ZIRLAI 45
Tualdâwih Tih Awmzia Chu
Isua’n a hnungzuitute chu ‘khawvêla mi an ni lo’ tih a zirtîr a. (Johana 15:19) Chutah chuan tualdâwihna—khawvêl politics leh indonaa ṭan lam neih lohna—a tel a ni. A nihna takah chuan, tualdâwih chu thil awlsam a ni reng lo. Kan tualdâwihna avângin mi nuihzat kan ni thei. Engtin nge tualdâwih rengin, Jehova chungah kan rinawm reng theih?
1. Engtin nge Kristian dikte’n mihring sawrkârte chu an thlîr?
Kristiante chuan sawrkâr chu an zah a. Isua sawi angin, “Kaisara thilte chu Kaisara hnênah” kan pe a—a awmzia chu chhiah chawi ang chî, ram dânte chu kan zâwm tihna a ni. (Marka 12:17) Bible chuan mihring sawrkârte hi Jehova phalna avânga awm niin a zirtîr a. (Rom 13:1) Chuvângin, mihring sawrkârte hian Pathian tlukin thu an nei lo tih kan hria a ni. Kan Pathian leh a vân lam Lalram chu mihringte buaina chingfel tûrin kan rinchhan a ni.
2. Engtin nge kan tualdâwih tih kan lantîr theih?
Isua angin, politics thilah kan inrawlh lo va. Mite’n Isua thilmak tih tam tak zînga pakhat an hmuh khân, an lal atâna siam an tum a; mahse, a hnâwl a ni. (Johana 6:15) Engvângin nge? A chhan chu, a hnua a sawi angin, “[A] ram chu he khawvêla mi hi a ni lo.” (Johana 18:36) Isua zirtîrte kan nih angin, kawng tam takin tualdâwihna kan lantîr a. Entîr nân, indonaah kan tel lo. (Mika 4:3 chhiar rawh.) Flag ang chî ram chhinchhiahnate chu kan zah a; mahse, chibai kan bûk lo. (1 Johana 5:21) Chu bâkah, political party emaw, an candidate emaw thlâwp kan nei lo va, do kan nei hek lo. Hêng kawngte leh kawng dangte hmang hian Pathian sawrkârna, a Lalram chungah kan rinawm tlat tih kan lantîr a ni.
ZIR BELHIN HMUH BELH RAWH
Kan tualdâwihna fiah thei dinhmunte bih chiangin, Jehova tilâwmtu thu tlûknate i siam theih dân hre rawh.
3. Kristian dikte chu an tualdâwih
Isua leh a hnungzuitute chuan entawn tûr min hnutchhiah a ni. Rom 13:1, 5-7 leh 1 Petera 2:13, 14 chhiar rawh. Tichuan, VIDEO chu chhuah la, a hnuaia zawhnate hi sawiho vang che u.
Engvângin nge sawrkâr thuneitute chungah zahna kan lantîr ang?
An thu kan âwih tih kan lantîr theih dân kawng ṭhenkhat chu engte nge ni?
Indo laiin ram ṭhenkhat chuan tualdâwih niin an inchhâl mai thei a; mahse, lehlam lehlam an ṭanpui ve ve a ni. Tualdâwihna dik tak chu eng nge ni? Johana 17:16 chhiar rawh. Tichuan, VIDEO chu chhuah la, a hnuaia zawhna hi sawiho vang che u.
Tualdâwih tih awmzia chu eng nge ni?
Sawrkâr thuneitute’n Pathian dân nêna inkalh thil engemaw min phût ta se, engtin nge ni ang? Tirhkohte 5:28, 29 chhiar rawh. Tichuan, VIDEO chu chhuah la, a hnuaia zawhnate hi sawiho vang che u.
Mihring dân leh Pathian dân a inkalh hunah, tu dân nge kan zawm zâwk ang?
Kristiante’n sawrkâr thuneitute thu an zawm loh hun tûr dinhmun ṭhenkhat i ngaihtuah chhuak thei em?
4. Ngaihtuahna leh thiltihah tualdâwih rawh
Johana thawn khat 5:21 chhiar la. Tichuan, VIDEO chu chhuah la, a hnuaia zawhnate hi sawiho vang che u.
Video-ah khân, engvângin nge Ayenge-a chuan politics party zawm loh leh ram ni pawimawha flag chibai bûk ang chi tih loh chu a thlan?
Thu tlûkna fing a siam niin i hria em?
Eng dinhmun dangte’n nge kan tualdâwihna fiah thei? VIDEO chu chhuah la, a hnuaia zawhnate hi sawiho vang che u.
Ram leh ram inkâra infiamna thilah engtin nge tualdâwihna kan vawn reng theih?
Engtin nge politics khêlte thu tlûkna siamin a mi mal taka min nghawng hunah pawh kan tualdâwih reng theih?
Engtin nge chanchin thar puante leh kan ṭhiante’n kan tualdâwihna an nghawng theih?
Eng thilahte nge Kristian chu ngaihtuahna leh thiltihah a tualdâwih reng ang?
MI ṬHENKHAT ZAWHNA: “Engvângin nge flag chibai in bûk loh va, ram hla in sak loh?”
Engtin nge i chhân ang?
KHAIKHAWMNA
Kristiante chuan an ngaihtuahna, ṭawngkam, leh thiltihah politics lama tualdâwih tûrin theih tâwp an chhuah a ni.
Ennawnna
Mihring sawrkârte lakah eng nge kan bat?
Engvângin nge politics thilah kan tualdâwih reng?
Eng dinhmunte’n nge kan tualdâwihna fiah thei?
HRIAT BELH NAN
Tualdâwih reng tûrin eng thilte nge kan chân ngai mai thei?
Chhûngkuate chu an tualdâwihna fiah thei dinhmunte hmachhawn tûrin engtin nge an lo inbuatsaih lâwk theih?
Engvângin nge ram vênhim chu miin a dawn theih chawimawina sâng ber a nih loh?
Hnathawh chungchânga thu tlûkna i siam hunah, khawvêla mi ni lova awm reng theih dân ngaihtuah rawh.
“Mi Tinin Mahni Phur An Phur Ṭheuh Dâwn” (Vênnainsang, April 1, 2006)