Tuin Nge Khawvêl Hi Thunun Tlat?

BIBLE SAWI DAN CHUAN

“Khawvêl pumhlûm hi mi sual thu thuin a awm.”—1 Johana 5:19. “Pathian Fapa lo lan chhan ber chu diabola hnathawhte a tihboral theih nân a ni.”—1 Johana 3:8, O.V. Reference.

I ṬANGKAIPUI THEIH DAN

Khawvêl buaina chungchâng awmze nei taka hrilhfiahna i hre thei.—Thu Puan 12:12.

Kan khawvêl hi a ṭha zâwngin a inthlâkthleng dâwn tih rin nachhan tûr i nei thei.—1 Johana 2:17.

BIBLE SAWI CHU KAN RING THEI EM?

Thei e, a lo berah pawh chhan pathum avângin:

• Setana rorêlna chuan boralna a hmabâk. Jehova chuan mihringte chunga Setana thununna chu tihtâwp a tum nget tlat a. “Diabola . . . tihboral” leh Setana thlentîr chhiatna zawng zawng sûtlêt chu min tiam a ni.—Hebrai 2:14.

• Pathianin khawvêl awp tûrin Isua Krista a thlang fel tawh. Isua chu tûna khawvêl lal nunrâwng leh mahni hmasial tak nên chuan a inang lo hle. Isua chungchângah Pathian chuan: “Mi rethei leh pachhiate chu a khawngaih ang a . . . An nunna chu hnehchhiahna leh nunrâwnna lak ata a tlan ang,” tih min tiam a ni.—Sâm 72:13, 14.

• Pathianin dâwt a sawi thei lo. Bible chuan heti hian a sawi a ni: “Pathian chu daw rual a ni lo ve,” tiin. (Hebrai 6:18, C.L. Re-edited) Chuvângin, Pathianin thil engemaw ti tûra thu min tiam hian, tih tawh ang tluka ngaih theih a ni tlat! (Isaia 55:10, 11) “He khawvêl lal hi paih chhuah a ni ang.”—Johana 12:31, O.V. Reference.