Baptisma Changtu Tûrte Nêna A Hnukhâr Nâna Sawiho Tûr

Baptisma channa chu Jehova Thuhretute inkhâwmpuiahte neih a ni tlângpui a. Baptisma channa thusawi zawhah, thusawitu chuan baptisma chang tûrte chu dintîrin, a hnuaia zawhna pahnihte hi aw ring taka chhâng tûrin a ngên ang:

1. I sualte sim a, Isua hmanga Pathian min pêk chhandamna kawng chu pawmin, Jehova hnênah i inpumpêk tawh em?

2. I baptisma channa hian Jehova inawpna pâwl zînga tel Jehova Thuhretu pakhat angin a chhinchhiah che tih i hria em?

Hêng zawhnate chiang tak leh fiah taka a chhânna hi baptisma chang tûra hian tlanna a ring a, Pathian Jehova hnênah tiam chin awm lovin a inpumpêk tawh tih vântlâng hmaa ‘kaa a ṭanna’ a ni. (Rom 10:9, 10) Baptisma chang tûrte chuan mi mal rin tlatna nêna an chhân theih nân hêng zawhnate hi ṭawngṭaina nên ngun takin an lo ngaihtuah lâwk duh ngei ang.

Jehova chauh chibai i bûk tawh tûr thu leh a duh zâwng tih chu i nuna i dah pawimawh ber tûr thu chu ṭawngṭaia tiamin, a hnênah i inpumpêk tawh em?

Remchâng hmasa berah baptisma i chang tûr a ni tih i thinlung zawng zawngin i ring tlat em?

Baptisma chan nâna thuam inchawih tâwk chu eng nge ni? (1 Tim. 2:9, 10; Joh. 15:19; Phil. 1:10, 11)

‘Pathian kan ngaihsakna’ târ lang tûrin “inthlahdah lo leh inbel lutuk lovin” kan inthuam tûr a ni. Chuvângin, baptisma chang tûrte chuan taksa lang tam thei tuihleuh kawr an ha lo vang a, khawvêl thuziak leh au hlate chuanna thuamhnawte chu an inbel lo vang. He hun zahawmna nêna inchawihin, felfai tak, thianghlim tak, leh zahawm takin an inthuam tûr a ni.

Baptisma a chan laiin, mi chu eng angin nge a awm ang? (Lk. 3:21, 22)

Isua baptisma chan dân chuan tûn laia Kristian baptisma channa atân entawn tûr min hnutchhiah a. Ani chuan baptisma chan hi rahbi urhsûn tak a ni tih a hria a, chu chu a rilru put hmangah leh a thiltihah a lang a ni. Chuvângin, baptisma channa hmun chu fiamthu thawhna hmun, infiamna hmun, tuihleuhna hmun, a nih loh leh a hun urhsûnna la kiang thei thil dang tihna hmun a ni tûr a ni lo. Kristian thar pawhin hnehna ropui tak chang ang maiin inâwm lo takin a awm tûr a ni hek lo. Baptisma channa hi hun hlimawm tak a nih rualin, chu hlimna chu zahawm taka lantîr tûr a ni.

Engtin nge inkhâwm ziahna leh kohhran belh tlatna chuan Jehova hnêna i inpumpêkna hlen tûrin a ṭanpui ang che?

Baptisma i chan hnuah, engvângin nge mi mal inzirna hun duan ṭha tak neih leh rawngbâwlnaa tel ziah chu a pawimawh ang?

KOHHRAN UPATE TANA KAIHHRUAINA

Baptisma la chang lo thuchhuahtuin baptisma chan a duh thu hriat a nih hunah chuan, ani chu he lehkhabua “Baptisma Chang Duhte Hnêna Zawh Tûr Zawhnate,” tih phêk 185-207-a thu awmte ngun taka ennawn tûra fuih tûr a ni. Upate nêna sawihona nei tûra a inbuatsaih dân tûr hrilhfiahna thu, phêk 182 aṭanga inṭan “Baptisma La Chang Lo Thuchhuahtu Hnêna Thuchah,” tih chu kawhhmuh tûr a ni bawk. Chuta inziak angin, baptisma chang tûra chuan sawiho chhûngin lehkha phêk danga a thu chhinchhiah a hmang thei ang a, he lehkhabu hi a keu thei bawk ang. Amaherawhchu, upate a hmuh hmaa tuemawin zawhnate a lo ennawnpui hmasak erawh a ngai lo.

Baptisma chang duhte chuan upate râwn khâwmtu coordinator a hriattîr tûr a ni a. Baptisma chang duhtuin “Baptisma Chang Duhte Hnêna Zawh Tûr Zawhnate,” tih a chhiar hnuah coordinator chuan ṭawngṭaiin Jehova hnênah A duh zâwng ti tûra inpumpêkna a neih tawh leh tawh loh a zâwt ang. Chutianga inpumpêkna a neih tawh chuan, upate râwn khâwmtu coordinator chuan upate zînga pahnih chu “Baptisma Chang Duhte Hnêna Zawh Tûr Zawhnate,” tih chu sawipui tûrin ruahmanna a siam ang. He ṭhen hnih nei sawihona atân upa hran ve ve chanvo pêk tûr a ni. Hêng sawihona nei tûr hian inkhâwmpui neih hun tûr hriat hun lo nghah kher a ngai lo.

Ṭhen hnih nei he sawihona hi a tlângpui thuin dârkâr khat awh ṭum hniha zawh theih a ni a; mahse, a ṭûl phawt chuan a aia tam hman a pawi hran lo. Sawihona apiang chu ṭawngṭainaa ṭan leh khâr tûr a ni. Baptisma changtu tûr emaw, upate emaw chu zawhnate an sawiho hian an hmanhmawh vak tûr a ni lo. Chanvo changtu upate chuan he an mawhphurhna hi an ngai pawimawh tûr a ni.

Zawhnate ennawnna chu a huhova nei lo va, a mal mala tih a ṭha ber tlângpui a. Baptisma chang tûr chu zawhna zawng zawng chhântîrna hmangin, upate chuan a hriatthiamna thûk dân an hre thei ang a, baptisma chang tûrin a tling em, tih rinhlelna a paih bo vang. Chu bâkah, a mal mala neih a nih hian baptisma changtu tûr chuan chhânna a pe duh zâwk thei bawk. Nupate chuan sawihona chu a rualin an nei thei ang.

Baptisma changtu tûr chu unaunu a nih chuan, sawihona chu mi dangte hmuh theih, an thusawi hriat phâk si lova neih tûr a ni. Sawihonaa mi dang hruai a ngaih chuan, ani chu a dawta paragraph-a târ lan angin, ennawn tûr section azirin upa emaw, kohhranho rawngbâwltu emaw a ni tûr a ni.

Upa nei tam lo kohhranahte chuan, ṭha taka rorêl thiam leh hriatthiamna nei kohhranho rawngbâwltu puitling tak chuan baptisma chang tûrte tâna zawhna “Ṭhen 1: Kristian Thurinte,” tih chu a enpui thei ang. Upa chauhvin “Ṭhen 2: Kristian Khawsak Dân,” tih chu a enpui ang. Kohhranah upa tling tak indaih tâwk a awm loh chuan, ṭhenawm kohhranah ṭanpui theitu an awm tâkin tiin bial kantu pun theih a ni.

Baptisma changtu tûr chu kum tling lo naupang a nih chuan, sawihonaah a nu leh pate an tel tûr a ni. A nu leh pate an tel theih loh chuan, upa pahnih (a nih loh leh, an ennawn tûr section azirin upa pakhat leh kohhranho rawngbâwltu pakhat) chuan section tinte chu an enpui tûr a ni.

Upate chuan baptisma changtu tûrin Bible zirtîrna bulpuite hriatthiamna inâwm tâwk a nei a ni tih an chian ang. Chu bâkah, thutak a hlut tak zet tih leh Jehova inawpna pâwl zahna dik a lantîr tih chu chian an duh ngei ang. Ani chuan Bible zirtîrna thu bulte a la hriat loh chuan, upate chuan nakin huna baptisma a chan theih nân a mamawh mi mal ṭanpuina dawng tûrin ruahmanna an siamsak ang. Mi dangte erawh chuan thlawhhma rawngbâwlna an ngaihhlutzia lantîr nân emaw, inawpna pâwl ruahmanna hnuaia a intukluhzia lantîr nân emawa hun pêk belh an ngai thei. Upate chuan baptisma chang tûra a inpeih leh peih loh an hriatfiah theih nân, sawihona hun dârkâr khat vêl chu sem darh tûrin remhriatna a hmang tûr a ni. Zawhna ṭhenkhatah hun pêk tam ngaiin a dangah pêk tlêm deuh ngai mah se, zawhna zawng zawng chu zawh kim vek tûr a ni.

He zawhnate ennawnpui tûra ruat upate chu ṭhen hnihna zawhah an inhmukhâwm ang a, baptisma chang tûra chu a tlin leh tlin loh an rêl thlu ang. Upate chuan baptisma changtu tûr pian leh mûrna, a theihna, leh a dinhmun dangte chu an ngaihtuah tel ang. Kan ngaih pawimawh chu Jehova lama an rilru nghattute leh Bible thutak bulpui hriatthiamna neite hi an ni. Hmangaih taka in ṭanpuina zârah, baptisma changtu tûrte chu chanchin ṭha rawngbâwltute anga an mawhphurhna pawimawh tak hlen tûrin ṭha taka buatsaih an ni ang.

Chu mi hnuah chuan, amah ennawnpuitu upa pakhat emaw, pahnih emaw chuan baptisma chang tûra a tlin leh tlin loh an hriattîr ang. A tlin chuan, upate chuan “Baptisma Changtu Tûrte Nêna A Hnukhâr Nâna Sawiho Tûr,” tih phêk 206-207 chu an ennawnpui ang. Ani chuan Chatuanin I Hlim Thei! tih lehkhabute a la zir zo lo a nih chuan, upate chuan baptisma a chan hnua zir zo tûrin an fuih tûr a ni. Baptisma chang tûr hnênah chuan, ama hminga kan kawl Kohhrana Thuchhuahtute Chhinchhiahna lehkhaah a baptisma chan nî chhinchhiah a nih tûr thu hriattîr rawh u. Upate chuan a hnên aṭanga mi mal chanchin an lâk chhan chu, inawpna pâwl chuan khawvêl puma Jehova Thuhretute rawngbâwlna an enkawl theih nân leh amah ngei pawh thlarau lam thiltiha a tel theih a, thlarau lam ṭanpuina a dawn theih nân a ni tih hriatnawntîr rawh u. Chu bâkah, upate chu thuchhuahtu thar hnênah a mi mal chanchin kan lâkkhâwm rêng rêng chu jw.org-a kan hmuh Global Data Protection Policy of Jehovah’s Witnesses nêna inrema hman a ni tih an hriatnawntîr thei bawk a ni. He sawihona hian a tlângpui thuin minute sâwm emaw, a aia tlêm emaw lek a awh ṭhîn.

Thuchhuahtuin baptisma a channa kum khat a tlin hnuah, upa pahnih chuan fuihna leh rawtna ṭangkai tak takte pe tûrin an hmu tûr a ni. Upa a pakhat zâwk chu a awmna group overseer a ni tûr a ni a. Mi thar chu naupang kum tling lo a nih chuan, thutaka awm a nu leh pate chu an tel tûr a ni. He inhmuhkhâwmna hi nêlawm tak leh mi tichak thei tak a ni tûr a ni a. Upate chuan thlarau lama a hmasâwn dân chu an sawipui ang a, mahnia inzirna leh nî tin Bible chhiarna hun duan ṭha nei zêl tûr te, chawlhkâr tina chhûngkuaa Pathian biakna nei zêl tûr te, rinawm taka inkhâwma chhânnate pe zêl tûr te, leh chawlhkâr tina thlawhhma rawngbâwlnaa tel zêl tûrtea a mamawh rawtna ṭangkai tak takte chu an pe ang. (Eph. 5:15, 16) Chatuanin I Hlim Thei! tih lehkhabute a la zir zawh loh chuan, upate chuan zir zo tûrin ṭanpuitu tûr an ruahmansak tûr a ni. Upate chuan hmangaihna nên an fak mawlh mawlh tûr a ni a. A tlângpui thuin, thu pahnih khat vêl chungchânga fuihna leh rawtna pêk chu a tâwk mai ṭhîn a ni.