Nun leh Rawngbâwlna Inzirna Lehkhabu Atâna Thu Lâk Chhuahnate
JANUARY 7-13
PATHIAN THU AṬANGA RO HLUTE | TIRHKOHTE 21-22
“Jehova Thu Thu Ni Rawh Se”
(Tirhkohte 21:8-12) tin, atûkah chuan kan chhuak a, Kaisari khua kan thleng a; tin, Chanchin Ṭha hriltu Philipa inah kan lût a, ani chu pasarihte zînga pakhat a ni a, a hnênah kan châm a. 9 Chu mi chuan fanu pali a nei a, nula thianghlim an ni a, Pathian thu an hril ṭhîn a. 10 Tin, chutah chuan ni tam tak kan châm a, chu mi lai chuan Judai ram ata a hming Agaba zâwlnei pakhat a lo chhuk a. 11 Tin, kan hnênah a lo kal a, Paula kawnghrên a la a, a kete, a kutte amahin a inphuar a, tin, “‘Jerusalem khuaa Judate chuan hetiang hian he kâwnghrên neitu hi an phuar ang a, Jentailte kutah an pe bawk ang,’ thlarau thianghlimin a ti e,” a ti a. 12 Tin, chûng thu chu kan hriat veleh keini leh chu mi khuaa mite chuan Paula chu Jerusalem khuaa han kal lo tûrin kan ngên chiam a.
bt-E 177-178 ¶15-16
“Jehova Thu Thu Ni Rawh Se”
15 Philipa ina Paula a thlen laiin, mikhual zahawm tak dang pakhat Agaba chu a lo thleng a. Philipa ina awmte chuan Agaba chu zâwlnei a ni tih an hria a; ani chuan Klaudia lal laiin ṭâm nasa tak a thleng dâwn tih a sawi lâwk a ni. (Tirh. 11:27, 28) Anni chuan: ‘Engvângin nge Agaba hi a lo kal ni? Eng thuchah nge a rawn ken?’ tiin an ngaihtuah mai thei a. An en reng laiin, ani chuan Paula kawnghrên chu a la a—chu kawnghrên chu puan sei tak a ni a, pawisa leh thil dangte fun theih niin taia hrên ṭhin a ni. Chu kawnghrên chuan, Agaba’n a kete, a kutte chu amahin a inphuar a. Tichuan, thu a sawi ta a ni. A thuchah sawi pawimawh tak chu: “Jerusalem khuaa Judate chuan hetiang hian he kâwnghrên neitu hi an phuar ang a, Jentailte kutah an pe bawk ang, thlarau thianghlimin a ti e,” tih hi a ni.—Tirh. 21:11.
16 Chu hrilh lâwkna chuan Paula chu Jerusalemah a kal dâwn tih a tichiang a. Chuta awm Juda mite a cheibâwl dân avângin ani chu “Jentailte kutah” pêkin a awm ang tih a târ lang bawk. Chu hrilh lâwkna chuan chuta awmte chungah nghawng nasa tak a nei a. Luka chuan: “Chûng thu chu kan hriat veleh keini leh chu mi khuaa mite chuan Paula chu Jerusalem khuaa han kal lo tûrin kan ngên chiam a. Tin, Paula chuan a chhâng a, ‘Eng in ti nge ni, in ṭah in ṭah a, ka lung in tihchhiat? Lalpa Isua hming avâng chuan Jerusalem khuaa phuar chang ka huam lova, thih pawh ka huam asin,’” tiin a ziak a ni.—Tirh. 21:12, 13.
(Tirhkohte 21:13) Tin, Paula chuan a chhâng a, “Eng in ti nge ni, in ṭah in ṭah a, ka lung in tihchhiat? Lalpa Isua hming avâng chuan Jerusalem khuaa phuar chang ka huam lova, thih pawh ka huam asin,” a ti a.
bt-E 178 ¶17
“Jehova Thu Thu Ni Rawh Se”
17 He thilthleng hi han mitthla teh. Luka pawh telin, unaute chuan Paula chu kal lo tûrin an ngên a. Ṭhenkhat chu an ṭap a. A chungah hmangaihna an lantîr tih a hriat avângin Paula chuan a ‘lung an tihchhiat’ thu, a nih loh leh Girk ṭawng letlingtu ṭhenkhat sawi dânin anni chuan “[a] rilru an tihhrehawm,” thu ngilnei takin a hrilh a ni. Engpawh ni se, thu tlûkna a siam nghet tawh a, Turi khuaa unaute a hmuh laia thilthleng ang khân, an ngênna emaw, an mittui emaw avângin a tumna chu a sawhsawn chuang lo. Chu aiin, an hnênah a kal a ngaih chhan a hrilhfiah zâwk a ni. Huaisenna leh tum ruhna a va lantîr chiang em! A hun hmaa lo nung tawh Isua angin, Paula chuan Jerusalema kal chu a tum nghet tlat a. (Heb. 12:1-2) Ani chuan martara thih chu a tum lo va; mahse, chutiang thil a thleng a nih pawhin, Krista Isua hnungzuitu nia thih chu chawimawina angin a ngai a ni.
(Tirhkohte 21:14) Tin, thlêm rual a nih loh ahnu chuan, “Lalpa thu thu ni rawh se,” kan ti a, kan bâng ta a.
bt–E 178 ¶18
“Jehova Thu Thu Ni Rawh Se”
18 Engtin nge unaute’n an chhân lêt? Tawitêa sawi chuan, zah takin. Heti hian kan chhiar a ni: “Thlêm rual a nih loh ahnu chuan, ‘Lalpa thu thu ni rawh se,’ kan ti a, kan bâng ta a,” tiin. (Tirh. 21:14) Jerusalema Paula kal lo tûra hmin tumtute chuan an duh dân anga tihluihtîr an tum lo va. Ṭang bur lovin, Paula sawi chu an zâwm a, Jehova duh zâwng anga tih chu an tân harsa mah se, chu chu an hre thiam a, an pawm a ni. Paula chuan a tâwpa a thihna thlentu tûr kawng chu a zawh ta a. Amah hmangaihtute’n kal lo tûrin thlêm lo se chuan, Paula tân a awlsam zâwk ngei ang.
Thlarau Lam Lunghlute Laih Chhuahna
(Tirhkohte 21:23, 24) Chuvângin i hnêna kan sawi ang hian ti ang che: Thutiam nei mipa pali kan hnênah an awm; 24 chûng mite chu hruai la, an hnênah inthian fai ve la, an lu an meh theih nân an tân sum sêng rawh; chutichuan mi zawng zawngin mi kaa i thu an hriat apiang kha, tih tak a ni lo tih an hria ang a, nangmah ngei pawh Dân zawhin fel takin i awm ve zâwk tih an hre dâwn nia.
bt–E 184-185 ¶10-12
‘Ka Thiamna Thu Hi Ngaithla Rawh U’
10 Nimahsela, Paula chuan Chawlhnia hna thawh loh leh ei leh in ṭhenkhat ei loh ang chi Juda hnam dân ṭhenkhat zuitute chungah hriatthiamna a lantîr a. (Rom 14:1-6) Serhtan chungchângah dân a siam hek lo. Dik tak chuan, Paula chuan Timothea chu a pa Girk mi a nih avângin Juda mite’n an rinhlelh loh nân serh a tantîr a ni. (Tirh. 16:3) Serhtan leh tan loh chu mi mal thu tlûkna siam tûr a ni a. Paula chuan Galatia mite hnênah: “Serh tan engmah a sâwt lo, serh tan loh pawh engmah a sâwt hek lo; rinna, hmangaihnaa thawh erawh chu a sâwt a ni,” tiin a hrilh a ni. (Gal. 5:6) Mahse, Dân hnuaia awm duh vâng emaw, Jehova pawm hlawh duh vâng emawa serhtan a nih chuan rinna tlâkchhamna a ni ang.
11 Chuvângin, Paula chanchin thuthangte chu dik lo mah se, chûng thuthangte avângin Juda ringtute chu an rilru a la buai reng a. Chumi avâng chuan, kum upa deuhte chuan, Paula hnênah he kaihhruaina hi an pe a ni: “Thutiam nei mipa pali kan hnênah an awm; chûng mite chu hruai la, an hnênah inthian fai ve la, an lu an meh theih nân an tân sum sêng rawh; chutichuan mi zawng zawngin mi kaa i thu an hriat apiang kha, tih tak a ni lo tih an hria ang a, nangmah ngei pawh Dân zawhin fel takin i awm ve zâwk tih an hre dâwn nia,” tiin.—Tirh. 21:23, 24.
12 Paula chuan an buaina ber chu a chanchin thuthang dik lo ni lovin, Juda ringtute’n Mosia Dânah ṭhahnem an ngaih lutuk avâng zâwk a ni tiin a hnial thei a. Mahse, ani chuan Pathian thu bulte a kalh loh phawt chuan, insiamrem a duh a ni. Chu mi hma lawk chuan: “Dân hnuaia awmte ka lâk luh theihna tûrin Dân hnuaia awmte hnênah Dân hnuaia awm angin ka awm ṭhîn,” tiin a ziak a. (1 Kor. 9:20) Hemi ṭumah hian, Paula chu Jerusalema upate nên thawk dûnin, “Dân hnuaia awm angin,” a awm a ni. Chutiang chuan, kohhran upate nêna thawkho tûr leh mahni duh dân chauhva thil ti lo tûrin tûn laiah kan tân entawn tûr ṭha a siam a ni.—Heb. 13:17.
(Tirhkohte 22:16) Tin, engati nge i la awm reng le? Tho la, ama hming lam chungin baptisma chang la, i sualte tlêngfai ta che,’ mi ti a.
Tirh. 22:16 ṭanchhan nwtsty study note
ama hming lam . . . la, i sualte tlêngfai ta che: A nih loh leh, “i sualte tlêngfai la, ama hming lam rawh.” Mi chu tuia baptisma a chan avâng ni lovin, Isua hming a lam avâng zâwka a sualte tlênfai a ni ang. Chutah chuan Isua a rinna leh Kristian rawngbâwlna hmanga a rinna târ lanna a tel a ni.—Tirh. 10:43; Jak. 2:14, 18.
Bible Chhiar
(Tirhkohte 21:1-19) Tin, anni nên chuan kan inṭhen a, lawngin kan chhuak a, chu mi hnuah chuan ngîl takin Koi thliarkâr kan thleng a, tin, atûkah Rodi thliarkâr kan thleng leh a, chuta ṭangin kan kal zêl a, Patara khua kan thleng a; 2 tin, Phoiniki rama kai tûr lawng pakhat kan hmu a, kan chuang a, kan kal ta zêl a. 3 Tin, Kupra thliarkâr kan hmu a, vei lam chhawnin kan pêl a, Suria ram lamah kan kal zêl a, Turi khuaah chuan khawmualah kan chhuak ta rih a; chutah chuan lawnga bungrua thiar chhuah tûr a ni a. 4 Tin, zirtîrhote kan zawng chhuak a, chutah chuan ni sarih kan châm a; tin, anni chuan Thlarau hrilhin, Paula hnênah Jerusalem khua tlawh loh tûr an ti a. 5 Nimahsela chûng ni zawhah chuan kan chhuak a, kan kal ta a, unaute chuan an zain, an nupui fanaute nên daipâwn thlengin min thlah a; tin, tuifinriat kamah chuan kan ṭhingṭhi a, kan ṭawngṭai a. 6 Tin, “Dam takin,” kan inti a, lawngah chuan kan chuang a; anni erawh chu an inah an haw leh ta a. 7 Tin, Turi khua ata lawnga kan kal zawh chuan Ptolemai khua kan thleng a, unaute chibai kan bûk a, an hnênah ni khat kan châm a. 8 tin, atûkah chuan kan chhuak a, Kaisari khua kan thleng a; tin, Chanchin Ṭha hriltu Philipa inah kan lût a, ani chu pasarihte zînga pakhat a ni a, a hnênah kan châm a. 9 Chu mi chuan fanu pali a nei a, nula thianghlim an ni a, Pathian thu an hril ṭhîn a. 10 Tin, chutah chuan ni tam tak kan châm a, chu mi lai chuan Judai ram ata a hming Agaba zâwlnei pakhat a lo chhuk a. 11 Tin, kan hnênah a lo kal a, Paula kawnghrên a la a, a kete, a kutte amahin a inphuar a, tin, “‘Jerusalem khuaa Judate chuan hetiang hian he kâwnghrên neitu hi an phuar ang a, Jentailte kutah an pe bawk ang,’ thlarau thianghlimin a ti e,” a ti a. 12 Tin, chûng thu chu kan hriat veleh keini leh chu mi khuaa mite chuan Paula chu Jerusalem khuaa han kal lo tûrin kan ngên chiam a. 13 Tin, Paula chuan a chhâng a, “Eng in ti nge ni, in ṭah in ṭah a, ka lung in tihchhiat? Lalpa Isua hming avâng chuan Jerusalem khuaa phuar chang ka huam lova, thih pawh ka huam asin,” a ti a. 14 Tin, thlêm rual a nih loh ahnu chuan, “Lalpa thu thu ni rawh se,” kan ti a, kan bâng ta a. 15 Tin, chu mi hnuah chuan kan bungrua kan siam a, Jerusalem khuaah kan han kal a. 16 Kaisari khuaa mi zirtîrho tute emaw kan hnênah an kal ve a, anni chuan a hming Mnasona, zirtîr hmasa pâwl, Kupra thliarkâra mi pakhat kan thlen in pa tûr chu an hruai ve a. 17 Tin, Jerusalem khua kan thlen chuan unauten hlim takin min lo lâwm a. 18 Atûkah chuan Paula hovin Jakoba hnênah kan lût a; chutah chuan kohhran upate zawng zawng pawh an awm a. 19 Tin, Paulan anmahni chibai a bûk zawhin, a rawngbâwlna hmanga Pathianin Jentailte zînga thil a tihtîr apiang chu akip akawiin a sawi a.
JANUARY 14-20
PATHIAN THU AṬANGA RO HLUTE | TIRHKOHTE 23-24
“Huatthlala Tak leh Chawk Buaitu Anga Hêkna”
(Tirhkohte 23:12) Tin, nî a chhuahin Judate an ṭangrual a, Paula an thah hma loh zawng engmah eia bâr lo tûrin chhia an inchham a.
(Tirhkohte 23:16) Nimahsela, Paula farnua fapain an chân thu chu a lo hria a, kulhbîngah chuan a va lût a, Paula chu a va hrilh a.
bt–E 191 ¶5-6
“Huai Takin Awm Rawh!”
5 Paula chuan a hun takah fuihna a pe a. A tûkah, Juda mi 40 chuangte chu “an ṭangrual a, Paula an thah hma loh zawng engmah eia bâr lo tûrin chhia an inchham a.” He “inphiar rûkna chhechham” hian chûng Juda mite’n tirhkoh Paula tihhlum an tumzia a târ lang a ni. An phiar rûk anga a kal tluan loh chuan, a tâwpah, an chungah anchhia, a nih loh leh thil ṭha lo a thleng ang tih an ring a. (Tirh. 23:12-15) Puithiam lalte leh upate phalnain, Paula chu Sanhedrin-a hruai kîr leh a, a chungchâng thua thil ṭhenkhat hriat chian nân zawhnate zawh belh an tum a ni. Mahse, phiarrutute chuan Paula chu man a, tihhlum a nih theih nân kal kawngah an lo chang ang.
6 Mahse, Paula tupain chu phiar rûkna chu a lo hria a, Paula chu a va hrilh a. Tichuan, Paula’n chu thu chu Rom sipai hotu lal ber Klaudia Lusiana hnêna hrilh tûrin tlangvâl pakhat a tîr a ni. (Tirh. 23:16-22) Jehova chuan hming târ lan loh, Paula tupa anga mahni ṭhatna aia Pathian mite ṭhatna atâna huaisen taka thil ti a, Lalram hmasâwn nâna an tihtheih apiang rinawm taka titu ṭhalaite chu a hmangaih tih a chiang hle.
(Tirhkohte 24:2) Tin, Paula chu an koh chhuah hnu chuan Tertulla chuan amah a hêk ṭan a: “Felik ṭha ber, nangmaha zârah thlamuang êm êmin kan awm avâng leh, i enkawl avânga he chite tân hian sualte khap ṭhatin a awm ṭhin avângin,
(Tirhkohte 24:5, 6) He mi hi mi huatthlala tak, khawvêla Judateho zawng zawng chawk buaitu leh Nazaret mite pâwla an tupa ber pakhat a nih kan hria a; 6 Pathian biak in tihbawlhhlawh a tum bawk a; chuvângin kan man a.
bt–E 192 ¶10
“Huai Takin Awm Rawh!”
10 Paula chu Jerusalem aṭanga amah hêktute an lo thlen hma chu Kaisari khuaa “Heroda inah vên” a ni a. (Tirh. 23:35) Ni nga a liam hnuah, Puithiam Lal Anania, thusawi thiam Tertulla, leh upa tute emaw chu an lo thleng ta a. Tertulla chuan Felika chu Juda mite tâna a thiltihsak avângin a fak hmasa a, chu chu a duhsakna dawn a duh avânga fakder mai tih a chiang a ni. Tichuan, chu mi chungchâng thuah Terlulla chuan Paula chu “mi huatthlala tak, khawvêla Judateho zawng zawng chawk buaitu leh Nazaret mite pâwla an tupa ber pakhat a nih kan hria a; Pathian biak in tihbawlhhlawh a tum bawk a; chuvângin kan man a,” tiin a puh a ni. Juda mi dangte pawhin “‘chûng thu chu chutiang chu a ni,’ tiin an ṭanpui ve a.” (Tirh. 24:5, 6, 9) Sawrkâr laka helna, pâwl hlauhawm tak kaihhruaina leh biak in tihbawlhhlawhnate chu tihhlum theih hial khawpa hêkna pawi tak a ni.
(Tirhkohte 24:10-21) Tin, Ram Awptu chuan thu sawi tûra Paula chu kuta a zah veleh Paula chuan, “Nang kum tam tak he chite rorêlsaktu hi i nih ka hriat avângin lâwm takin ka thiamna thu ka sawi dâwn hi. 11 Jerusalem khuaah Pathian be tûrin ka han kal achin chu ni sâwm leh ni hnih lo liam a la ni lo vang tih i la hre thei ang; 12 Pathian biak inah pawh, inkhâwmna inahte pawh, khuaah pawh tumah ka hnial leh mipui ka fuihpawrh annin mi hmu hek lo; 13 tûnah pawh an mi hêkna thu hi i hriatah a bul an chhui chhuak thei hek lo vang. 14 Nimahsela he thu hi i hnênah ka inpuang ang, ‘pawl hrang’ an tih Kawng dân angin min thlahtute Pathian ka be ṭhîn. Dân leh Zâwlneite Lehkhabua ziak zawng zawng ringin; 15 tin, mi felte leh fel lote thawhlehna a awm ang tih Pathian lamah ka beisei a, hênghote pawh hian chûng chu an âwih ve bawk si a; 16 chu mi avâng chuan Pathian hnên lamah leh mihring hnênah pawh rilru sual lo mawlh hi vawn fo ka tum ṭhîn. 17 Tin, kum tam tak hnuah hian ka chipuite hnênah thilpêk tûr leh sa talh tûr rawn kengin ka lo kal a; 18 tin, chûng thil ka pêk lai chuan mipui tel lovin, bengchheng lovin, Pathian biak inah thianghlimin mi hmu a. 19 Nimahsela chutah chuan Asia rama mi Juda tute emaw an awm kha, chûngte chuan ka chungah thu an neih chuan hetah hian i hmaa awmin mi hêk tûr a ni. 20 A nih loh leh, hêng mite ngei hian rorêltute hmaa ka din lai khân, ka tihsual engnge an hmuh sawi rawh se, 21 he thu kamkhat avâng hian a nih nghâl loh chuan, an zînga dingin, ‘Mitthi thawhlehna thu-ah vawiinah hian in hmaah chhuahchhalhin ka awm a nih hi,’ ka tih kha,” a ti a, a chhâng a.
bt-E 193-194 ¶13-14
“Huai Takin Awm Rawh!”
13 Kan biakna avânga sawrkâr thuneitute hmaa hruai kan nih a, helna chawkchhuaktute, sawrkâr pawi sawitute, leh ‘pâwl hlauhawm tak’ zînga mi tia dik lo taka hêk kan nih hunah Paula’n kan zui tûr entawn tûr ṭha a siam a ni. Paula chuan Tertulla’n fak derna thu a sawi angin, ram awptu chu a tlawn lo va. Chu aiin, dam tak leh zah takin a awm zâwk a ni. A thiamthu chu fiah tak leh dik takin a sawi a. Paula chuan biak in tibawlhhlawhtu nia amah puhtu “Asia rama mi Juda tute emaw” chu hetah an awm loh thu leh, chûng mite chu hmachhawna an hêknate ngaithla tûr a nih thu a sawi a ni.—Tirh. 24:18, 19.
14 Paula chuan a rinna chungchâng hriattîr lova a awm lo chu chhinchhiah tlâk tak a ni. Tirhkoh Paula chuan Sanhedrin hmaa a awm laiin, buaina awmtîrtu thawhlehna chungchânga rinna a neihzia huaisen takin a sawi a. (Tirh. 23:6-10) A thiamthu a sawinaah, thawhleh beiseina chu a sawi uar a ni. Engvângin nge? Paula chuan amah dodâltute pawm loh tûr Isua leh a thawhlehna thute a hriattîr vâng a ni. (Tirh. 26:6-8, 22, 23) Inhnialna a awm chhan ber chu thawhlehna chungchâng a ni a—chiang lehzuala sawi chuan, Isua leh a thawhlehna rinna chungchâng a ni.
Thlarau Lam Lunghlute Laih Chhuahna
(Tirhkohte 23:6) Tin, Paulan a ṭhen Saddukaite, a ṭhen Pharisaite an ni tih a lo hriatin rorêltute zîngah chuan a au va, “Unaute u, Pharisai ka ni, Pharisai fapa pawh ka ni; mitthi thawhleh beiseina thu-ah chhuahchhâlin ka awm a nih hi,” a ti a.
Tirh. 23:6 ṭanchhan nwtsty study note
Pharisai ka ni: A thungaithlatute zînga ṭhenkhat chuan Paula chu an hria a. (Tirh. 22:5) Pharisai fapa pawh ka ni tia insawiin, anmahni nên inang khat nia a pawm thu an hre thiam ngei ang. Sanhedrin zînga Pharisaite chuan Paula chu Kristian ṭhahnemngai tak a ni tih an hriat avângin, dik lo takin a insawi lo tih an hria a ni. Mahse, heta Paula’n Pharisai ka ni a tih hi kawng dang pawha hriatthiam theih a ni; Paula chuan Saddukai inti lovin, Pharisai a intih chhan chu thawhlehna chungchânga Pharisaite rinna a ṭawmpui tih a sawi duh vâng a ni. Chutianga sawiin, chuta awm Pharisaite nên inremna a siam a. Paula chuan buaina awmtîr theitu thute târ langin, Sanhedrin zînga mi ṭhenkhatin a hnialna thu chu an hriatthiampui ang tih a beisei a, tichuan, a tum chu a hlawhtling reng a ni. (Tirh. 23:7-9) Tirhkohte 23:6-a chhinchhiah Paula thusawi hi a hnua Lal Agrippa hmaa a thiamthu sawi dân nên a inmil a ni. (Tirh. 26:5) Rom khua aṭanga Philippi khuaa Kristiante hnêna lehkha a ziah khân, Paula chuan Pharisai a nih thu a sawi leh a. (Phil. 3:5) Tûn hmaa Pharisai lo ni tawh ṭhîn Kristian dangte pawh Tirhkohte 15:5-a târ lan an ni hi chhinchhiah tlâk tak a ni.—Tirh. 15:5 study note en rawh.
(Tirhkohte 24:24) Tin, ni eng zât emaw chinah Felika chu a lo kal leh a, a nupui Drusilli, Juda hmeichhia nên, Paula chu a kohtîr a, Krista Isua rinna thu chu a ngaithla a.
(Tirhkohte 24:27) Nimahsela kum hnih a vei hnuin Porkia Festan Felika chu a thlâk ta a; tin, Felika chuan Judate zîngah hmingṭhat a duh a, Paula chu phuar sain a hnutchhiah ta a.
Tirh. 24:24 ṭanchhan nwtsty study note
Drusilli: He nu hi Tirhkohte 12:1-a târ lan Heroda, chu mi chu Herod Agrippa I-na, fanu pathumna leh naupang ber a ni a. Ani chu C.E. 38 vêla piang a ni a, Agrippa II-na leh Berniki te farnu a ni. (Tirh. 25:13 study note leh Thu Har Hrilhfiahna, “Heroda” tih chu en rawh) Ram awptu Felika chu a pasal pahnihna a ni a. Drusilli chuan a hmasain Emesa khawpuia awm Suria Lal Azizus a nei a, a ṭhen a, tichuan, C.E. 54 vêl, a nih loh leh kum 16 vêl a nihin Felika a nei leh a ni. Ani chu Paula’n Felika hmaah “felna thu te, insûm thute, rorêlna lo la awm tûr thute,” a sawi laiin a awm ve a ni ngei ang. (Tirh. 24:25) Felika aiah Festana a lal chuan, ani chuan “Judate zîngah hmingṭhat a duh” avângin Paula chu lung in a tantîr a, mi ṭhenkhat chuan chutianga a ti chu Juda mi a nupui tleirâwl tak a tihlâwm duh vâng niin an ring a ni.—Tirh. 24:27.
Bible Chhiar
(Tirhkohte 23:1-15) Tin, Paula chuan rorêltute chu a en reng a, “Unaute u, vawiin thlengin Pathian mithmuha ṭha lama ka hriat apiang tiin ka awm ṭhîn e,” a ti a. 2 Tin, puithiam Lalber Anania chuan Paula kianga dingte hnênah a kaa bensak tûr a ti a. 3 Tin, Paula chuan a hnênah, “Nang lung pal hnawih vârpa, Pathianin a bêng zâwk ang che; nang, Dân anga mi ngaihtuah tûrin i ṭhu a, Dân lo anga mi ben tûr i ti vei a ni maw?” a ti a. 4 Tin, a kianga miten, “Pathian Puithiam Lalber i hau vei maw?” an ti a. 5 Tin, Paulan, “Unuate u, Puithiam Lalber a ni tih ka hre lo a ni; ‘I chipuite hotu chungah thu ṭha lo sawi suh,’ tih pawh ziak a ni si a,” a ti a. 6 Tin, Paulan a ṭhen Saddukaite, a ṭhen Pharisaite an ni tih a lo hriatin rorêltute zîngah chuan a au va, “Unaute u, Pharisai ka ni, Pharisai fapa pawh ka ni; mitthi thawhleh beiseina thu-ah chhuahchhâlin ka awm a nih hi,” a ti a. 7 Tin, chu chu a sawi zawh chuan Pharisaite leh Saddukaite an lo inhnial a, rorêltute chu an inkhing ta a. 8 (Saddukaihoten, “Mitthi thawhlehna rêng a awm lo, vântirhkohte, thlaraute pawh a awm hek lo,” an ti ṭhîn; Pharisaihote erawh chuan chu mi kawng pahnih chu a awm tih an âwih si a) 9 Tichuan nasa takin an buai ta a; Pharisaite lama mi lehkhaziaktute ṭhenkhat an ding a, an hnial a, “He mi hi engmah a sualna kan hre lo ve; thlarau pawhin vântirhkoh pawhin ani hi bia pawh ni sela, engnge pawi ang?” an ti a. 10 Tin, an inhnial nasat deuh deuh avângin sipai hotu lal ber chuan Paula an pawh sawm a hlau va, sipaite hnênah, zuk kala an zîng ata kulhbînga han hruai chho lui tûrin a ti a. 11 Tin, azânah chuan Lalpa chu Paula kiangah a ding a, “Thlamuang takin awm rawh, Jerusalem khuaa ka thu i hriattîr ang bawk hian Rom khuaah pawh i hriattîr tûr a ni,” a ti a. 12 Tin, nî a chhuahin Judate an ṭangrual a, Paula an thah hma loh zawng engmah eia bâr lo tûrin chhia an inchham a. 13 Chu mi thu phiartute chu sawmli aia tam an ni. 14 Tin, anni chu puithiam lalte leh upate hnênah an kal a, “Paula kan thah hma loh zawng engmah tem lo tûrin chhia kan chham ta vek a ni. 15 Chuvângin nangnin, rorêltute nên a thu fel lehzuala ngaihtuah tum angin, in hnêna hruai thla tûrin sipai hotu lal ber hnênah pehhêl deuhvin han sawi rawh u; in kiang hnai a thlen hma pawhin, keini amah that tûrin kan inpeih reng e,” an ti a.
JANUARY 21-27
PATHIAN THU AṬANGA RO HLUTE | TIRHKOHTE 25-26
“Paula Chuan Kaisara Hnêna A Thlen Hnuah Lal Herod Agrippa Thu A Hrilh”
(Tirhkohte 25:11) Mi sual ka nih a, thihna khawp meuh thil ti ka nih chuan thih pawh ka hnial lo ve; nimahsela hêngho mi hêkna thil hi abul engmah a awm loh chuan tumahin an hnênah mi pe thei lo vang. Kaisara hnênah ka thlen ang,” a ti a.
bt–E 198 ¶6
“Kaisara Hnênah Ka Thlen Ang”
6 Juda mite hmaa Festana hming ṭhat duhna avângin Paula chu dinhmun hlauhawm takah a awm a. Chuvângin, Paula chuan, Rom mi a nihna chu a hmang ṭangkai a ni. Festana hnênah: “Kaisara rorêlna ṭhutphah hmaa ro mi rêlsakna tûrah hian ka din hi; Judate chungah thil engmah ka tisual lo, nang pawhin chu chu i hre chiang hle si a. . . . Kaisara hnênah ka thlen ang,” a ti a. Vawi khat thlen a nih tawh chuan, sût lêt theih a ni tawh lo tlângpui. Festana’n chutiang a nihzia târ langin: “Kaisara hnênah thlen i tum vei a, Kaisara hnênah i kal mawlh ang chu,” tiin a hrilh a ni. (Tirh. 25:10-12) Thuneihna sâng zâwkah ngênna theh lûtin, Paula chuan tûn laia Kristian dikte tân entawn tûr a hnutchhiah a. Dodâltute’n “dâna thil tihsualna siam” an tum hian, Jehova Thuhretute chuan chanchin ṭha hum nân dân thiltihtheihna chu an hmang ṭangkai a ni.—Sâm 94:20.
(Tirhkohte 26:1-3) Tin, Agrippa chuan Paula hnênah chuan, “I thiamna thu i sawi thei e,” a ti a. Tin, Paula chuan a kut a phar a, a thiamna thu a sawi a; 2 “Lal Agripp, Judaten mi hêkna zawng zawnga ka thiamna thu vawiinah hian i hmaa ka sawi dâwn avâng hian lâwmin ka inhria; 3 hei hi ka lâwmna ber a ni, Judate zîngah dân leh thubuai zawng zawng kawnga i fin ngawt avângin: chuvângin muang taka mi ngaihthlâksak tûrin ka ngên a che.
bt–E 198-201 ¶10-16
“Kaisara Hnênah Ka Thlen Ang”
10 Paula chuan Lal Agrippa chu Judate zîngah dân leh thu buai zawng zawng kawnga fing tak a ni tih hriain, a hmaa thiamthu sawi theihna hun remchâng a neih avângin a lâwmzia zah takin a sawi a ni. Paula chuan a tûn hma nun chu heti hian a sawi a ni: “Kan sakhaw pâwl khermei ber dân pângngaia Pharisaia ka awm kha” tiin. (Tirh. 26:5) Pharisai a nih angin, Paula chuan lo kal tûr Messia chu a beisei a. Tûnah, Kristian a nih angin, Isua Krista chu rei tak an lo nghaha kha a nihzia huaisen takin a sawi a ni. Amah leh a hêktute chuan rin dân thuhmun—an thlahtute hnêna Pathian thutiam chu a thleng famkim ang tih beiseina—an nei a, chu chu, chumi nia Paula fiah a nih chhan chu a ni. Chu chuan Agrippa chu Paula sawi tûrte a ngaihventîr lehzual a ni.
11 Tûn hmaa Kristiante zahthlâk taka a cheibâwl dân chu hre chhuakin, Paula chuan: “Kei pawhin Nazaret Isua hming kalh lamin thil tam tak ti ila ṭhain ka lo ring ṭhîn a . . . an [Krista hnungzuitute] chungah ka kawlh êm êm a, ram dang khaw thleng pawhin ka tiduhdah ṭhîn a,” tiin a sawi a ni. (Tirh. 26:9-11) Paula chuan a nih dân bâkin a sawi lo. Mi tam tak chuan Kristiante chunga rawng taka a tih dânte chu an hria a. (Gal. 1:13, 23) ‘Hetiang mi hi engtin nge a danglam theih le?’ tiin Agrippa chuan a ngaihtuah mai thei a ni.
12 A dawta Paual thusawi chuan chu zawhna chhânna chu a pe a ni: “Chutiang ti tûrin puithiam lalte thu hmu leh an tirhna lehkha kengin Damaska khuaah ka kal a; tin, e, lalpa, ka kal laiin chawfâk hun a ni a, vân ata êng eng emaw, ni êng aia êng zâwk, keimah leh ka kalpuite vêlah êngin ka hmu a. Tin, kan zain leiah kan tlu a, Hebrai ṭawngin, ‘Saula, Saula, nangin engati nge mi tihduhdah hi? Chhunna tiang khen i tân a na e,’ mi tiin aw ka hria a. ‘Tin, keiin, ‘Lalpa tunge i nih?’ ka ti a. ‘Tin, Lalpa chuan, ‘Isua, i tihduhdah hi ka ni,’” tiin.—Tirh. 26:12-15.
13 Chu thilthleng ropui tak a thlen hmain, Paula chu ‘chhunna tiang kheng’ ang a ni a. Thil phûrtu atâna an hman ramsain chhunna tiang hriam tak a kea a khen avânga ṭûl lo taka a intina angin, Paula chuan Pathian duh zâwng dodâlin thlarau lamah mahni a inti na mai a ni. Damaska kawnga kal mêk Paula hnêna inlârin, tho leh Isua chuan rilru dik tak pu, chu kawng dik lo zawhtu ngaihtuahna chu a thlâkthleng a ni.—Joh. 16:1, 2.
14 Paula chuan a nunah nasa takin a inthlâk danglam a. Agrippa hnênah: “Vâna mi inlâra chu ka hnial lo va, atîrin Damaska khuaa mite hnênah, chu mi hnuah chuan Jerusalem khuaa mite hnênah te, Judai ram tina mite hnênah te, Jentailte hnênah te pawh, sim hming pu tlâka thil ti a, sima Pathian lam an hawina tûrin ka hril zâwk ṭhîn a ni,” tiin a sawi a ni. (Tirh. 26:19, 20) Paula chuan chhûn laia a hmuh inlârnaa Isua Krista pêk hna chu kum tam tak chhûngin a hlen a. Eng nge a rah chhuah? Paula hrilh chanchin ṭha chhâng lêttute chuan an nungchang ṭha lo te, leh helpna bawlhhlawhte chu bansanin Pathian lam an hawi ta a ni. Chûng mite chu khua leh tui ṭha takte niin, dân leh thupêk zâwmtute leh zahtute an lo ni ta a ni.
15 Mahse, chûng hlâwknate chu Paula dodâltu Judate tân chuan awmzia a awm lo. Paula chuan: “Chûng avâng chuan a ni, Judaten Pathian biak inah mi mana tihhlum mi tum tâk ni. Nimahsela Pathian hnên aṭanga ṭanpuina ka hmuh avângin vawiin thlengin mi tête leh mi liante hnêna thu hriattîrin ka la awm reng a,” tiin a sawi a ni.—Tirh. 26:21, 22.
16 Kristian dikte kan nih angin, kan rinna chungchâng ‘chhâng tûrin kan inpeih sa fo,” tûr a ni. (1 Pet. 3:15) Rorêltute leh thuneitute hnêna kan rinna chungchâng kan sawi hunah, Agrippa leh Festa hnêna Paula thusawi dân entawnna chuan min ṭanpui ngei ang. Chûng sawrkâr thuneitute hnênah Bible thutakin kan nun leh kan thuchah ken chhâng lêttute nun a ṭha zâwngin a thlâk tih zahthiam taka kan hrilh chuan an rilru a hneh mai thei a ni.
(Tirhkohte 26:28) Tin, Agrippa chuan Paula hnênah, “Rei lo tê chauh thlêma Kristiana mi siam i tum a nih hi!” a ti a.
bt-E 202 ¶18
“Kaisara Hnênah Ka Thlen Ang”
18 Mahse, Paula chuan ram awptu chu: “Festa ṭha ber, ka â lo asin; thu dik tak leh thu fing tak ka sawi zâwk a nih hi. Hêng thu hi lal hian a hria alâwm, a hnênah pawh hlau lovin ka sawi hi; . . . Lal Agripp, zâwlneite thu i âwih em? I âwih tih ka hria e,” a ti a. Agrippa chuan, “Rei lo tê chauh thlêma Kristiana mi siam i tum a nih hi!,” tiin a chhâng a. (Tirh. 26:25-28) Lal chuan chûng thute chu rilru dik tak puin a sawi emaw, sawi lo emaw pawh ni se, Paula thusawi chuan a chungah nasa takin nghawng a nei tih a târ lang a ni.
Thlarau Lam Lunghlute Laih Chhuahna
(Tirhkohte 26:14) Tin, kan zain leiah kan tlu a, Hebrai ṭawngin, ‘Saula, Saula, nangin engati nge mi tihduhdah hi? Chhunna tiang khen i tân a na e,’ mi tiin aw ka hria a.
Tirh. 26:14 ṭanchhan nwtsty study note
chhunna tiang khen: Tiang chu ramsate khalh nâna hman hawlhna hmawlh sei a ni a. (Ro. 3:31) “Chhunna tiang khen” tih ṭawngkam hi Grik thuziaka hmuh theih thufing pakhat a ni. Chu thufing chu bawgpa luhlul takin amah hawlhna tiang chu duh lovin, a lo khen lêt avânga a intihnat dân ṭanchhana mitthla theih a ni. Saula chu Kristian a nih hmain chutiang chuan a lo awm ṭhîn a. Pathian Jehova ṭanpuina dawngtu Isua hnungzuite chu beiin, Paula chuan amah leh amah na takin a inhliam a ni. (Tirh. 5:38, 39; 1 Tim. 1:12-14 khaikhin rawh.) Thuhriltu 12:11-ah, fuihna zâwm tûra chêttîrtu mi fing thusawi chu entîr nei ṭawngkamin “tiang zum” tia hman a ni.
nwt thu har hrilhfiahna
Chhunna Tiang. Leilettute’n ran hawlh nâna an hman, a hmâwra thîr zum awm hmawlh sei tak a ni a. Chhunna tiang chu fuihna fing tak zâwm tûra chêttîrtu mi fing thusawi nên khaikhin a ni. “Chhunna tiang khen” tih chu, bawngpa luhlul takin amah hawlhna tiang chu duh lovin, a lo khen lêt avânga a intihnat dân aṭanga lo chhuak ṭawngkam a ni.—Tirh. 26:14; Ro. 3:31.
(Tirhkohte 26:27) Lal Agripp, zâwlneite thu i âwih em? I âwih tih ka hria e,” a ti a.
Lalram Thuchah Pawm Turin Mi Dangte Ṭanpui Rawh
14 Paula chuan Agrippa chu a hming maia Juda mi a ni tih a hre reng a. Agrippa’n Judate dân a hriatna chu ṭanchhanin, Paula chuan a thu hrilhah chuan Mesia thih leh thawhlehna chungchânga “zâwlneite leh Mosian lo thleng tûr an tih thu chauh lo chu” engmah a tel loh tak zetzia a hrilh a ni. (Tirhkohte 26:22, 23) Agrippa hnênah Paula chuan: “Lal Agripp, zâwlneite thu i âwih em?” tiin a zâwt chawt a. Agrippa chuan buaina a tâwk ta. Zâwlneite a ring lo a tih chuan Juda ringtu hming a put chu a chhe mai dâwn si a. Paula thil chhût dân a pawm dâwn lahin mite’n tirhkohte nêna thuhmunah an ngai ang a, Kristian tia an koh mai a hlauhawm bawk si. Chutah Paula chuan ama zawhna vêk chu: “I âwih tih ka hria e” tiin fing takin a chhâng a ni. Agrippa thinlung chu eng anga chhâng tûrin nge chêttîra a awm? Heti hian a chhâng a ni: “Rei lo tê chauh thlêma Kristiana mi siam i tum a nih hi!” tiin. (Tirhkohte 26:27, 28) Agrippa chu Kristianah inlet lo mah se, Paula thusawi chuan a thinlung chu engemaw chen a hneh tih a chiang hle.—Hebrai 4:12.
Bible Chhiar
(Tirhkohte 25:1-12) Chutichuan Festa chuan ram chu a awp ta a; tin, ni thum chinah Kaisari khua a ṭang chuan Jerusalem khuaah a han kal a. 2 Tin, puithiam lalte leh Juda puipate chuan a hnênah Paula chung châng thu chu a chhe lamin an lo hriattîr a. 3 Jerusalem khuaa han hruaitîr tûrin khawngaihna an lo ngên chiam bawk a; kalkawnga lo châna thah an tum a. 4 Nimahsela Festa chuan, “Paula chu Kaisari khuaah an vêng reng a ni, kei pawh rei lo têan ka haw dâwn e. 5 Chuvângin chu mi chuan sualna a neih chuan in zînga thu nei apiangin mi zui chhuk sela, hêk rawh se,” a ti a, a chhâng a. 6 Tin, an zîngah chuan ni riat emaw, ni sâwm emaw lo liam chu a châm lo va, Kaisari khuaah a haw thla ta a; tin, atûkah chuan rorêlna ṭhutphahah a ṭhu a, Paula chu rawn hruai tûrin thu a pe a. 7 Tin, ani chu a lo thlen chuan Jerusalem khuaa mi Juda lo chhukte chu a vêlah an ding a, a chungah thupawi tam tak rit tak tak an sawi an sawi a, abul erawh chu an chhui chhuak thei si lo va; 8 tin, Paula chuan a thiamna thu a sawi a, “Judate Dân chungchângah te, Pathian biakin thu-ah te, Kaisara chungahte pawh thilrêng rêng ka tisual lo ve,” a ti a. 9 Nimahsela Festa chuan Judate zînga hmingṭhat a duh a, Paula hnênah chuan, “Jerusalem khuaa han kal a, khitah ka hmaa hêng thu hi rêl i duh em?” a ti a, a chhâng a. 10 Paula erawh chuan, “Kaisara rorêlna ṭhutphah hmaa ro mi rêlsakna tûrah hian ka din hi; Judate chungah thil engmah ka tisual lo, nang pawhin chu chu i hre chiang hle si a. 11 Mi sual ka nih a, thihna khawp meuh thil ti ka nih chuan thih pawh ka hnial lo ve; nimahsela hêngho mi hêkna thil hi abul engmah a awm loh chuan tumahin an hnênah mi pe thei lo vang. Kaisara hnênah ka thlen ang,” a ti a. 12 Tin, Festa chuan a rorêlpuite a biak râwn zawhin, “Kaisara hnênah thlen i tum vei a, Kaisara hnênah i kal mawlh ang chu,” tiin a chhâng a.
JANUARY 28–FEBRUARY 3
PATHIAN THU AṬANGA RO HLUTE | TIRHKOHTE 27-28
“Paula Chu Rom Panin Lawngin A Zin”
(Tirhkohte 27:23, 24) A ta ka ni a, a rawng ka bâwl ṭhin Pathian kha, chu mi vântirhkoh pakhat nizân khân ka kiangah a lo ding a, ka hnênah, 24 ‘Paula, hlau suh, Kaisara hmaah i ding tûr a ni; tin, ngai rawh, lawnga i hnêna kal zawng zawngte pawh hi Pathianin a pe a che,’ mi ti a ni.
bt-E 208 ¶15
“Tumahin Nunna In Hloh Dâwn Lo Ve”
15 Paula chuan lawnga chuang mi tam tak hnênah ‘Pathian thutiam beisei kawng thu’ a hrilh a nih a rinawm. (Tirh. 26:6; Kol. 1:5) Lawng a chhiat mai theihna dinhmunah, Paula chuan an beisei nghal theih thil ṭanchhanin thu a sawi a. Ani chuan: “Vântirhkoh pakhat nizân khân ka kiangah a lo ding a, ka hnênah, ‘Paula, hlau suh, Kaisara hmaah i ding tûr a ni; tin, ngai rawh, lawnga i hnêna kal zawng zawngte pawh hi Pathianin a pe a che,’ mi ti a ni,’” tiin a sawi a. An hnênah: “Pute u, thlamuang takin awm rawh u; Pathian ka ring e, mi hrilh ang zêlin a awm dâwn. Nimahsela thliarkâr engah emaw min lên chhuak tûr a ni,” tiin a sawi a.—Tirh. 27:23-26.
(Tirhkohte 28:1, 2) Tin, kan kai zawh chuan thliarkâr hming chu Meliti a ni tih kan lo hre ta a. 2 Tin, awze miten khawngaih namênin min khawngaih lo va; ruah a lo sûr avâng leh a vawh avângin mei an chhêm a, kan zain min lo lâwm a.
bt-E 209 ¶18
“Tumahin Nunna In Hloh Dâwn Lo Ve”
18 Dam khawchhuakte chuan Sicily chhim lama awm Meliti thliarkârah an awm tih an hre ta a. (“Khawiah nge Militi a awm?” tih bâwm chu en rawh) Chu thliarkâra awm awze mite chuan “khawngaih namênin” an khawngaih lo va. (Tirh. 28:2) Anni chuan huh chung leh khur hlawk hlawk chunga an awmna tuipui kam rawn thleng chûng hmêlhriat lohte tân mei an lo chhehsak a. Khua chu vâwt hlein, ruahte sur mah se, lum takin an awm thei a ni. Chu mei avâng chuan thil mak tak a thleng bawk.
bt–E 210 ¶21
“Tumahin Nunna In Hloh Dâwn Lo Ve”
21 Chu mi hmunah chuan mi hausa tak Publia a awm a. Ani chu Meliti thliarkâra Rom sipaihotu a ni mai thei. Luka chuan ani chu “thliarkâra lal ber,” tia sawiin, Meliti thuziak pahniha hmuh nihna sawina ṭawngkam a hmang a ni. Ani chuan Paula leh a ṭhiante chungah ni thum chhûng khualchhâwn thiamna a lantîr a. Mahse, Publia pa chu a dam lo va. Luka chuan thil awm dân chu dik takin a târ lang leh a ni. Dam lo chu “khawsik leh santên veiin a lo mu reng a,” tia ziakin a natna chu dik takin a târ lang a. Paula chuan a chunga kut nghatin a ṭawngṭai a, a lo dam ta a. Chu thil mak tih chuan tualchhûng mite thinlung a khawih êm avângin, tidam tûrin dam lo dangte an rawn hruai a, Paula leh a ṭhiante mamawh phuhru tûrin thilpêk tam tak an rawn keng bawk a ni.—Tirh. 28:7-10.
(Tirhkohte 28:16, 17) Tin, Rom khuaa kan luh chuan Paula chu a vêngtu sipai hnênah amah chauhva awm an phal a. 17 Tin, ni thum chinah Paula chuan Judate hotu deuh apiang a ko khâwm a; tin, an rawn inkhâwmin an hnênah, “Unaute u, mi zawng zawng leh min thlahtute dân chunga engmah ka tih loh pawhin Jerusalem khua aṭangin Rom mite hnênah mi tântîr a ni.
bt-E 213 ¶10
“Chipchiar Takin Thu A Hril”
10 Khualzinte chu a tâwpah Rom khua an thlen chuan, “Paula chu a vêngtu sipai hnênah amah chauhva awm an phal a.” (Tirh. 28:16) Ina khuahkhirha awmte chu an tlan chhuah loh nân anmahni vêngtu nên khaidiatin an thlun zawm ṭhîn a ni. Lalram thuchah puangtu Paula chu khaidiata phuar a ni chung pawhin thuchah puang lovin a awm thei lo. Chuvângin, khualzin zawha ni thum chhûng a chawlh hahdam hnuah amah inhmêlhriattîr a, thu hril tûrin Rom khuaa Juda mi liante chu a kokhâwm a ni.
Thlarau Lam Lunghlute Laih Chhuahna
(Tirhkohte 27:9) Tin, ni tam tak a ral tawh avâng leh, lawnga kal a hlauhawm tawh avângin, (Chaw Nghei nî chu a lo pêl tawh si a,) Paula chuan anni chu a zilh a.
Tirh. 27:9 ṭanchhan nwtsty study note
Chaw Nghei nî: A nih loh leh “favâng chaw nghei.” A ngial a ngana sawi chuan, “nghei,” tihna a ni a. “Nghei” tih Grik thu mal hian Mosia Dânin a phût chaw nghei chauh a sawina a ni a, chu chu, kum tina an neih Inremna Nî nêna inkungkaiha chaw nghei a ni a, Yom Kippur (Hebrew, yohm hak·kip·pu·rimʹ, “[sual] khuhna nî”) tia koh a ni bawk. (Lev. 16:29-31; 23:26-32; Num. 29:7; Thu Har Hrilhfiahna, “Inremna Nî” tih en rawh.) “Intihrehawm,” tih ṭawngkam hi Inremna Nî nêna inkungkaiha hman a ni a, chu chu chaw nghei pawh tiamin, mahni intihhrehawmna chi hrang hrang sawi nâna hman nia hriatthiam a ni tlângpui. (Lev. 16:29) Tirhkohte 27:9-a “chaw nghei” tih thu mal hian Inremna Nî-a an tih ṭhin chaw nghei ang chi mahni intihhrehawmna hi a kâwk deuh ber a. Inremna Nî-a chaw nghei chu September tâwp lam, a nih loh leh October thla tîr lamah an nei ṭhîn.
(Tirhkohte 28:11, Baptist Mid-Mission Translation) Thla thum hnuah, Aleksandria lawng, a lûa phîr unau lim chuanna, thliarkâra thlasik chhûng zawng lo awm tawhah chuan kan kal leh ta a.
Tirh. 28:11 ṭanchhan nwtsty study note
Phîr Unau: Grik leh Rom thawnthu sawi dân chuan, heta Phîr Unau (Grik, Di·oʹskou·roi) hi Zeus pathian (Jupiter) leh Spartan Lalnu Leda-i te fa phir, Kastor-a leh Pollux-a te sawina a ni a. Ngaih dân tam tak a awm bâkah, anni chu tuipuia dinhmun hlauhawm laka lawng mite vênghimtu nia ngaih an ni bawk. Lawng lûa lim chuang chungchâng chipchiar taka ziah lanna chuan, he thu hi mit ngeia hmutu ziah a ni tih a finfiah belh a ni.
Bible Chhiar
(Tirhkohte 27:1-12) Tin, Itali rama lawnga kan kal tûr thu an tihtlûk veleh, Paula leh mi tâng dang tute emaw Awgusta pâwla mi sipai za hotu a hming Julia an kawltîr a. 2 Tin, Adramuttini khaw lawng, Asia ram tuifinriat kama khaw awmte tlawh tûrah chuan kan chuang a, tuifinriatah kan kal ta a; Makedonia rama mi Aristarka, Thessalonika khuaa mi kan hnênah a awm a. 3 Tin, atûkah Sidon khua kan tlawh a. Tin, Julia chuan Paula a tiṭha hle a, intiharh tûrin a ṭhiante hnênah a lêntîr a, 4 Tin, chuta ṭangin tuifinriatah kan kal leh a, thliin a ni lo lamah min nem avângin Kupra thliarkâr phên thli ûp lamah kan tlân a. 5 Tin, Kilikia ram leh Pamphulia ram dep tuifinriat kan pelh hnuin, Lukia rama Mura khua kan thleng a. 6 Chutah chuan sipai za hotu chuan Aleksandria khaw lawng Itali ram tlawh tûr chu a hmu a; chu miah chuan min chuantîr a. 7 Tin, ni rei tak zawi zawiin kan kal a, Knidos khaw zâwn harsa takin kan thleng hrâm hrâm a, thliin min hnar avângin Salmoni hrûla Kret thliarkâr phên thli ûp lamah kan tlân a; 8 tin, harsa takin vaukam kan hrût a, Litengsâwl Mawi an tih hmun chu kan thleng ta a; chu mi kiangah chuan Lasai khua a awm. 9 Tin, ni tam tak a ral tawh avâng leh, lawnga kal a hlauhawm tawh avângin, (Chaw Nghei nî chu a lo pêl tawh si a,) Paula chuan anni chu a zilh a, 10 an hnênah, “Pute u, lawnga tûna kal hi chhiatna leh boralna nasa tak a thleng dâwn tih ka hria e, a sum leh lawng chungah chauh ka ti lo va, keimahni chungah pawh ka ti a ni,” a ti a. 11 Nimahsela sipai za hotu chuan Paula thusawi ai chuan lawngpu leh lawng neitu thu a âwih zâwk a. 12 Tin, thlasik tuar nên litengsâwl chu a rem loh avângin a tam zâwkin, chuta ṭanga tuifinriata kal chhuaha Phoiniki khua thlen hrâma chuta thlasik tuar an rawtpui a; Phoiniki chu Kret thliarkâra litengsâwl pakhat a ni, hmâr chhak leh chhim chhak chhawng a ni.