Kohhran Chhûnga Inrêlbâwl Dân leh Rorêl Dân

TIRHKOH Paula chuan Korinth khuaa mite hnêna a lehkha thawn hmasa zâwkah Pathian chungchânga thu dik pawimawh tak pakhat a sawi lang a ni: “Pathian chu buaina Pathian a ni lo va, remna Pathian a ni zâwk si a,” tiin. A hnuah, kohhran inkhâwmte chungchângah heti hian a sawi zawm a ni: “Engkim mawi tak leh fel taka tih ni rawh se,” tiin.—1 Kor. 14:33, 40.

² Chu a lehkha thawn inṭannaah, tirhkoh chuan Korinth kohhran chhûnga inṭhenna awm chungchângah zilhna a pe a. Chulai hmuna awm unaute chu, ‘thu thuhmun sawi’ tur leh “rilru hmun khat leh ngaihtuahna hmun khata fel taka inzawm tlat” tûrin a fuih a. (1 Kor. 1:10, 11) Chumi hnuah, kohhran inpumkhatna nghawngtu thil hrang hrang chungchângah a zilh ta a ni. Mihring taksa chu entîr nâna hmangin, inpumkhat leh thawhho a pawimawhzia a hrilh a. Kristian kohhrana mi zawng zawng chu eng chanvo pawh chelh se, hmangaih taka inngaihsak tawn tûrin a fuih a ni. (1 Kor. 12:12-26) Chutianga kohhran chhûnga mite inlungrual taka thawhhona chuan, inrêlbâwl dân fel tak a nei ang tih a hril a ni.

³ Mahse, Kristian kohhran chu eng anga inrêlbâwl tûr nge a nih? Tuin nge rêlbâwl ang? Eng ang kal hmang nge a neih ang? Tute’n nge kaihruai ang? Bible inkaihhruaitîrna hmangin, hêng zawhnate chhânna fiah tak kan hmu thei a ni.—1 Kor. 4:6.

PATHIAN KAIHHRUAINA ANGA INRELBAWLNA

⁴ Kristian kohhran chu C.E. 33 Pentikost nî khân din a ni a. Kum zabi khatnaa kohhran chungchâng eng nge kan hriat theih? Pathian kaihhruaina anga rêlbâwl leh rorêl a ni a; chu mi awmzia chu Pathian (Greek, the·osʹ) rorêlna (kraʹtos) hnuaia awm tihna a ni. Hêng thu mal pahnihte hi 1 Petera 5:10, 11-ah a lang a. Pathian thâwk khum thua kan hmuh kum 2,000 dâwn lai liam taa Jerusalema thilthleng chuan hriak thih Kristian kohhran chu Pathian din a ni tih a nemnghet a. (Tirh. 2:1-47) Chu kohhran chu a in, a chhûngte a ni. (1 Kor. 3:9; Eph. 2:19) Tûn laia Kristian kohran hian kum zabi khatnaa kohhran inrêlbâwl dân leh hnathawh dân chu a zui a ni.

⁵ Kristian kohhran chu zirtîr 120 vêla din ṭan a ni a. Joela 2:28, 29 thu thlen famkim nân an chungah thlarau thianghlim leih hmasak a ni. (Tirh. 2:16-18) Mahse, chumi nî vêk chuan mi 3,000 vêlin tuiah baptisma changin thlarauva hrinte awmna kohhrana hruai luh an ni a. Anni chuan Krista chungchâng thu chu an pawm a, “tirhkohte zirtîrin . . . an awm reng a.” Chumi hnu chuan, “chhandam mêk apiangte chu Lalpain nî tin an hnênah a teltîr zêl ṭhîn” a ni.—Tirh. 2:41, 42, 47.

⁶ Jerusalema kohhran chu a pun nasat tâk êm avângin, Juda puithiam lal pawhin zirtîrte’n an thu zirtîrnaa Jerusalem khua an tihkhah vek thu a sawi hial a ni. Jerusalema zirtîr tharte zîngah chuan Juda puithiam tam tak pawh an lo tel a, kohhranho zînga mi an lo ni ta a ni.—Tirh. 5:27, 28; 6:7.

⁷ Isua chuan: “Jerusalem khuaah te, Judai leh Samari ram khaw tinah te, kâwlkil thleng pawhin ka thuhretute in ni ang,” tiin a sawi a. (Tirh. 1:8) A sawi ang ngeiin, Stephana thih hnua Jerusalema tihduhdahna nasa tak a chhuah khân, chu lai hmuna chêng zirtîrte chu Judai leh Samari ram khaw tinahte chuan an darh ta a. An kalna apiangah chanchin ṭha puang chhuak zêlin, zirtîr an siam belh zêl a, a ṭhen phei chu Samari mite an ni. (Tirh. 8:1-13) A hnuah, chanchin ṭha chu serh tan loh, Juda ni lo hnam dangte hnênah pawh hlawhtling taka hrilh a ni zêl a. (Tirh. 10:1-48) Chûng thu hrilhna avâng chuan zirtîr tam tak siam belh a niin, Jerusalem pâwnah pawh kohhran tharte din a ni ta a ni.—Tirh. 11:19-21; 14:21-23.

⁸ Kohhran din thar apiangte chu Pathian duh dân—Pathian kaihhruaina—anga rêlbâwl leh rorêl a nih theih nân eng ruahmanna nge siam a nih? Pathian thlarau hnathawh hmangin berâmte enkawl tûrin Krista hnuaia berâm vêngtute ruahman a ni a. Paula leh Barnaba chuan an missionary zin hmasak ber ṭuma an tlawh kohhranahte chuan upate an ruat a. (Tirh. 14:23) Bible ziaktu Luka chuan Paula leh Ephesi khuaa kohhran upate inhmuhkhâwmna thu a sawi a ni. Paula chuan an hnênah heti hian a sawi a ni: “Pathian kohhranho, ama [Fapa] thisena a leite chu châwm tûrin, nangmahni leh in hote zawng zawng chungah chuan fîmkhur rawh u, thlarau thianghlimin an chunga hotuah a siam che u hi,” tiin. (Tirh. 20:17, 28) Chûng mite chuan Bible-a upate tâna thil phûte an tlin avângin upa nih an tling a ni. (1 Tim. 3:1-7) Paula hnathawhpui Tita chu Kret thliarkâra kohhranahte chuan upate ruat tûra thuneihna pêk a ni.—Tit. 1:5.

⁹ Chutianga kohhran a lo din tam zêl tâkah chuan, tirhkohte leh Jerusalema kohhran upate chuan kum zabi khatna khawvêla kohhran ṭhang chho zêlte tâna hotu ber angin rawng an bawl chho zêl a. An tâna governing body angin rawng an bâwl ta a ni.

¹⁰ Tirhkoh Paula chuan Ephesi khuaa kohhran mite hnêna a lehkha thawnah Pathian thlarau nêna inmila hna an thawh chuan Kristian kohhran chuan Isua Krista lû nihna pawmin rinawm takin inpumkhatna an vawng thei tih a hrilhfiah a. Paula chuan chumi hmuna awm Kristiante chu inngaihtlâwmna nei tur leh kohhrana mi tinte nêna inrem taka an awm hova, “inpumkhatna” vawng reng tûrin a fuih a ni. (Eph. 4:1-6) Tichuan, Sâm 68:18 chu la chhuakin, Jehova pêk thlarau lama mipa tling takte chu kohhranin a mamawh ang zêla tirhkoh atân te, zâwlnei atân te, chanchin ṭha hriltu atân te, kohhran châwmtu leh zirtîrtu atântea ruat an nih thu a sawi a. Pathian hnên aṭanga thilpêk an nih angin, chûng mipate chuan kohhran pum pui chu Pathian lawm an hlawh theih nân, thlarau lama famkim tûrin an ṭanpui a ni.—Eph. 4:7-16.

TUN LAIA KOHHRANTE CHUAN TIRHKOHTE TIH DAN AN ZUI

¹¹ Tûn laiah pawh, Jehova Thuhretute kohhran tinah chuan tirhkohte hun laia kal phung ang chiah chu zui a ni a. Hei hian hriak thihte kaihhruaina hnuaia awm khawvêl puma kohhran inpumkhat a siam a ni. (Zak. 8:23) Isua Krista avânga chutianga awm thei a ni a. A lo tiam tawh angin, Isua Krista chu “kumkhuain, khawvêl tâwp thleng pawhin” a zirtîr hriak thihte hnênah rinawm takin a awm reng a ni. Kohhran ṭhang chho mêka lo lûtte chuan Pathian chungchânga chanchin ṭha chu an pawm a, Jehova hnênah an inpumpêk a, Isua zirtîrte angin baptisma an chang a ni. (Mt. 28:19, 20; Mk. 1:14; Tirh. 2:41) Anni chuan “berâm vêngtu ṭha” Isua Krista chu, hriak thih Kristiante leh “berâm dang” hmanga din, berâm rual zawng zawng chunga Hotu a ni tih an hria a. (Joh. 10:14, 16; Eph. 1:22, 23) Chu “pâwl pakhat” chuan Krista lû nihna rinawm taka a pawm bâkah, Krista ruat “bâwih rinawm, fing tak” lakah intulûtin, inpumkhatna a vawng a ni. He Pathian mi hmante chungah hian rinna pumhlûm i lantîr zêl ang u.—Mt. 24:45.

SAKHUANA LAMA CORPORATION-TE HMAN A NIH DAN

¹² Thlarau lam chaw a hun taka sem a nih theih nân leh tâwpna lo thlen hmaa Lalram chanchin ṭha hrilh a nih theih nân corporation-te din a ni a. Chûngte chu ram hrang hrangah dân anga din a ni a, an inṭâwiâwm tlâng vek a. Khawvêl puma chanchin ṭha hrilhna an awlsamtîr a ni.

BRANCH INRELBAWL DAN RUHREL

¹³ Branch office din a nih apiangin, chu ram emaw, chumi branch thuneihna huam chhûnga awm ramte emawa rawngbâwlna enkawl tûrin upa pathum emaw, a aia tam emaw chu Branch Committee atâna ruat an ni ṭhîn a. Committee member zînga pakhat chu Branch Committee coordinator angin a awm ṭhîn.

¹⁴ Branch hnuaia awm tualchhûng kohhrante chu bial chi hrang hranga ṭhen a ni a. A ram awm dân leh ṭawng hmante bâkah, branch hnuaia awm kohhran a tam dân azirin, bial len zâwng chu a inang lo thei a ni. Bial tina kohhrante enkawl tûrin bial kantu pakhat ruat a ni a. Branch office chuan bial kantu hnênah a mawhphurhnate a hlen dân tûr chungchângah kaihhruaina a pe a ni.

¹⁵ Kohhrante chuan mi tin tâna ṭha tûra inawpna pâwlin a siam ruahmannate chu a pawm a. Branch te, bial te, leh kohhrante enkawltu atâna upaa ruatte chu a pawm a ni. A hun taka thlarau lam chaw pe tûrin bâwih rinawm leh fing tak chu an rinchhan a. Tûn laia bâwih rinawm chu Krista lû nihna hnuaiah a intulût thlap a, Bible thu bulte vuan tlatin, thlarau thianghlim kaihhruaina chu a zui tlat a ni. Kan zaa inlungrual taka kan thawhho hian, kum zabi khatnaa Kristiante thiltawn ang chu kan tawng a ni: “Kohhran pâwlte chu rinnaah chuan an nghet ta a, ni tin an pung ta deuh deuh va,” tih chu.—Tirh. 16:5.