Pathian Rama Lal Chu Tu Nge Ni?

• Pathian thlan a ni ang. “Keimah ngeiin . . . ka lal siam chu ka ṭhuttîr ta a ni, . . . I rochun atân hnam tin ka pe ang chia, kâwlkil tâwp thlengin i ro atân ka pe bawk ang che.”—Sâm 2:6, 8.

• Lal Davida thlah a ni ang. “Kan tân naupang a lo piang a, fapa pêkin kan awm ta a . . . A ram a zau zêl ang a, a ramah remnain tâwpintai a nei lo ang; Davida lalṭhutthlêngah a ṭhu ang a, . . . a rawn tinghet ang.”—Isaia 9:6, 7.

• Bethlehemah a piang ang. “Nang Bethlehem . . . , nangma lak aṭang hian . . . rorêltu tûr chu ka tân a lo chhuak ang a; . . . ani chu lei tâwp thlengin a ropui dâwn si a.”—Mika 5:2, 4.

• Mite hnâwl leh tihhlum a ni ang. “Ani chu hmuhsitin a awm a, keini lah chuan ani chu kan ngaisâng si lo . . . ani chu kan bawhchhiatnate avângin hliamin a awm a, kan khawlohnate avângin vuak thitlinin a awm a.”—Isaia 53:3, 5.

• Thihna ata kaihthawh leh chawimawi a ni ang. “Ka thlarau Seol hnênah i hnutchhiah dâwn si lo va: I mi thianghlim hi ṭawihna hmuh i phal dâwn hek lo. . . . I kut ding lamah chuan kumkhaw lâwmna tûr a awm a.”—Sâm 16:10, 11.

Isua Krista—Rorêltu Atâna Tling Ber Chu

Mihring chanchin tluanchhuakah, a chunga târ lan zawng zawngte nêna inmil awm chhun Rorêltu pakhat chauh a awm a, ani chu Isua Krista a ni. Dik tak chuan, vântirhkoh pakhatin Isua nu Mari hnênah: “Lal Pathianin a hnênah a thlahtu Davida ṭhutphah chu a pe ang a, . . . a ramin kin ni a nei lo vang,” tiin a sawi.—Luka 1:31-33.

Isua chu leia rorêltu a ni ngai lo vang. Chu aiin, Pathian Rama Lal niin, vân aṭangin mihringte chungah ro a rêl dâwn a ni. Engin nge ani chu rorêltu ṭha ber nihtîr? Leia a awm laia a thiltihte kha han ngaihtuah teh.

• Isua chuan mite a ngaihsak. Isua chuan mite ṭo bul leh nihnate chu engpawh ni se, a hmei a pa, a pui a pangte chu a ṭanpui a. (Matthaia 9:36; Marka 10:16) Phâr pakhatin: “I duh chuan mi tithianghlim thei e,” tia a ngen khân, Isua chuan a khawngaih êm avângin a tidam ta a ni.—Marka 1:40-42.

• Isua chuan Pathian tihlâwm dân min zirtîr. Ani chuan: “Pathian leh sum rawng in bâwl kawp thei lo,” tiin a sawi a. Cheibâwl kan duh dân anga mi dangte pawh cheibâwl tûrin min fuih a, chu thu bul chu a hnuah Dân Rangkachak tia hriat a ni. Chu bâkah, Pathian chuan kan thiltihte chauh ni lovin, kan ngaihtuah dân leh rilru awm dânte pawh a ngaihven tih a târ lang bawk. Chuvângin, Pathian tilâwm tûr chuan thinlunga kan ngaihtuahnate chu kan thunun a ngai a ni. (Matthaia 5:28; 6:24; 7:12) Hlimna dik tak nei tûr chuan Pathianin ti tûra min duhte zîr a, kan tih a ngai tih Isua’n a sawi uar hle.—Luka 11:28.

• Isua chuan mi dangte hmangaih dân min zirtîr. Isua thusawi leh thiltihte chuan thil a titheiin, a thu ngaithlatute thinlung a hneh hle a. “Mipuiten a thu zirtîr chu mak an ti hle a; lehkhaziaktute ang lova, thuneihna nei âwm taka anmahni a zirtîr avângin.” (Matthaia 7:28, 29) Chûng mipuite hnênah chuan: “In hmêlmate chu hmangaih ula,” tiin a fuih a ni. Chu bâkah, a thihnaa mawhphurtute tân: “Ka Pa, anni hi ngaidam rawh; an thiltih hi an hre lo a nih hi,” tiin a ṭawngṭaisak bawk.—Matthaia 5:44; Luka 23:34.

Isua chu mite ṭanpui duhtu leh ngilnei tak a nih avângin khawvêl Rorêltu ṭha tak ni tûrin a tling tak zet a ni. Mahse, engtikah nge ro a rêl ṭan ang?