPA chuan heti hian a ti: Ngai teh u, an chungah thil ṭha lo, an pumpelh tawp loh tûr chu ka rawn thlen ang; mi au vang a, mahse ka chhâng lo vang. 12 Tin, Juda khawpuite leh Jerusalema chêngte chuan pathian, an hnêna rimtui an hâlna ṭhinte chu an au vang a, mahse an buai hunah chuan chûng chuan an chhanhim tawp lo vang. 13 Aw Juda, i pathiante chu i khawpui zât an ni si: thil zahthlâk tak, Baala hnêna rimtui hâlna tûr maichâm meuh pawh Jerusalem kawtthlêr zât ngawtin in lo din ta a. 14 Chuvângin hêngte hi ṭawngṭaisak suh la, an tân dîlna emaw aw emaw chhuah hek suh; an buai huna mi auh chu ka ngaihthla dâwn si lo va. 15 Thil tenawm tak ti chungin, ka duh tak chuan ka inah pual eng nge a neih? Thu intiam te leh sa serh chuan in chhiatna tûr a pumpelhtîr thei ang che u em ni? In chhuang thei em ni? 16 LALPA chuan i hmingah, Oliv thing hring, rah ṭha mawi pui, a ti chia, ri huau huauin a chungah mei a chhêm a, a zârte pawh a tliak zo ta.
MARCH 27–APRIL 2
PATHIAN THU AṬANGA RO HLUTE | JEREMIA 12-16
“Israel Mite’n Jehova An Theihnghilh”
(Jeremia 13:1-5) LALPA chuan ka hnênah heti hian a ti a: Hrênpuan zai sîn lei la, tihuh lovin hrêng rawh. 2 Tichuan LALPA thu ang zêlin hrên chu ka lei a, ka hrêng ta a. 3 Tin, LALPA thu chu ka hnênah a lo thleng leh a, 4 Hrênpuan i lei, i hrên kha la la, tho la, Epuhrates lui pan la, chuta lung keh kârah chuan thukru rawh, tiin. 5 Tichuan LALPA thu mi pêk angin ka kal a, Euphrates lui bulah chuan ka thukru ta a.
jr-E 51 ¶17
Thinlung Bumhmang Chu Vêngṭha Rawh
17 Jeremia chanvoah chuan Pathian kaihhruaina zawm a tel a. Jeremia ni ta la, eng kaihhruaina pawh i zâwm ang em? Ṭumkhat chu, Jehova’n Jeremia chu hrênpuan la a, hrêng tûrin a hrilh a. A hnuah, Pathianin Euphrates luia kal tûrin thu a pe leh a. Mâp i en chuan, chu zin kawng chu mêl 300 (km 500) vêl a ni tih i hmu ang. Chumi hmun a thlen chuan, Jeremia’n a hrênpuan chu lung keh kârah a thukru ang a, tichuan Jerusalemah a kîr leh dâwn a ni. A hnuah Pathianin chu hrênpuan va la tûrin a tîr leh a. (Jeremia 13:1-9 chhiar rawh.) Jeremia zin kawng zawng zawng chu, mêl 1,200 (km 1,900) vêl a ni. Bible sawisêltute chuan a thla têla kêa kal ngai chutianga hla chu a zin an ring thei lo va. (Ezr. 7:9) Mahse, Jeremia chuan Pathian sawi ang chiah chiahin a ti a ni.
(Jeremia 13:6, 7) Tin, ni tam tak hnuah chuan LALPAN ka hnênah, Tho la, Euphrates lui pan la, hrênpuan ka thuhrûktîr che kha la chhuak rawh, a ti a. 7 Tichuan Euphrates lui lamah chuan ka kal ta a, ka han hai a, hrênpuan chu ka thuhrûkna ata ka han phawrh chhuak a. Ngai teh, hrênpuan chu a lo mawih vek a; eng atân mah a tlâktlai ta lo.
jr-E 52 ¶18
Thinlung Bumhmang Chu Vêngṭha Rawh
18 Zâwlnei chu Juda tlânga zin kawng bumboh takahte kêa a kal hnuah a zin kawng azira thlalêrte kal tlangin Euphrates lui a pan lai chu han mitthla teh. Hrênpuan thukru tûr maia kal a ni! Rei tak a zin bo avângin a ṭhenawmte chuan a chachin hriat an châk ngei ang. A haw leh chuan, hrênpuan chu a hâwn tawh lo. A hnuah, Pathianin Jeremia chu “eng atân maha tlâktlai ta lo” hrênpuan mawih va la leh tûrin zin kawng thui tak chu a zawhtîr leh a. ‘A lutuk mah mah. Awmzia a nei pawn ka hre lo ve,’ tia ngaihtuah a awlsam dân tûrzia chu han ngaihtuah teh. Pathian zirtîrna a pawm avângin chutiang chuan a chhâng lêt lo. Sawisêl aiin, Pathian kaihhruaina ang thlapin a tizâwk a ni!
(Jeremia 13:8-11) Tin, LALPA thu chu ka hnênah a lo thleng a: 9 LALPA chuan heti hian a ti: Hetiang bawk hian Juda chapopui leh Jerusalem chhuantawlawl chu ka tichhe dâwn a ni. 10 He hnam sual, ka thute ngaithla duh lova, anmahni rilru ngawltâwt zai zuia pathian dangte rawng bâwl leh be tûra ûm zâwktute hi he hrênpuan, eng atân maha tlâktlai lo ang hi an ni ang. 11 Hrênpuan chu mi kâwnga a bet reng ang hian, Israel chhûngkaw pum pui leh juda chhûngkaw pum pui hi, ka mite leh ka hmingthanna leh ka mawina leh ka ropuina an lo nih theih nân, ka hnêna bet reng tûra ka siam an ni si a; mahse, an bengkhawn lo.
jr-E 52 ¶19-20
Thinlung Bumhmang Chu Vêngṭha Rawh
19 Zin kawng vawi hnihna a kal hnu chauhvah Pathianin thil awm dân chu a hrilhfiah a ni. Jeremia thiltih chuan thuchah pawimawh tak: “He hnam sual, ka thute ngaithla duh lova, anmahni rilru ngawltâwt zai zuia pathian dangte rawng bâwl leh be tûra ûm zâwktute hi he hrênpuan, eng atân maha tlâktlai lo ang hi an ni ang,” tih thu sawi tûrin a buatsaih a ni. (Jer. 13:10) Jehova’n a mite a zirtîr dânah nghawng ṭha tak a va ni êm! Jeremia’n thil tê tham ang maia langah pawh Jehova thu a âwih tlatna hi Pathianin a mite nghawng nei taka a zirtîrnaah entîrna pawimawh tak a ni.—Jer. 13:11.
20 Tûn lai Kristiante chu Pathian zirtîrna dawng tûrin mêl za tam tak kal tûra phût an ni lo va. Mahse, i zawh mêk Kristian nung kawng avângin i vêngte chuan mak an ti chein, an sawisêl che em? Chûngah chuan i thawmhnaw hâk dân leh inchei dân te, zirna i thlan dân te, eizawnna i thlan dân te, leh zu in chungchânga i thlîr dânte a tel a ni. Jeremia ang bawkin Pathian kaihhruaina zawm i tum tlat ang em? Pathian i inzirtîr avânga i duh thlannate chuan thu hrilhna ṭha tak a thlen thei ang. Eng pawh ni se, Bible-a kan hmuh Jehova kaihhruaina zawmna leh bâwih rinawm fing takte hmanga pêk kaihhruaina zawmna chu chatuana i ṭhatna tûr a ni. Thinlung bumhmang kaihhruaia awm ai chuan Jeremia ang i ni thei. Chuvângin, Pathian zirtîrna chu pawm tlat la, chatuana hman theih, chawimawi tlâk bêl ni tûrin amah insiamṭhattîr ang che.
it-1-E 1121 ¶2
Kâwng
Jehova chuan Israel leh Juda chhûngkuate chu atâna mawina leh ropuina an nih theih nân a kâwnga hrênpuan anga sawiin, anni chu a lamah a bei nghehtîr tlat a. (Jer. 13:11) Isua Krista chu felna taihrên leh rinawmna kâwnghrên hrêng chunga rorêl nia sawi lâwk a ni a. Hei hian Isua Krista’n a thiltihtheihna zawng zawng chu felna leh rinawmna nên a hmang reng tih a târ lang a ni. Ṭanpuina petu hrênpuan angin, he felna mizia hian Isua chu Jehova ruat Rorêltu anga thil ti reng tûrin a tichak a ni.—Is. 11:1, 5.
Thlarau Lam Lunghlute Laih Chhuahna
(Jeremia 12:1, 2) Aw LALPA, i hnênah ka phunnawi pawhin, nang zawng i dik ṭhîn; mahse ka vuina thu chu ka sawi tho dâwn engati nge mi suaksualte kawng chu a hmuingîl ṭhin ni? Engati nge bumhmang tawh phawtte chu nuamsa taka an awm ṭhîn le? 2 Anni chu i phun a, a ni, zung an kai ta a, an ṭhang a, a ni, rah an chhuah ta; an hmuiah chuan i hnai a, an chhûngrilah zawng i hla si.
(Jeremia 12:14) Ka mi Israelte hnêna roluah tûra ka pêk khawih chhetu, ka ṭhenawm sualte zawng zawng chungchângah chuan LALPA chuan hetiangin a ti: “Ngai rawh u, an ram ata ka pawt chhuak ang a, an zîng ata Juda chhûngte ka phawi chhuak ang.
jr-E 118 ¶11
“Jehova Chu Khawiah Nge A Awm?” Tiin Nî Tin I Zâwt Ṭhîn Em?
11 Jeremia chuan mi suaksualte an hlawhtling a hmuhin zawhna khirh tak zawh tûr a nei a. (Jeremia 12:1, 3 chhiar rawh.) Jehova felna chu ringhlel lo mah se, a ‘phunnawina’ chhânna chu hriat a duh a ni. Naupang leh a hmangaih tak pain inzawmna nghet an nei angin, tlang taka a thusawi chuan Pathian nên inzawmna nghet tak an nei tih a tichiang hle a ni. Juda mi tam takte an sual hle chunga an hlawhtlin chhan chu Jeremia’n a hre thiam lo mai a ni. Jeremia chuan chhânna lungâwithlâk tak a hmu em? Jehova’n a hnênah mi suaksuakte chu A phawi chhuak ang tih a tiam a. (Jer. 12:14) Jeremia’n a tâwpa thil thleng tûr a hriat chuan Pathian hnênah a ṭawngṭai a, Pathian rorêl dikna a rinna chu a nghet zual sauh a ni. Chuvângin, Jeremia chu a Pa, Pathian hnênah a ṭawngṭai zual sauh ngei ang.
(Jeremia 15:17) Nuamsip bâwltuteho zîngah ka tel lo va, ka hlimpui hek lo; nangma kut vângin a fâlin ka ṭhu a, lungnih lohnain mi tikhat si a.
Jeremia Angin Huaisen Rawh
Ṭhian Kawmah I Fîmkhur Ang U
16 Jeremia chuan huaisen tûra ṭanpuitu thil dang pawh a sawi lang a. Ani chuan: “Nuamsip bâwltuteho zîngah ka tel lo va, ka hlimpui hek lo; nangma kut avângin a fâlin ka ṭhu a, lungnih lohnain mi tikhat si a,” a ti a ni. (Jeremia 15:17) Jeremia chuan ṭhian sualte tihkhawloha awm ai chuan, mahni chauhva awm fâl chu a duh zâwk a. Tûn laiah pawh chutiang chuan kan thlang zâwk a ni. Tirhkoh Paula vaukhânna “ṭhian sualte chuan nungchang ṭha an tikhawlo ṭhîn” tih hi kan theihnghilh ngai lo, chûng chuan kum tam tak aṭanga kan neih tawh nungchang ṭhate pawh a tikhawlo ṭhîn a ni.—1 Korinth 15:33.
Bible Chhiar
(Jeremia 13:15-27) Ngaithla ula, beng dawh rawh u; Chapo suh u, LALPA chuan thu a thlah tawh a ni. 16 LALPA in Pathian chu chawimawi ula, thimna a thlentîr hmâa thimhlim tlâng chungahte in kê a phêt hmâ hian, eng in beisei lai takin thimah a chantîr a, thim chhah takah a siam dâwn a ni. 17 Mahse in ngaihthlâk loh chuan in chapona avângin fianrialah ka ṭap ka ṭap ang; ka mittui pawh nasa takin a luang reng ang, LALPA berâm rual chu sala kaih an nih avângin. 18 Lal leh a nu hnênah te chuan, ṭhu hniam rawh u, in lukhumte a tla ta si, in lallukhum ropui ngei chu, ti rawh. 19 Chhim khawpuite chu a ping zo ve, tuma hawn rual lohvin; Juda zawng zawng salah an tâng, a pum puiin an tâng zo ve. 20 In mit lên ula en rawh u, hmâr lam ata lo thawkte saw berâm rual i neih kha khawnge, i berâm rual duhawm tak kha? 21 Nangman ṭhiana i siamte kha i chunga an dah hun chuan engtin nge i tih ang? Hmeichhe nau vei ang mai hian nâ i ti hle dâwn lâwm ni? 22 Eng vângin nge hêng hi ka chungah a lo thlen? I ti rilru a nih chuan, i khawlohna avâng asin ni? I fênfual hlîm a niha i saruak a lan ni. 23 Ethiopia mi hângin a vun a tidanglamin keitêin a zia a thup thei em ni? Chuti a nih chuan nangni thil sual tih chîng ṭhînte pawhin thil ṭha in tithei ang chu! 24 Thlalêr thlîin buh sî a lên ang maiin anmahni ka tidarh ang. 25 Hei hi i chanvo, i puala ka ruatsak che chu a ni, mi theihnghilh a, dâwt i rinchhan avângin, tih hi LALPA thu chhuak a ni. 26 Tichuan keimah ngeiin i fênfual chu i hmai khuh hialin ka hlîmsak ang chia, i zahmawh a lang ang. 27 Tâmlaka tlângah te i uirenate, i hur au thâwmte, i inphalrai nasatziate, chûng i thiltih tenawmte chu ka hmu ta. Aw Jerusalem, i chung a pik e! Tihthianghlim i nih hmâ chu eng chen nge ni dâwn?