Nun leh Rawngbâwlna Inzirna Lehkhabu Atâna Thu Lâk Chhuahnate
© 2023 Watch Tower Bible and Tract Society of Pennsylvania
MAY 1-7
PATHIAN THU AṬANGA RO HLUTE | 2 CHRONICLES 17-19
“Mi Dangte Chu Jehova Thlîr Angin Thlîr Rawh”
Hmân Lai Ziakte Lamah I Thinlung I Nghat Ang Em?
7 Tûnah chuan, Asa fapa Jehosaphata chanchin i lo ngaihtuah ang u. Ani chuan Jehova lâwm zâwng mize ṭha tak tak a nei a. Jehova a rinchhan lai chuan, thil ṭha tam tak a ti a ni. Mahse, thu tlûkna ṭha lo ṭhenkhat pawh a siam a. Entîr nân, a fapa nupui atân Lal sual Ahaba fanu nei tûrin ruahmanna a siam a. A hnuah, Ahaba’n Suria mite a beih khân, ṭanpui lo tûra zâwlnei Mika’n a vaukhân chung pawhin a ṭanpui a ni. Indonaah, Suria mite chuan Jehosaphata chu an bei a, thah an tum ta a ni. (2 Chronicles 18:1-32) Jerusalem-a a haw chuan, zâwlnei Jehua’n: “Mi suaksual chu i ṭanpuiin LALPA hawtute chu i hmangaih dâwn a ni maw?” tiin a lo zâwt a ni.—2 Chronicles 19:1-3 chhiar rawh.
Jehova Hmangaihna Dai Ngai Lo Chu Ngaihtuah Rawh
8 Jehova chuan a mi hmangaihna kan hriat chu a duh a, kan famkim lohna mai a en lo. Kan ṭhatna laite chu a zawng zâwk a ni. (2 Chronicles 16:9) Jehova’n Juda Lal Jehosaphata ṭhatna lai a hmuhsak dân i lo en ang u. Jehosaphata chuan Israel Lal Ahaba nêna Suria-ho chu Ramoth-gilead khuaa bei tûrin thu tlûkna ṭha lo tak a siam a. Zâwlnei der 400-te chuan Ahaba’n indona a hneh dâwn tiin thu dik lo sawi mah se, Jehova zâwlnei dik Mikaia erawh chuan Jehosaphata leh Ahaba hnênah chuan indonaa an tlâwm tûr thu a sawi a. Chutiang tak chuan an tlâwm ta a ni. Indonaah chuan Ahaba chu a thi a, Jehosaphata erawh chu a dam khawchhuak hrâm a ni. Indo zawh chuan, Jehosaphata chu a thil sual tihte avânga zilh tûrin Jehova chuan zâwlnei Jehua chu a tîr a. Chutichung pawhin: “Ṭhatna kawng eng emaw zawng i la nei cheu a ni,” tiin a hrilh a ni.—2 Chronicles 18:4, 5, 18-22, 33, 34; 19:1-3.
9 A hma kum tam tak khân, Jehosaphata chuan lal fapate, Levi mite, leh puthiamte hnênah Judai ram khua zawng zawng fang chhuaka Jehova Dânte zirtîr tûrin a hrilh a. Chu chu a hlawhtling hle a, ram dang mite pawhin Jehova an lo hriat phah hial a ni. (2 Chronicles 17:3-10) A hnuah thu tlukna dik lo siam mah se, Jehova chuan tûn hmaa a thil ṭha tihte chu a theihnghilh lo va. Keini pawhin thil tihsual châng kan neih ṭhin avângin, he entîrna hian min thlamuan hle. Jehova rawngbâwlnaa theih tâwp kan chhuah chuan, ani chuan thil ṭha kan lo tih tawhte chu theihnghilh lovin, min hmangaih reng zâwk ang.
Thlarau Lam Lunghlute
Thinlung Ṭha Famkimin Jehova Rawngbâwl Rawh!
10 Asa fapa Jehosaphata chuan “a pa Asa kawng chu pênsan hauh lovin a zawh a.” (2 Chronicles 20:31, 32) Engtin nge a zawh? A pa ang bawkin, mite chu Jehova be tûrin a fuih a. “LALPA dân bu” mite zirtîr tûrin mipate chu Juda khawpuiahte a tîr a ni. (2 Chronicles 17:7-10) Amah ngei pawh Israel hmâr lam rama awm, Ephraim tlâng rama mite hnênah kalin, “Pathian lamah a hruai kîr leh hlawm” a. (2 Chronicles 19:4) Jehosaphata chu “thinlung zawng zawnga LALPA zawng ṭhîn,” lal a ni.—2 Chronicles 22:9.
11 Tûn laiah pawh, Jehova chuan khawvêl puma mite chu a chanchin zirtîr a duh a, he hna hi kan vaiin kan thawk thei a ni. He hnaah hian thla tin tel i tum thei ang em? Mite’n Jehova an rawn biak ve theih nân Bible zirtîr i duh em? Chumi atân i ṭawngṭai em? Chumi atâna i thawhrim chuan, Jehova’n Bible zirpui nei tûrin a ṭanpui ang che. I hun âwl ṭhenkhat chân dâwn pawh ni la, tuemaw Bible zirpui i duh ang em? Jehosaphata’n mite chu Jehova be leh tûra a ṭanpui ang bawkin, keini pawhin kohhrana che châng tawh lote chu ṭanpui kan tum thei a ni. Chu bâkah, tûn hmaa an sualte kalsan tawh hnawhchhuahte va tlawh a, ṭanpuina pe tûrin kohhran upate chuan ruahmanna an siam a ni.
MAY 8-14
PATHIAN THU AṬANGA RO HLUTE | 2 CHRONICLES 20-21
Jehova In Pathian Chu Ring Rawh U
He Khawvêl Hlui Tâwpna Hmachhawn Tlângin
8 Lal Jehosaphata hun lai khân, Pathian mite chuan an chhehvêla hmêlma hlauhawm “mipui tam tak” chu an hmachhawn a. (2 Chro. 20:1, 2) Pathian chhiahhlawhte’n anmahni chakna rinchhana hmêlmate hneh an tum lo chu an fakawm hle. Anni chuan Jehova an rinchhan zâwk a ni. (2 Chronicles 20:3, 4 chhiar rawh.) Tin, Pathian an rinchhannaah pawh mi tinin an duhzâwng leh ṭha an tih ang angin an ti lo. Bible chuan: “Judate zawng zawng chu an fanau tê tê, an nupuite an fate nên LALPA hmaah an ding a,” tiin min hrilh a ni. (2 Chro. 20:13) A pui a pangte chuan Jehova kaihhruaina zâwm tûrin rinnain an bei tlâng a, an hmêlmate lakah Jehova chuan a vênghim a ni. (2 Chro. 20:20-27) Hei hi Pathian mite kan nih anga harsatnate hmachhawn dân tûr entîrna ṭha tak a ni lâwm ni?
Nupa Tuak Tharte U—In Nunah Jehova Rawngbâwlna Dah Pawimawh Ber Rawh U
7 Jehova chuan Levia mi Jahaziela hmangin Jehosaphata chu a bia a. A hnênah: “Inzâr ula, ding ngawt mai ula, in lama ṭang LALPA chhandamna chu en reng mai rawh u,” tiin a hrilh a ni. (2 Chro. 20:13-17) Dik tak chuan, chu chu râl beih dân pângngai a ni lo chiang hle! Mahse, chûng kaihhruainate chu mihring hnên aṭanga lo kal ni lovin, Jehova hnên aṭanga lo kal a ni. Jehosaphata chuan Pathian a rinchan tlat avângin a hrilh ang chuan a ti a. A mite nêna hmêlmate bei tûra an kal chhuah chuan, hma hruaitu atân râl do thiam tak sipaite ni lovin, râlthuam pawh nei lo hla satute chu a dah a. Jehosaphata’n a rinchhan ang ngeiin, Jehova chuan hmêlmate chu a titlâwm ta a ni.—2 Chro. 20:18-23.
Thlarau Lam Lunghlute
it-1-E 1271 ¶1-2
Jehorama
A nupui Athali thununna ṭha lo engemaw chen a dawn avângin, Jehorama chuan a pa Jehosaphata kawng fel zawhte chu a zawh ve lo va. (2 Lal. 8:18) Ani chuan a unau paruk leh Juda puipa ṭhenkhat a tihhlum mai bâkah, a khua leh tuite chu Jehova hawisantîrin, pathian dik lote lam a hawitîr a ni. (2 Chro. 21:1-6, 11-14) A rorêl chhûng chu ram chhûng leh pâwn lam aṭanga buaina hlîrin a khat a. A hmasain, Edom-ho chu an hel a; chumi hnuah, Libna khua pawh Juda lakah a hel ve bawk. (2 Lal. 8:20-22) Jehorama hnêna a lehkha thawnah, zâwlnei Elija chuan heti hian a vaukhân a: “Ngai teh, LALPAN i mite, i fate, i nupuite, i rante hripuiin a hrem ang,” tiin. Chu bâkah, nang, Lal Jehorama hi “rîl natna nasa tak i nei ang a, nî tin chu natna avânga i rîl chu a tlâk a tlâk a, a tlâk zawh vek thlengin,” tiin a hrilh bawk.—2 Chro. 21:12-15.
Chûng zawng zawng chu a thleng vek a. Jehova’n Arab mite leh Philistia mite chu Judai ram hneh tûr leh, Jehorama nupuite leh a fapate sala an man a remti a. Pathian chuan Jehorama fapa naupang ber Jehoahaza (Ahazia tia koh bawk) chauh dam khawchhuah a phal a; mahse, chu pawh chu Davida nêna a siam Lalram thuthlung vâng chauh a ni. “Chu mi hnuah chuan LALPAN [Jehorama chu] tihdam theih loh rîl natnain a hrem a.” Kum hnih a liam hnuah “a rîl chu a tla ta a,” a tâwpah a thi ta a ni. Chutiang chuan, chu mi sual nunna chu a lo tâwp a, “tuma ui hlawh lovin a thi a.” Ani chu Davida khawpuiah phûm a ni a, “lalho thlânah erawh chuan a ni lo.” A fapa Ahazia chu a aiah a lal ta a ni.—2 Chro. 21:7, 16-20; 22:1; 1 Chro. 3:10, 11.
MAY 15-21
PATHIAN THU AṬANGA RO HLUTE | 2 CHRONICLES 22-24
“Jehova’n Huaisen Taka Hma Lâknate Mal A Sâwm”
w09-E 4/1 24 ¶1-2
Ṭhian Sual Avângin Joasa’n Jehova A Hawisan
PATHIAN biak in awmna khawpui Jerusalem tân hun khirh tak a ni a. Lal Ahazia tih hlum a nihna chu a la rei lo hle a. A hnua, Ahazia nu Athali thiltih phei chu rin harsa tak a ni. Ani chuan Ahazia fapate—ama tûte ngei—chu a tihlum a nih chu! A chhan i hria em?—Anmahni aiah a lal theih nân a ni.
Mahse, Athali tûte zînga pakhat, nausên Joasa chu humhim a ni a, a pi chuan chumi chungchâng chu hriat pawh a hre lo. Humhim a nih dân chu hriat i duh em?—Chu nausên Joasa chuan nî Jehosabeathi a nei a, ani chuan Joasa chu Pathian biak inah a thukru a ni. A pasal chu Puithiam Lal Jehoiada a nih avângin, chutah chuan a thukru thei a. Chutiang chuan, an pahnihin Joasa chu him takin an thukru a ni.
w09-E 4/1 24 ¶3-5
Ṭhian Sual Avângin Joasa’n Jehova A Hawisan
Joasa chu kum ruk chhûng biak ina thuhrûk a ni a. Chutah chuan, ani chu Pathian Jehova leh a dânte chungchâng zawng zawng zirtîr a ni a. A hnuah, kum sarih a lo tlin chuan Jehoiada chuan Joasa chu lalah a siam ta a ni. Jehoiada’n Joasa lala a siam dân leh Lalnu sual tak, a pi Athali chunga thilthlengte chu hriat i duh em?—
Jehoiada chuan, chutih hun laia Jerusalema lalte’n an neih vêngtute chu a rûkin a ko khâwm a. An hnênah chuan an nupaa Lal Ahazia fapa dam khawchhuak tûra an ṭanpui dân chu a hrilh a. Tichuan, Jehoiada chuan chûng vêngtute hnênah Joasa chu a hmuh a, anni chuan Joasa chu lal tûr dik tak a ni tih an hria a ni. Tichuan, ruahmanna chu siam a ni ta.
Jehoiada chuan Joasa chu hruai chhuakin lallukhum a khumtîr a. Tichuan, mipuite chuan “an kut an bêng a, ‘Pathianin lalber humhim rawh se,’” an ti a. Chûng vêngtute chuan Joasa chu hualin an vêng tlat a. Athali’n chûng hlim thâwmte a lo hriat chuan, a rawn dodâl ta a. Mahse, Jehoiada thupêkin vêngtute chuan Athali chu an tihlum ta a ni.—2 Lalte 11:1-16.
it-1-E 379 ¶5
Phûmna, Phûmna Hmunte
Puithiam Lal fel tak Jehoiada chu “Davida khawpuiah lalte zîngah” phûma chawimawiin a awm a, amah chauh hi lal thlah ni lo, chutianga phûm nia târ lan awmchhun a ni.—2 Chro. 24:15, 16.
Thlarau Lam Lunghlute
it-2-E 1223 ¶13
Zekaria
12. Puithiam Lal Jehoiada fapa a ni a. Jehoiada a thih hnuah, Lal Joasa chuan Jehova zâwlneite thurâwn aiin thurâwn ṭha lote ngaithlain, biakna dik chu a hawisan a. Joasa laichîn, a unau Zekaria (2 Chro. 22:11) chuan mite chu chumi chungchângah a vaukhân tlat a; mahse, inchhîr a hnêkin, ani chu biak in hung chhûngah lungin an dêng hlum a ni. Zekaria thih dâwna a thusawi chu: “LALPAN a rawn ngaihtuah ang a, phuba a la rawn lâksak ang,” tih hi a ni. Chu zâwlnei ngenna chu chhânin a awm a, Suria mite’n Juda mite nasa taka an thah mai bâkah, Joasa ngei pawh “puithiam Jehoiada fapate thisen avâng khân” a chhiahhlawh pahnihte kutah tihhlumin a awm a ni. Grik Septuagint Bible leh Latin Vulgate Bible-te chuan Joasa chu Jehoiada “fapa” thisen phuba avânga tihhlum a nih thu an sawi a. Mahse, Masoretic Bible leh Syriac Peshitta Bible chuan “fapate” tiin a sawi thung a, chu chu Jehoiada fapa, zâwlnei leh puithiam nifâwm Zekaria ṭhatna leh hlutna sawi nân, pakhat aia tam sawina a hmang a ni thei ang.—2 Chro. 24:17-22, 25.
MAY 22-28
PATHIAN THU AṬANGA RO HLUTE | 2 CHRONICLES 25-27
Jehova Chuan Chu Aia Tam Tak Chu A Pe Thei Che
it-1-E 1266 ¶6
Joasa
Joasa chuan Edom mite bei tûrin Juda lal hnênah a sipai nuaikhat a rawihtîr bawk a. Mahse, “Pathian mi” thurâwn pêk avângin hawtîr an ni a, tangka talent za ($660,600) pêk lâwk an ni chung pawhin, râllâkte insemnaah chanpual an nei ve dâwn lo anga a lan avângin, hawtîr an ni chu an thinrim hle. Chuvângin, Hmâr lama an kîr leh hnu chuan chhim lam lalram, Samari (râl do tûra an inkhuarna hmun nia lang) aṭangin Beth-horon thlengin, chûng laia khuate chu an bei a ni.—2 Chro. 25:6-10, 13.
Jehova Ṭhatzia “Tem Chhin” Rawh U—Engtin Nge?
16 Jehova tân inpe rawh. Jehova tilâwm tûrin kan nuam tih zâwngte chu kan kalsan vek a ngai kher lo. (Thur. 5:19, 20) Mahse, mi mal inpêkna neih kan hreh avânga tam lehzuala Jehova rawngbâwl theihna kan hnâwl a nih chuan, Isua tehkhin thua kan hmuh Pathian ngaihsak aia mahni nawmsak nâna inchhêk khâwltu ang kan ni ve thei a ni. (Luka 12:16-21 chhiar rawh.) France rama chêng unau Christian-a chuan, “Jehova leh ka chhûngkaw tân ka hun leh tha neih ṭha ber ka pe lo,” tiin a sawi. Tichuan, an nupaa pioneer thawh an tum ta a. Mahse, an thiltum hlen thei tûr chuan an eizawnna hna an chawlhsan a ngai dâwn a ni. Mahni inchâwm nân in leh office tihthianghlim hna an thawk a, sum tlêm zâwk hmanga hlim taka khawsak dân an zir bawk. Chutianga an inpêkna avâng chuan an inchhîr em? Christian-a chuan, “Rawngbâwlnaa tel chu nuam kan ti lehzual tawhin, kan tlawhkîr leh Bible zirpuite’n Pathian Jehova chanchin an zir kan hmuh hian kan hlim hle a ni,” tiin a sawi.
Thlarau Lam Lunghlute
w07-E 12/15 10 ¶1-2
Thlarau Lama Kaihruaitu Che I Nei Em?
KUM 16 vêl leka upa a nihin, Uzia chu Juda chhim lam lalrama lal a lo ni a. Ani chuan B.C.E. kum zabi pakua tâwp lam aṭanga kum zabi pariat tîr lam thlengin, kum 50 chuang ro a rêl a. Naupang tê a nih aṭangin Uzia chuan, “LALPA mithmuha thil ṭha tak a ti ṭhîn a.” Kawng dik tak zawh tûrin ani chu engin nge thunun? Bible-in: “[Uzia] chuan Pathian inlârna hre thiam Zekaria dam chhûng chuan Pathian zawng tûrin a insiam tlat a: Pathian a zawn chhûng zawng chuan Pathianin a tihmuingîl zêl a,” tiin a sawi a ni.—2 Chronicles 26:1, 4, 5.
Bible-a he mi chungchâng tih loh chu, lal thurâwn petu Zekaria chungchâng hriat tûr a tam lo hle. Mahse, “Pathian dik ṭih tûra zirtîrtu” a nih angin, Zekaria chuan rorêltu naupang tak chu thil dik ti tûrin ṭha takin a thunun a ni. The Expositor’s Bible chuan Zekaria chu “Pathian thu hre tak, thlarau lama tawnhriat ngah tak, leh a thil hriatte mi dangte hnêna zirtîr thiam tak a ni,” tih a chiang hle tiin a sawi. Bible lama mi thiam pakhat chuan Zekaria chungchângah: “Ani chu hrilh lâwkna thute hre chiang mi a nih bâkah, . . . mi fing tak, Pathian tâna inpe tak, pa ṭha tak, leh Uzia chunga nghawng ṭha tak neitu a nih pawh a rinawm,” tiin thu tâwp a siam a ni.
MAY 29–JUNE 4
PATHIAN THU AṬANGA RO HLUTE | 2 CHRONICLES 28-29
“Entawn Ṭha Tûr Nei Lo Chung Pawhin Jehova Rawng I Bâwl Thei”
Jehova Ṭhian Ṭhate Chu Entawn Rawh
8 Hezekia leh Ruthi te ṭobul chu a inang lo hle a. Hezekia chu Pathian hnêna inpumpêk hnam zînga mi a ni a. Mahse, Israel mi zawng zawngte chu an rinawm reng lo. Hezekia pa, Lal Ahaza chu lal sual tak a ni a. Pathian biak in a zah lo va, mite chu pathian dangte be tûrin a hmin a ni. Ahaza chuan Hezekia unau ṭhenkhat chu pathian dik lo tâna inthawi nân a nung chungin a hâl a ni. Hezekia naupan lai hun chu a râpthlâk hle!—2 Lalte 16:2-4, 10-17; 2 Chronicles 28:1-3.
Jehova Ṭhian Ṭhate Chu Entawn Rawh
9 Ahaza entawn tûr ṭha lo tak chuan a fapa Hezekia chu Jehova chunga rilru nâin emaw, thinurin emaw a awmtîr thei a. Tûn laiah, Hezekia aia tuar nasa lo zâwk mi ṭhenkhat chuan ‘lalpa chunga vui’ chhan tûr leh a inawpna pâwl chunga rilru nat chhan tûr nei niin an inhria a ni. (Thufingte 19:3) Mi dangte chuan an chhûngkaw ṭobul chuan nun ṭha lo tak a neihtîrin, an nu leh pate thil sual tih ang a tihnawntîr niin an hre bawk. (Ezekiela 18:2, 3) Mahse, chutiang ngaih dân chu a dik em?
10 A dik lo tih Hezekia nun chuan a târ lang chiang hle! Jehova chunga thinurna tûr chhan ṭha a awm ngai lo. Jehova chuan mite chungah thil ṭha lo a thlentîr si lo va. (Joba 34:10) Nu leh pate chuan an fate chu thil ṭha emaw, thil sual emaw an zirtîr thei tih chu a dik a. (Thufingte 22:6; Kolossa 3:21) Mahse, kan chhûngkaw ṭobul chuan eng ang mi nge kan nih dâwn tih chungchâng chu a thunun tlat tihna a ni lo. Engvângin nge? Jehova chuan zalên taka duh thlan theihna min pêk vâng a ni a, a awmzia chu thil ṭha emaw, thil sual emaw tih kan thlang thei tihna a ni. (Deuteronomy 30:19) Engtin nge Hezekia chuan, chu thilpêk hlu tak chu a hman?
11 A pa chu Juda lal sual berte zînga mi ni mah se, Hezekia chu lal ṭha berte zînga mi a ni a. (2 Lalte 18:5, 6 chhiar rawh.) A pa entawn tûr ṭha lo tak zui loh chu a thlang a ni. Chu ai chuan, Isaia, Mika, leh Hosea ang Jehova zâwlneite thusawi chu ngun takin a ngaithla zâwk a. An zilhna leh thununnate chu a ngaihsak tlat a ni. Chu chuan a pa thlentîr buaina tam tak siam ṭha tûrin a chêttîr a. Biak in a thianfai a, Pathian hnênah mite sual ngaidam tûrin a ngên a, ram chhûnga milem biaknate chu a tichhe vek a ni. (2 Chronicles 29:1-11, 18-24; 31:1) A hnua Assuria lal Senakeriba’n Jerusalem a beih khân, Hezekia chuan huaisenna leh rinna nasa tak a târ lang a. Jehova vênhimna chu rinchhanin, a mite chu a tichak a ni. (2 Chronicles 32:7, 8) Ṭum khat chu Hezekia a lo chapo ta a; mahse, Jehova’n a zilh hnu chuan a inngaitlâwm ta a ni. (2 Chronicles 32:24-26) Hezekia chu kan tân entawn tûr ṭha tak a ni tih a chiang hle. A chhûngkaw ṭobulin a nun a tihchhiat chu a phal lo. Jehova ṭhian a nihzia a târ lang zâwk mah a ni.
Thlarau Lam Lunghlute
w12-E 2/15 24-25
Nathana—Biakna Thianghlim Atâna Rinawm Taka Hma Latu
Jehova chhiahhlawh rinawm a nih angin, Nathana chuan he leia biakna thianghlim hmun nghet hmasa ber sa tûra, Davida ruahmanna chu ṭhahnemngai takin a thlâwp a. Mahse, chumi ṭum chuan Nathana chuan Jehova hminga sawi lovin, a rilru vei zâwngte chu a sawi chhuak niin a lang. Chumi zân chuan zâwlnei chu lal hnêna a thusawi ang ni lo, thuchah dang va hrilh tûrin Pathianin a ti a ni: Davida chuan Jehova biak in a sa lo vang tih hi. A satu tûr chu Davida fapate zînga pakhat a ni ang. Mahse, Nathana chuan Pathianin Davida chu thu a thlunpui ang a; chuvângin, a lalṭhutthlêng chu “chatuana tihngheh a ni ang,” tih a hrilh a ni.—2 Sam. 7:4-16.
Biak in sak chungchânga Nathana ngaih dân chu Pathian duh zâwng nên a inmil lo va. Mahse, phunnawi mai lovin, he zâwlnei inngaitlâwm tak hian Jehova thiltum chu pawmin a thlâwp tlat a ni. Pathianin kawng eng emawti taka min siam ṭhat huna, kan tâna entawn tûr ṭha a va ni tak êm! A hnua zâwlnei anga Nathana thiltihte chuan, Pathian duhsakna a hloh lo tih a târ lang a ni. A nihna takah chuan, Jehova’n Nathana chu, lal remruatpuitu Gada nên biak in rawngbâwlnaa rimawi tum thiam, mi 4,000 ruat tûra Davida hnêna kaihhruaina pe tûrin a thâwk khum niin a lang.—1 Chro. 23:1-5; 2 Chro. 29:25.
JUNE 5-11
PATHIAN THU AṬANGA RO HLUTE | 2 CHRONICLES 30-31
“A Huhova Inkhâwm Hi Kan Hlâwkpui”
it-1-E 1103 ¶2
Hezekia
Biakna Dik Atâna A Ṭhahnemngaihna. Hezekia chuan kum 25 a niha lalṭhutthlênga a ṭhut veleh, Jehova biakna atâna a ṭhahnemngaihna chu a lantîr a. A hma lâkna hmasa ber chu biak in hawn leh siam ṭhat a ni. Tichuan, puithiamte leh Levi hote chu ko khâwmin an hnênah: “LALPA Israelte Pathian hnênah thuthlun ka tum a ni,” tiin a hrilh a. Hei hi rinawmna thuthlung a ni a, Dân thuthlung hman la ni reng chu ngaihthah ni mah se, Judai ramah vântlâng hmaa nemngheh thar ang mai a ni. Thatho takin ani chuan, Levi hote chu an rawngbâwlna a chhunzawmtîr a, rimawi tumtute leh fakna hlasatute tâna ruahmanna pawh a din thar leh a ni. Nisan thla, Kalhlên Kût hmanna tûr thla a ni a; mahse, biak in bâkah puithiamte leh Levi hote chu an thianghlim lo a ni. Nisan ni 16-ah chuan, biak in chu tihthianghlim a ni a, a chhûnga bungbêlte pawh dah luh leh a ni. Tichuan, Israel mi zawng zawng tâna a bîk taka remna siam tûr a ni a. A hmasain, mi lianhote chuan ram leh hmun thianghlim leh mipuihote tâna sual thawina an rawn keng a; chumi hnuah, mipuite chuan hâlral thilhlan a sâng têl an hlân a ni.—2 Chro. 29:1-36.
it-1-E 1103 ¶3
Hezekia
Mipuite chu an thianghlim loh avângin, Kalhlên Kût an hman hun pângngaiah an hmang thei lo va, thianghlim lote tân thla khat hnuah Kalhlên Kût hman phalsakna dân a awm a, chu dân chu Hezekia’n a hmang ṭangkai a ni. Lehkha tlânpuitute hmanga lehkha thawnin, Beer-seba aṭanga Dan thlengin Juda mite chauh ni lovin, Israelte pawh a sâwm a ni. Lehkha tlânpuitute chuan nuihsawhtu tam tak an tawng a; amaherawhchu, Aser-ho leh Manase-ho leh Zebulun-ho ṭhenkhat chu inngaitlâwm takin kal an tum a, Ephraim mi leh Isakar mi ṭhenkhatte pawh an tel a. Hei bâkah, Israel mi ni lo Jehova betu tam tak an tel ve bawk. Biakna thianghlim atâna ding hmâr lam lalrama awmte tân, chuta tel chu thil harsa tak a nih a rinawm. A chhan chu, hmâr lam lalram chu nungchang lama a tlâk hniam êm avâng te, biakna dik lova a pil bo tawh avâng te, leh Assuria mi hlauhawm takte tihduhdahna avângtein, thuchah kengtute ang bawkin dodâlna leh nuihsawhna an tawh ngei dâwn vâng a ni.—2 Chro. 30:1-20; Num. 9:10-13.
it-1-E 1103 ¶4-5
Hezekia
Kalhlên Kût a zawh chuan Chhang Dawidim Telh Loh Kût ni sarih an hmang a, chuta tel zawng zawngte chuan an hlim êm avângin ni sarih dang kût leh an rawt hial a ni. Chutiang hun khirh takah pawh chuan, Jehova’n mal a sâwm avângin “hlimna ropui tak Jerusalem-ah chuan a awm a: Israel lal Davida fapa Solomona chinah chutiang rêng rêng chu Jerusalem-ah a la awm ngai lo.”—2 Chro. 30:21-27.
Chu chu biakna dik din thar lehna leh harh tharna a ni tak zet tih leh, rilru lama rei lo tê hlimna atâna kal khâwm mai an ni lo tih a hnua thilthlengah hmuh a ni. Kûta telte chuan an ina an haw leh hmain, Judai ram zawng zawng leh Benjamin ram leh Ephraim leh Manase rama mi lungphunte an tisawm a, Aserite an kit a, hmun sângte leh maichâmte an tichim vek a ni. (2 Chro. 31:1) Mite’n Mosia dâr rûl siamte chu rimtuite hâla milem biak nâna an hman avângin, Hezekia chuan tikeh sawmin entawn tûr a siam a ni. (2 Lal. 18:4) Kût ropui tak a zawh hnuah, Hezekia chuan puithiam pâwl ṭhen fel dân tûrte huaihawtin leh, biak ina rawngbâwlna ṭanpui dân ruahmanin biakna dik kalpui chhunzawm zêl a ni ngei tih a chian a; ani chuan sâwma pakhat leh, lova thil haw hmasa berte Levi hote leh puithiamte hnêna pe tûra Dân awm chu zâwm tûrin thu a pe a, chu chu mipuite’n thinlung takin an zâwm a ni.—2 Chro. 31:2-12.
Thlarau Lam Lunghlute
“Chûng Thil Chu In Hriat Chuan Ti Ula In Eng A Thâwl Ang”
14 Inngaihtlâwmna kan lantîr theih dân kawng dang leh chu ṭha taka ngaihthlâk hi a ni. Jakoba 1:19 chuan “ngaihthlâk chuh” tûrin min hrilh a. Jehova chu ngaithlatu ṭha ber a ni. (Genesis 18:32; Josua 10:14) Entîr nân, Exodus 32:11-14-a kan hmuh inbiakna hi han ngaihtuah teh. (Chhiar rawh.) Jehova’n Mosia ngaih dân chu a hriat ngai lo mah se, a ngaihtuah dânte a sawitîr a. Tûn hmaa thil lo tisual ṭhîntu thusawi chu dawhthei taka ngaithlain, a thurâwn pêk chu i zui ang em? Jehova chuan rinnaa ṭawngṭai zawng zawngte chu dawhthei takin a ngaithla a ni.
15 Heti hian inzâwt rawh: ‘Jehova chu Abrahama te, Rakili te, Mosia te, Josua te, Manoa te, Elija te, leh Hezekiate thusawi a ngaihthlâk anga mite thusawi ngaithla thei khawpa a inngaitlâwm a nih chuan chutiang chuan ka ti ve tûr a ni lawm ni? Unaute ngaih dân ngaihthlâksak a, a theih chuan an ngaih dân zuina hmangin anni chu ka chawimawi lehzual thei ang em? Kohhranah leh chhûngkuaah nasa lehzuala kan ngaihsak ngai tuemaw an awm em? Chu mi chungchângah eng nge ka tih theih?’ tiin.—Genesis 30:6; Rorêltute 13:9; 1 Lalte 17:22; 2 Chronicles 30:20.
JUNE 12-18
PATHIAN THU AṬANGA RO HLUTE | 2 CHRONICLES 32-33
“Mangan Hunah Mi Dangte Tichaktu Ni Rawh”
it-1-E 204 ¶5
Assuria
Senakeriba. Sargona II-na fapa, Senakeriba chuan Hezekia rorêl kum 14-na (B.C.E. 732) chhûngin Juda lalram a bei a. (2 Lal. 18:13; Is. 36:1) Hezekia chu a pa Ahaza thiltih avânga a chunga tla ta, Assuria awpbehna lakah a hel a ni. (2 Lal. 18:7) Senakeriba chuan Judai ram rûnna hmangin a chhang lêt a, chhinchhiah dân chuan khawpui 46 (Is. 36:1, 2 nên khaikhin rawh) a la a; tichuan, riahhmun a khuarna Lakis aṭangin Hezekia chu rangkachak talent 30 (c. $11,560,000) leh tangka talent 300 (c. $1,982,000) pe tûrin a tuk a ni. (2 Lal. 18:14-16; 2 Chro. 32:1; Is. 8:5-8 nên khaikhin rawh.) Hêng sum leh paite hi pêk ni mah se, Senakeriba chuan Jerusalem khua chu inpe tûra nawr tûrin a aiawha thusawitute chu a tîr a. (2 Lal. 18:17–19:34; 2 Chro. 32:2-20) A hnua Jehova’n zan khat thila sipai rual 1,85,000 a tihhlumna chuan, Assuria mi chapo tak chu inhnûk dâwk tûr leh, loh theih lohva Ninevi-a kîr leh tûrin a siam a ni. (2 Lal. 19:35, 36) Chutah chuan a fapate pahnihin an tihlum a, a fapa dang Esar-haddona chu a aiawhin a lal ta a ni. (2 Lal. 19:37; 2 Chro. 32:21, 22; Is. 37:36-38) Assuria sipai rual tihboralna tel lovin, heng thilthlengte hi Senakeriba leh Esar-haddonate lungphunah chhinchhiah a ni bawk.—MILEMTE, Vol. 1, p. 957.
Berâmpu Pasarih leh Mi Ropui Pariat—Tûn Laia Kan Tâna Awmzia An Neih Chu
12 Jehova chu kan tih theih loh thilte min tihsak a inhuam reng a; mahse, kan tih theih thilte ti ve tûrin min beisei a ni. Hezekia chuan “a mi liante leh a mi chakte” chu a râwn a, ‘khaw pâwn lama tuite tihchah’ chu an tum ta a ni. “Tichuan [Hezekia chu] a intihuai a, kulh chim lai zawng zawngte chu a siam a, in sângte a din ṭha a, pâwn lam kulhte pawh. Tin, . . . hriamhreite leh phawte tam tak a siam a.” (2 Chro. 32:3-5) Jehova chuan chutih hun laia a mite vênghim tûr leh enkawl tûrin mi huaisen—Hezekia te, a mi liante, leh thlarau lama chak zâwlneite chu a hmang a ni.
Berâmpu Pasarih leh Mi Ropui Pariat—Tûn Laia Kan Tâna Awmzia An Neih Chu
13 A dawta Hezekia thiltih chu tui tihchah leh khawpui kulhte siam ṭhat aiin a pawimawh zâwk daih a. Mite ngaihsak tak berâm vêngtu a nih angin, Hezekia chuan mipuite chu a ko khâwm a: “Asuria lal . . . chu hlau suh ula, zâm hek suh u, kan lama ṭang chu a lama ṭang aiin a chak zâwk si a: a lama ṭang chu tisa sipai an ni a, min pui tûr leh min dosak tûra kan lama ṭang erawh chu LALPA kan Pathian a ni si a,” tih thute hian anni chu thlarau lamah a tichak a ni. Rinna tichaktu hriattîrna a va ni êm—Jehova chuan a mite tân a dosak dâwn tih hi! Chu thu an hriat chuan, Juda “mipui chuan Juda lal Hezekia thu sawite chu an ring a.” Mipuite tichaktu chu “Hezekia thu sawite” a ni tih hi lo chhinchhiah ang che. Zâwlnei Mika leh Isaia pawh tiamin amah leh a mi liante leh a mi chakte chu Jehova’n a zâwlnei hmanga a lo sawi lâwk berâm vêngtu hlawhtling a ni tak zet a ni.—2 Chro. 32:7, 8; Mika 5:5, 6 chhiar rawh.
Thlarau Lam Lunghlute
Inchhîrna Dik Tak Chu Eng Nge Ni?
11 A hnuah chuan, Jehova’n Manasea ṭawngṭainate chu a chhâng a. Ṭawngṭainaa a sawite aṭangin a inthlâk danglam tak zet tih a hmu a ni. Chuvângin, Jehova chuan ngaidam tûra Manasea ngenna chu a ngaihthlâksakin, lalṭhutthlêngah a ṭhuttîr leh a ni. Manasea chuan inchhîrna dik tak lantîr tûrin theih tâwp a chuah a. Ani chuan Ahaba’n a tih ngai loh chu a ti a ni. A nungchang a thlâk a. Biakna dik lo chu ṭhahnemngai taka dovin, biakna dik chu a chawisâng leh a ni. (2 Chronicles 33:15, 16 chhiar rawh.) Chutiang ti tûr chuan, Manasea’n huaisenna leh rinna a neih a ngai ngei ang, kum tam tak chhûng chu a chhûngte, a mi ropui te, leh a mite tân entawn tûr ṭha lo tak a lo siam si a. Mahse, tûna a thih dâwn hnaih lam kumahte chuan, amah avânga lo awm harsatna ṭhenkhat chu chinfel a tum a. Chu chuan a hnua lal ṭha tak rawn ni a tupa Josia chungah nghawng ṭha tak a nei ngei ang.—2 Lal. 22:1, 2.
12 Manasea entîrna aṭangin eng nge kan zir theih? Ani chuan inngaihtlâwmna a lantîr bâkah, thil dangte pawh a ti a. Khawngaihna dîlin a ṭawngṭai a ni. A nun kawngte a thlâk a. Amah avânga lo awm harsatnate chu theih tâwp chhuahin a chingfel a, Jehova chibai bûk tûr leh mi dangte pawh chutianga ti ve tûrin a ṭanpui bawk. Manasea entîrna chuan mi sual berte tân pawh beiseina a neihtîr a ni. Heta ṭang hian Pathian Jehova chu ‘a ṭhain, ngaihdam a peih’ tih finfiahna chiang tak kan hmu a. (Sâm 86:5) Inchhîrna dik tak lantîrtute chu Jehova ngaihdam an ni ang.
JUNE 19-25
PATHIAN THU AṬANGA RO HLUTE | 2 CHRONICLES 34-36
“Pathian Thu Hi I Hlâwkpui Tak Zet Em?”
it-1-E 1157 ¶4
Huldi
Biak in sak ṭhatna hna thawh a nih chhûnga, puithiam lalber Hilkia hmuh chhuah “dân lehkhabu” chhiar Josia’n a han hriat chuan, Jehova râwn tûrin mite a tîr a. Anni chu Huldi hnênah an va kal a, ani chuan thuawih lohna avânga chhiatna lo thleng tûr ‘lehkhabua’ chhinchhiah zawng zawng chu kalpêng hnam chungah a thleng dâwn tih sawiin, Jehova thute chu a lo hrilh a. Huldi chuan Josia chu Jehova hmaa a intihtlâwm avângin, chûng chhiatnate chu a hmu ve lo vang a, a pi leh pute hnêna, thlâna thlamuang taka hruai a nih tûr thu a lo hrilh zâwk a ni.—2 Lal. 22:8-20; 2 Chro. 34:14-28.
Jehova In Tân Ṭhahnemngai Rawh!
20 Lal Josia huaihawt biak in din thar lehna hna thawh a nih lai chuan, Puithiam Lal Hilkia chuan “Mosia hmanga pêk LALPA dân bu chu a hmu chhuak a.” Chu chu lal lehkha ziaktu Saphana hnênah a pe a, ani chuan Josia hmaah a chhiar a ni. (2 Chronicles 34:14-18 chhiar rawh.) Chu chuan eng nge nghawng a neih? Dân thu chu a han hriat chuan lal chuan a puan a pawt thlêr nghâl a, a mite chu Pathian Jehova râwnsak tûrin thu a pe ta a ni. Zâwlneinu Huldai kal tlangin, Pathian chuan Judai rama sakhaw chîn dân ṭhenkhat a duh loh thu a hrilh a. Mahse, milem biakna tibo tûra Josia hma lâkna chu Pathianin a hmuh hmaih lo va, a hnam puma hrem a tum thu a puang chung pawhin, Josia chu a duhsak chhun zawm zêl a ni. (2 Chro. 34:19-28) Chuta ṭang chuan nge nge kan zir theih? Josia ang nih chu kan duh ve ngei a. Pathian kan biaknaah kal pênna leh rinawm lohna kan indîpdâltîr chuan thil pawi a thleng thei tih hre rengin, Pathian Jehova kaihhruaina zawm nghâl vat chu kan duh a ni. Pathian Jehova’n Josia ṭhehnemngaihna a hmuh ang bawkin, amah biaknaa kan ṭhahnemngaihna pawh chu a hmu ve tih kan ring tlat thei a ni.
Thlarau Lam Lunghlute
Hmân Lai Ziakte Lamah I Thinlung I Nghat Ang Em?
15 A tâwp berah, Josia hnên aṭangin eng nge kan zir theih? Lal ṭha tak ni mah se, a thihna thlen thei thil a tisual a. (2 Chronicles 35:20-22 chhiar rawh.) Eng thil nge thleng? Aigupta lal Nekova chu chhan awm lovin a do va. Dik tak chuan, Nekova chuan do a duh loh thu Josia a hrilh a ni. Bible chuan Nekova thusawite chu “Pathian kâ aṭanga” lo chhuak tiin a sawi. Mahse, Josia chu indo tûrin a chhuak a, thah a ni ta a ni. Engvângin nge Nekova chu a do? A chhan erawh Bible-in a sawi lo.
16 Josia chuan Nekova thusawi chu Jehova hnên aṭang a nih leh nih loh zawng chhuak âwm tak a ni. Engtin nge a zawn chhuah ang? Jehova zâwlnei Jeremia chu a zâwt thei a. (2 Chronicles 35:23, 25) Chu bâkah, Josia chuan thil nih dân dik tak chu a ngaihtuah tûr a ni. Nekova chu Jerusalem ni lovin, hnam dang bei tûrin Karchemis-ah a kal a. Ani chuan Jehova leh a mite chu tihlungnih loh a tum hek lo. Josia chuan thu tlûkna a siam hmain chûng thilte chu ngun takin a ngaihtuah lo a ni. Kan zir tûr chu eng nge ni? Buaina kan neih hunah leh thu tlûkna kan siam a ngaih hunah Jehova’n ti tûra min duhte chu kan ngaihtuah hmasa tûr a ni.
17 Thu tlûkna siam tûr kan neih hunah, min ṭanpui theitu leh kan hman theih Bible thu bulte chu kan ngaihtuah hmasa tûr a ni a. Dinhmun ṭhenkhatah chuan, kan thu leh hla chhuahte chu nasa taka zir bing kan duh thei a, a nih loh leh upa hnênah thurâwn kan dîl mai thei bawk. Upa chuan Bible thu bul dangte ngaihtuah tûrin min ṭanpui thei a ni. He dinhmun hi han ngaihtuah teh: Unaunu chuan Thuhretu ni lo tuemaw chu pasalah a nei a. Ni khat chu rawngbâwla chhuak tûrin ruahmanna a siam a. (Tirhkohte 4:20) Mahse, chumi nîah chuan, thu hrila chhuah chu a pasalin a phal lo a ni. A pasal chuan hun tam tak an hman dun theih ngai loh thu leh hmun pakhata hruai a duh thu a hrilh a. Chuvângin, unaunu chuan thu tlûkna ṭha siam thei tûra ṭanpuitu Bible chângte chu a chhût ngun a. Pathian thu âwih a ngai tih leh Isua’n zirtîr siam tûrin thu min pe tih a hria a ni. (Matthaia 28:19, 20; Tirhkohte 5:29) Mahse, nupui chu a pasal thuhnuaia a intukluh a ngai tih leh Pathian chhiahhlawhte chuan a âwm tâwk hriatna an neih a ngai tih a hre reng a ni. (Ephesi 5:22-24; Philippi 4:5) A pasal chuan a thu hrilhna tih tâwp a tum nge ni a, chumi nîa hun hmanpui a duh mai zâwk? Jehova chhiahhlawhte kan nih angin, inâwm tâwk leh amah tilâwm theitu thu tlûknate siam kan duh a ni.
JUNE 26–JULY 2
PATHIAN THU AṬANGA RO HLUTE | EZRA 1-3
“Jehova Inhmantîr Rawh”
Zakaria Hmuh Chu I Hmu Em?
JUDA mite chu an phûr hle a. Pathian Jehova chuan Babulon sala kum sâwmbi têl lo awm tawh Israel mite chhuah tûrin ‘Persia lal Kura thinlung chu a chawk tho va.’ Lal chuan Juda mite chu an rama kîr leh a, ‘LALPA, Israel-hote Pathian in han sa’ tûrin thu a pe a ni. (Ezra 1:1, 3) Chu chu thupêk phûrawm tak a va ni êm! Pathian dik biakna chu a mite hnêna a pêk ram ngeiah din ṭhat leh a ni dâwn tihna a ni.
Sakawr Tawlailîrte leh Lallukhum Chuan A Vêng Ang Che
2 Zakaria chuan Jerusalema kîr leh Judate chu Jehova betute an ni tih a hria a. Anni chu Babulona an inte leh sumdâwnnate chhuahsan tûra “Pathianin an thinlung a chawh thawh zawng zawngte” an ni. (Ezra 1:2, 3, 5) An zînga a tam zâwkin an hmuh ngai loh rama kal tûrin an hriat bel êm êm hmun chu an chhuahsan a. Juda mite tân Jehova biak in sak ṭhat leh chu a pawimawh êm avângin, kilometer 1,600 (mêl 1,000) vêla hla zin kawng hlauhawm tak chu kal an inhuam a ni.
Thlarau Lam Lunghlute
Ezra Bu Aṭanga Thu Pawimawh Hrilhfiahna
1:3-6. Babulona awm Israel mi ṭhenkhatte angin, Jehova Thuhretu tam takte chuan hunbi kimin rawng an bâwl thei lo va, mamawh zualna hmunah rawng an bâwl thei hek lo. Mahse, a thawk theite chu chhawmdâwlin, an fuih a; tin, Lalram rawngbâwlna leh zirtîr siam hna thawh nân phal takin thawhlâwm an thawh a ni.