ZIRLAI 2

Tîtî Phung Pângngai Taka Sawi

2 Korinth 2:17

KHAIKHAWMNA: I thusawi tûr leh ngaithlatute chunga i rilru put dân târ lang tûr zâwngin pângngai tak leh tih tak zetin sawi rawh.

Ṭawngṭaina nên ngun takin inbuatsaih rawh. I zâmna ngaihtuah lo tûr leh i thusawia rilru pe tlat thei tûrin ṭawngṭai ang che. I târ lan duh thu pawimawh laite chu i rilruah vawng tlat rawh. Lehkha phêka thuziak ang anga sawi mai lovin, a sawi tum chu mahni ir-âwm chhuakin sawi ang che.

Bible emaw, thu leh hla chhuah dang emaw aṭanga chhiar i tum a nih chuan, chûngte chu nâl taka chhiar thei khawpin hre chiang rawh. Mi thusawi i la chhâwng a nih chuan, a lutuka tihluih ni si lovin, rilrua veina nên chhiar ang che.
Thinlung aṭangin sawi rawh. Ngaithlatute’n i thusawi tûr an hriat a ngaih chhan chu ngaihtuah la, chûngte chu ngaihven tlat rawh. Chutianga i tih chuan, i din dân te, i zaizir dân te, leh i hmêl lan dânte chuan i tih tak zetna leh i nêlawmna a târ lang ang.

Pângngaina leh ngaihsamna chu hriat pawlh suh. Ṭawngkam fiah tak leh ṭawng dân phung dik tak hmangin, i thuchah ken zahawmna chu hum tlat ang che.
Ngaithlatute chu en rawh. Thil mawi lo a nih loh chuan, mite chu en ang che. Thu i sawi hunah, ngaithlatute chu en bîk nei lova en thuak thuak lovin, a mal malin en rawh.