Pathianin Thisen A Thlîr Dân

Thisen hi a pawimawh hle a. A tel lo chuan tumah kan nung thei lo. Siamtu a nih angin Pathian chuan thisen hman dân tûr chungchâng sawi tûrin dikna a nei a. A nih, thisen chungchângah eng nge a sawi? Ei theih emaw, inthun theih emaw a ni em? Hemi chungchângah hian engtin nge thu tlûkna ṭha i siam theih ang?

1. Engtin nge Jehova chuan thisen a thlîr?

Jehova chuan Bible hun laia amah betute hnênah: “Tisa zawng zawng nunna chu a thisen chu a ni si a,” tiin a hrilh a ni. (Leviticus 17:14) Jehova mit hmuhah thisen chu nunna a ni a. Pathian thilthlâwnpêk nunna hi a thianghlim a, chuvângin thisen pawh hi a thianghlim a ni.

2. Pathianin thisen chu eng anga hman nge a khap?

Jehova chuan Kristianna hun hmaa amah betute chu thisen ei lo tûrin thu a pe a. (Genesis 9:4 leh Leviticus 17:10 chhiar rawh.) He thupêk hi governing body-in Kristiante hnêna ‘sa thisen ei te bâng [“thisen laka inthiar fihlîm,” NWT]’ tûra kaihhruaina a pêk khân a nemnghet a ni.—Tirhkohte 15:28, 29 chhiar rawh.

Thisen laka inthiar fihlîm tih awmzia chu eng nge ni? Doctor-in zû laka inthiar fihlîm tûra a hrilh che chuan i in lo ngei ang. Mahse, zu telna ei tûr chu eiin, i taksaah zû i chiu lût ang em? Chutiang chuan i ti lo vang. Chutiang bawkin, Pathianin thisen laka inthiar fihlîm tûra thu min pêk hian thisen kan in tûr a ni lo va, a nih loh leh sa thisen chhuak lo chu kan ei tûr a ni lo tihna a ni a. Thisen telna ei tûr chi rêng rêng pawh kan ei tûr a ni hek lo.

Damdawi atâna hman thisen chungchâng hi eng nge ni ve? Inenkawl dân ṭhenkhat chuan Pathian dân chiang takin a bawhchhia a. Chûng zîngah chuan thisen hlang inthun, a nih loh leh thisen pêng bulpui pali—thi mûr sen, thi mûr vâr, thi mûr ban, leh thisena tuihnâng inthunte a tel a ni. Damdawia inenkawlna dangte chuan Pathian dân chiang takin a bawhchhe lo pawh a ni thei. Entîr nân, inenkawlna ṭhenkhatah chuan thisen bulpuite zînga pakhat aṭanga lâk thisen them te tak tê hman a ni thei a. Inenkawlna dangah chuan mahni thisen ngei hmanna a tel a ni. Hêng duhthlan tûrte ngun taka kan ngaihtuah hunah, kan zavaiin mahni tân thu tlûkna kan siam tûr a ni.a—Galatia 6:5.

ZIR BELHIN HMUH BELH RAWH

3. Inenkawlnaah Jehova tilâwmtu thu tlûknate siam rawh

Engtin nge inenkawlna lamah Pathian thlîr dân nêna inmil thu tlûknate i siam theih? VIDEO chu chhuah la, a hnuaia rahbi pawimawh takte hi sawiho vang che u.

VIDEO: Thisen Nêna Inkûngkaih Inenkawlna Lama Thutlûkna Siam Theih Dân (5:47)

• Finna dîlin ṭawngṭai rawh.—Jakoba 1:5.

• Bible thu bulte leh i nunpui theih dân tûr chungchângah zir bingna nei rawh.—Thufingte 13:16.

• I chênna hmuna duh thlan theih awmte chu zawng chhuak rawh.

• I pawm theih loh hulhualte chu hre rawh.

• I thu tlûkna siam chuan chhia leh ṭha hriatna a neihtîr che tih chian rawh.—1 Petera 3:16.b

• Chhia leh ṭha hriatnaa innghat thilah i kawppui, kohhran upa, a nih loh leh nangmah Bible zirpuitu che pawhin i thu tlûkna siam tûr an hrilh tûr che a ni lo tih hre rawh.—Rom 14:12.

• I thu tlûkna siam chu ziakin dah ṭha rawh.

4. Jehova Thuhretute chuan damdawi lama inenkawlna ṭha ber an zawng

Thisen chungchânga Pathian dân zâwm chungin thisen tel lova inenkawlna ṭha ber chu dawn theih a ni. VIDEO chu chhuah rawh.

VIDEO: Professor Massimo P. Franchi, M.D. Biangbiakna (1:36)

Tita 3:2 chhiarin, he zawhna hi sawiho vang che u:

• Engvângin nge damdawi lama mi thiamte kan dâwr hunah zah thiamna leh thuhnuairawlhna kan lantîr ang?

Pawm theih lohte	Kristianin thu tlûkna a siam tûr
A. Thisena tuihnâng	Thisena tuihnâng aṭanga lâk a themte
B. Thi mûr vâr	Thi mûr vâr aṭanga lâk a themte
C. Thi mûr ban	Thi mûr ban aṭanga lâk a themte
D. Thi mûr sen	Thi mûr sen aṭanga lâk a themte

5. Thisen them te tak tê a tel hunah

Thisen pêng bulpui pali a awm a—thi mûr sen, thi mûr vâr, thi mûr ban, leh thisena tuihnâng te a ni. Hêng a pêng bulpuiahte hian thisen them te tak tê tia koh pêng tê lehzual a awm a.c Chûng zînga ṭhenkhat chu natna dona leh thisen chhuak tihtâwpna damdawi atâna hman a ni.

Thisen them te tak tê nêna inkûngkaih thilte chungchângah Kristian tinte chuan Bible ṭanchhana an sawizawi tawh an chhia leh ṭha hriatna milin thu tlûkna an siam tûr a ni. Mi ṭhenkhat chuan thisen them te tak tê telna inenkawlna chu hnâwl an thlang thei a. Mi dangte chhia leh ṭha hriatna chuan thisen them te tak tê pawm chu a remti pawh a ni thei.

Thu tlûknate i siam hunah he zawhna hi ngaihtuah ang che:

• Engtin nge doctor hnênah thisen them te tak tê hmanga inenkawlna chi khat ka pawm chhan emaw, pawm loh chhan emaw chu ka hrilhfiah ang?

KHAIKHAWMNA

Jehova chuan dik lo taka thisen hmang lo tûrin min duh.

Ennawnna

• Engvângin nge Jehova chuan thisen chu thil thianghlim anga a thlîr?

• Engtin nge thisen laka inthiar fihlîm tûra Pathian thupêk hian thisen inthun a huam tel tih kan hriat?

• Inenkawl nâna thisen hman chungchângah engtin nge thu tlûkna ṭha i siam theih ang?

HRIAT BELH NAN

Mahni thisen ngei hmanga inenkawlna chungchângah eng thilte’n nge i thu tlûkna chu thunun ang?

“Chhiartute Zawhna” (Vênnainsâng thuziak)

Thisen them te tak tê i dawn dâwn leh dâwn loh chungchânga thu tlûkna i siam hunah eng nge i ngaihtuah ang?

“Chhiartute Zawhna” (Vênnainsâng, July 1, 2004)

Engin nge doctor pakhat chu thisen chungchânga Jehova thlîr dân chu thil inâwm nia pawmtîr?

“Pathianin Thisen A Thlîr Dân Hi Ka Pawm” (Awake!, December 8, 2003)

Hospital Liaison Committee-a (HLC) tel upate’n unaute an ṭanpui dân en rawh.

Jehova’n Dam Lote A Ṭanpui (10:23)