MI RILRU NGHET TAK NIH DAN

RILRU NGHET TIH CHU ENG NGE NI?

Mi rilru nghet chuan amah dâltu leh hrehawmnate chu a paltlang a. Chu chu thiltawn aṭanga neih a ni. Naupangte chu tlu lovin an kal thei nghâl lo angin, harsatnate tawng lovin nun hlawhtling a zir theih lo a ni.

ENGVANGIN NGE RILRU NGHET NEIH A PAWIMAWH?

Naupang ṭhenkhat chu hlawhchhamna te, harsatna leh sawisêlnate an hmachhawn hian an lunghnual a. Naupang ṭhenkhat chu an beidawn hle a ni. Mahse, a hnuai thute hi an hriatthiam a ngai a ni:

• Kan thiltih apiangah kan hlawhtling reng lo vang.—Jakoba 3:2.

• Mi tin hian nunah dinhmun khirh takte kan tâwk ṭheuh vang.—Thuhriltu 9:11.

• Zilhna chu zirtîrna atâna pawimawh tak a ni.—Thufingte 9:9.

Rilru nghet tak neihna chuan i fate chu nuna dinhmun harsat tak an tawh hunah hmachhawn thei tûrin a ṭanpui ang.

RILRU NGHET NEI TURA ZIRTIR DAN

I fa a hlawhchham hunah.

BIBLE THU BUL: “Mi fel chu vawi sarih tlu mah sela, a tho leh zêl ṭhîn.”—Thufingte 24:16.

I fat chu thilte a nihna ang taka thlîr thiam tûrin ṭanpui ang che. Entîr nân, school exam-naa a pass loh chuan eng nge a tih ang? “Eng mah ka ti dik thei lo!” tia sawiin a beidawng mai thei.

Rilru nghet nei tûr chuan, i fa chu hmasâwn a ngaihna laite hre tûrin ṭanpui ang che. Chutiang kawng chuan, buainate avânga beidawn aiin, a chinfel dân kawng a zawng zâwk ang.

Chutih rualin, a hmachhawn buainate chinfelsak chu pumpelh rawh. Chu aiin, mahnia chinfel thei tûrin ṭanpui zâwk ang che. Heti hian i zâwt thei a ni, “I zir laite hre thiam lehzual tûrin eng nge i tih theih?” tiin.

Harsatna a hmachhawn hunah.

BIBLE THU BUL: “Naktûkah chuan eng nge lo awm dâwn in hre si lo.”—Jakoba 4:14.

Nun hi sawi lâwk theih a ni lo. Vawiinah hausa tak ni mah ila, a tûkah mi reithei tak i ni thei a ni. Bible chuan ‘intlânsiaknaah mi chak chu a hlawhling chuang lo va, indonaah mi huai a hlawhtling chuang hek lo; . . . hun leh beisei loh thilte a thlen ṭhin avângin,’ tiin a sawi a ni.—Thuhriltu 9:11.

Nu leh pate in nih angin, hlauhawm laka fate vênghim tûrin theih tâwp in chhuah a. Dik taka sawi chuan, in fate chu thil ṭha lo zawng zawng laka vênhim theih a ni lo.

I fate chu hna chânna te, leh sum leh pai harsatnate tawng tûr khawpin an la upa lo pawh a ni thei. Chuti a nih pawhin, i fate chu ṭhiante chânna te, leh chhûngkhaw zînga tuemaw thihnate ang chi harsatna dang chu hmachhawn thei tûrin i ṭanpui thei a ni.a

I fa chu hmasâwn tûra hrilh an nih hunah.

BIBLE THU BUL: “A tâwp a tâwpa i lo fin theih nân, . . . thununna pawisa rawh.”—Thufingte 19:20.

Hmasâwn tûra inhrilh chu inhnehchhiahna a ni lo; Chu chu thiltih leh rilru put hmanga inthlâk danglamna an siam ngaite hriattîrna a ni.

Kaihhruaina pawm tûra fate i zitîr chuan in pahnihin in hlâwkpui ve ve ang. Pa pakhat John-a chuan, “Naupangte chu an dik lohnaa i siam ṭhat loh chuan engtikah mah an inzir ngai lo vang,” tiin a sawi a. An nunah buaina an nei tam tulh tulh ang a, nu leh pa i nih angin, chu an buainate chu i chinfelsak a ngai reng ang. Chu chuan nu leh pate leh naupangte tân pawh nun a tihrehawm a ni,” tiin a sawi.

Engtin nge i fate chu hmasâwn tûra hrilhhriatna hlâwkpui tûra i ṭanpui theih? I fa chuan—school-ah emaw, hmun dangah emaw—hmasâwn tûra hrilhhriat an ni chu hnar lo tûrin suh ang che. Chu aiin, heti hian i zâwt thei a ni:

• “Engvângin nge zilhna anga i ngaih?”

• “Engtin nge hma i sâwn theih?”

• “He dinhmun ang hi ka tawh leh hunah eng nge ka tih ang?”

Lainatna tel ṭawngkam hmanga sawisêl chu i fa chuan tûnah chauh ni lovin, nakina a puitling hunah pawh a hlâwkpui ang tih hria reng ang che.