Nun leh Rawngbâwlna Inzirna Lehkhabu Atâna Thu Lâk Chhuahnate
FEBRUARY 3-9
PATHIAN THU AṬANGA RO HLUTE | GENESIS 12-14
“Nangmah Nghawngtu Thuthlung”
(Genesis 12:1, 2) Tin, LALPAN Abrama hnênah chuan, “I khaw lam ata leh i laichînteho zîng ata leh i pa in ata chhuak la, ram ka la entîr tûr che lamah kal rawh. 2 Tichuan, chi ropui takah ka siam ang chia; mal pawh ka sâwm ang chia, i hming ka tiropui bawk ang; tin, nang malsâwmna ni ang che.
it-1-E 522 ¶4
Thuthlung
Abrahama Nêna Thuthlung. Abrahama nêna thuthlung chu Abrama’n (Abrahama’n) Kanaan ram lam pana Euphrates lui a kân khân hman ṭan niin a lang. Dân thuthlung chu a hnu kum 430-a siam a ni a. (Gal. 3:17) Jehova chuan Abrahama chu Mesopotamia ram, Kaldai-ho khawpui Ur-a a awm laiin a bia a, a entîr tûr ram lama kal tûrin a hrilh a ni. (Tirh. 7:2, 3; Gen. 11:31; 12:1-3) Exodus 12:40, 41 (LXX) chuan Kanaan ram leh Aigupta rama kum 430 an chên tâwp nî, “chu mi nî ngei chuan,” Aigupta rama sal tâng Israel mite chu an chhuak tih min hrilh a. Aigupta ram aṭanga an chhuah nî chu B.C.E. 1513, Nisan 14, Kalhlên Kût nî a ni. (Ex. 12:2, 6, 7) Chu chuan B.C.E. 1943, Nisan 14-ah Abrahama’n Kanaan ram lam panin Euphrates Lui a kân tih a târ lang a, chumi hun aṭang chuan Abrahama thuthlung chu hman ṭan niin a lang. Abrahama’n Kanaan rama Sekem thleng a kal hnuah, Pathian chu a hnênah inlâr lehin, “He ram hi i thlahte hnênah ka la pe ang,” tia sawiin, a thutiam chu a tichiang lehzual a, chutiang chuan, chu thuthlung chuan Eden huana thutiam nên inkûngkaihna a nei tih a târ lan bâkah, ‘thlah’ chuan mihring nun kawng a zawh ang a, chu chu, mihring thlah kal zêl aṭangin a lo chhuak ang tihna a ni. (Gen. 12:4-7) Genesis 13:14-17; 15:18; 17:2-8, 19; 22:15-18-a chhinchhiah angin, a hnuah Jehova thusawi dangte chu târ lan a ni.
(Genesis 12:3) Tin, malsâwmsaktu apiang che chu mal ka sâwm ang a, ânchhe lawhtu che chu ânchhia ka lawh ang; nangmahah chuan leia hnam tin an la thawveng ang,” a ti a.
w89-E 7/1 3 ¶4
Abrahama Chungchâng Thu Dik Hriat A Ngaih Chhan
Chu chu thutiam mak tak a ni a, Abrahama’n a lo berah ṭum hnih lai, chu thutiam chu a hria a ni. (Genesis 18:18; 22:18) Chu thutiam thleng famkim tûr chuan, Pathianin thi tawh chhûngkaw aiawhtute chu a kaitho leh ang. Chûng zînga a tam zâwkte chu atîra mihringte hloh tâk Paradis ang dinhmuna an rawn thawhleh dâwn avângin, an nun chu malsâwmna a ni tak zet ang. Chumi hnuah chuan, chatuan nun malsâwmna an hmuh theih dân zirtîr an ni ang.—Genesis 2:8, 9, 15-17; 3:17-23.
(Genesis 13:14-17) Tin, a hnên ata Lota a awm hran hnu chuan LALPAN Abrama hnênah, “Dâk la, i awmna aṭang khân hmâr lam te, chhim lam te, chhak lam te, thlang lam te en rawh; 15 i ram hmuh zawng zawng hi kumkhua atân nang leh i thlahte ka pe dâwn che u a ni. 16 Tin, i thlahte chu leia vaivut ang maiin ka la siam ang; chutichuan, miin leia vaivut hi an chhiar sên chuan i thlahte pawh chhiar sên an ni bawk ang. 17 Tho la, ram hi a dung a vâng fang chhuak rawh; ka pe dâwn che a ni,” a ti a.
it-2-E 213 ¶3
Dân
Thilthleng chanchinte ṭanchhanin, mi thiam ṭhenkhat chuan hmun ram hralh a nih hian, a leitu tûr chu ramrite a lan kim theihna hmun pakhat aṭangin ram chu hmuhtîr a ni ṭhîn tih an ring a. A leitu tûr chuan, “Ka hmu e,” tia a sawi chuan, chu chuan dân angin a pawm tih a târ lang. Jehova’n Abrahama hnêna Kanaan ram a pêk tûr thu a tiam khân, ram chu kil tin aṭanga en tûrin a hrilh hmasa a. Abrahama chuan, “Ka hmu e,” tiin a sawi lo, Pathianin Ram Tiam chu a hnua Abrahama thlahte hnêna a pêk tûr thu a sawi vâng a ni mai thei. (Gen. 13:14, 15) Israel hnam aiawhtu Mosia chu ram “hmuhtîr” a ni a, kan sawi tâkte kha a dik a nih chuan, chu chuan Israel mite hnênah ram chu dân anga pêk a ni tih a târ lang ang, anni chuan Josua kaihhruaina hnuaiah ram chu an la dâwn si a. (Deut. 3:27, 28; 34:4; Mt. 4:8-a Setana’n Isua pêk a tiam kha ngaihtuah bawk rawh.) Chutianga dân anga thiltihna dang leh chu: ram an luah dâwn tih hriattîr nâna fan chhuah, a nih loh leh ram chhûnga luh hi a ni. (Gen. 13:17; 28:13) Hmân lai lehkhabu ṭhenkhatah chuan, ram an hralh dâwnin a ram chhûnga thingkûng awm zawng zawngte chu a man chhûtnaah ziah tel vek a ni ṭhîn.—Gen. 23:17, 18 khaikhin rawh.
Thlarau Lam Lunghlute Laih Chhuahna
(Genesis 13:8, 9) Tichuan, Abraman Lota hnênah, “Khawngaih takin, nang leh keia kârah, i ran pute leh ka ran pute kârah pawh inhnialna awm suh se; unau kan ni si a. 9 Ram chu a pum puiin a awm duai lo vem ni? Khawngaih takin ka hnên ata hi intihrang mai rawh. Nang vei lama i kal chuan kei ding lamah ka kal ang a; a nih loh leh, nang ding lama i kal chuan kei vei lamah ka kal ang e,” a ti a.
Inrem Lohna Chu Hmangaihnain Chingfel Rawh U
12 Bible chuan Pathian chhiahhlawhte’n thu inhmuh lohna an neih huna remna an neih theih dân a târ lang a. Entîr nân, Abrahama leh a tupa Lota chuan ran tam tak an nei ve ve a, an ran zawng zawng tlatna tûr hmun indaih tâwk a awm loh avângin an ran pute chu an inhnial ta a. Abrahama chuan remna siam a duh avângin, Lota chu ram ṭha ber a thlantîr a ni. (Genesis 13:1, 2, 5-9) Kan tân entawn tûr ṭha a va ni êm! Abrahama chuan a thilphalna chu a chhiat reng phah em? Phah lo ve. Chu mi hnu lawkah, Jehova chuan a thil chân aia tama malsâwm a tiam a ni. (Genesis 13:14-17) Eng nge kan zir? Thu inhmuh lohnate chu thil ṭhenkhat chân inhuama hmangaihna nêna kan chinfel hian, Jehova chuan malsâwmna min vûr ang, tih hi.
(Genesis 14:18-20) Tin, Salem khaw lal Melkisedeka chuan chhang leh uain a rawn la a; ani chu Pathian Chungnungbera puithiam a ni a. 19 Tin, ani chuan Abrama chu mal a sâwm a, “Lei leh vân neitu Pathian Chungnungbera chuan Abrama malsâwm rawh se. 20 I hmêlmate i kuta petu, Pathian Chungnungbera chu fakin awm bawk rawh se,” a ti a. Tin, Abrama chuan ani chu engkim sâwma pakhat a pe a.
(Hebrai 7:4-10) Tichuan, chi thlahtu Abrahaman a râl lâk ṭha apiang zînga mi sâwma pakhat a pêka chu, chu mihring ropuizia chu ngaihtuah teh u. 5 Levia thlahte zînga puithiam hna chang apiangte chuan Dân thu angin mite lakah sâwma pakhat lâk tûr thu an hmu ngei a ni, chu chu an unaute lakah a ni, chûngho chu Abrahama ṭhâlbea chhuak ni mah sela; 6 amaherawhchu, an zînga a thlahtute chhui tel ve lohva khân Abrahama lakah sâwma pakhat a la a, thutiamte vawngtu chu mal a sâwm ta bawk a. 7 Nimahsela, hnial rual lohvin a tê zâwk chu ropui zâwka malsâwmsakin a awm ṭhîn. 8 Tin, hetah hian mihring thi ṭhînte hian sâwma pakhat an hmu ṭhîn a, chutah erawh chuan, ‘a nung reng’ tia a thu an hriattîra chuan a hmu a ni. 9 Tin, Levia, sâwma pakhat la ṭhîntu mah hian, Abrahama kutah khân sâwma pakhat a pe tawh, tih theih a ni; 10 Melkisedekan a lo hmuah lai khân a pa ṭhâlbeah a la awm si a.
it-2-E 683 ¶1
Puithiam
Salem khaw lal Melkisedeka chu puithiam (ko·henʹ) danglam tak a ni a. Bible-ah a thlahtu te, a pian hun te, leh a thih hunte târ lan a ni lo. A puithiam nihna chu a rochun a ni lo va, amah thlâktu tûr pawh a nei hek lo. Melkisedeka chuan lal leh puithiam nihna a chelh kawp a. Abrahama’n Melkisedeka hnêna sâwma pakhat pe a, a malsâwmna a dawn lai khân Levia chu Abrahama ṭhâlbeah a la awm avâng leh Abrahama kal tlanga Melkisedeka hnêna sâwma pakhat pe anga sawi theih a nih avângin, Melkisedeka puithiam nihna chu Levia thlahte puithiam nihna aiin a ropui zâwk a ni. (Gen. 14:18-20; Heb. 7:4-10) Chutiang chuan, Melkisedeka chuan Bible-in “Melkisedeka awm dân anga, Chatuana Puithiam,” tia a sawi Isua Krista chu a lo entîr lâwk a ni.—Heb. 7:17.
Bible Chhiar
(Genesis 12:1-20) Tin, LALPAN Abrama hnênah chuan, “I khaw lam ata leh i laichînteho zîng ata leh i pa in ata chhuak la, ram ka la entîr tûr che lamah kal rawh. 2 Tichuan, chi ropui takah ka siam ang chia; mal pawh ka sâwm ang chia, i hming ka tiropui bawk ang; tin, nang malsâwmna ni ang che. 3 Tin, malsâwmsaktu apiang che chu mal ka sâwm ang a, ânchhe lawhtu che chu ânchhia ka lawh ang; nangmahah chuan leia hnam tin an la thawveng ang,” a ti a. 4 Chutichuan, Abrama chu LALPAN a hnêna a sawi angin a kal ta a, Lota chu a hnênah a kal ve a. Tin, Abrama chu Haran khua ata a chhuah lai chuan kum 75 mi a ni a. 5 Tin, Abraman a nupui Saraii leh, a nau fapa Lota leh an sum deh chhuah zawng zawng leh, Haran khuaa an mi neih tâkte chu a hruai a; Kanaan rama kal tûrin an chhuak a. Tin, Kanaan ram chu an thleng ta a. 6 Tin, Abrama chu, chu mi ramah chuan Sekem hmun thlengin, More sasua thleng chuan a kal zêl a. Chûng lai chuan Kanaanhote chu chumi ramah chuan an awm a. 7 Tin, LALPA chu Abrama hnênah a inlâr a, “He ram hi i thlahte hnênah ka la pe ang,” a ti a. Tichuan, chutah chuan a hnêna inlâr LALPA tân chuan maichâm a siam a. 8 Tin, chuta ṭang chuan Bethel chhak lama tlângah chuan a insawn a, chutah chuan a puan in a zâr a, a thlang lamah chuan Bethel chu a awm a, a chhak lamah Ai khua a awm a; chutah chuan LALPA tân maichâm a siam leh a, LALPA hming chu a lam a. 9 Tin, Abrama chu chhim ram lam pan cheuvin a insawn ta zêl a. 10 Tin, chumi ramah chuan ṭâm a lo tla a; tin, chumi ramah chuan ṭâm chu a nasat êm avângin, Abrama chu Aigupta rama awm rih tûrin a chhuk ta a. 11 Tin, heti hi a ni a, Aigupta rama an luh dâwn lai chuan a nupui Saraii hnênah chuan, “Ngai teh, hmeichhe hmêl ṭha tak i ni tih ka hria. 12 Tichuan, hetiang hi a ni ang, Aigupta-hovin an hmuh hunah che chuan, ‘Hei hi a nupui a nih hi,’ an ti ang a; tin, kei chu min that mai ang, nang erawh chu an zuah ang che. 13 I zâra ṭha taka ka awm theih nân leh nangmah avânga ka nun theih nân, ‘A farnu ka ni,’ khawngaih takin ti zêl ang che,” a ti a. 14 Tin, heti hi a ni a, Abrama chu Aigupta rama a luh chuan, Aiguptaho chuan hmeichhia chu an hmu a, a hmêl chu ṭha an ti êm êm a. 15 Phahraoa mi liante pawhin an hmu a, Pharaoa inah an hruai lût ta a. 16 Tin, ani chuan Saraii avângin Abrama chu ṭha takin a ti a; tichuan, berâm te, bâwng te, sabengtungpa te, bâwihpa te, bâwihnu te, sabengtungnu te, sanghâwngsei te a neih phah ta a. 17 Tin, LALPA chuan Abrama nupui Saraii avângin Pharaoa leh a chhûngte chu sawisak namênin a sawisa ta lo va. 18 Tichuan, Pharaoa chuan Abrama chu a ko va, “Ka chunga i thiltih hi eng tizia nge ni le? I nupui a ni tih engati nge mi hrilh loh? 19 ‘Ka farnu a ni,’ engati nge i tih? Chumi avâng chuan alâwm ka nupuia ka lo neih tâk hial ni. Aw le, tûnah en rawh i nupui hi, hruai la, kal daih rawh,” a ti a. 20 Tin, Pharaoa chuan a chungchâng thuah chuan mi hnênah thu a pe a; tichuan, amah an han thlah ta a, a nupui nên a neih zawng zawng nên.
FEBRUARY 10-16
PATHIAN THU AṬANGA RO HLUTE | GENESIS 15-17
“Jehova Chuan Abrama leh Saraii Hming A Thlâk—Engvângin Nge?”
(Genesis 17:1) Tin, Abrama chu kum 99 mi a nihin, LALPA chu Abrama hnênah chuan a rawn inlâr a, a hnênah, “Kei, Pathian Engkimtitheia ka ni; ka hmaah awm la, ṭha famkimin awm rawh.
it-1-E 817
Sual, Mi Sualna Zawng
Kawng leh lamah chuan, mihringte thiltih dân leh chumiin a rahchhuahte chu a ṭha lo fo va. Sual chu Adama hnên aṭangin mi zawng zawngin an rochun a. (Rom 5:12; Sâm 51:5) Mahse, Jehova chu ṭha famkim a ni a, “kan taksa siam dân hi a hriat a, vaivut mai kan ni tih a hriat reng avângin,” kan chungah zah a ngai hle a ni. (Sâm 103:13, 14) Ani chuan mi rinawm leh thuâwih Nova chu “a dam rualpuite zîngah chuan sawisêlbo” angin a thlîr a. (Gen. 6:9) Abrahama chu, “Ka hmaah awm la, ṭhafamkimin awm rawh,” tiin thu a pe bawk. (Gen. 17:1) Chûng mite chu ṭha famkim lo niin thi mah se, ‘thinlung lam en ṭhîntu’ Jehova chuan anni chu sawisêlbo angin a thlîr a ni. (1 Sam. 16:7; 2 Lal. 20:3; 2 Chro. 16:9 nên khaikhin rawh.) Jehova chuan Israel mite chu: “LALPA in Pathian hmaah in ṭha famkim tûr a ni,” tiin thu a pe a. (Deut. 18:13; 2 Sam. 22:24) Jehova’n a Fapa ṭha famkim (Heb. 7:26) chu tlanna inthawina atân min pe a, Rorêltu fel leh sawisêlbo a nihna vawng reng chungin, chu tlanna inthawinaa rinna leh thuâwihna lantîrtute chu “mi fel,” a nih loh leh sawisêlbo tiin a ko thei a ni.—Rom 3:25, 26; INTEGRITY; PERFECTION en rawh.
(Genesis 17:3-5) Tin, Abrama chu a bawkkhup ta a; tin, Pathianin ani chu a bia a, 4 “Ngai teh, kei zawngin, ka thuthlung chu i hnênah a ni ka thlun ni; tichuan, chi hrang hrang tam tak thlahtu i ni tawh ang. 5 I hming pawh Abrama a ni tawh lo vang a, i hming hi Abrahama a ni tawh zâwk ang; chi hrang hrang tam tak thlahtu tûra ka siam tâk che hi.
it-1-E 31 ¶1
Abrahama
Hunte a liam zêl a. Tûnah chuan Kanaan rama an awmna chu kum sâwm dâwn lai ni tawh mah se, Sari chu a la ching reng a ni. Chuvângin, ani chuan Aigupta mi a bâwihnu Hagari chu a laka fa a neih theih nân a aiawha Abrahama nupuia awm tûrin a hrilh a. Abrahama chuan a lo pawm a. Tichuan, Abrahama kum 86 a nih kum, B.C.E. 1932-ah Ismaela chu a piang ta a ni. (Gen. 16:3, 15, 16) Hunte chu a liam belh zêl a. Abrahama kum 99 a nih kum, B.C.E. 1919-ah Jehova chuan amah leh Abrahama inkâra thuthlung bîk atân chhinchhiahna angin, Abrahama chhûngkuaa mipa zawng zawng chu serh tan tûrin thu a pe a ni. Chutih rual chuan, Jehova’n “chi hrang hrang tam tak thlahtu tûra ka siam tâk che hi,” tia sawiin, a hming Abrama tih chu Abrahama tiin a thlâksak a. (Gen. 17:5, 9-27; Rom 4:11) A hnu rei vak lovah, Abrahama’n mihring taksa pu vântirhkoh pathumte Jehova hminga a mikhual khân, anni chuan a kum lehah Sari’n nau a pai ang a, fa a hring ang tih an tiam a ni.—Gen. 18:1-15.
(Genesis 17:15, 16) Tin, Pathian vêkin Abrahama hnênah, “I nupui Saraii pawh, a hmingah Saraii i ti tawh lo vang a, a hming chu Sari a ni tawh zâwk ang. 16 Tin, ani chu mal ka sâwm ang a, chu lo pawh chu ama lakah chuan fapa ka pe ang che; a ni, amah chu mal ka sâwm ang a, chi hrang hrang thlahtunu a ni tawh ang; hnam hrang hrang lalte ama lakah chuan an lo la chhuak ang,” a ti leh pek a.
w09-E 2/1 13
Hmingin Eng Nge A Ken Tel?
Pathian chuan mi ṭhenkhat hming chu hrilh lâwkna atân a thlâksak a. Entîr nân, “Pa Chu Chawimawiin A Awm” tih awmzei nei Abrama hming chu “Mi Tam Takte Pa” tih awmze nei Abrahama tiin a thlâksak a. Chu a hming ang ngei chuan, Abrahama chu chi hrang hrang tam tak thlahtu a lo ni ta rêng a ni. (Genesis 17:5, 6) A hming awmzia “ân hmang” tih ni thei, Abrahama nupui Saraii pawh hi han ngaihtuah teh. Pathianin lalte thlahtu nu a ni dâwn tih sawi hmâwr hmuh nâna “Lal Fanu” tih awmze nei “Sari” tia a hming a thlâksak khân, a hlim hle ngei ang.—Genesis 17:15, 16.
Thlarau Lam Lunghlute Laih Chhuahna
(Genesis 15:13, 14) Tin, Pathian chuan Abrama hnênah, “I thlahte chu anmahni ram lovah chuan mikhualin an la awm ang a, an rawng an la bâwlsak ang tih chiang takin hre rawh khai; tin, kum 400 an tirethei ang a. 14 Tin, an rawng an bâwksakate chi pawh chu ka la ngaihtuah ang a; tin, chumi hnuah chuan sum tam tak neiin an lo la chhuak ang.
it-1-E 460-461
Hun Chhuina
Jehova’n Abrama (Abrahama) hnênah: “I thlahte chu anmahni ram lovah chuan mikhualin an la awm ang a, an rawng an la bâwlsak ang tih chiang takin hre rawh khai; tin, kum 400 an tirethei ang,” tiin a hrilh a. (Gen. 15:13; Tirh. 7:6, 7 en bawk rawh.) He thu hi ‘thlah,’ a nih loh leh thutiam roluahtu tûr Isaaka a pian hmaa sawi a ni. B.C.E. 1932-ah Ismaela chu Abrama leh Aigupta mi bâwihnu Hagari lakah a piang a, B.C.E. 1918-ah Isaaka chu a piang ve leh a ni. (Gen. 16:16; 21:5) ‘Tihretheihna’ (Gen. 15:14) tâwp hun, Aigupta ram ata an chhuah aṭanga kum 400 kan chhiar lêt chuan, chu chu B.C.E. 1913 a ni a, chutih hun lai chuan Isaaka chu kum nga vêl a ni. Ani chu hnute hnêk an bântîr tawh a nih a rinawm a, a ram ni lovah, ‘mikhualin a awm a,’ tûnah chuan, kum 19 mi vêl Ismaela ‘nuihsana’ awmin, sawi lâwk tihretheihna chu a tuar ṭan a ni. (Gen. 21:8, 9) Tûn laiah chuan, Ismaela’n Abrahama ro luahtu tûr a nuihsawh chu, thil ho lam tak anga ngaih ni mah se, thlahtute hun lai chuan chutiang a ni lo. Chu chu Sari chhân lêt dân leh Pathianin Hagari leh a fapa Ismaela hnawt chhuak tûra Sari ngenna a pawmsakna aṭangin a lang a ni. (Gen. 21:10-13) Thlarauva thâwk khum Lehkha Thu-a he thilthleng chipchiar taka chhinchhiah a nihna hian, Aigupta ram ata an chhuah huna tâwp tûr, kum 400 chhûng tihrehtheihna chungchâng hrilh lâwkna inṭanna pawh a târ lang bawk a ni.—Gal. 4:29.
(Genesis 15:16) Tin, chhuan linaah chuan hetah hian an lo kal leh ang; Amor-ho sualnate hi a la kim rih si lo,” a ti a.
it-1-E 778 ¶4
Kal Chhuahna
“Chhuan linaah.” Jehova’n Abrahama hnênah a thlahte chu chhuan linaah Kanaan rama an kîr leh tûr thu a hrilh tih kan hre reng tûr a ni. (Gen. 15:16) Chhinchhiah dânah chuan, chutih hun laia an dam rei zâwng ngaihtuah chungin, Abrahama thuthlung hman ṭan a nih aṭanga Aipupta ram ata an chhuah thleng, kum 430 pumhlûm chhûngin, chhuan li aia tam a awm a ni. Mahse, Israel mite Aigupta rama an awm chhûng tak chu kum 215 chauh a ni. Aigupta ram an luh aṭanga ‘chhuan lina’ chu Israel hnam pakhat, Levia thlah chauh chu entîr nâna hmangin hetiang hian chhût theih a ni: (1) Levia, (2) Kohatha, (3) Amrama, leh (4) Mosia.—Ex. 6:16, 18, 20.
Bible Chhiar
(Genesis 15:1-21) Chûng thil hnuah chuan, “Abram, hlau suh, kei hi i phaw leh i lâwmman nasa tak mai ka ni asin,” tiin, LALPA thu chu Abrama hnênah mumang angin a lo thleng a. 2 Tin, Abrama chuan, “Aw Lalpa PATHIAN, eng nge mi pêk ang, fa nei lovin ka awm hlen dâwn a, ka ro khâwmtu tûr chu Damaska khuaa mi Eliezera hi a ni si a?” a ti a. 3 Tin, Abrama vêkin, “Ngai teh, chi rêng rêng mi thlahtîr si lo va; en teh, ka ina piang hi ka ro luahtu tûr a ni,” a ti a. 4 Tin, ngai teh, “Kha mi kha i ro luahtu tûr a ni lo vang; nangma rîla lo la rah tûr ngei chu i ro luahtu tûr a ni zâwk ang,” tiin LALPA thu chu a hnênah a lo thleng a. 5 Tin, ani chu pâwnah a hruai chhuak a, “Vân lam khi en la, arsite khi i chhiar theih chuan chhiar teh khai,” a ti a. Tin, amah vêkin a hnênah, “I thlahte chu khiti zât khi an la ni ang,” a ti a. 6 Tin, ani chuan LALPA chu a ring a; tichuan, ani chuan chu chu a felnaah a ruatsak ta a. 7 Tin, a hnênah, “He ram hi luah tûra pe tûr chea Kaldai-ho khua Ur ata hruai chhuaktu che LALPA kha ka ni,” a ti a. 8 Tin, ani chuan, “Aw Lalpa PATHIAN, ka luah ang tih engtin nge ka hriat ang?” a ti a. 9 Tin, ani chuan a hnênah, “Bâwngla kum thum mi leh kêlpui kum thum mi leh berâmpa kum thum mi leh thuro leh pârva no mi rawn lâk rawh,” a ti a. 10 Tichuan, chûng zawng zawng chu a rawn lâksak a, a lai takah a phel ṭheuh va, a phel pakhat chu a phel lehlam zâwnah chuan a dah ṭheuh zêl a; savate erawh chu a phel ve lo va. 11 Tin, sava sa hel ei mite chu saruangahte chuan an zuk fu ṭhîn a, Abrama chuan a lo hnawt kiang zêl a. 12 Tin, ni a tlâk dâwn suar suar lai chuan Abrama chu a lo muhîl ta dêr mai a; tin, ngai teh, thim nasa tak, thil râpthlâk zet hian amah a rawn khuh a. 13 Tin, Pathian chuan Abrama hnênah, “I thlahte chu anmahni ram lovah chuan mikhualin an la awm ang a, an rawng an la bâwlsak ang tih chiang takin hre rawh khai; tin, kum 400 an tirethei ang a. 14 Tin, an rawng an bâwksakate chi pawh chu ka la ngaihtuah ang a; tin, chumi hnuah chuan sum tam tak neiin an lo la chhuak ang. 15 Nang erawh chu i thlahtute hnênah thlamuang takin i kal ang a; i lua kêlsam ṭo vekin an phûm ang che. 16 Tin, chhuan linaah chuan hetah hian an lo kal leh ang; Amor-ho sualnate hi a la kim rih si lo,” a ti a. 17 Tin, heti hi a ni a, ni a tlâka khua a lo thim chuan, ngai teh, rawhtuina mei khu mup mup leh chûng sa phel kârah chuan, meichher alh hluah hluah kal kal a lo awm a. 18 Chumi nî chuan LALPA chuan, “He ram hi, Aigupta lui aṭanga lui lian pui (Euphrates lui) thlengin i thlahte ka pe tawh: 19 Ken-ho te, Keniz-ho te, Kadmon-ho te, 20 Hit-ho te, Periz-ho te, Rephaim-ho te, 21 Amor-ho te, Kanaan-ho te, Girgas-ho te, Jebus-ho te nên hian ka pe bawk a,” tiin Abrama hnênah chuan thu a thlung ta a.
FEBRUARY 17-23
PATHIAN THU AṬANGA RO HLUTE | GENESIS 18-19
“‘Lei Chung Zawng Zawng Rorêltu’ Chuan Sodom leh Gomorra A Tiboral”
(Genesis 18:23-25) Tin, Abrahama chuan a va hnaih a, “Mi felte chu mi sualte zîngah i tiboral ve dâwn em ni? 24 Khaw chhûngah chuan mi fel sawmnga tal an awm mahna; a chhûnga mi fel sawmnga awmte avâng chuan khua chu zuah phah lovin i tiboral dâwn em ni? 25 Nang êm chuan chutiang chuan mi felte chu mi sualte anga an awm vena tûra, mi felte chu mi sualte zînga tihhlum ve mai te chu i ti âwm êm si lo va; nang êm chuan i ti âwm êm si lo! Lei chung zawng zawng Rorêltu chuan fel takin a ti dâwn lâwm ni?” a ti a.
“Lei Chung Zawng Zawng Rorêltu” Chuan Thil Dik A Tireng Ṭhîn
“LEI chung zawng zawng Rorêltu chuan fel takin a ti dâwn lâwm ni?” (Genesis 18:25) Mi rinawm Abrahama chuan rinhlelhna a neih avângin he zawhna hi zâwt a ni lo. Jehova’n Sodom leh Gomorra khawpui chungah dikna ṭha famkimin ro a rêl ang tih a rinzia a târ lang zâwk a ni. Jehova chuan ‘mi felte chu mi sualte zîngah a tihlum’ ngai lo vang tih a ring tlat a. Chu chu Abrahama ngaih chuan ‘thil tih âwm a ni lo.’ A hnuah, Jehova’n: “Lungpuia chu, a thiltih a fel famkim; a awm dân zawng zawng chu dân a ni: Pathian rinawm, khawlohna nei lo, fel leh ṭha a ni,” tiin a hrilh a ni.—Deuteronomy 31:19; 32:4.
(Genesis 18:32) Tin, ani chuan, “Aw, Lalpa chu thinur suh ang che, vawi khat chauh chuan ka han sawi leh teh ang: chutah chuan sâwm chauh i hmu a ni mahna,” a ti a. Tin, ani chuan, “Sâwm avâng pawh chuan ka tiboral lo vang,” a ti a.
Dawhtheihna—Thiltum Neia Chhelna
Ni e, dawhtheihna lantîrna kawnga entawn tûr ṭha ber chu Jehova a ni a. (2 Petera 3:15) Jehova’n dawhtheihna nasa tak a lantîr thu Bible-ah kan chhiar fo a ni. (Nehemia 9:30; Isaia 30:18) Jehova’n Sodom khua tiboral tûra thu tlûkna a siam chungchângah Abrahama’n vawi tam tak a zawh laia a chhân lêt dân kha i la hria em? Ani chuan Abrahama thu sawi lai chu a pawtchat lo va. A zawhnate leh a hlauhthâwnnate chu dawhthei takin a ngaihthlâksak a. Tichuan, a hlauhthâwnnate chu a hriatthiampuizia târ langin, Sodom khuaa mi fel sâwm chauh an awm a nih pawhin chu khawpui chu a tiboral lo vang tih a tiam a ni. (Genesis 18:22-33) Jehova chuan dawhthei takin a ngaithla ṭhîn a, a lutukin a châng lêt ngai lo!
(Genesis 19:24, 25) Tin, LALPA chuan Sodom leh Gomorra khaw chungah chuan vâna LALPA hnên aṭang chuan kât leh mei a sûrtîr a; 25 tichuan, chûng khuate leh phaizâwl zawng zawng leh, khuaa mi zawng zawngte leh leia thil ṭote chu a tiboral ta vek a.
Jehova Chu Kan Lal Chungnungber A Ni!
12 Pathian Jehova chuan a lalchungnunna a puang thuai dâwn tih kan hre chiang thei a. Ani chuan suahsualna a dawh kumkhua lo vang a; tin, ni hnuhnûngah kan awm tih kan hre ve bawk. Ani chuan Tuilêtah mi suaksualte chu a lo tiboral tawh a. Sodom leh Gomorra khuate, leh Pharaoa leh a sipaite chu a lo tiboral tawh bawk a. Tin, Sisera leh a sipaite, Senakeriba leh a Assuria sipaite chu Chungnungbera tân eng tham mah a ni lo bawk. (Gen. 7:1, 23; 19:24, 25; Ex. 14:30, 31; Ro. 4:15, 16; 2 Lal. 19:35, 36) Chuvângin, Jehova chuan a hming zah lohna leh a Thuhretute tihduhdahna chu a dawh kumkhua dâwn lo tih kan ring tlat thei a ni. Chu bâkah, tûnah chuan Isua lo awm lehna leh he khawvel suaksual tâwpna chhinchhiahnate chu kan hmu tawh bawk a ni.—Mt. 24:3.
Thlarau Lam Lunghlute Laih Chhuahna
(Genesis 18:1) Abrahama chu chhûn ni lum lai taka puan in kawngka bula a ṭhut laiin, LALPA chu mamre sasaw kiangahte chuan a hnênah a rawn inlâr a;
(Genesis 18:22) Tin, mite chu chuta ta chu an hawi a, Sodom khaw lam chu an pan ta a; Abrahama erawh chu LALPA hmaah chuan a la ding reng a.
w88-E 5/15 23 ¶4-5
Pathian Hmu An Awm Tawh Em?
Tûnah chuan Abrahama’n Pathian aiawha thusawitu mihring taksa pu vântirhkoh hnêna a thusawi chu Pathian Jehova hnêna sawi ang maia târ lan a nih chhan chu kan hriatthiam thei a. Chu vântirhkoh chuan Pathianin Abrahama hnêna a sawi duh ang chiaha a sawi bâkah, Pathian aiawhtu a nih avângin, Bible chuan “LALPA chu . . . a hnênah a rawn inlâr a,” tiin a sawi a ni.—Genesis 18:1.
Mihringin telephone leh radio hmanga thu kan sawi thei ang hian, Pathian aiawha thusawitu vântirhkoh chuan Pathian thuchahte chu dik takin min hrilh thei tih hre reng ang che. Chuvângin, Abrahama te, Mosia te, Manoa te, leh mi dangte’n Pathian hnêna thusawi ang maia mihring taksa pu vântirhkoh hnêna thu an sawi thei chu kan hre thiam thei a ni. Chûng mite chuan chûng vântirhkohte leh anmahnia lang Jehova ropuinate an hmuh theih laiin, Pathian erawh an hmu thei lo. Chuvângin, hei hian tirhkoh Johana thusawi: “Tu mân eng lai mahin Pathian an hmu lo” tih chu eng kawng mahin a kalh lo a ni. (Joh. 1:18) Chûng mite chuan Pathian ni lovin, a aiawhtu vântirhkohte chu an hmu a ni.
(Genesis 19:26) A nupui erawh chu Lota hnung aṭang chuan a lehhawi a, chi khâwn dingah a lo chang ta a.
Rilru Hahna Hmachhawn Thei Tûrin Mi Dangte Chu Ṭanpui Rawh
3 Lota chuan nungchang bawlhhlawh tak Sodom khaw mite zînga awm tûrin duh thlanna ṭha lo tak a siam a. (2 Petera 2:7, 8 chhiar rawh.) Chu ram chu ram hausa tak ni mah se, Lota chuan Sodom khuaa a insawn avângin thil tam tak a chân phah a ni. (Gen. 13:8-13; 14:12) A nupui chuan Jehova thu zâwm lo khawpin chu khawpui, a nih loh leh chuta chêng ṭhenkhatte chu a ngaina niin a lang. Pathianin chumi hmunah mei leh kât a sûrtîr chuan a nun a chân a ni. Lota fanu pahnihte hi han ngaihtuah teh. A hnua boral Sodom khuaa mipate nên khân an lo inhual a. Lota chuan a in leh ro sumte a chân a, chûng ai maha atâna hrehawm zâwk chu, a nupui a chân hi a ni. (Gen. 19:12-14, 17, 26) Chûng hun khirh tak kârah chuan Jehova’n Lota chungah dawhtheihna a hloh em? Hloh lo ve.
Bible Chhiar
(Genesis 18:1-19) Abrahama chu chhûn ni lum lai taka puan in kawngka bula a ṭhut laiin, LALPA chu mamre sasaw kiangahte chuan a hnênah a rawn inlâr a; 2 tin, a han dâk a, a en a; tin, ngai teh, a zâwn lawkah chuan mi pathum an lo ding reng a; tin, a hmuh veleh puan in kawngka ata chu anmahni lâwm tûrin a va tlân a, lei siin chibai a bûk a, 3 “Ka pu, mi khawngaih theih chuan, khawngaih takin i chhiahhhlawh hi mi kalpêl lul suh ang che u; 4 tui tlêm tal rawn la sela, in kete sil ula, thing hnuaiah hian châwl teh rih u. 5 Chhang tlêm tal ka va la ang a, in thinlung tiharh ang che u; chumi hnuah chuan in kal zêl dâwn nia; chumi avânga in chhiahhlawh hnêna lo kal hi in ni châwk ang a,” a ti a. Tin, anni chuan, “I sawi ang chuan va ti rawh,” an ti a. 6 Tichuan, Abrahama chu puan in chhûngah Sari hnênah chuan a lût ta thuai a, “Rang takin chhangphut dip tak tehkhâwng thum siam la, hmet la, chhangpêrahte siam rawh,” a ti a. 7 Tin, Abrahama chu bâwng rual lamah a va tlân a, bâwng no nalh tha zet hi a rawn la a, chhiahhlawh hnênah a pe a; tin, ani chuan a lo siam thuai thuai a. 8 Tin, hnutetui khal te, hnutetui te, bâwng no sa siamte chu a la a, an hmaah a va hlui ta a; tin, thing hnuaiah chuan an kiangah a ding reng a, anni chuan an ei ta a. 9 Tin, anni chuan a hnênah, “I nupui Sari khawiah nge a awm?” an ti a. Tin, ani chuan, “Saw puan inah sâwn,” a ti a. 10 Tin, ani chuan, “Hun hi a lo thlen leh tikah chuan i hnênah ka lo kal leh ngei ngei ang a; tin, ngai teh, i nupui Sari chuan fapa a nei ang,” a ti a. Tin, a hnunga puan in kawngka bul aṭang chuan Sarin a lo hria a. 11 Abrahama leh Sari chu upa tak, tar tawh tak an ni a; hmeichhe dân pângngai chu Sari chungah chuan a reh daih tawh a. 12 Tichuan, Sarin, “Tar ka nih tawh hnu hian lâwmna ka nei ang maw, ka lalpa lah a upa tawh bawk si a?” tiin a rilruin a nui a. 13 Tin, LALPA chuan Abrahama hnênah, “Engati nge Sarin, ‘Kei tar hian fa ka hring êm ang maw?” tiin a nuih? 14 LALPA tân thil rêng rêng a harsa lutuk em ni? Hun ruatah, hun a lo thlen tikah chuan i hnênah ka lo kal leh ang a; tin, Sari chuan fapa a nei ang,” a ti a. 15 Chutichuan, Sari chuan, “Ka nui lo,” tiin a pha a; a hlau si a. Tin, ani chuan, “Awih loh loh tûr; i nuih ngei kha le,” a ti a. 16 Tin, mite chu chuta ta chu an tho va Sodom khaw lam chu an en a; tin, Abrahama chu anmahni thlah tûrin an hnênah a kal ve a. 17 Tin, LALPA chuan, “Ka thil tih tûr hi Abrahama lakah hian ka zêp ang em aw? 18 Abrahama hi chi ropui leh thiltithei tak a lo la ni ngei dâwn a, amahah chuan khawvêla chi tin an la thawveng dâwn si a. 19 LALPA kawng an zawh theih nân a hnua a fate leh a chhûngte, thil fel taka ti tûr leh rorêl anga ti tûra thu a pêk theihna tûrin ani chu ka ruat tawh si a; chutichuan, a chungchâng thu a sawia chu LALPAN Abrahama chunga a thlentîr theihna tûrin,” a ti a.
FEBRUARY 24–MARCH 1
PATHIAN THU AṬANGA RO HLUTE | GENESIS 20-21
“Jehova Chuan A Thutiam Angin Thil A Ti Ṭhîn”
(Genesis 21:1-3) Tin, LALPA chuan a sawi tawh angin Sari chu a zuk kan a, LALPA chuan a sawi tawh angin Sari chungah a tihsak ta bawk a. 2 Tichuan, Sari chu a rai a, Pathianin a hnêna a sawi hun ruat takah chuan Abrahama chu a tar hnuin fapa a hrinsak ta a. 3 Tin, Abrahaman a fapa neih, Sarin a hrinsaka chu a hmingah Isaaka a sa a.
Pathianin Ani Chu “Lal Fanu” Tiin A Ko
Sari chu a nuih avângin rinna a nei lo tihna a ni em? Ni lo ve. Bible chuan: “Rinnain Sari ngei pawhin, a tiamtu chu rinawma a ruat avângin, tar hnu tawhin chi pai theihna a hmu a,” tiin a sawi a. (Hebrai 11:11) Sari chuan Jehova a hria a, a thutiam engpawh a hlen ang tih a ring bawk a ni. Kan zîngah chutiang rinna nghet tak mamawh lo tunge awm ang? Thutak Pathian chu kan hriat chian lehzual a ngai a ni. Chutianga kan tih chuan, Sari’n rinna a neih avângin chutiang thil chu a ti tih kan hria ang. Jehova chu a rinawmin a thutiam engpawh hlen ṭhîntu a ni—a châng chuan, kan tâna mak tak leh min tinui khawpa makin thil a ti pawh a ni mai thei!
“THU A SAWI ZAWNG ZAWNG CHU ZAWM RAWH”
Kum 90 mi a lo nih chuan, Sari chu a dam chhûng zawnga a lo nghah thil avâng chuan a lâwm thei ta a ni. Tûna kum za ni tawh a pasal duh tak tân fapa a hrinsak ta! Abrahama’n naupang chu Pathian sawi tawh angin Isaaka, a nih loh leh “Tinui” tih hming a pe a. Sari chu chau hle mah se: “Pathianin mi tinui ta; mi tin a hria apiangin mi nuihpui ang,” tih a sawi laia a hlim hmêl chu kan mitthla thei a ni. (Genesis 21:6) Jehova pêk he lâwmman mak tak hian Sari chu a thih thlengin a tihlim ngei ang. Mahse, mawhphurhna lian tak pawh a neihtîr bawk a ni.
Isaaka kum nga mi a nihin, an chhûngkua chuan naupang hnutê hnêk bântîr a nih chhinchhiah nân ruai an ṭheh a. Mahse, an vaiin an hlim vek lo. Sari’n a rilru tibuaitu thil pakhat “a hmu a,” tiin kan chhiar a ni. Hagari fapa kum 19 mi Ismaela’n naupang Isaaka chu a nuihsawh a. Hei hi fiamthu anga ti a ni lo. A hnuah, Ismaela’n a tihduhdahna chu tilang tûrin tirhkoh Paula chu thlarauva thâwk khum a ni. Sari’n chu hnehchhiahna thiltih, a fapa ṭhatna tûr dâltu thil hlauhawm tak chu a hmu a. Sari chuan Isaaka chu a fapa mai ni lovin, Jehova thiltumah chanvo ropui tak nei tûra ruat a ni tih a hria a ni. Chuvângin, Abrahama hnênah huaisen tak leh tlang takin a sawi a. Hagari leh Ismaela chu hnawtchhuak tûrin a ngên ta a ni.—Genesis 21:8-10; Galatia 4:22, 23, 29.
Engtin nge Abrahama’n a chhân lêt? “Chu thu chu a fapa avângin Abrahama ngaih chuan thil ṭha lo tak a ni,” tiin kan chhiar a. Ismaela chu a hmangaih a, chu bâkah, pa ber anga a’n ngaihtuah chuan chu thil chu a hre thiam thei lo a ni. Mahse, Jehova chuan thil awm dân chu fiah taka a hmuh avângin a rawn inrawlh ta a. “Pathianin Abrahama hnênah chuan, ‘Naupang chungchâng thu leh i bâwihnu chungchâng thu hi i ngaihin thil ṭha lo tak ni suh se; Sarin i hnêna thu a sawi zawng zawng chu zâwm rawh; Isaakaah hian i thlahte an la ti dâwn si a,’” tiin kan chhiar a ni. Jehova’n Abrahama hnênah Hagari leh naupang chu a enkawl ang tih a tiam a. Mi rinawm Abrahama chuan a zâwm ta a ni.—Genesis 21:11-14.
(Genesis 21:5-7) Tin, Abrahama chu a fapa Isaaka a neih lai chuan kum 100 mi a ni a. 6 Tin, Sari chuan, “Pathianin mi tinui ta; mi tin a hria apiangin mi nuihpui ang,” a ti a. 7 Tin, amah vêkin, “‘Sarin nautête a la pawm ang,’ tih, tuin nge Abrahama hnênah sawi ngaihna hria ang? A tar hnu hian fapa ka hrinsak tâk hi,” a ti a.
(Genesis 21:10-12) Chumi avâng chuan Abrahama hnênah chuan, “He bâwihnu leh a fapa hi hnawt chhuak rawh; he bâwihnu fapa hi ka fapa Isaaka ro luahpuitu tûr a ni thei lo vang,” a ti a. 11 Tin, chu thu chu a fapa avângin Abrahama ngaih chuan thil ṭha lo tak a ni. 12 Nimahsela, Pathianin Abrahama hnênah chuan, “Naupang chungchâng thu leh i bâwihnu chungchâng thu leh bâwih chungchâng thu hi i ngaihin thil ṭha lo tak ni suh se; Sarin i hnêna thu a sawi zawng zawng chu zâwm rawh; Isaaka-ah hian i thlahte an la ti dâwn si a.
(Genesis 21:14) Tichuan, Abrahama chu zîng takah a tho va, chhang leh tuithâwl tuia khat a la a, Hagari a pe a, a kokiah a chhuansak a, naupang pawh chu a kaltîr ta a; tichuan, a kal a, Beer-seba thlalêrah chuan a vâk a vâk ta a.
Thlarau Lam Lunghlute Laih Chhuahna
(Genesis 20:12) Chu achhapah ka farnu a ni rêng bawk si a, ka pa fanu a ni a, ka nu fanu erawh chu a ni lo; tin, ka nupuiah a lo awm ta a ni.
wp17.2 12, ftn.
“Hmeichhe Hmêl Ṭha Tak I Ni”
Sari chu Abrahama farnu a ni a. An pa chu Tera a ni a, an nute erawh a inang lo. (Genesis 20:12) Tûn laiah chutianga inneihna chu thiang lo mah se, an hun lai chu tûn kan hun lai nên a inang lo hle tih chhinchhiah chu thil pawimawh tak a ni. Mite chu Adama leh Evi te hloh tâk ṭhat famkimna nên an la inhnaih hle a. Chutianga mi hrisêlte tân chuan, chhûng khat hnaite neih chu fa piangsual hrinna a ni lo. Mahse, a hnu kum 400 vêlah chuan mite dam rei zâwng chu kan hun lai ang bawk a lo ni a. Chutih hunah chuan, Mosia Dân chuan chhûng khatte nêna inneih chu a khap ta a ni.—Leviticus 18:6.
(Genesis 21:33) Tin, Abrahama chuan Beer-seba-ah chuan fâr thing a phun a, chutah chuan LALPA, Chatuana Pathian hming chu a lam a.
w89-E 7/1 20 ¶9
Abrahama—Pathian Ṭhian Ni Duh Zawng Zawngte Tâna Entawn Tûr
9 Abrama chuan rinna thiltih dang a lantîr leh a. Bible chuan: “Chutah chuan . . . LALPA tân chuan maichâm a siam a,” tiin a sawi. (Genesis 12:7) Hebrai ṭawnga “maichâm” tih thu mal hian “inthawina hmun” tih awmzia a neih avângin, chutah chuan ran inthawina pawh a tel ngei a rinawm. A hnuah, Abrama chuan chutiang rinna thiltihte chu hmun dangah pawh a lantîr zêl a. Chu bâkah, “LALPA hming chu a lam a.” (Genesis 12:8; 13:18; 21:33) Hebrai ṭawnga “hming chu a lam,” tih hi “hming chu a puang chhuak (hril)” tihna pawh a ni. Chuvângin, Abrama chhûngte leh Kanaan mite chuan Abrama’n huaisen taka a Pathian Jehova hming a puang chu an hre ngei ang. (Genesis 14:22-24) Chutiang bawkin, tûn laiah pawh, Pathian ṭhian nih duhtu zawng zawngte chuan rinnain a hming an lam tûr a ni. Chutah chuan, vântlâng hmaa thuhrilhna pawh a tel avângin, “faka inthawina hi Pathian hnênah i hlân fo vang u, chu chu a hming ṭanna hmuite rah a ni” si a.—Hebrai 13:15; Rom 10:10.
Bible Chhiar
(Genesis 20:1-18) Tin, Abrahama chu chuta ṭang chuan chhim ram lam panin a insawn a, Kades khua leh Sur kârah chuan awm hmun a khuar a; Gerar khuaah chuan a awm ta rih bawk a. 2 Tin, Abrahaman a nupui Sari chu, “Ka farnu a ni,” a ti a; tichuan, Gerar lal Abimeleka chuan mi a tîr a, Sari chu a va hruaitîr ta a. 3 Nimahsela, Pathian chu zânah a mumangah Abimeleka hnênah a lo kal a, a hnênah, “Ngai teh, i hmeichhe hruai avâng hian mitthi mai i ni ta; mi nupui a ni si a,” a ti a. 4 Abimeleka erawh chuan a la pâwl rih lo va; tichuan, “Lalpa, mi fel takte pawh i tihlum dâwn em ni? 5 Amah ngei pawhin ka hnênah, ‘Ka farnu a ni,’ a ti lâwm ni? Tin, ani ngei pawhin, ‘Ka nuṭa a ni,’ a ti bawk si a; thinlung ṭha tak pu leh kut thianghlim tak nei chungin hei hi ka ti a ni,” a ti a. 6 Tin, Pathianin a mumangah chuan, “Ni e, hei hi thinlung ṭha tak pu chungin i ti a ni tih ka hria e. Tichuan, kei pawhin ka chunga i thil tihsual tûr chu ka khap che a ni; chuvângin a ni, amah i khawih ka phal loh ni. 7 Chutichuan, tûnah mi nupui kha pe kîr leh rawh; ani chu zâwlnei a ni si a, a ṭawngṭaisak ang chia, tin, i dam dâwn nia. I pêk kîr leh loh zawgin i thi ngei dâwn tih hre rawh, nang leh i neih zawng zawngte nên,” a ti a. 8 Tichuan, Abimeleka chu zîng takah a tho va, a chhiahhlawh zawng zawng a ko va, an beng hriatah chûng thu zawng zawng chu a hrilh a; tin, mite chuan an hlau ta êm êm a. 9 Chutichuan, Abimeleka chuan Abrahama a ko va, a hnênah, “Kan chunga i thiltih hi eng tizia nge ni le? Eng kawngah nge i chungah thil ka tihsual a, kei leh ka khua leh tuite chungah hian thil sual nasa tak i rawn thlen hi le? Thil tih âwm loh tak hi ka chungah i tih tâk hi,” a ti a. 10 Tin, Abimeleka vêk chuan Abrahama hnênah, “Eng nge i hmuh a, hetiang thil i tih le?” a ti leh a. 11 Tin, Abrahama chuan, “He mi khuaah hian Pathian ṭihna a awm hauh lo ngei ang a, ka nupui avâng hian mi tihlum mai ang tih ka rin vâng a ni. 12 Chu achhapah ka farnu a ni rêng bawk si a, ka pa fanu a ni a, ka nu fanu erawh chu a ni lo; tin, ka nupuiah a lo awm ta a ni. 13 Tin, heti hi a ni a, Pathianin ka pa in ata mi vahvaihtîr lai khân, a hnênah, ‘Hei hi i khawngaihna ka chunga i lantîr tûr chu a ni: kan thlenna hmun apiangah, “Ka nuṭa a ni” ti zêl ang che,’ ka ti rêng a ni,” a ti a. 14 Tin, Abimeleka chuan bêramte leh bâwngpate leh bâwihpate leh bâwihnute a hruai a, Abrahama chu a pe a, a nupui Sari pawh chu a pe kîr leh ta a. 15 Tin, Abimeleka chuan, “En teh, ka ram chu a awm duai alâwm, i duhna apiangah hian awm rawh,” a ti a. 16 Tin, Sari hnênah chuan, “En teh, i nuṭa hi tangka sângkhat ka pe ta a; ngai teh, i hnêna awm zawng zawngte lakah chuan i tân mit khuhna tûr a nih hi; i chung thu rêng rêngah hian i fel leh tawh vek a ni,” a ti a. 17 Tichuan, Abrahama chuan Pathian hnênah a ṭawngṭai a; tin, Pathianin Abimeleka leh a nupui leh a bâwihnute chu a tidam leh a; tichuan, fate an hring leh ta a. 18 Abrahama nupui Sari avâng chuan LALPA chuan Abimeleka chhûngte zawng zawng chu a tiching ta tlat hlawm si a.