Nun leh Rawngbâwlna Inzirna Lehkhabu Atâna Thu Lâk Chhuahnate
JULY 4-10
PATHIAN THU AṬANGA RO HLUTE | 2 SAMUELA 18-19
“Barzilaia—Thuhnuairawlhna Kawnga Entawn Tlâk”
w07-E 7/15 14 ¶5
Barzilaia—Mahni Tlin Tâwk Hretu
Rinhlelh rual lohvin, Davida chu Barzilaia ṭanpuina avângin a lâwm hle ngei ang. Lal chuan mamawh zualpuite pea duhsakna lantîr lêt mai chu a duh tâwk lo niin a lang. Mi hausa tak Barzilaia chuan chutiang ṭanpuina chu a mamawh lo va. Davida chuan chu kum upa tawh tak chu a mize duhawm takte avângin lal ina awmah a duh a ni ngei ang. Chutianga lal ina awm chu Barzilaia tân chawimawina leh lal nêna inlaichînna ṭha neih theihna hun remchâng a ni ngei ang.
w07-E 7/15 14 ¶7
Barzilaia—Mahni Tlin Tâwk Hretu
Barzilaia’n chutiang thu tlûkna a siam chhan pakhat chu a kum upat tawh avâng leh a tihtheihte a beitham tawh avâng a ni thei a. Ani chuan dam rei a inring tawh lo a ni mai thei. (Sâm 90:10) A theih ang tâwkin Davida chu a ṭanpui a; mahse kum upatna avângin a tihtheihte chu a beitham hle tih a hre bawk. Barzilaia chuan mite ngaihsân hlawh leh hmingthan duhna avânga a theihnate en dik lova awm chu a duh lo. Thiltum sâng tak nei Absaloma nêna inang lo takin, Barzilaia chuan thuhnuairawlhna chu a lantîr a ni.—Thufingte 11:2.
w07-E 7/15 15 ¶1-2
Barzilaia—Mahni Tlin Tâwk Hretu
Bible-a Barzilaia chanchin hian inbûk tâwk a ngaihzia a târ lang a. Kawng khatah chuan, hahdam taka awm kan duh avâng leh mawhphurhna chelh tûra tling tâwk lo nia kan inhriat avângin, rawngbâwlna chanvo hlute chu kan kalsan, a nih loh leh kan hnâwl tûr a ni lo. Chakna leh finna atâna Pathian kan rinchhan phawt chuan, ani chuan kan mamawh thiamnate chu min pe thei a ni.—Philippi 4:13; Jakoba 4:17; 1 Petera 4:11.
Kawng leh lamah chuan, kan tlin tâwk kan hriat a ngai a. Entîr nân, Kristian tu emaw chu thlarau lam thiltihnaahte a buai hle tawh a. Chanvo hlu dangte a pawm leh a nih chuan a chhûngkua ngaihsak tûra Pathian pêk mawhphurhnate chu a ngaihthah palh thei tih a hria a ni. Chutiang dinhmunah chuan, chanvo hlu dangte pawm rih loh chu a tân thuhnuairawlhna leh hriatthiamna lantîrna a ni dâwn lâwm ni?—Philippi 4:5; 1 Timothea 5:8.
Thlarau Lam Lunghlute
‘Intlânsiaknaah A Tâwp Thlengin Tlân Rawh’
19 Harsatnate i hmachhawn bâkah, mite’n an hre thiam lo che nia i hriat chuan, Mephibosetha thiltawn aṭangin chakna i hmu thei a ni. (2 Sam. 4:4) Ani chuan tisa lama harsatna a neih chu a hmachhawn a ngai a, Lal Davida’n a chungah dik lo takin a ti bawk. Chûngte chu Mephibosetha thil tihsual vânga thleng a ni lo. Chuti chung pawhin, ani chu a thinrim lo va, a thil ṭha neihte chungah a lâwm a ni. Davida’n tûn hmaa a chunga ngilneihna a lantîr avângin a lâwm hle a. (2 Sam. 9:6-10) Chuvângin, Davida’n a chunga dik lo taka a tih pawhin, thil nih dân dik tak chu hriatthiam a tum tlat a ni. A chunga Davida thil tihsual chu thinrim nân a hmang duh lo va. Davida thiltih avângin Jehova pawh a mawhchhiat hek lo. Mephibosetha chuan Jehova ruat lal a thlâwp theih dân chauh a ngaihtuah a. (2 Sam. 16:1-4; 19:24-30) Jehova chuan Mephibosetha entawn tûr siam ṭha tak chu kan hlâwkpui theih nân Bible-ah a chhinchhiah a ni.—Rom 15:4.
JULY 11-17
PATHIAN THU AṬANGA RO HLUTE | 2 SAMUELA 20-21
“Jehova Chu Rorêlna Dik Pathian A Ni”
it-1-E 932 ¶1
Gibeona
Kum zabi tam tak chhûngin, Gibeon mite chu Lal Saula’n tihchimih vek tum mah se, hnam khat angin an awm zawm zêl a. Mahse, anni chuan Jehova’n rorêlna dik a lantîr hun tûr chu dawhthei takin an nghâk a ni. Jehova chuan Davida lal laia kum thum chhûng ṭâm tlâktîrna hmangin a rorêlna chu a rawn lantîr a. Davida chuan Jehova a râwn a, thisen thiam loh chantîrna a nih thu a hriat chuan, inremna siam nâna tih ngaite hre tûrin Gibeon mite chu a zâwt a. Chumi chungchângah, Dân thuin tualthattu tân tlanna pêk theih a ni lo tih a sawi avângin, anni chuan “tangka leh rangkachak lam thu” a ni lo tia sawiin an chhâng a ni. (Num. 35:30, 31) Chu bâkah, dân phalna tel lo chuan mi chu tihhlum theih a ni lo tih pawh an hre bawk. Chuvângin, Davida’n zawhna dang a zawh leh hmain, an hnêna Saula “fapa” pasarihte hlân tûrin an ngên a ni. Saula leh a chhûngte chunga thinsen chhuahna sual thiam loh chantîrna chuan Saula chu tualthahnaa hmahruaitu ni mah se, a ‘fapate’ pawh tlang takin emaw, a pehhêl zâwngin emaw an inrawlh a ni thei tih a târ lang. (2 Sam. 21:1-9) Chu thilthlengah chuan fate thihna chu an pate sualna vâng a ni lo; (Deut. 24:16) chu aiin, “nun aiah nun,” tih dân thu nêna inmilin rorêlna dik an hmachhawn mai zâwk a ni.—Deut. 19:21.
Thlarau Lam Lunghlute
Kristian Upate—‘Kan Lâwmna Tûra Min Thawhpuitute’
14 Setana leh a hoten harsatna min thlensak chung pawhin, Jehova mite kan nih angin khawvêl pum puiah rawng kan bâwl a. Kan zînga ṭhenkhatte chuan harsatna lian tak kan hmachhawn a; mahse, Jehova ring tlatin, chutiang “Goliathate” chu kan hmachhawnin, kan hneh a ni. Amaherawhchu, a châng chuan he khawvêl nêksâwrna do reng a ngaihna hian min tichauvin, min tilunghnual a. Chutianga kan chauh lai chuan, hneh kan awlsam a, kan chak laia kan do hneh ngei tûr pawh do zawh loh mai a hlauhawm a ni. Chutiang hunah chuan, mi tam takte’n an tawn tawh angin, a hun taka upate ṭanpuina chuan kan hlimna leh chakna nei lêt leh tûrin min ṭanpui thei a ni. Kum 65 vêl mi pioneer unaunu chuan heti hian a sawi: “Hun engemaw chen kal ta khân, ka nuam sam vak lo va, rawngbâwlna chuan min tichau ṭhîn a ni. Upa pakhat chuan ka chau tih hriain, min rawn pan a. Bible thu châng pakhat hmanga inkawmna mi tichak thei tak kan nei a. A thurâwn min pêk chu ka zâwm a, ka ṭangkaipui hle a ni,” tiin. “Ka chak lohna min hriat saka min ṭanpuitu chu upa chuan hmangaihna a va ngah tak êm!” tiin a sawi belh a ni. Ni e, hmangaihna nêna min thlîr rengtu leh hmân laia Abisaia anga ‘min chhan’ tûra inring renga awm upate kan nei tih hriat chu a thlamuanthlâk hle.
JULY 18-24
PATHIAN THU AṬANGA RO HLUTE | 2 SAMUELA 22
“Ṭanpui Tûr Chein Jehova Rinchhan Rawh”
cl-E 19 ¶11
“Pathian I Hnaih” Thei Tak Tak Em?
11 Pathian chu ‘thiltihtheihna lamah a chak,’ tih thu chhiar chu thu khat a ni a. (Isaia 40:26) Israel mite Tuipui Sen aṭanga a chhan chhuah hnua thlalêra kum 40 chhûng a châwm dân thute chhiar chu thu dang daih a ni. Tui fâwn so sâng tak mai a inṭhen lai chu i mitthla thei a. An sîr leh lam leh lama bang sâng tak ang maia tui ding luah leh a lai lei châra mi 3,000,000 vêla tam Israel mite kea an kal lai chu i mitthla thei a ni. (Exodus 14:21; 15:8) Thlalêra an awm lai khân, Pathian vênhimna an dawng tih finfiahnate pawh i hmu thei bawk. Lung aṭangin tui a lo chhuak a. Ei tûr vâr ser mai chu leiah a lo awm a. (Exodus 16:31; Numbers 20:11) Jehova chuan thiltihtheihna a neihzia a lantîr mai ni lovin, chu chu a mite tân a hmang a ni. Kan ṭawngṭainate chu Pathian thiltithei tak, “kan inhumhimna leh kan chakna, mangan laia ṭanpui vartu hnai reng” hnênah a thleng tih hriat chu a va thlamuanthlâk tak êm!—Sâm 46:1.
w10-E 6/1 26 ¶4-6
“Rinawm Takin Thil I Ti Ang”
Davida thusawite chu lo bih chiang ta ila. ‘Rinawm taka thil ti,’ tia lehlin Hebrai thu mal chu “ngilneihna ngah taka thil ti,” tih pawha lehlin theih a ni. Rinawmna dik tak chu hmangaihnaa innghat a ni a. Jehova chu a chunga rinawmte lakah a rinawm tlat a ni.
Rinawmna chu rilrua veina mai a ni lo va, chu chu thiltihna a ni, chechang lo a ni lo tih pawh hi lo chhinchhiah ang che. Davida’n a thiltawn aṭanga a hriat angin, Jehova chuan rinawm takin thil a ti a ni. A nuna hun hrehawm ber a hmachhawn lai pawh khân, Jehova chuan chu lal rinawm chu rinawm taka vênghim leh kaihruaiin, a tân thil a tihsak a ni. Davida chuan “a hmêlma zawng zawng kut ata” chhan chhuaktu Jehova chunga a lâwm êm avângin, ani chu a chawimawi a ni.—2 Samuela 22:1.
Davida thusawite chuan kan tân eng awmzia nge a neih? Jehova chu a danglam ngai lo va. (Jakoba 1:17) A tehnate chu a vawng rengin a thutiamte lakah a rinawm tlat a ni. Davida chuan a fakna hla phuah dangah: “LALAPA chuan . . . a mi thianghlimte [“rinawmte,” NWT] chu a kalsan ngai lo,” tiin a ziak a ni.—Sâm 37:28.
Thlarau Lam Lunghlute
Te Ber Rilru Put Hmang Ang Nei Rawh
7 Inngaihtlâwmna lama Pathian entawn tûr siam chuan fakna hla phuahtu Davida rilru chu a hneh hle a. “Nangin i chhandamna phaw chu mi pe bawk a: i inngaihtlâwmnain mi siam lian ta,” a nih loh leh mi tiropui ta tiin Jehova fakin a zai a ni. (2 Sam. 22:36) Davida chuan Israel rama ropuina a neih engpawh chu Jehova inngaihtlâwmna—amah ngaihsaktu Pathiana a intihhnuai—vâng tih a sawi a ni. (Sâm 113:5-7) Kan chungah pawh chutiang tho chu a thleng a ni lâwm ni? Kan zînga tu hian nge kan mizia te, theihnate, leh chanvo te hi Jehova hnên aṭanga kan “dawn loh” nei awm? (1 Kor. 4:7) Tê bera inngaitu a “ropui” dân chu Jehova chhiahhlawh hlu lehzual a rawn ni hi a ni. (Lk. 9:48) Chutiang a nih dân chu i lo en ang u.
JULY 25-31
PATHIAN THU AṬANGA RO HLUTE | 2 SAMUELA 23-24
“I Thilpêk Chu Inthawina A Ni Em?”
it-1-E 146
Arauna
Arauna chuan inthawina hmun tûr bâkah, chumi atân rante leh thingte chu a thlâwnin a pe tih a chiang a; mahse, Davida chuan a man chu a pe lui a. Samuela pahnihna 24:24-na thute chuan Davida’n hruih leh sebawng chu tangka sekel 50-in ($110) a lei tih a târ lang a. Mahse, 1 Chronicles 21:25-na chuan Davida’n rangkachak sekel 600 ($77,000 vêl) a pêk thu a sawi thung. Samuela Pahnihna ziaktu chuan maichâm awmna hmun leh chuta hlan tûr thilte chungchâng chauh a sawi a; chuvângin, a man zât a sawite chu chûng thilte atân chauh a nih a rinawm. Kawng leh lamah chuan, Chronicles Pakhatna ziaktu chuan a hnua chumi hmuna sak biak in leh a sakna bungrua leina mante chu a sawi tel a ni. (1 Chro. 22:1-6; 2 Chro. 3:1) Biak in awmna hmun chu a zau êm avângin, rangkachak sekel 600-ah chuan a tîra Davida maichâm sakna hmun tê tak tê ni lovin, chu hmun zau tak leina man pawh a tel a rinawm a ni.
‘Thutak Awm Dân Aṭangin’ Inzir Rawh
8 Israel miin inthawina a hlan chhan chu Jehova chunga a lâwmna lantîr nân emaw, hâlral thil hlan anga Pathian duhsakna dîl nân emawa mahni duh thua hlan a nih chuan ran ṭha ber thlan chu a har lo ngei ang a. Ani chuan a thil neih ṭhat ber Jehova hnêna pêk chu a duh hle ngei bawk ang. Tûn laia Kristiante chuan Mosia Dânin a phût ang inthawina tak tak chu an hlân tawh lo va; mahse, Jehova rawng bâwl nâna an hun te, tha leh zung te, leh sum leh paite hmangin inthawina an hlân ve reng tho a ni. Tirhkoh Paula chuan Kristian beiseina ‘ṭan,’ a nih loh leh vântlâng hmaa puan chhuah leh “thil tihṭhat leh thilphal” chu Pathian lâwmzâwng inthâwina angin a sawi a. (Heb. 13:15, 16) Rilru put hmang dik neia Pathian Jehova mite chutiang thila an inhmanna chuan an tâna Pathian thilpêk zawng zawngte an ngaihhlutzia a târ lang a ni. Chuvângin, tûn laia Kristian rawngbâwlnaa telte leh hmân laia mahni duh thua inthawina hlântute rilru put hmang leh chêttîrtu inkârah inanna a awm a ni.
Thlarau Lam Lunghlute
Samuela Bu Hnihna Aṭanga Thu Pawimawh Hrilhfiahna
23:15-17. Davida chuan nunna leh thisen chungchânga Pathian dân pêk a zah êm avângin, he mi ṭum hian chu dân bawhchhiatna ni thei tûr thiltih dang lakah chuan a insûm a ni. Pathian thupêk zawng zawng chungah chutiang rilru put hmang chu kan nei tûr a ni.
AUGUST 1-7
PATHIAN THU AṬANGA RO HLUTE | 1 LALTE 1-2
“I Thil Tihsualte Aṭangin I Inzir Em?”
it-2-E 987 ¶4
Solomona
Hmun hla vak lo Gihon hmuna thâwm ri leh “lal Solomona dam reng rawh se,” tia mipui au ri an hriat chuan, Adonija leh a phiarrûkpuite chu hlau leh chiaiin an tlân chhia a. Solomona chuan phuba lâkna hmanga lalna chuh duh lovin, a rorêlna chhinchhiahna tûr chu remna a nihzia a lo lantîr lâwk a ni. Thilte chu a lêt zâwngin kal ta se chuan, Solomona chuan a nun a chân ngei ang. Adonija chu a sa him nân hmun thianghlimah a tlân avângin, Solomona chuan Adonija chu a hmaa rawn hruai tûrin thu a pe a. Adonija hnênah eng mah thil sual tih a neih loh chuan tihhlum a nih loh tûr thu hrilhin, a in lamah a hawtîr ta a ni.—1 Lal. 1:41-53, C.L. Re-edited.
it-1-E 49
Adonija
Mahse, Davida thih hnu chuan, Adonija chuan Bath-sebi chu a va pan a, Solomona hmaa a aiawha va kala, Davida enkawltu leh a rawngbâwlsaktu Abisagi chu a nupui atâna dîlsak tûrin a ngên a. “Ram hi ka ta a ni tawh tih leh, Israel-ho zawng zawngte pawh hian keimah hi lal atân mi thlîr reng a ni,” tia a thusawi aṭangin, Adonija chuan chumi chungchânga Pathian inrawlhna chu chiang takin hre mah se, a dikna neih chu chhuhsak niin a ngai tih a târ lang a ni. (1 Lal. 2:13-21) Lalram a chân avânga zângnadawmna ṭhenkhat a duh vânga chutianga dîl a nih mai theih rualin, hmân lai Khaw Chhak ramah chuan lal nupuite leh hmeite chu lal aiawhtute chauhvin an rochun ṭhin avângin, chu chuan Adonija’n thiltum sâng tak a la nei reng tih chiang takin a târ lang a ni. (2 Sam. 3:7; 16:21 nên khaikhin rawh.) Solomona chuan a nu kal tlanga ngenna chu chutianga a thlîr avângin, Adonija chu tihlum tûrin thu a pe a, chutiang chuan Benaia’n a ti ta nghâl a ni.—1 Lal. 2:22-25.
Thlarau Lam Lunghlute
Lalte Bu Khatna Aṭanga Thu Pawimawh Hrilhfiahna
2:37, 41-46. Hrem lohva Pathian dân bawhchhiat theih nia ngaih chu a va hlauhawm tak êm! Duh rêng vanga ‘nunna kalna kawngka zîm’ pênsante chuan an thu tlûkna âtthlâk tak rah chu an seng ngei ang.—Matthaia 7:14.
AUGUST 8-14
PATHIAN THU AṬANGA RO HLUTE | 1 LALTE 3-4
“Finna Hlutna”
I Tân Entawn Tûr Ṭha Nge A Nih, Vaukhânna Zâwk?
4 Solomona a lal ṭan tirh chuan, a mumangah Pathian a inlâr a, a duhzâwng dîl tûrin a ti a. Thiltawn a nei tlêm tih inhriain, Solomona chuan finna a dîl a ni. (1 Lalte 3:5-9 chhiar rawh.) Hausakna leh ropuina dîl lova finna a dîl zâwk avângin Pathian chu a lâwm a, Solomona hnênah chuan “finna leh hriatna thinlung” a pe a, hausakna pawh a pêk belh bawk a ni. (1 Lal. 3:10-14) Isua sawi angin, Solomona finna chu a nasat êm avângin Seba lalnu pawhin amah ngeia hmuh tumin ram hla tak ata a rawn pan vang vang a ni.—1 Lal. 10:1, 4-9.
5 Mak tak maia finna dawn chu kan inbeisei lo. Solomona chuan “LALPA chuan finna a pe ṭhîn” tih a sawi a; mahse, chu Pathian pêk finna nei tûr chuan kan thawhrim a ngai tih hetiang hian a ziak bawk a ni: ‘Finna lamah i beng chhî la, i thinlung hriatna lam atân pe rawh,’ tiin. Chu mi chungchângah chuan ‘au’ tih leh ‘zawng’ tih ṭawngkamte pawh a hmang a. (Thuf. 2:1-6) Finna chu kan nei thei tih a chiang hle.
6 Hetianga inzawh hi a ṭha a ni: ‘Pathian finna khâwl khâwm kawnga Solomona entawn tûr siam chu ka ngai pawimawh em?’ tiin. Khawvêl sum leh pai dinhmun ngheh lohna chuan mi tam tak chu an hna leh sum leh pai lama rilru pe lehzual tûrin a chêttîr a, zirna an thlan tûr leh zir chen tûr chungchânga thu tlûkna an siamte chu a thunun bawk a ni. Nang leh i chhûngte chungchâng eng nge ni ve? In duhthlanna siam chuan Pathian finna chu in zawn a, in khâwl khâwmzia a târ lang em? In thil ngaihsak ber emaw, tum ber emaw siamremna chuan finna a neih lehzualtîr che u ang em? Finna neih leh nunpui chu chatuana in hlâwkna tûr a ni tak zet a ni. Solomona chuan heti hian a ziak a: “Tichuan felna le rorêlna chu i lo hre thiam ang a, hleih neih lohna nên, a ni, kawng ṭha tinrêng pawh,” tiin.—Thuf. 2:9.
Thlarau Lam Lunghlute
w98-E 2/1 11 ¶15
Jehova Chu Thuthlung Pathian A Ni
15 Dân hnuaia hnam khat anga ding Abrahama thlahte chu Jehova chuan chu an thlahtu hnêna a thutiam angin mal a sâwm a. B.C.E. 1473 khân, Mosia aiawhtu Josua chuan Israel mite chu Kanaan ramah a hruai lût a. A hnua chûng hnamte zînga ram semna chuan Abrahama thlahte hnêna ram pe tûra Jehova thutiam chu a tithleng famkim a ni. Israelte an rinawm chhûng chuan, Jehova’n an hmêlmate hneh tûra an hnêna a thutiam chu a hlen a. Chu chu Lal Davida rorêl chhûngin a thleng dik lehzual a ni. Davida fapa Solomona hun laiin, Abrahama thuthlung hmêlhmang pathumna chu a thleng famkim a. “Juda-te leh Israel-te chu tuifinriat kama ṭiau vaivut zât zetin an tam a, an eiin an in a, hlim takin an awm ṭhîn a.”—1 Lalte 4:20.
AUGUST 15-21
PATHIAN THU AṬANGA RO HLUTE | 1 LALTE 5-6
“An Kut leh An Thinlungin An Sa”
w11-E 2/1 15
I Lo Hre Tawh Em?
Lebanon tlânga sidar thingte chu rannung ei chhiat theih loh a nih piah lamah, a tlona te, a mawina te, leh a rimtuinate avânga hriat hlawh tak a ni a. Chuvângin, Solomona chuan biak in sak nân hmanraw ṭha berte a hmang a ni. Tûn hmaa Lebanon tlâng lo luah khat ṭhîntu sidar thingte chu tûnah chuan hmuh tûr a awm mang tawh lo a ni.
it-1-E 424
Sidar Thing
Chutiang khawpa sidar thing hmang nasa tûr chuan thing kittu tûr te, chûng thingte Mediterranean tuipui kama awm Tura, a nih loh leh Sidon khuaa thawntu tûr te, a zaitu tûr te, leh tuipui kama awm Jopa thlenga tawlhtu tûr mi a sâng têl mamawh a ni a. Chûng thingte chu Jerusalem khaw thlengin tawlh a ni a. Chu chu Solomona leh Hirama thawhdunna hmanga tih a ni a. (1 Lal. 5:6-18; 2 Chro. 2:3-10) Chumi hnuah pawh thingte chu tawlh zawm zêl a la nih avângin, Solomona chuan a rorêl chhûngin ‘sidar thingte chu phaia theipui thing ang leka ngaih khawpin a awmtîr’ nia sawi theih a ni.—1 Lal. 10:27; Is. 9:9, 10 nên khaikhin rawh.
it-2-E 1077 ¶1
Biak In
Hna a huaihawtnaah, Solomona chuan Israel mite zîng aṭangin mipa 30,000 a chhawr a, thla khata mi 10,000 zêl inthlâkin Lebanonah a tîr a, thla hnih chu mahni in lamah an awm a ni. (1 Lal. 5:13, 14) Chu bâkah, ram chhûnga awm “hnam dang mi” zîng aṭangin thil phur mi atân 70,000 leh lung chher mi 80,000 a chhawr bawk. (1 Lal. 5:15; 9:20, 21; 2 Chro. 2:2) Solomona chuan hnathawhnaa hotu bîk atân mi 550 leh a ṭanpuitute atân mi 3,300 a ruat a ni. (1 Lal. 5:16; 9:22, 23) Chûng zînga mi 250 chu Israel mi leh mi 3,600 chu Israel rama awm “hnam dang mi” an nih a rinawm.—2 Chro. 2:17, 18.
Thlarau Lam Lunghlute
g-E 5/12 17, bâwm
Bible—Hrilh Lâwkna Dik Lehkhabu, Ṭhen 1
HUN VAWN DIKNA
Hun chungchâng Bible-in a sawi dikzia entîrna pakhat chu 1 Lalte 6:1-ah târ lan a ni a, chu Bible châng chuan Lal Solomona’n Jerusalema biak in a sak ṭan hun a sawi a. Heti hian kan chhiar a ni: “Tin, heti hi a ni a, Israela thlahte Aigupta ram ata an chhuah achin kum zali leh sawmriatna [kum 479 a kim] kum, Israel-hote chunga Solomona a lal kum lina, Ziv thla, thla hnihna thla chuan LALPA in sak chu a ṭan a,” tiin.
Bible hun chhût dân chuan Solomona lal kum, a kum lina chu B.C.E. 1034 a ni a. Chumi hun aṭangin a lêt zâwnga chhiara kum 479 a kimna chu Aigupta ram aṭanga Israelte an chhuah kum B.C.E. 1513 chiah a ni.
AUGUST 22-28
PATHIAN THU AṬANGA RO HLUTE | 1 LALTE 7
“Ban Pahnih Aṭanga Kan Zir Theihte”
w13-E 12/1 13 ¶3
‘Tlângte Aṭangin Dâr In Lai Chhuak Ang’
Lal Solomona chuan Jerusalema biak in thawm ṭhatnaah dâr tam tak a hmang a. Chûng zînga tam tak chu a pa Davida’n Suria mite a hneh ṭuma a lâkte a ni a. (1 Chronicles 18:6-8) Puithiamte’n insil nâna an hman dâr “tuizêm,” insilna bêl lian takah chuan tui gallon 17,500 (66,000 L) a leng a, ton 30 chuanga rit a nih a rinawm. (1 Lalte 7:23-26, 44-46) Chu bâkah, biak in luhnaah chuan dâr ban lian tak pahnih a ding bawk a. Chûngte chu feet 26-a sâng (m 8) a ni a, a chung lam feet 7.3 (m 2.2) vêlah chuan bâwkte a awm a. Chûng bante chu a kawrawng a, a chhah lam chu inches 3 (cm 7.5) a ni a, a len lam chu hawlh tlangin feet 5.6 (m 1.7) a ni. (1 Lalte 7:15, 16; 2 Chronicles 4:17) Chûngte siam nâna dâr an hman tam dân tûrzia mai chu ngaihtuah mai pawhin thil mak a tling a ni.
it-1-E 348
Boaz, II-na
Solomona biak in ropui tak hulhliap hmaa ding, dâr ban lian tak pahniha hmar lam zâwk chu Boaz tih hming vuah a ni a, a awmzia ni thei chu “Chaknain” a ni. Chhim lam zâwk ban chu Jakin tia koh a ni a, a awmzia chu “[Jehova’n] Tinghet Rawh Se” tihna a ni. Chuvângin, chu ban pahnih chu din tlântîrin, ding lam aṭanga vei lam, Chhak lama kan chhiar chuan ’Chaknain [biak in chu] [Jehova’n] tinghet rawh se,’ tih awmzia a nei ang.—1 Lal. 7:15-21; CAPITAL tih chu en rawh.
Thlarau Lam Lunghlute
it-1-E 263
Inbual
Tisa lam thianghlimna chu thianghlim taka Jehova chibai bûktute tâna phût a ni a. Chu chu biak bûk ruahmanna leh a hnua biak ina rawngbâwlna nêna inkûngkaiha târ lan a ni. Puithiam Lal Arona leh a fapate chu puithiam nia rawngbâwl tûra lâk luh an nih khân an puithiam silhfênte hâktîr an nih hmain an inbual hmasa a. (Ex. 29:4-9; 40:12-15; Lev. 8:6, 7) Puithiamte chuan an kut leh kete sil nân biak bûk hung chhûnga dâr maihûna tui an hmang a, a hnuah, Solomona biak ina dâr tuizêm lianpuia tui chu an hmang a ni. (Ex. 30:17-21; 40:30-32; 2 Chro. 4:2-6) Inremna Nîah chuan puithiam lal chu vawi hnih a inbual a. (Lev. 16:4, 23, 24) Azazela pual kêl chhuahtu te, inthawina ran taksa bâng khawihtu te, leh inthawina bâwngla sen dai pâwna hruaitute chuan an awmna hmun lama an kîr leh hmain an inbualin, an silhfênte an su tûr a ni.—Lev. 16:26-28; Num. 19:2-10.
AUGUST 29–SEPTEMBER 4
PATHIAN THU AṬANGA RO HLUTE | 1 LALTE 8
“Inngaitlâwm Tak leh Thinlung Taka Vântlâng Hmaa Solomona Ṭawngṭaina”
Bible Zirin I Ṭawngṭaina Tihausa Rawh
9 Kan ṭawngṭaina chhân ni tûr chuan thinlunga tih tak zeta kan ṭawngṭai a ngai a. Solomona chuan 1 Lalte bung 8-naa chhinchhiah tih tak zeta ṭawngṭaina chu B.C.E. 1026-a Pathian Jehova biak in hawn a nih khân Jerusalema mipui pung khâwmho hmaah a hlân a. Hmun Thinghlim Bera thuthlung bâwm dah a nih hnu chuan Pathian Jehova chhûm chuan biak in chu a tikhat a, Solomona chuan Pathian a fak a ni.
10 Solomona ṭawngṭaina chu zir chiang la, thinlung chungchâng a sawi lante chu chhinchhiah ang che. Solomona chuan Pathian Jehova chauh chu thinlung hretu a nihzia a pawm a. (1 Lal. 8:38, 39) Chu ṭawngṭaina bawk chuan ‘thinlung taka a lam hawi’ thil sual titu tân pawh beiseina a awm tih a târ lang a ni. Hmêlmate’n Pathian mite chu man mah se, Jehova lama an thinlung a ṭhat famkim phawt chuan an dîlnate ngaihthlâk a ni dâwn a ni. (1 Lal. 8:48, 58, 61) Chuvângin, i ṭawngṭaiin thinlunga tih tak zetin i ṭawngṭai tûr a ni tih a chiang hle.
Kut Rinawm Nghette Phara Ṭawngṭaina
7 Mahniin kan ṭawngṭai emaw, vântlâng hriatin kan ṭawngṭai emaw pawh ni se, Pathian Lehkhathu-a thu bul pawimawh kan hriat reng tûr chu kan ṭawngṭainaah rilru puthmang inngaitlâwm tak lantîr tûr kan ni tih hi a ni. (2 Chronicles 7:13, 14) Lal Solomona’n Jerusalem-a Jehova biak in hlannaa vântlâng hmaa a ṭawngṭainaah a inngaihtlâwmzia a lantîr a. Solomona chuan he leia sak tawh zawng zawng zînga in ropui ber chu a sa zo va. Chutichung pawhin, inngaitlâwm takin: “Pathian chu leiah hian a awm tak meuh ang emaw chu? Ngai teh, vân leh vânte vânah pawh i leng lo a ni a; he ka in sakah hian i va leng lo nasa lehzual âwm êm!” tiin, a ṭawngṭai a ni—1 Lalte 8:27.
8 Solomona angin, vântlâng hmaah mi dangte aiawha kan ṭawngṭaiin, inngaitlâwm tak kan ni tûr a ni. Mi dangte aia ṭha zâwk anga lan chu kan pumpelh tûr ni mah se, kan aw phawi dân hmangin inngaihtlâwmna kan lantîr thei a ni. Inngaitlâwm tak ṭawngṭainate chu nasa takin a inchâwisâng lo va, a inti veider hek lo. Chutiang inngaitlâwm tak ṭawngṭainate chuan a ṭawngṭaitu-ah ni lovin, Pathian lamah ngaihsakna a la zâwk a ni. (Matthaia 6:5) Ṭawngṭainaa kan thusawite chuan inngaihtlâwmna a lantîr thei bawk. Inngaitlâwm taka kan ṭawngṭai chuan, Pathian chu thil engemaw kan duh zâwng ti tûra phût angin kan lang lo vang. Chutihahnêkin, Jehova chu a duh zâwng nêna inrem taka che tûrin kan ngên zâwk ang. Sâm ziaktuin: “Aw LALPA, khawngaih takin chhandam la: Aw LALPA, khawngaih takin vânneihna rawn tîr ang che,” tia ngenna a siamin rilru put dân dik tak a entîr a ni.—Sâm 118:25; Luka 18:9-14.
Thlarau Lam Lunghlute
it-1-E 1060 ¶4
Vân
Jerusalema biak in satu Solomona chuan Pathian chu “vân leh vânte vânah pawh” a leng lo tih a sawi a. (1 Lal. 8:27) Vân Siamtu a nih angin, Jehova nihna chu thil dang zawng zawng aiin a sâng zâwk a, “a hming chauh chu chawi sânin a awm si a. A ropuina chuan lei leh vân a khûm daih a ni.” (Sâm 148:13) Miin khâp—a kut pharha a kutzupui aṭanga a kutzungtê inkâr—hmanga thil a teh ṭhîn ang hian, Jehova chuan vân khi awlsam takin a teh a ni. (Is. 40:12) Solomona thusawi awmzia chu Pathianin awmna hmun bîk a nei lo tihna a ni lo. Hmun tinah leh thil engkimah a ngial a nganin a awm a tihna lah a ni hek lo. Chumi chungchâng chu Jehova’n ‘a chênna hmun vân,’ thlarau thil siamte awmna hmun aṭanga kan ṭawngṭainate a ngaithla nia Solomona thusawi aṭangin kan hre thei a ni.—1 Lal. 8:30, 39.