Thil Engkimah Rinawm Rawh

Mi tinte hian ṭhian rinawm leh dik neih an duh a. Jehova pawhin a ṭhiante lakah chutiang chu a beisei a ni. Mahse, chu chu mi rinawm lo tam takte awmna khawvêlah hian thil awlsam a ni lo. Thil engkima rinawmna leh dikna chuan eng hlâwkna nge a thlen?

1. Rinawm a pawimawh chhan ber chu eng nge ni?

Mi dangte chunga kan rinawm hian Jehova hnênah amah kan hmangaihna leh kan zahna kan târ lang a ni a. Hei hi ngaihtuah rawh: Jehova’n kan ngaihtuah leh kan thiltih engkim a hria, tih hi. (Hebrai 4:13) Rinawmna leh dikna kan thlan hian, chu chu a lo hmuin, a ngaihlu hle a ni. A thu chuan: “Mi kawhmawh chu LALPA ngaihin tenawm an ni si a; mi ṭha famkim [mi dik] erawh chu a ṭhian an ni,” a ti a ni.—Thufingte 3:32.

2. Kan nî tin nuna kan rinawm theih dân kawng ṭhenkhat chu engte nge ni?

Jehova chuan “thudik tak sawi ṭheuh” tûrin min duh a. (Zakaria 8:16, 17) Eng tihna nge ni? Kan chhûng te, kan hnathawpui te, Kristian unau te, leh sawrkâr thuneitute kan biak hunah dâwtthu emaw, ngaih sual theih tûr chanchin emaw pêk chu kan duh lo. Mi rinawmte chuan mi dangte thil an ru lo va, anni chu an bum hek lo. (Thufingte 24:28 leh Ephesi 4:28 chhiar rawh.) Chu bâkah, chhiah chawi ngai zawng zawng an pe bawk ṭhîn. (Rom 13:5-7) Hetiang kawng leh kawng dangin, “kawng engkimah rinawm taka awm kan tum tlat” a ni.—Hebrai 13:18, Mzo King James Version.

3. Rinawm taka awm a hlâwkna chu engte nge ni?

Rinawmna kawnga hming ṭha kan neih hian mi dangte’n min ring a. Kohhran chhûngah chhûngkua ang boruak a awmtîr a. Chu bâkah, chhia leh ṭha hriatna thiang kan nei bawk. Kan rinawmna chuan ‘Pathian min Chhandamtu zirtîrna thu a cheimawi a,’ kohhran pâwn lama mite pawh biakna dikah a hîp a ni.—Tita 2:9, 10.

ZIR BELHIN HMUH BELH RAWH

4. Rinawmna chuan Jehova a tilâwm

Sâm 44:21 leh Malakia 3:16 chhiarin, hêng zawhnate hi sawiho vang che u:

• Engvângin nge thudik thup bo thei anga inngaih chu finthlâk lo nia i hriat?

• A harsat hunah pawh thudik sawi kan thlan hian Jehova’n engtin nge a ngaih i rin?

5. Engtik lai pawhin rinawm takin thilti rawh

VIDEO: Engin Nge Hlimna Min Neihtîr?—Chhia leh Ṭha Hriatna Thiang (2:32)

Hebrai 13:18 [MKJV] chhiarin, hêng dinhmuntea kan rinawm theih dân sawiho vang che u.

• Kan chhûngkuaah

• Hnathawhnaah, a nih loh leh school-ah

• Dinhmun dangah

6. Rinawmna kan hlâwkpui

Rinawmna hian buaina ṭhenkhat min thlen thei a. Mahse, khuarei atân chu chu thil ṭha ber a ni. Sâm 34:12-16 chhiarin, he zawhna hi sawiho vang che u:

• Engtin nge rinawmna chuan nun ṭha zâwk a neihtîr che?

1. Nupa rinawm takte chuan an inneihna an tinghet

2. Hnathawktu rinawm takte chuan an hnathawhna pute rin an hlawh

3. Khua leh tui rinawm takte chuan sawrkâr thuneitute hmaah hming ṭha an nei

KHAIKHAWMNA

Jehova’n a ṭhiante chu an thusawi leh thiltih zawng zawnga rinawm tûrin a duh.

Ennawnna

• Kan rinawm theihna kawng ṭhenkhat chu engte nge ni?

• Engvângin nge thu dik thup bo thei anga inngaih chu a finthlâk loh?

• Engvângin nge englai pawha rinawm chu i duh?

HRIAT BELH NAN

Engtin nge nu leh pate’n an fate chu rinawm tûra an zirtîr theih?

Thu Dik Sawi Rawh (1:44)

Kan thutiamte hlennain eng hlâwkna nge a thlen?

Thutiamte Hlenin, Malsâwmnate Dawng Rawh (9:09)

Chhiah sumte chu dik lo taka hman pawh ni se, kan chawi a ṭûl chhan ngaihtuah rawh.

“Chhiah—Chawi Ngei A Ngai Em?” (Vênnainsâng thuziak)

Mi rinawm lo tak pa pakhat chu a nun thlâk danglam tûr leh rinawm taka nung tûrin engin nge chêttîr?

“Jehova Chu Zahngai Thei Tak Leh Ngaihdam Peih Tak A Ni Tih Ka Hre Ta” (Vênnainsâng thuziak)