Nun leh Rawngbâwlna Inzirna Lehkhabu Atâna Thu Lâk Chhuahnate
NOVEMBER 1-7
PATHIAN THU AṬANGA RO HLUTE | JOSUA 18-19
“Jehova Ram Ṭhen Dân Finthlâk Tak”
it-1-E 359 ¶1
Ramri
Hnamte zînga ram insem dân chu thil pawimawih pahnihin a thunun niin a lang: ṭhum vâwrna leh a hnam tam dân azirin. Ṭhum vâwrna chu hnam tinte awmna tûr hmun tihchian nân chauhva hman a nih a rinawm; chutiang chuan Chhim lamah nge Hmâr lamah, Chhak lamah nge Thlang lamah, a nih loh leh tuipui kam phai zâwlah nge tlâng ramah an awm dâwn tih a hriat theih ang. Ṭhum vâwrna hmanga thu tlûkna siam chu Jehova thu nêna inmila tih a nih avângin, chu chuan hnamte zîngah inîtsîkna leh inhnialna awm lo tûrin a ṭanpui ang. (Thuf. 16:33) Chutiang chuan, hnam tinte dinhmun chu Genesis 49:1-33-naa chhinchhiah, thlahtu Jakoba’n a thih dâwna thlarau thâwk khuma hrilh lâwkna a sawi nên a inmil theih nân Pathianin an thiltihte chu a kaihruai dâwn a ni.
it-1-E 1200 ¶1
Rochan
Ram rochan. Jehova’n Israel thlahte hnênah an rochan tûr a pe a, a rami chin tûrte chu Mosia a hrilh a ni. (Num. 34:1-12; Jos. 1:4) Tichuan, Mosia’n Gada thlah te, Reubena thlah te, leh Manasea thlah hnam chanve te hnênah an chanpual tûr ramte chu a pe a. (Num. 32:33; Jos. 14:3) Josua leh Eleazara kaihhruainain Israel thlahte zînga hnam dang la awmte pawhin an chanpual tûr rochante an dawng a. (Jos. 14:1, 2) Genesis 49:5, 7-a Jakoba hrilh lâwkna nêna inmilin, Simeona leh Levia hnênah chuan a hranga rochan pêk an ni lo. Simeona chanpualte chu (khawpui ruat hransakte nên) Juda thlahte chan zînga mi a ni a, (Jos. 19:1-9), Levia erawh chuan Israel ram pumpuiah khawpui 48 a chang a ni. Levi-ho chuan hmun thianghlima rawngbâwl theihna chanvo hlu an dawn avângin, Jehova chu an rochan anga sawi a ni a. Anni chuan sâwma pakhat chu an rawngbâwlna atâna an chanpual, a nih loh leh rochan angin an dawng a ni. (Num. 18:20, 21; 35:6, 7) Chhûngkuate chu an thlahte dawn rochan chhûnga chanvo pêk an ni a. Chhûngkua an pun chhoh zêla, fapate an neih belh zêl chuan, an ram chu ṭhen hran zêl niin a tê tial tial a ni.
it-1-E 359 ¶2
Ramri
Ṭhum vâwrna hmanga hnam khat awmna tûr hmun an tihchian tawh chuan, a pahnihna ṭanchhanin an awmna ram zau zâwng tûr chu an tihchian leh a ngai a. “A chi zir ang zêlin ṭhum vâwrin ram chu in luah ang a, a rual deuhte chu ram zau deuh in pe ang a, a rual lo deuhte chu ram zîm deuh in pe ang: ṭhum vâwra a tlûkna apiang chu an pual a ni ang a; in pi leh pute chi kal dân ang zêlin in luah tûr a ni.” (Num. 33:54) Ṭhum vâwrna hmanga an awmna hmun tûr chungchânga thu tlûkna an siam chu tihdanglam tûr a ni lo va; mahse, chuta chêng tûr zât azirin a ram zau zâwng tûr erawh siamrem theih a ni a. Chuvângin, Juda chanpual chu a zau êm avângin, an chanpual ṭhenkhat chu Simeona thlahte hnêna pêk ṭhen a ni.—Jos. 19:9.
Thlarau Lam Lunghlute
it-1-E 359 ¶5
Ramri
Jordan Thlang lampanga ram insemna thu chuan a hmasain Juda (Jos 15:1-63), Josefa (Ephraim) (Jos. 16:1-10), leh Jordan Thlang lampanga awm Manasea thlah hnam chanvete chanpual (Jos. 17:1-13) tân ruat a niin, an ramri leh khuate pawh ruat leh chhiar vek a ni tih a târ lang a. Chumi hnuah, Israel-ho riahhmun chu Gilgal khua aṭanga Silo khuaa insawn nia târ lan a nih avângin, ram insemna chu tihkhaihlak niin a lang. (Jos. 14:6; 18:1) Chutianga tihkhaihlak a nih hun rei lam chu târ lan ni lo mah se, a tâwpah, Josua’n hnam sarih la bângte chu ram luah chungchânga an muan chân avângin a hau va. (Jos. 18:2, 3) Hnam sarihte rilru put hmang chungchângah hrilhfiah dân chi hrang hrang a awm a, mi ṭhenkhat chuan ram lâk a nih chhûngin ram ṭiau tam tak a awmna leh Kanaan mite beihna laka eng emaw chen zalênna an neihna chuan chûng hnamte chu ram la bângte chu hmanhmawh taka luah ngai lo nia inhriatna a neihtîr thei niin an sawi a. Hmêlma chak takin an lo beih lêt avânga lo awm harsatnate chu hmachhawn an hreh vângin an vuaicha a ni thei ang. (Jos. 13:1-7) Chu bâkah, Ram Tiama he lai hmun hi an ram luah tawh hmun dangte aiin an hre chiang loh lehzual pawh a ni thei bawk.
NOVEMBER 8-14
PATHIAN THU AṬANGA RO HLUTE | JOSUA 20-22
“Inhriatsualna Aṭanga Zir Tûrte”
w06-E 4/15 5 ¶3
I Kawppui Nêna Inbiak Pawh Dân Kawngte
Tlang taka inbiak pawhna chuan inhriat thiam lohna leh inhriat sualnate awm lo tûrin a vêng thei a. Israel mite chanchin tîr lam khân, Jordan Lui chhak lama awm Reubena thlah te, Gada thlah te, leh Manase hnam zâtvete chuan Jordan lui kamah chuan “maichâm liannpui langsâr tak” an siam a. Israela thlah hnam dangte chuan an thiltih chu an hre sual a ni. Jordan thlang lama awm hnamte chuan râl lehlama awm an unaute chu kal pêng ta emaw an tih avângin, chûng ‘helte’ nêna indo tûrin an inbuatsaih a. Mahse, an inbeih hmain, lui chhak lama hnamte nêna inbe pawh tûrin palaite an tîr a. Hma lâkna fing tak a va ni êm! Maichâm chu dân lo taka siam hâlral thil hlân, a nih loh leh inthâwina tûr a ni lo tih an hre ta a ni. Chu aiin, lui chhak lama awm hnamte chuan an unau hnam dangin nakinah: “LAPAAH chanpual in nei ve lo ve,” tia an sawi an hlauh vâng a ni. Chu maichâm chuan anni pawh Jehova betute an ni tih a hriattîr a ni. (Josua 22:10-29) Chu maichâm chu Ed tiin an ko va, a chhan chu Jehova chu Pathian dik a ni tih a hriattîr avâng a ni thei ang.—Josua 22:34.
‘Inremna Tûr Thilte Chu Um Rawh U’
Israel mi ṭhenkhat chuan an thil sual tih finfiahna ṭhahnem tâwk a awm tawhah ngaiin, an lama ṭangte an thih tlêm zâwk nân a rûka han beih mai chu an tum a. Amaherawhchu, hmanhmawh taka chêt han lâk ai chuan, Jordan thlang lama awm hnamte chuan an unaute nêna buaina sawiho tûrin palai an tîr a ni. Anni chuan: “Israelte Pathian chungah engnge maw in tihsual le, LALPA chungah vawiinah hian hel tuma maichâm siamin vawiinah hian LALPA chu in hawisan le?” tiin an zâwt a. A nihna takah chuan, maichâm satu hnamte chuan thil engmah an tisual lo. Mahse, chutiang puhna chu engtin nge an chhân lêt ang? Anmahni puhtute chu ṭawngkamin an bei lêt dâwn nge ni a, an be duh lo zâwk dâwn? Puha awmte chuan ṭawngkam nêm taka chhângin, an thiltih chu Jehova rawngbâwl châk vânga ti an nihzia fiah takin an hrilh a ni. An chhân lêt dân chuan Pathian nêna an inlaichînna a vên him bâkah nun a chhanhim bawk a. Dam taka sawihona chuan buaina a chingfelin, remna a awmtîr leh a ni.—Jos. 22:13-34.
Thlarau Lam Lunghlute
it-1-E 402 ¶3
Kanaan
Kanaan mi tam tak chuan hnehna lian tham takte lakah dam khawchhuakin rahbehnate chu do lêt thei mah se, Israelte chungchângah “LALPAN an thlahtute chhechhama pêk a lo tiam tâk ram zawng zawng chu Israelte chu a pe a,” an awmna “hmun tinah muanna” awmtîrin, “LALPAN Israela chhûngte hnêna a ṭha lam thu a lo sawi zawng zawng kha thlâwn rêng rêng a awm lo va, a lo thleng vek,” tia sawi theih a ni. (Jos. 21:43-45) Israelte chhehvêla awm hmêlmate chu an hlauh avângin, Israelte tân hlauhawm tham an tling lo. Pathianin ram a ṭiau loh nân leh ramsate an pun thut loh nân Kanaan mite chu “zawi zawiin” a hnawhchhuahsak dâwn tih a lo sawi tawh a ni. (Ex. 23:29, 30; Deut. 7:22) Kanaan mite chuan thîr tawlailîrte pawh tiamin, indona hmanrua ṭha tak takte nei mah se, Israelte chak lohna eng pawh chu Jehova’n a thutiamte a hlen loh vâng nia ngaih theih a ni lo. (Jos. 17:16-18; Ro. 4:13) Chu aiin, Israel mite’n hneh loh châng an neih chhan chu an rinawm lohna avâng zâwk a ni tih Bible chuan a târ lang.—Num. 14:44, 45; Jos. 7:1-12.
NOVEMBER 15-21
PATHIAN THU AṬANGA RO HLUTE | JOSUA 23-24
“Israelte Hnêna Josua Thurâwn Pêk Hnuhnûng Ber”
it-1-E 75
Ṭanrualna
Israel mite’n Kanaan ram, Ram Tiama an luh khân, an hneh ngai dinhmun danglam a awm a. Chungnungber Pathian chuan Israelte chu an thlahtute hnêna a thutiam thlen famkim nân ram chu a luahtîr ta ngei a. Hnam dang mite anga lût an nih loh avângin, Jehova chuan ram chhûnga awm milem bia hnam dang mite chu thurualpui lo tûrin a khap a ni. (Ex. 23:31-33; 34:11-16) Anni chuan an hnawh chhuah tâk hnam dânte ni lo vin, Pathian dânte leh thupêkte chauh an zâwm tûr a ni. (Lev. 18:3, 4; 20:22-24) A bîk takin, chûng hnamte nêna nupui pasala inneih pawlh lo tûra vaukhân an ni a. Chutianga ṭanrualpuina chuan anni chu milem bia an nupuite nên chauh ni lovin, milem biakna nêna inkûngkaih thilte leh an sakhaw dik lo thiltihte nên a inhnamhnawhtîr ang a, chu chu an tân kalpênna leh thang a ni ang.—Deut. 7:2-4; Ex. 34:16; Jos. 23:12, 13.
Jehova Thusawi A Thlâwn Ngai Lo
19 Kan mit ngeia kan hmuh aṭang chuan: “LALPA in Pathianin in chungchâng a ṭha lam a lo sawi tawh zawng zawngte kha thlâwn pakhat mah a awm lo . . . in chungah a lo thleng ta vek a, pakhat mah thlâwn a awm lo ve,” tiin chiang takin kan sawi thei a ni. (Josua 23:14) Jehova chuan a chhiahhlawhte chu a chhan chhuak a, a vênghimin, a chhawmdâwl bawk a ni. A thutiam a hun ruat taka thleng famkim lo pakhat tal sawi tûr i hria em? Chu chu thil awm thei a ni lo. Pathian Thu rin tlâk tak chu kan ring tlat si a.
20 Eng hmabâk nge awm? Kan zînga a tam zâwkte hi chuan lei paradis nuam taka nun chu kan beisei thei tih Jehova chuan min hrilh a. Kan zînga tlêm tê hian vâna Krista nêna rorêl tûrin beiseina an nei thung a ni. Kan beiseina chu eng pawh ni se, Josua anga rinawm chhan tûr kan nei chiang hle. Kan beiseite a taka chan hun chu a lo thleng ngei ang. Chutih hunah chuan Jehova thutiam tawh zawng zawngte chu thlîr lêtin, keini pawhin: “A lo thleng ta vek a,” tiin kan sawi ve thei ngei ang.
Thlarau Lam Lunghlute
Josua Bu Aṭanga Thu Pawimawh Hrilhfiahna
24:2—Abrahama pa, Tera chu milem betu a ni em? Atîr chuan Tera chu Pathian Jehova betu a ni lo. Hmân lai Ur khawpuia pathian lâr tak thlapui (moon) pathian Sin an tih chu a biak a rinawm hle. Judate thurochhiah sawi dân aṭangin, Tera chu milem pathian chhertu a ni hial mai thei a ni. Nimahsela, Abrahama’n Ur khawpui a chhuahsan khân, a rualin Tera chu Haran-ah a kal ve a ni.—Genesis 11:31.
NOVEMBER 22-28
PATHIAN THU AṬANGA RO HLUTE | RORELTUTE 1-3
“Huaisen Taka Phiarrûkna Chanchin”
w04-E 3/15 31 ¶3
Ehuda’n Hnehchhiahtute Nghâwngkawl A Titliak
Ehuda thiltum hlawhtlin chhan chu a fin vâng emaw, hmêlmate chak loh vâng emaw a ni lo. Pathian thiltum hlawhtlinna chu mihringte thiltihah a innghat lo va. Ehuda hlawhtlin chhan ber chu Pathian mite chhuah zalên tûra a duh zâwng mila thil a tih avânga Pathian ṭanpuina a dawn vâng a ni. Pathianin Eduda chu a ṭanpui a, “LALPAN [a mite tân] rorêltute a rawn siamsak chuan, LALPA chu rorêltu hnênah chuan a awm a.”—Rorêltute 2:18; 3:15.
w04-E 3/15 30 ¶1-3
Ehuda’n Hnehchhiahtute Nghâwngkawl A Titliak
Ehuda hma lâkna hmasa ber chu a kawr chhûnga thuh rûk theih khawpa tawi, khandaih hriam tawn ‘chher’ a ni a. Ani chuan amah an endik dâwn tih a beisei mai thei. Khandaihte chu kut ding lama awlsam taka phawi theih a nih nân, taksa vei lamah an vawng tlângpui ṭhîn a ni. Veikhawr Ehuda chuan a khandaih chu lal vêngtute’n an zawn lohna tûr “a malpui ding lam puan hnuaiah a taivawn a.” Chuvângin, dangtu awm lovin, “Moab lal Eglona chu lâwmman chu a han pe a.”—Rorêltute 3:16, 17.
Eglona rorêl ṭan tir lama thilthleng chu chipchiar taka târ lan a ni lo va. Bible chuan: “Lâwmman a han pêk zawh veleh chuan, lâwmman kengtute chu a kaltîr leh ta a,” tiin a sawi mai a ni. (Rorêltute 3:18) Ehuda chuan lâwmman chu a pe a, Eglona awmna hmun aṭanga hla fê thlengin, lâwmman kêngtute’n an zui a, anmahni a kîrtîr hnuah chuan ani chu a lêt leh a ni. Engvângin nge? Anni chu amah vênghimtu atâna hruai a ni em? A nih loh leh, tih dân pângngai a nih avânga hruai ngei a nih a, a nih loh leh anni chu lâwmman kengtute mai a ni zâwk? Chu bâkah, a thiltum a tihhlawhtlin hmain anni chu hmun hima awmtîr a duh vâng nge ni ang? A ngaihtuahna chu engtiang pawh lo ni se, Ehuda chuan huaisen takin amahin a lo lêt leh a ni.
“[Ehuda] erawh chu Gilgal khaw kianga lung chherna hmun aṭangin a lêt leh a, ‘I e lalpa, thurûk hrilh tûr che ka nei,’ a ti a.” Eglona awmna hmuna a va luh theih dân chu Bible-ah târ lan a ni lo. Vêngtute chuan rinhlelhna an nei lo em ni? Israel mi pakhat mai chu an lal tân hlauhawm thamah an ngai lo em ni? Ehuda amah chauhva a lo lêt lehna chuan ani chu a mite phahsantu angin a lantîr em? A enga pawh chu ni se, Ehuda chuan lal chu a mi mala hmuh a tum a, a hmu ta rêng a ni.—Rorêltute 3:19.
Thlarau Lam Lunghlute
Rorêltute Bu Aṭanga Thu Pawimawh Hrilhfiahna
2:10-12. ‘Jehova thiltih ṭhatte’ kan theihnghilh loh nân Bible zir tûrin hun duan ṭha kan nei tûr a ni. (Sâm 103:2) Nu leh pate chuan an fate thinlungah Pathian Thu, thutak chu an tuh tûr a ni.—Deuteronomy 6:6-9.
NOVEMBER 29–DECEMBER 5
PATHIAN THU AṬANGA RO HLUTE | RORELTUTE 4-5
“Jehova’n A Mite Chhanchhuah Nân Hmeichhe Pahnih A Hmang”
w15-E 8/1 13 ¶1
‘Israel Ram Nu Angin Ka Che’
Sisera! Chu hming chuan Israel ramah hlauhna leh thlabârna a thlen a ni. Naupang inthâwina leh biak ina nawhchizuarte awmna, Kanaan mite sakhua leh hnam dânte chu a rawng hle a. Kanaan mite sipai lal leh a sipaite’n ram an thunun chuan, ram chu eng ang dinhmunah nge a awm tâk? Debora hla chuan ram chhûnga zin vah chu thil theih loh tluk leh khuaahte chuan tu mah an awm ngam lo tih a târ lang a. (Rorêltute 5:6, 7) Mite chuan khaw kulh nei lova thlai chîn chu an hlauh êm avâng leh suamhmang tâwka, an fate chhuhsak a, an nupuite an mutpui an hlauh avânga kawnga khualzin ngam lo va, ramngâwa tlânchhiaa an biru laite chu i mitthla mai thei a ni.
w15-E 8/1 13 ¶2
‘Israel Ram Nu Angin Ka Che’
Jehova’n a hnam luhlûl takin inthlâk danglam a duh tih finfiahna a hmuh hma chu, a nih loh leh thlarauva thâwk khum Debora leh Baraka hlaa: “Kei Debori ka chêt a, Israel ram nu hi ka chêt hma loh kha chuan” tia chhinchhiah angin, kum 20 chhûng chu nunrâwng taka awpbeh an ni a. Lappidotha nupui Debori chu fa nei nu tak tak a nih leh nih loh kan hre lo va; mahse, chu ṭawngkam chu entîr nei a nih a rinawm. Dik tak chuan, Jehova’n Debori chu nu anga ram humhim tûrin a ruat a ni. Ani chuan rinna nghet tak nei, Rorêltu Baraka ko chhuak tûr leh Sisera do tûra hrilh tûrin thu a pe a ni.—Rorêltute 4:3, 6, 7; 5:7.
w15-E 8/1 15 ¶2
‘Israel Ram Nu Angin Ka Che’
Jaeli chuan a ngaihtuah vat a. Sisera chu chawlh hahdamna tûr hmun a pe a. Ani chuan amah rawn zawngtute hnênah a awm tih hril lo tûrin thu a pe a. Jaeli chuan ani chu a mutna hmunah puanin a khuh a, in tûr tui a dîl chuan bâwnghnute a pe a. Rei vak lovah, Sisera chu a muhîl ta thuai a. Tichuan, Jaeli chuan puan ina awm hmeichhiate’n thiam taka an hman ṭhin khenkilhna leh tuboh a la a. Sisera lu nghahna lamah bawk vâkin zâwi têin a va pan a, Jehova aiawha tiboraltu angin, hna hlauhawm tak thawh tûr a hmachhawn ta a ni. Mumal lo taka thiltih, a nih loh leh tîmna chhe tê pawhin chhiatna a thlen thei a ni. Jaeli chuan Pathian mite leh kum rei tak chhûng he pa nunrawnziate a hre chhuak em? A nih loh leh, Jehova tâna hmalâk theihna chanvo hlu a neihte chu a ngaihtuah em? Bible-in eng mah a sawi lang lo. Mahse, Rei rial lovin a khêng hlum ta tih chauh kan hria a ni. Sisera chu a thi ta!—Rorêltute 4:18-21; 5:24-27.
Thlarau Lam Lunghlute
Rorêltute Bu Aṭanga Thu Pawimawh Hrilhfiahna
5:20—Engtin nge vâna arsite’n Baraka tân râl an beih? Bible chuan chu chu vântirhkoh ṭanpuina emaw, Sisera mi fingte’n vânduaina thlentu anga an hrilhfiah vân sâng boruak aṭanga leia bawlhhlawh lo tla emaw, a nih loh leh Sisera tâna arsia aienna a lo thleng dik lo emaw a nih leh nih loh a sawi lang lo. Mahse, rinhlelh rual lohvin, Pathian chu indonaah kawng engemaw tak hmangin a inrawlh a ni.
DECEMBER 6-12
PATHIAN THU AṬANGA RO HLUTE | RORELTUTE 6-7
“He I Chakna Hian Kal La”
w02-E 2/15 6-7
Pathian Dân Bulte Chu I Hlâwkpui Thei
Mahni leh mahni inâwm tâwk chauhva inthlîr a, mahni hlutna pawh fak chiam lotu chu hmân lai Hebrai mite zînga rorêltu Gideona a ni a. Ani chuan Israel mite hruaitu nih chu a tum lo va. Mahse, hruaitu ni tûra ruat a nih khân, a phu lohzia a inhre zâwk a ni. “Manasea thlah zîngah hnam rethei ber kan ni a, kei lah hi ka pa chhûngte zînga tê ber ka ni si a,” tiin a sawi a ni.—Rorêltute 6:12-16.
w05-E 7/15 16 ¶3
“Lalpa leh Gideona Ngûnhnâm!”
Tûnah chuan, Midian-hovin hlauh namên lovin an hlau ta! Thâwklehkhatah, bêl 300 keh sawm ri te, tawtawrâwt 300 ham ri te, leh mi 300 au thâwmte avângin zân reh tak mai chu zân bengchheng takah a chang ta. Midian-ho chu a bîk takin, “Lalpa leh Gideona ngûnhnâm!” tih au thâwm ri an hriat avângin, an hlau lutuk chu an au chêl chûl ta mai a ni. Chûng rite kârah chuan, chhiatna lo thleng tûr chu ṭhiante hnêna hrilh hriat theih pawh a ni lo. Pathianin hmêlmate chu anmahni leh anmahni khandaiha a inbeihtîr laiin mi 300-te chu an dinna ngaiah an ding reng a. Midian-ho riah hmun tihchhiat a nih hnuah, tlân chhuahna an neih loh avângin, tihhlum an ni ta vek a ni. Tûnah chuan, hun rei tak chhûng rawng taka thil an lo tihna chu a tâwp ta a ni.—Rorêltute 7:19-25; 8:10-12, 28.
Thlarau Lam Lunghlute
Rorêltute Bu Aṭanga Thu Pawimawh Hrilhfiahna
6:25-27. Gideona chuan a dodâltute ṭûl lo taka tithinur lo tûrin remhriatna a hmang a. Chanchin ṭha kan hrilhin, kan ṭawng dân hmanga mite ṭûl lo taka tithinur lo tûrin kan fîmkhur tûr a ni.
DECEMBER 13-19
PATHIAN THU AṬANGA RO HLUTE | RORELTUTE 8-9
“Inngaihtlâwmna Chu Chapona Aiin A Ṭha Zâwk”
w00-E 8/15 25 ¶3
Engtin Nge Ngaih Dân Inan Lohnate Chu I Chinfel Ang?
Midian mite beihnaa nasa taka tel Gideona chuan Ephraim mite ṭanpuina a dîl a. Mahse, indona a zawh chuan, Ephraim mite chuan Gideona chu indona a inṭan phat aṭanga ṭanpuina a rawn dîl loh avângin, a chungah nasa takin an phunnawi a. Bible chuan: “An hau nasa hle mai a,” tiin a sawi. Gideona pawhin: “Nangni aiin eng nge ka tih-uchuak bîk le? Abiezer-ho grêp lawh ai hian Ephraim-ho grêp hmaih chhar hi a nasa zâwk lo vem ni? Pathianin Midian-ho lal Oreba leh Zeeba chu in kutah a rawn pe ta a ni a; tichuan, nangni ai hian keiin eng nge ka lo tih-uchuak theih bîk ni?” tiin a chhâng a. (Rorêltute 8:1-3) Gideona chuan ṭha taka thlan sa thlamuanna thute sawiin indona râpthlâk tak thleng thei chu a pumpelh a ni. Chûng Ephraim hnamte chuan mahni inngaih pawimawhna leh chapona an nei a ni thei a. Mahse, chu chuan Gideona chu remna rah thlamuanawm tak thawk chhuak tûrin a dâl chuang lo. Chutiang chuan kan ti ve thei ang em?
Thuhnuairawlhna A La Pawimawh Reng Chhan
15 Gideona chu thuhnuairawlhna kawnga entawn tûr ṭha tak a ni a. Jehova’n Midian mite laka Israel mite chhan chhuak tûra mawhphurhna a pêk khân, Gideona chuan: “Manasea thlah zîngah hnam rethei ber kan ni a, kei lah hi ka pa chhûngte zînga tê ber ka ni si a,” tiin a sawi a ni. (Rorêltute 6:15) Mahse, Jehova rinchhanin chu chanvo chu a pawm a ni. Tichuan, Jehova’n ti tûra a duh chu hriatthiam a tum a, a kaihhruaina dîlin a ṭawngṭai a ni. (Rorêltute 6:36-40) Gideona chu chak tak leh huaisen tak a nih bâkah, a fingin a fîmkhur thiam hle bawk. (Rorêltute 6:11, 27) A hnuah, mite’n an chunga rorêl tûra an duh khân a hnâwl a. Jehova sawi anga a tih hnuah, a inah a haw leh a ni.—Rorêltute 8:22, 23, 29.
Jehova Kawng Chu Zawh Rawh
9 Pathian ṭhian ni tûr chuan, “thuhnuairawlhin” kan awm tûr a ni. (1 Pet. 3:8; Sâm 138:6) Thuhnuairawlhna pawimawhzia chu Rorêltute bung 9-naah târ lan a ni. Gideona fapa Jothama chuan heti hian a sawi: “Vawi khat chu thing hi an lal atâna hriak thih tûrin an va chhuak a,” tiin. Oliv thing te, theipui kûng te, leh grêp hrui te chu lala siam an tum a ni. Chûng chuan an Israel puite chunga rorêltu ni tlâk mah se, rorêl tum lote a entîr a. Mahse, hlîng—meia tuah atân chauhva hman tlâk—chuan mi chapo, tualthattu, mi dangte thunun châk Abimeleka lalna a entîr thung a ni. Ani chu “Israel-ho chungah kum thum a lal a,” mahse a tar hmain a thi a ni. (Ro. 9:8-15, 22, 50-54) ‘Thuhnuairawlh’ taka awm chu a va ṭha zâwk tak êm!
Thlarau Lam Lunghlute
it-1-E 753 ¶1
Ephod, I
Gideona chuan Jehova’n Israel mite hnêna a pêk hnehna hriat reng nân leh Pathian chawimawi nân thiltum ṭha tak neiin ephod a siam a; mahse, chu chu “Gideona leh a chhûngte tân pawh thang a lo ni ta mai a,” Israelte’n chu chu chibai bûka thlarau lama an lo uirê tâk avângin. (Ro. 8:27) Mahse, Bible chuan Gideona pawhin chibai a bûk ve tih a sawi lo; chutih ahnêkin, tirhkoh Paula chuan ani chu Kristian hun hmaa Jehova Thuhretu rinawm “chhûmpui nasa tak” zînga pakhat angin a sawi zâwk a ni.—Heb. 11:32; 12:1.
DECEMBER 20-26
PATHIAN THU AṬANGA RO HLUTE | RORELTUTE 10-12
“Jephtha—Thlarau Lama Puitling Tak”
Rinawmnain Pathian Pawm Min Hlawhtîr
9 Josefa entawn tûr siam chuan Jephtha chu a ṭanpui ngei a rinawm. A unaute’n an haw chung pawhin Josefa’n an chunga zahngaihna a lantîr dân chu a hre ngei ang a. (Genesis 37:4; 45:4, 5) Jehova tilâwm tûr zâwnga chhâng lêt tûra Jephtha ṭanpuitu chu Josefa entawn tûr siam a ngaihtuahna hi a ni ngei bawk ang. A unaute thiltih chuan Jephtha rilru chu a tina tak zet a. Mahse, a rilru veizâwng aiin Jehova hming leh a mite tâna râl do chu a pawimawh zâwk a ni. (Rorêltute 11:9) Jehova chunga rinawm a tum tlat a. Chu a rilru put hmang avâng chuan amah leh Israel mite chu Jehova’n mal a sâwm a ni.—Hebrai 11:32, 33.
it-2-E 27 ¶2
Jephtha
A ṭûl huna thil ti nghâl vat ṭhîntu Jephtha chuan hruaitu chak tak a nihnaah hun a khawhral lo va. Ani chuan Amon lal hnênah Amon mite hi luhlul taka Israel ram rûntu an ni tih hrilh tûrin palaite a tîr a. Lal chuan Israel mite zâwk hian Amon mite hnên aṭangin ram an la tiin palaite chu a lo chhâng a. (Ro. 11:12, 13) Hetah hian, Jephtha chuan sipai huaisen rawng tak ang ni lovin, chanchin hre mi tak angin, a bîk takin, Pathianin a mite a cheibâwl dân hretu angin a inlantîr a. Amon mite chhân lêtna chu hetiang hian a hnial thla a ni, (1) Israelte hian Amon mite, Moab mite, a nih loh leh Edom mite a khawih buai lo (Ro. 11:14-18; Deut. 2:9, 19, 37; 2 Chro. 20:10, 11); (2) Israel mite’n hnehna an chan laiin chu ram inchuh chu Kanaan hnam Amor mite kutah a awm a, Pathianin an lal Sihona leh a ram chu Israelte kuta a pêk avângin Amon mite’n an ram angin an sawi thei lo; (3) Kum 300 liam ta aṭang tawh khân, Amon mite chuan Israel mite ram luah chu an chuh tawh lo va; chuvângin, tûnah, chutianga an tihna tûr chhan eng nge awm? tiin.—Ro. 11:19-27.
it-2-E 27 ¶3
Jephtha
Jephtha’n buaina chu biakna lam thil a ni tih a hria a. Ani chuan Pathian Jehova’n chu ram chu Israel mite hnêna a pêk a nih avângin pathian dik lo betute hnênah inchi khat tê pawh a pe lo vang tih a puang a ni. Kemosa chu Amon-ho pathian tiin a ko va. Mi ṭhenkhat chuan chu chu dik lo niin an ngai a ni. Milkoma chu Amon-ho pathian niin, Kemosa chu Moab-ho pathian ni mah se, chûngte nêna inzawmna nei hnamte chuan pathian tam tak an bia a. Solomona meuh pawhin ram dang mi a nupuite avângin Israel ramah dik lo takin Kemosa biakna a la lût hial a ni. (Ro. 11:24; 1 Lal. 11:1, 7, 8, 33; 2 Lal. 23:13) Chu bâkah, Bible lama mi thiam ṭhenkhat sawi dân chuan “Kemosa” tih thu mal hian “Ngamtu, Hnehtu,” tih awmzia a nei thei a ni. (Gesenius’s Hebrew and Chaldee Lexicon, translated by S. Tregelles, 1901, p. 401 tih en rawh.) Jephtha sawi chu Amon mite’n mi dangte ‘ngam,’ a nih loh leh ‘hneh’ a, ramte petu nia an ngaih he pathian chungchâng hi a ni thei ang.
Thlarau Lam Lunghlute
it-2-E 26
Jephtha
Jephtha, Sâwn Fa A Ni Lo. Jephtha nu chu “nawhchizuar” a ni a; mahse, Jephtha chu nawhchizuar fa, a nih loh leh sâwn fa a ni lo. A nu chu Gileada nupui pahnihna a nih hma chuan nawhchizuar a lo ni tawh ngei mai; mahse, a hnuah Salmona nên an innei a. (Ro. 11:1; Jos. 2:1; Mt. 1:5) Jephtha chu sâwn fa a ni lo tih fihfiahtu chu Gileada nupui hmasa zâwk hrin a pianpui unaute’n ro a chan ve loh nâna an hnawhchhuahna kha a ni. (Ro. 11:2) Chu bâkah, a hnuah Jephtha chu Gilead mite hotu atâna pawm a ni a (chûng zîngah chuan Jephtha pianpui unaute chu langsâr berte niin an lang). (Ro. 11:11) Chu lo dang leh chu, ani chuan biak bûkah Pathian hnênah inthawina a hlân bawk. (Ro. 11:30, 31) Chûng thil zawng zawng chu sâwn fa tân tihtheih a ni lo, Dân chuan: “Sâwn chu LALPA mite pung khâwm zîngah an tel tûr a ni lo; chhuan sâwmna thlengin a thlahte chu LALPA mite pung khâwm zîngah an tel tûr a ni lo,” tia chiang taka a sawi avângin.—Deut. 23:2.
DECEMBER 27–JANUARY 2
PATHIAN THU AṬANGA RO HLUTE | RORELTUTE 13-14
“Nu leh Pate’n Manoa-te Nupa Hnên Aṭanga An Zir Theih Chu”
w13-E 8/15 16 ¶1
Nu leh Pate U—In Fate Chu An Têt Tê Aṭangin Zirtîr Rawh U
Hmân lai Israel rama Zora khuaa awm, Dan hnama mi Manoa chungchâng hi han ngaihtuah teh. Jehova vântirhkoh chuan nau pai thei lo Manoa nupui hnênah fapa a hrin tûr thu a hrilh a. (Ro. 13:2, 3) Mi rinawm Manoa leh a nupui chu, chu beiseina avângin a hlim hle ngei ang. Mahse, lungkhamna lian tak pawh a nei a. Chuvângin, Manoa chuan: “Aw LALPA, khawngaih takin Pathian mi i rawn tirha kha kan hnênah lo kal leh sela, naupang lo piang tûr chu engtin nge kan tih ang min han zirtîr rawh se,” tiin a ṭawngṭai a ni. (Ro. 13:8) Manoa leh a nupui chuan an fa enkawl seilen dân tûr chungchângah lungkhamna an nei a. An fapa, Samsona chu Pathian dân an zirtîr ngei ang a, an thawhrimna pawh a hlawhtling tih a chiang a ni. Bible chuan: “LALPA thlarauvin a [Samsona] rawn khawih harh ṭan ta a,” tiin a sawi. Chuvângin, Samsona chuan Israel mite rorêltu zînga pakhat a nih angin, thil ropui tak tak a ti a ni.—Ro. 13:25; 14:5, 6; 15:14, 15.
w05-E 3/15 25-26
Jehova Pêk Chaknain Samsona’n Hnehna A Chang!
Samsona a lo puitlin chhoh zêl chuan “LALPAN mal a sâwmsak a.” (Rorêltute 13:24) Ni khat chu, Samsona chuan a nu leh pa hnênah: “Timna khuaah, Philistia-ho fanute zînga mi hmeichhe pakhat ka hmu a: ka nupuiah mi neihsak rawh u,” tiin a hrilh a. (Rorêltute 14:2) Mak an tih dân tûr chu han mitthla teh. An fapa chuan Israel mite chu hnehchhiahtute kut ata chhuah zalen ahnêkin, anmahni nêna nupui pasala inneih a duh zâwk a. Milem pathian betute zînga mi nupuia neih chu Pathian Dân bawhchhiatna a ni. (Exodus 34:11-16) Chuvângin, a nu leh pate chuan: “I unaute fanute zîngah emaw, kan chite zawng zawng zîngah hian emaw hmeichhia an awm hauh lo em ni le, Philistia-ho serhtan lohte zînga nupui tûr i zuk zawn tâk mai?” tiin an hrilh a. Mahse, Samsona chuan: “Mi neihsak mai rawh; ka duh êm asin maw le,” tiin a ngên ngut ngut a ni.—Rorêltute 14:3.
Thlarau Lam Lunghlute
w05-E 3/15 26 ¶1
Jehova Pêk Chaknain Samsona’n Hnehna A Chang!
A tîra ziakah chuan, “duh êm,” tih ṭawngkam hi “ani hi ka ta tûr dik tak a ni,” tihna a ni a. A nih chuan, eng kawngin nge he Philistia hmeichhia hi Samsona “ta tûr dik tak” a nih? McClintock and Strong’s Cyclopedia, lehkhabu sawi dân chuan, a “hmêl ṭhat vâng te, a nalh vâng te, leh a duhawm vângte” ni lovin, “thiltum eng emaw nêna inkûngkaihna a awm vâng zâwk a ni.” Eng thiltum nên nge a inkûngkaih? Rorêltute 14:4-na chuan Samsona’n “Philistia-ho chungah remchâng a zawng a ni si a,” tiin a sawi. Samsona chuan chu a thiltum avângin chu hmeichhia chu a ngaihven a ni. Samsona a rawn puitlin chhoh chuan, “LALPA thlarauvin a rawn khawih harh ṭan,” a nih loh leh hma la tûrin a chêttîr ṭan a ni. (Rorêltute 13:25) Chuvângin, Samsona’n mak danglam taka nupui neih a ngen chhan leh Israel rama rorêltu nia rawng a bâwl chhûnga amah chêttîrtu ber chu Jehova thlarau a ni. Samsona chuan hun remchâng a zawn chu a hmu ta em? Jehova’n ani chu a ṭanpui ngei dâwn tih a hriatchiantîr dân i lo en hmasa ang u.