ZIRLAI 05
Bible—Kan Tâna Pathian Thuchah
Jehova chuan lehkhabu 66 infinkhâwm thilpêk hlu tak, Bible chu min pe a. Mahse, heti hian i ngaihtuah mai thei: ‘Engtin nge Bible hi kan neih theih? Tu ziah nge ni?’ tiin. Hêng zawhnate chhânna hre tûr hian Pathian thuchah chuanna Bible kan lo neih dân i lo sawiho vang u.
1. Bible hi mihringte ziah a nih si chuan, engtin nge Pathian chu a ziaktu a nih theih?
Bible hi ziaktu mi 40 vêlin kum 1,600 aia tam, B.C.E. 1513 aṭanga C.E. 98 vêl chhûnga an ziah a ni a. A ziaktute hi ṭobul inang lo tak tak an ni hlawm a. Chutichung pawhin a thute hi a inmil vek a ni. Chu chu engtin nge a nih theih? A Ziaktu tak chu Pathian a nih vâng a ni. (1 Thessalonika 2:13 chhiar rawh.) A ziaktu mihringte chuan an ngaih dânte an ziak lo va. Chu aiin, “thlarau thianghlim tirhin Pathian hnên ata an sawi zâwk ṭhîn.”a (2 Petera 1:21) Pathianin a ngaihtuahnate ziak chhuak tûrin mihringte chu a thlarau thianghlimin a thâwk khum, a nih loh leh a chêttîr a ni.—2 Timothea 3:16.
2. Tute’n nge Bible hi hlâwkpui thei?
“Hnam tinrêng te, chi tinrêng te, ṭawng tinrêng te, mi tinrêng te” chuan Bible-a chuang chanchin ṭha chu an hlâwkpui thei a ni. (Thu Puan 14:6 chhiar rawh.) Pathian chuan Bible hi mihring chanchina lehkha bu dang zawng zawng aiin ṭawng tam zâwka neih theih tûrin a siam a. Tûn laiah, eng ṭawng pawh hmangin khawi hmunah pawh awm ila, mi tin deuhthaw hian mahni ṭawngin Bible kan chhiarin kan hlâwkpui thei tawh a ni.
3. Engtin nge Jehova’n Bible a humhim?
Bible chu thil tlo lo savun leh phairuang lehkhate chunga ziak a ni a. Mahse, Bible ngaina takte chuan an kutin Bible an ziak chhâwng zêl a ni. Mi thiltithei tak takte chuan Bible hi tihbo tum ṭhîn mah se, mi ṭhenkhat chuan an nun thâpin an lo vênghim a. Jehova chuan mi emaw, thil emawin min biak pawhna tûr a tihbo chu a phal lo. Bible chuan: “Kan Pathian thu erawh chu chatuanin a awm reng ang,” a ti a ni.—Isaia 40:8.
ZIR BELHIN HMUH BELH RAWH
Pathianin Bible ziak tûra mite a thâwk khum dân te, a humhim dân te, leh mi zawng zawng neih theiha a siam dânte zir belh rawh.
4. Bible chuan a Ziaktu a târ lang
VIDEO chu chhuah la. Tichuan, 2 Timothea 3:16 chhiarin, a hnuaia zawhnate hi sawiho vang che u.
Bible hi mihringte ziak a nih si chuan, engvângin nge Pathian Thu tia koh a nih?
Pathianin a ziaktu mihringte hnênah a ngaihtuahnate a thawn chhuak tih rin chu a inâwmin i hria em?
Secretary chuan lehkha ziak mah se, a thu chu a pu hnên aṭanga lo kal a ni a. Chutiang bawkin, mihringte’n Bible ziak mah se, a thuchah chu Pathian hnên aṭanga lo kal a ni
5. Bible chu dodâlnate kârah a dam chhuak
Bible hi Pathian hnên aṭanga lo kal a nih chuan, a humhim ngei kan beisei thei a. Mihring chanchinah mi thiltithei tak takte chuan Bible hi nuaibo an lo tum ṭhîn a. Sakhaw hruaitute’n thup bo an tum bawk a. Mahse, mi tam takte chuan dodâlna leh thih theihna dinhmuna an ding chung pawhin an nun thâpin Bible an vênghim a ni. Chûng zînga mi pakhat chanchin hre tûrin, VIDEO chu chhuah la, a hnuai zawhnate hi sawiho vang che u.
Bible vênhim nâna mite inpêkna nasa tak i hriatna chuan chhiar châkna a neihtîr che em? Engvângin nge?
Sâm 119:97 chhiarin, he zawhna hi sawiho vang che u:
Engin nge mi tam tak chu an nun thâpa Bible letling a, sem chhuak tûra chêttîr?
6. Mi tinte tâna lehkhabu
Bible hi mihring chanchina lehkhabu lehlin tam ber leh sem chhuah tam ber a ni a. Tirhkohte 10:34, 35 chhiarin, hêng zawhnate hi sawiho vang che u:
Engvângin nge Pathianin Bible tam taka lehlin leh sem chhuah chu a duh?
Bible chungchângah eng nge i duh?
Khawvêl mihring
100%
deuhthawin
an hriatthiam theih ṭawngin Bible an nei thei
A bu pumin emaw, a ṭhen lai emaw chu
ṭawng
3,000
chuangin a hmuh theih
Tihchhuah tawh nia chhût zât chu
5,000,000,000
a ni a, lehkhabu dang zawng aiin a tam zâwk
MI ṬHENKHAT SAWI DAN: “Bible hi mihringte ziak lehkhabu hlui mai a ni.”
Nang, engtin nge i ngaih?
Eng finfiahnain nge Bible hi Pathian Thu a ni tih târ lang?
KHAIKHAWMNA
Bible hi Pathian Thu a ni a, ani chuan mi tinte neih theih tûrin a siam a ni.
Ennawnna
Bible ziak tûrin Pathianin mihringte a thâwk khum tia kan sawi hian eng kan tihna nge ni?
Bible dam khawchhuahna, lehlinna, leh sem chhuahna chungchângah engin nge i rilru khawih?
Pathianin nangmah biak pawh nân hetiang khawpin ṭan a la tih i hriatna chuan engtin nge a awmtîr che?
HRIAT BELH NAN
A tîra kutziak Bible aṭanga tûn laia lehlin Bible-te chanchin chu chhiar rawh.
“Kan Tûn Lai Hun Thlenga Bible Dam Khaw Chhuah Dân” (Awake!, November 2007)
Thil hlauhawm pathum laka Bible a dam khawchhuah dân chhiar rawh.
Bible letling tûra mite’n an nun an thâp dân en rawh.
Bible hi vawi tam tak ziah chhâwn leh lehlin a ni a. Engtin nge a thuchah ken chu dik taka vênhim a ni tih i chian theih?
“Bible Thute Hi Khawih Danglam A Ni Tawh Em?” (Website thuziak)