ZIRLAI 40
Engtin Nge Pathian Mit Hmuhah Kan Thianghlim Theih Ang?
Hmangaihna nei tak nu pakhatin a fapa school kal tûr a siam mêk angin han mitthla teh. A fapa chu a inbual faiin, a thawmhnaw hâk pawh a felfaiin a thianghlim a ni tih a chian a. Chu chuan hrisêlna ṭha nei tûra a ṭanpui bâkah, ngaihsaktu nu leh pa a nei tih a târ lang a ni. Chutiang bawkin, min hmangaihtu kan Pa Jehova chuan tisa lam leh nungchang lama thianghlim tûrin min duh a. Thianghlimna chu keimahni ngeiin kan hlâwkpui a, chu chuan amah a chawimawi bawk.
1. Engtin nge tisa lamah kan thianghlim theih?
Jehova chuan: “Nangni in thianghlim tûr a ni,” tiin min hrilh a. (1 Petera 1:16) Thianghlim tûr chuan tisa lam leh nungchang lama felfai tak, thianghlim tak, leh bawlhhlawh kai lo kan ni tûr a ni. Kan inbual ziah a, kan thawmhnaw leh kan in leh lote bâkah, kan lîrtheite thlenga felfai taka dahin tisa lamah kan thianghlim thei a. Kan Kingdom Hall tihthianghlimnaah kan ṭanpui thei bawk. Tisa lama kan invawn thianghlim reng hian Jehova kan chawimawi a ni.—2 Korinth 6:3, 4.
2. Thianghlim tûrin eng thil chînte nge kan pumpelh ang?
Bible chuan: “Tisa leh thlarau bawlhhlawhna zawng zawngah i intifai ang u,” tiin min fuih a. (2 Korinth 7:1) Chuvângin, kan taksa leh kan rilru tichhe thei thil tawh phawt chu kan pumpelh tûr a ni. Kan ngaihtuahna chuan Jehova a tilâwm tûr a ni a, chuvângin ngaihtuahna ṭha lote hnâwl tûrin theih tâwp kan chhuah a. (Sâm 104:34) Ṭawngkam bawlhhlawhte hman loh pawh kan tum tlat bawk a ni.—Kolossa 3:8 chhiar rawh.
Eng thil dangte’n nge tisa lam leh nungchang lamah min tibawlhhlawh thei? Thil ṭhenkhat chuan kan taksa a tibawlhhlawh thei a. Chuvângin, hetiang thil vaihlo te, kuhva te, khaini te, leh intihhlimna atâna hman ruihhlo te hi kan pumpelh a. Hêng thilte kan pumpelh hian kan hrisêl lehzual a, nunna kan zahzia kan lantîr a ni. Thil chîn bawlhhlawh tak, mahnia châkna inhrîkthlâkna leh saruak lem leh thuziakte en châkna dovin, nungchang lamah thianghlim chu kan tum tlat a. (Sâm 119:37; Ephesi 5:5) Hêng thil chînte bânsan hi a harsa thei a; mahse, Jehova chuan bânsan tûrin min ṭanpui thei a ni.—Isaia 41:13 chhiar rawh.
ZIR BELHIN HMUH BELH RAWH
Tisa lama thianghlimnain Jehova a chawimawi dân ngaihtuah la, thil chîn bawlhhlawhte bânsan theih dân hria ang che.
3. Tisa lama thianghlimnain Jehova a chawimawi
Jehova’n thianghlimna a thlîr dân chu hmân lai Israelte hnêna a thupêkte bih chianna aṭangin kan hre thei a. Exodus 19:10 leh 30:17-19 chhiarin, hêng zawhnate hi sawiho vang che u:
Hêng Bible chângte hian tisa lama thianghlimna chungchâng Jehova thlîr dân eng nge a târ lan?
Eng nge tisa lama thianghlim reng tûra kan tih theih?
Tisa lama thianghlim tûr chuan hun pêk leh theih tâwp chhuah a ngai a. Mahse, khawi hmunah pawh awmin, rethei hle pawh ni ila tisa lamah thianghlim takin kan awm thei a ni. VIDEO chu chhuah la; tichuan, a hnuaia zawhna hi sawiho vang che u.
Engtin nge kan thil neihte felfai tak leh thianghlim taka vawnna chuan kan thu hrilh rawngbâwlna a chawimawi?
4. Chîn dân ṭha lote hneh rawh
Jehova chuan thil chîn ṭha lo eng pawh hneh tûrin min ṭanpui thei
Mei zu ṭhîn, a nih loh leh intihhlimna atâna ruihhlo hmang ṭhîn i nih chuan chûng thilte bânsan chu a harsa hle tih i hre ngei ang. Engin nge ṭanpui thei che? Chûng thil chînte’n a nghawng dân che ngaihtuah rawh. Matthaia 22:37-39 chhiarin, vaihlo, a nih loh leh ruihhlo hman sualnain hêngte chunga nghawng a neih dân sawiho vang che u.
Jehova nêna an inṭhianna
A chhûngte leh a kianga awm mi dangte
Thil chîn ṭha lote bânsan tûrin ruahmanna siam rawh.a VIDEO chu chhuah rawh.
Philippi 4:13 chhiarin, he zawhna hi sawiho vang che u:
Engtin nge ṭawngṭaina, Bible zirna, leh inkhâwmna hun duan ṭha neihna chuan mi chu thil chîn ṭha lote bânsan tûra a ṭanpui theih?
5. Ngaihtuahna leh thil chîn thianghlim lote chu do rawh
Kolossa 3:5 chhiarin, hêng zawhnate hi sawiho vang che u:
Engtin nge saruak lem leh thuziak en te, châkna chawk tho thei milem leh thuziak phone hmanga thawn chhuah te, leh mahnia châkna inhrîkthlâkte hi Jehova mithmuhah a thianghlim lo tih kan hriat?
Jehova’n nungchang lama thianghlim tûra min beisei chu thil inâwm niin i hria em? Engvângin nge?
Ngaihtuahna thianghlim lote do dân en rawh. VIDEO chu chhuah rawh.
Isua chuan nungchang lama thianghlim reng tûrin tum ruhna nêna hma lâk vat a ngaih tih târ lan nân tehkhin thu pakhat a hmang a. Matthaia 5:29, 30 chhiarin, he zawhna hi sawiho vang che u:
Isua chuan kan taksa a taka inhliam tûrin thurâwn min pe tihna a ni lo, hma kan lâk a ngai tih a târ lanna a ni zâwk. Ngaihtuahna thianghlim lote pumpelh tûrin mi chuan engtin nge tum ruhna nêna hma a lâk vat theih?b
Ngaihtuahna thianghlim lote hneh tûrin ṭan ila a nih chuan, Jehova chuan i ṭan lâkna chu a ngaihlu a ni. Sâm 103:13, 14 chhiarin, he zawhna hi sawiho vang che u:
Thil chîn bawlhhlawhte i do mêk a nih chuan, engtin nge he Bible châng hian do chhunzawm zêl tûrin a ṭanpui che?
I tlûk leh pawhin tlâwm suh!
‘Ka hlawhchham a, ka tlâwm mai dâwn,’ tia ngaihtuah chu a awlsam mai thei. Mahse, hei hi han ngaihtuah teh: Intlânsiaknaa tel chu a inchhuiha a tlûk avângin a tlâwm tihna a ni lo va, a bul aṭanga a tlân ṭhat leh a ngai tihna lah a ni hek lo. Chutiang bawkin, i tlûk lehna chuan thil chîn ṭha lo hneh tuma i beihnaah i tlâwm ta tihna a ni lo va. Hma i lo sâwn tawhna zawng zawng a thlâwn ta vek tihna lah a ni hek lo. Tlûk leh hi thil pângngai tak—hnehna kawng zawhnaa thil tel ve rêng a ni. Chuvângin, tlâwm suh! Jehova ṭanpuinain thil chîn ṭha lo chu i hneh thei a ni.
MI ṬHENKHAT SAWI DAN: “A ngawl ka vei tawh. Ka bânsan thei lo.”
Mi chuan Jehova ṭanpuinain thil chîn ṭha lo a bânsan thei tih kawhhmuh tûrin eng Bible châng nge i hman theih?
KHAIKHAWMNA
Kan taksa, kan rilru, leh kan nungchang kan vawn thianghlim rengna hmangin Jehova kan tilâwm.
Ennawnna
Engvângin nge thianghlim taka awm chu thil pawimawh tak a nih?
Engtin nge tisa lamah i thianghlim theih?
Engtin nge i ngaihtuahna leh i nungchang chu thianghlim taka i vawn theih?
HRIAT BELH NAN
Kan hausa lo a nih pawhin, tisa lama thianghlim tûrin eng thil awlsam takte nge i tih theih?
Zial zûk bânsan tûra i tihtheihte chu chhiar rawh.
Saruak lem leh thuziakte ennain nghawng ṭha lo a neihte bih chiang rawh.
“Saruak Lem leh Thuziakte—A Hlauhawm Nge Hlauhawm Lo?” (Vênnainsâng, August 1, 2013)
Saruak lem leh thuziakte en chîng dawklawk pa pakhatin a bânsan dân chhiar rawh.
“Ka Hlawhtlin Hma Chuan Vawi Tam Tak Ka Hlawhchham” (Vênnainsâng, October 1, 2016)
a He zirlaia Hriat Belh Nân tih section hnuaia “Zial Zûk Bânsan Theih Dân,” tih thuziak hian ngawlveina hneh theih dân rahbi pawimawh tak takte a târ lang.
b Mahnia châkna inhrîkthlâkna thil chîn bânsan tûra ṭanpuitu atân, “Engtin Nge Mahnia Châkna Inhrîkthlâkna Thil Chîn Chu Ka Hneh Theih Ang?” tih chu en rawh tih thuziak Questions Young People Ask—Answers That Work, tih lehkhabu Volume 1, bung 25 chhiar ang che.