MI INNGAITLAWM NIH THEIH DAN

INNGAIHTLAWMNA CHU ENG NGE NI?

Mi inngaitlâwm chuan mite a zah thiam a. Induhna a nei lo va, mi dangte’n a bîk taka an cheibâwl a beisei hek lo. Chu aiin, mi inngaitlâwm chuan mi dangte a ngaihsak tak zetin, an hnên aṭanga inzîr a duh a ni.

A châng chuan, inngaihtlâwmna chu chak lohna anga hriat sual a ni ṭhîn a. Dik tak chuan, chu mizia chuan chak lohnate kan neiin, tihtheih chin tâwk kan nei tih inhre tûra min ṭanpui avângin, chu chu chakna zâwk a ni.

ENGVANGIN NGE INNGAIHTLAWMNA HI A PAWIMAWH?

• Inngaihtlâwmnain inlaichhînna ṭha a siam. The Narcissism Epidemic tih lehkhabu chuan, “A tlângpui thuin, mi ngaithlâwmte tân mi dangte ṭhiana siam chu a awlsam lehzual,” tih a sawi a. Chu bâkah, chutiang mite tân “mi dangte nêna inlaichînna ṭha neih a awlsam bawk,” tiin a sawi belh a ni.

• Inngaihtlâwmna chuan i fate hma lam hun a siam ṭha. Mi inngaihtlâwm nih tumna chuan i fate chu tûnah leh an puitlin hunah—entîr nân, hna an zawn hunah a ṭanpui ang. “Mahni tlin lohna hre lova inchhuang taka awm ṭhalaite chu hna dîla interview an chhân hunah a hlawhtling duh lo va. Mahse, interview huna zawhna an zawh ṭhin thu pawimawhte hre duh tak zettu chuan hna a hmu tlângpui,”a tiin Dr.Leonard Sax chuan a ziak a ni.

INNGAIHTLAWM TURA ZIRTIR DAN

Inbûk tâwk taka mahni inthlîrna nei tûrin fuih rawh.

BIBLE THU BUL: “Mi, eng mah ni si lovin, mi lian deuhva a inhriat chuan a inbum chawp mai a ni si.”—Galatia 6:3.

• Kaihhruaina dik lo chu pumpelh rawh. “I duhthusâm zawng zawng chu a thleng dik thei a, i nih duh ang apiang chu i ni thei,” tia sawi chu ṭha tak angin lang mah se, a tak ramah chuan a thleng dik lo fok. I fate chuan thiltum inâwm tak an neih a, hlen tûra theih tâwp an chhuah chuan an hlawhtling lehzual ngei ang.

• Thiltih eng emaw bîkah fak rawh. Naupang chu “fel tak” i ni tia hrilh maina chuan inngaitlâwm tûrin a chêttîr lo vang. Fak bîkna nei rawh.

• I fate social media hmanna chu chin tâwk neihtîr rawh. Social media kal tlangin mite chuan an thiamnate leh an thil hlen chhuahte puang zârin, mahni an inchawilâr ṭhîn, chu chu inngaihtlâwmna kalh chiah a ni.

• I fate chu ngaihdam dîl nghâl tûrin fuih la. I fa chu a thil tih dik lohna laite hre tûr leh pawm tûrin ṭanpui rawh.

Lâwm nachâng hre tûrin ṭanpui rawh.

BIBLE THU BUL: “Lâwm nachâng hre bawk rawh u.”—Kolossa 3:15.

• Thil siam avângin lâwm nachâng hre rawh. Naupangte chuan thil siamte leh kan nun zawm zêl theih nâna chûng thil siamte pawimawhzia an hriat thiam tûr a ni. Kan hîp tûr boruak ṭha te, in tûr tui te, leh ei tûrte kan mamawh a. Thil siam mawi tak takte avânga lâwmna leh mak tihna min neitîrtu entîrnate hmang ang che.

• Mite chungah lâwm nachâng hre rawh. Mi tinte hian kawng eng emawti takin kan aia ṭhat zâwkna an nei a, mi dangte thiamna leh thil tihtheihnate chu îtsîk ahnêkin, an hnên aṭangin kan inzir thei tih i fa chu hrilh ang che.

• Lâwmthu sawi rawh. I fate chu “ka lâwm e,” tia ṭawngkam mai ni lova, thinlung taka sawi tûrin zirtîr rawh. Lâwm nachâng hriatna chuan inngaitlâwm reng tûrin min ṭanpui a ni.

I fate chu mi dangte ṭanpui a hlutna hre tûrin zirtîr rawh.

BIBLE THU BUL: “Elrel leh inngaihhlut avânga eng mah ti lovin mi tinin inngaitlâwm takin mahni aiin mi dang ṭha zâwkah ruat ṭheuh rawh se; mahni ta ta mai en lovin, mi dang ta pawh en ṭheuh zâwk rawh u.”—Philippi 2:3, 4.

• I fa chu in chhûng hnate thawhtîr rawh. Anni chu in chhûng hna thawk lo va, i awltîr chuan ‘Chu chu hna ho lam tak, thawh ngai lo,’ niin i ngaihtîr thei a! In chhûng hna chu a pawimawh hmasa ber a, a dawtah infiamna a ni tûr a ni. In chhûng hnate thawhpuina chu mi dangte ṭanpuina ang a nih bâkah, mi dangte lâwm leh zah pawh kan hlawh bawk.

• Mi dangte tâna thil tihsak a ṭhat dân chu sawi uar rawh. Mi dangte tâna thiltihna chuan naupangte chu puitling tûrin a ṭanpui a ni. Chuvângin, i fate chu ṭanpui ngaite hre thiam tûrin fuih la. Mi dangte an ṭanpui theih dânte chu sawipui bawk ang che. Mi dangte thil a tihsaknaah ṭanpui la, fak ang che.