Unaupate U—Kohhranho Rawngbâwltu Ni Tûrin Hma In La Em?

1. Engtin nge tirhkoh Paula chuan kohhranho rawngbâwltute chu a thlîr?

KOHHRANHO rawngbâwltute hian kohhranah chanvo pawimawh tak an chelh a. Tirhkoh Paula pawhin a hun laia chûng mipa rinawm takte chu a ngai hlu hle. Entîr nân, Philippi khuaa Kristiante hnêna a lehkhathawnah, kohhran upate rualin, a bîk takin kohhranho rawngbâwltute chu chibai a bûk tih kan hmu thei a ni.—Phil. 1:1.

2. Engtin nge unau Luis-a chuan kohhranho rawngbâwltu anga a chanvo dawn chu a thlîr?

² Kum lama upa emaw, naupang emaw pawh ni se, baptisma chang tawh unaupate chuan kohhranho rawngbâwltu an nihna aṭangin hlimna nasa tak an nei a. Entîr nân, Devan-a chu kum 18 mi a nihin kohhranho rawngbâwltu a ni a. Chutih rualin, unau Luis-a erawh chu kum 50 a chuan hnuah ruat a ni ve thung. Mi dang tam takte ang bawkin ani chuan a chanvo a thlîr dân chu heti hian a sawi a ni: “A bîk takin, kohhranin ka chunga hmangaihna a lantîr dân ka ngaihtuah hian kohhranho rawngbâwltu anga rawng ka bâwl theihna hi ka ngai hlu tak zet!” tiin.

3. Eng zawhnate nge kan sawiho vang?

³ Baptisma chang tawh unaupa i nih a, kohhranho rawngbâwltu i la ni lo a nih chuan, chu chu thiltumah i nei thei ang em? Chutianga ti tûrin engin nge chêttîr thei che? Bible-a târ lan eng miziate nge i tlin ngai? He thuziakah hian hêng zawhnate hi sawiho a ni ang. Mahse, a hmasain, kohhranho rawngbâwltute chanvo dawnah eng nge tel tih i lo bih chiang ang u.

KOHHRANHO RAWNGBAWLTUTE CHANVO DAWNAH ENG NGE TEL?

4. Kohhranho rawngbâwltute chanvo dawnah eng nge tel? (Milem en bawk rawh.)

⁴ Kohhranho rawngbâwltute chu kohhrana thil pawimawh tak tak tihnaa upate ṭanpui tûra thlarau thianghlim hmanga ruat baptisma chang tawh unaupate an ni a. Kohhranho rawngbâwltu ṭhenkhat chuan thuchhuahtute’n rawngbâwlna bial leh thu leh hla chhuah indaih tâwk an neih leh neih loh an chian ṭhîn a. Mi dangte chuan Kingdom Hall tihthianghlimna leh vawn ṭhatna lamah an ṭanpui a. Chu bâkah, kohhran inkhâwmnaahte pawh inkhâwmnaa lo kalte lo lâwm lûttu attendant anga rawngbâwlin, audio-video hmanruate an enkawl bawk a. Hêng an hnathawh zawng zawngte hi a ṭangkai hle a. Mahse, a pawimawh ber chu kohhranho rawngbâwltute chu Pathian Jehova hmangaih a, a tehna mila nung thlarau mi takte an ni tih hi a ni a. An Kristian unaute chu an hmangaih hle bawk a ni. (Mt. 22:37-39) A nih chuan, engtin nge baptisma chang tawh unaupa chuan kohhranho rawngbâwltu ni tûra hma a lâk theih?

5. Hma la tih awmzia chu eng nge ni?

⁵ Bible chuan kohhranho rawngbâwltu ni tûrte tâna tlin ngai miziate a târ lang a. (1 Tim. 3:8-10, 12, 13) Bible-a târ lan chûng miziate zir chianna leh chûngte nei chho tûra ṭan lâkna hmangin he chanvo hlu tak chelh thei tûrin hma i la thei a ni. Mahse, a hmasain, chutianga hma i lâk duh chhan chu i chian a ngai a ni.

ENGIN NGE HMA LA TURA CHETTIR CHE?

6. Engin nge i unaute chu eng kawng pawha rawngbâwlsak tûra chêttîr ang che? (Matthaia 20:28; a kâwma milem en bawk rawh.)

⁶ Kan entawn tûr ṭha ber chu Isua Krista a ni a—a Pa leh mihringte a hmangaihna chuan mi dangte tâna thawk rim tûr leh hna hnuaihnung takte thawk tûrin a chêttîr a. (Matthaia 20:28 chhiar rawh; Joh. 13:5, 14, 15) Nang pawh, hmangaihna avânga hma la i nih chuan, Pathian Jehova’n mal a sâwm chein, kohhranho rawngbâwltu ni thei tûrin a ṭanpui ang che.—1 Kor. 16:14; 1 Pet. 5:5.

7. Engvângin nge unaupate chuan mahni hmasial taka tum sânnate chu an pumpelh a ngaih?

⁷ Khawvêlah chuan mahni inchawi lârtute chuan mite ngaihsân an hlawh fo va. Jehova inawpna pâwlah chuan chutiang chu a ni lo va. Isua anga hmangaihna vânga chêttîra awm unaupa chuan mi dangte chunga thuneih emaw, mahni inchawi lâr emaw chu a duh lo vang. Thiltum sâng tak nei tu emaw chu kohhranah chanvo nei ta se, Jehova berâmte enkawl tûra hna hnuaihnung takte thawh a ngaih hunah a thawh duh loh a rinawm a ni. Chûng hnate chu a thawh atâna hniam lutuk angin a thlîr thei a. (Joh. 10:12) Chapo tak leh mahni hmasial taka tum sânna neitute thawh rimna chu Jehova’n mal a sâwm lo vang.—1 Kor. 10:24, 33; 13:4, 5.

8. Isua’n a tirhkohte hnênah eng thu nge a hrilh?

⁸ Isua ṭhian hnai takte pawhin chanvo hlute chelh duhin, hma an lo la tawh a; mahse, anmahni chêttîrtu chu a dik lo a ni. Isua tirhkoh Jakoba leh Johana thiltih hi han ngaihtuah teh. Isua hnênah a Lalrama chanvo pawimawh tak chelh an dîl a. Isua chuan chutianga an tum sâna avânga fak ahnêkin, tirhkoh 12-te hnênah heti hian a hrilh a ni: “Tu pawh in zînga hmasa ber nih duh chu, in vaia chhiahhlawhah a awm tûr a ni,” tiin. (Mk. 10:35-37, 43, 44, NWT) Chêttîrtu dik tak—mi dangte rawngbâwlsak duhna—neia hma latu unaupate chu kohhran tân malsâwmna an ni ang.—1 Thes. 2:8.

ENGIN NGE HMA LAK DUHNA NEIHTIR THEI CHE?

9. Engtin nge hma lâk duhna i neih chhoh theih?

⁹ Jehova i hmangaihin, mi dangte rawngbâwlsak i duh tih chu a chiang ngei a. Mahse, kohhranho rawngbâwltu anga mawhphurhna dangte lâk belh chu i châk lo pawh a ni mai thei. A nih chuan, engtin nge hma lâk duhna i neih chhoh theih ang? I unaute rawngbâwlsakna aṭanga lo awm thei hlimnate chu i ngaihtuah thei a ni. Isua chuan: “Mi dang hnên aṭanga thil dawn aiin, mi hnêna in pêk chhuahin in hlim zâwk ang,” a ti a. (Tirh. 20:35, NWT) Ani chuan he thu bul hi a nunpui a. Mi dangte rawng a bâwlsakna aṭangin hlimna dik tak a hmu a, nang pawhin i hmu ve thei a ni.

10. Engtin nge Isua’n mi dangte rawngbâwlsak nuam a tihzia chu a lantîr? (Marka 6:31-34)

¹⁰ Tûnah, Isua’n mi dangte ṭanpui nuam a tih dân târ langtu entîrna pakhat i lo ngaihtuah ang u. (Marka 6:31-34 chhiar rawh.) Ṭum khat chu, Isua leh a tirhkohte chu an hah hle a. Hmun fianriala chawl tûrin an kal a. Mahse, mipuite chuan Isua zirtîrnate ngaithla tûrin an lo thlen khalh a. Isua leh a tirhkohte chuan “chaw tak ngial pawh an ei hman lo va.” Chuvângin, a duh chuan mipuite chu a hnar haw thei a, a nih loh leh thutak tlêm azâwng zirtîrin a hawtîr thei a ni. Mahse, hmangaihnain a chêttîr avângin anni chu “thu tam tak a zirtîr ta a.” “Khua a tlai” thlengin a zirtîr a ni. (Mk. 6:35, NWT) Chûngte chu a tih tûr ngei ngei anga a thlîr vâng ni lovin, anni chu ‘a khawngaih êm’ avânga ti a ni. A hmangaih avângin anni chu zirtîr a duh a. Mi dangte rawngbâwlsakna chuan Isua chu hlimna nasa tak a neihtîr a ni.

11. Engtin nge Isua’n a thu ngaithlatute chu a ṭanpui? (Milem en bawk rawh.)

¹¹ Isua’n chûng mite rawng a bâwlsak chuan Pathian thu a zirtîr mai bâkah, an tisa lam mamawhte pawh a ngaihsak a. Thil mak hmangin ei tûr a buatsaihsak a, chûng chu a zirtîrte a semtîr a; chutiang chuan, anni chu mi dangte rawngbâwlsak dân a zirtîr a ni. (Mk. 6:41) Chu bâkah, kohhranho rawngbâwltute hna thawh ṭhin ang mi dangte rawngbâwlsakna chu thil pawimawh tak a ni tih a lantîr bawk a. Zirtîrte’n thil mak tihna hmanga a buatsaih ei tûrte mite an sem a, “an vaiin an ei a, an puar” tih an hmuh laia an hlim dân tûr chu han mitthla teh! (Mk. 6:42, NWT) He thilthleng hi Isua’n ama mamawhte aia mi dangte mamawh a ngaih pawimawh zâwkzia târ lanna thilthleng awm chhun a ni lo. A lei lam nun pumpui chu mi dangte tân a hmang a. (Mt. 4:23; 8:16) Isua chuan mi dangte zirtîr a, an mamawhte inngaitlâwm taka a ṭanpuina aṭangin hlimna leh lungawina a nei a. Nang pawh, mahni hmasial lova, kohhranho rawngbâwltu anga mi dangte ṭanpuina aṭangin hlimna i nei ve ngei ang tih a chiang.

12. Engvângin nge kohhran tâna tihsak theih nei lo anga kan inngaih loh vang?

¹² Thiamna eng emaw nei lo anga i inhria a nih pawhin, lunghnual suh ang che. Kohhrana mi ṭangkai tak nihtîr theitu che miziate i nei ngei ang tih a chiang. 1 Korinth 12:12-30-a Paula thusawite chu chhiar a, ṭawngṭaia chhût ngunna chu i hlâwkpui thei a ni. Paula thusawite chuan Jehova chhiahhlawh dangte ang bawkin, kohhranah chanvo hlu leh pawimawh tak i nei tih chiang takin a târ lang a ni. Kohhranho rawngbâwltu ni tûra i la tling lo a nih chuan, lunghnual mai lo la, Jehova leh i unaute tâna i tih theih eng pawh chu tih tum tlat zâwk ang che. Kohhran upate chuan ṭha taka ngaihtuahin i tih theih tûr mawhphurhnate an pe dâwn che tih i chiang thei a ni.—Rom 12:4-8.

13. Engvângin nge kohhranho rawngbâwltu nih chu thil harsa lutuk a nih loh?

¹³ Kohhranho rawngbâwltu ni thei tûra hma i lâkna tûr chhan dang pakhat hi han ngaihtuah teh: Tlin ngai mizia a tam zâwkte chu Kristian zawng zawngte tân a ni. Dik tak chuan, Kristian zawng zawngte chuan Jehova an hnaih ṭheuh tûr a ni a, inpêkna aṭanga lo awm hlimna neiin, an Kristian nun kawngah entawn tûr ṭha an siam ṭheuh tûr a ni. A bîk takin, unaupate’n hma la tûrin eng nge an tih theih?

HMA LAK DAN TUR

14. “Mi zahawm” tih awmzia chu eng nge ni? (1 Timothea 3:8-10, 12)

¹⁴ Tûnah, 1 Timothea 3:8-10, 12 -a târ lan tlin ngai mize ṭhenkhatte hi i lo bih chiang ang u. (Chhiar rawh.) Kohhranho rawngbâwltu chu “mi zahawm” a ni tûr a ni a. Chumi awmzia chu i nui thei lo, a nih loh leh fiamthu i hlimpui thei lo tihna a ni lo va. (Thur. 3:1, 4) Chutih rualin, mawhphurhna i dawn zawng zawngte chu ṭhahnemngai takin i hlen chhuak tûr a ni. Mi rinawm leh rin tlâk nia hming ṭha i nei a nih chuan unaute’n an zah ang che.

15. ‘Kam tam lo’ leh ‘hlêpna bawlhhlawha duhâm lo’ tih awmzia chu eng nge ni?

¹⁵ ‘Kam tam lo’ tih awmzia chu mi dik tak leh rin tlâk i ni tihna a ni a. I thusawi angin i awm a, mite i bum lo. (Thuf. 3:32) ‘Hlêpna bawlhhlawha duhâm lo’ tih awmzia chu sumdâwnnaah leh sum leh pai chungchângah i rinawmin i dik tihna a ni a. I Kristian unaute nêna inlaichînna ṭha i neihte chu sum leh pai lama hlâwkpui nân i hmang ṭangkai lo vang.

16. (a) ‘Uain heh lo’ tih awmzia chu eng nge ni? (b) ‘Chhia leh ṭha hriatna thiang’ nei tih awmzia chu eng nge ni?

¹⁶ ‘Uain heh lo’ tih awmzia chu zû a lutukin i in lo, a nih loh leh zu ruih hmang nia hriat hlawh i ni lo tihna a ni. ‘Chhia leh ṭha hriatna thiang’ nei tih awmzia chu Jehova tehnate milin i nung tihna a ni a. Mi ṭha famkim ni lo mah la, Pathian nêna inlaichînna aṭangin thlamuanna i nei a ni.

17. Engtin nge unaupate chuan ‘fiaha awm’ an nih chhûng pawha rinchhan tlâk an ni tih an lantîr theih”? (1 Timothea 3:10; milem en bawk rawh.)

¹⁷ ‘Fiaha awm’ tih awmzia chu mawhphurhnate la tûrin i rin tlâk tih i lantîr tawh tihna a ni a. Chuvângin, upate’n mawhphurhna an pe che a nih chuan, an thu hrilh che leh inawpna pâwl aṭanga i dawn kaihhruainate chu fîmkhur takin zâwm la. I mawhphurhnain a ken telte leh i zawh hun tûrte chu hriat chian tum ang che. I mawhphurhna dawn apiang taima taka i hlen chhuak a nih chuan, kohhran mite chuan i hmasâwnna chu an hmu ang a, an ngai hlu dâwn a ni. Upate u, baptisma chang tawh unaupate chu zirtîr tûrin hma la ang che u. (1 Timothea 3:10 chhiar rawh.) In kohhranah tleirâwl chhuak, a nih loh leh chu aia naupang baptisma chang tawh unaupate an awm em? Mi mala inzirna hun duan ṭha an nei em? Kohhranah chhânnate an pe ziahin, thu hrilh rawngbâwlnaah an tel ziah em? Chutiang a nih chuan, an kum leh an dinhmun nêna inmil an tlin theih tûr mawhphurhnate pe ang che u. Chutiang chuan, ṭhalai unaupate chu ‘fiaha awm’ an ni thei ang a. Tûn aṭanga kum rei lo têah [kum 17 mi chauh an nih pawhin] kohhranho rawngbâwltu an rawn ni thei a ni.

18. “Sawisêl bo” tih awmzia chu eng nge ni?

¹⁸ “Sawisêl bo” tih awmzia chu mite chuan thil sual titu anga puh tûr chein ṭanchhan tûr dik tak an nei lo tihna a ni. Kristiante chu dik lo taka puh an ni thei ngei mai. Isua ngei pawh kha dik lo taka puhin a awm a, a hnungzuitute pawhin chutiang thil chu an tâwk ve dâwn tih a sawi lâwk bawk a ni. (Joh. 15:20) Chutih rualin, Isua anga nungchang lama thianghlimna i vawng tlat a nih chuan kohhranah hming ṭha i nei ang.—Mt. 11:19.

19. “Nupui pakhat nei” tihah chuan eng nge tel?

¹⁹ “Nupui pakhat nei.” Kawppui nei i nih chuan, inneihna chungchânga a tîr aṭanga Jehova tehna—mipa pakhat leh hmeichhe pakhat—chu i zâwm tûr a ni. (Mt. 19:3-9) Kristian mipa chu nungchang bawlhhlawhnaah a inhnamhnawih tûr a ni lo va. (Heb. 13:4) Mahse, chutah chuan mipat hmeichhiatna hman aia tam a tel a ni. I nupui chungah i rinawm tlat tûr a ni a, hmeichhe dangte chu i ngaih melh tûr a ni lo.—Job. 31:1.

20. Engtin nge unaupa chuan a chhûngkaw ‘khawsak a rêl fel’?

²⁰ “An fate leh anmahni in chhûng khawsak rêl felin.” Chhûngkaw lû i nih chuan, i mawhphurhnate chu i ngai pawimawh hle tûr a ni a. Chhûngkuaa Pathian biakna chu kaihruai ziah ang che. I chhûngkuaa mi tinte chu a tam thei ang berin rawngbâwlnaah chhuahpui la. I fate chu mi mal taka Pathian Jehova nêna inlaichînna nei chho tûrin ṭanpui ang che. (Eph. 6:4) A chhûngkua enkawltu mipa chuan kohhran pawh a enkawl thei tih a târ lang a ni.—1 Timothea 3:5 nên khaikhin rawh.

21. Kohhranho rawngbâwltu i la nih loh chuan, eng nge i tih theih?

²¹ Unaupate u, kohhranho rawngbâwltu in la nih loh chuan, he thuziaka thute hi ṭawngṭaiin ngun takin ngaihtuah ang che u. Kohhranho rawngbâwltute tâna tlin ngai miziate chu zir ula, nei chho tûrin theih tâwp chhuah ang che u. Jehova leh in unaute in hmangaihzia chu ngaihtuah ula. In unaute hmangaih lehzual tûra ṭan lain, an rawng in bâwl duh chhan chu ngaihtuah ang che u. (1 Pet. 4:8, 10) Chutianga in tih chuan, in thlarau lam chhûngkua rawngbâwlsakna aṭangin hlimna nasa tak in hmu ang. Kohhranho rawngbâwltu ni tûra ṭan in lâkna kawngah Jehova’n nasa takin malsâwm che u rawh se!—Phil. 2:13.