ZIRLAI 42
Bible-in Nupui Pasal Neih Leh Neih Loh Chungchângah Eng Nge A Sawi?
Hnam dân ṭhenkhatah mite chuan mi chu nupui pasal an neih chauhva hlim thei tûrah an ngai a. Mahse, nupui pasal nei zawng zawng hi an hlim vek lo va, nei lova awmte lah an hlim lo vek lo. A nihna takah chuan, Bible chuan kawppui neih emaw, neih loh emaw chu thilpêk angin a sawi ve ve a ni.
1. Kawppui nei lova awm a hlâwkna ṭhenkhat chu eng nge ni?
Bible chuan: “Nupui pasal neitu chuan a tiṭha e, nimahsela a nei lotu chuan a tiṭha lehzual a ni,” tiin a sawi a. (1 Korinth 7:32, 33, 38, NWT) Eng kawngtein nge kawppui nei lo chuan ‘a tih ṭhat lehzual’ theih? Kawppui nei lo Kristiante chuan kawppuite mamawh an ngaihtuahsak a ngai lo va. Chuvângin, a tlângpuiin an zalên lehzual a ni. Entîr nân, mi ṭhenkhat chuan chanchin ṭha hril tûra ram danga zin chhuah ang chi kawng phûrawm takin an rawngbâwlna an zauh thei a. A pawimawh berah, anni chuan Jehova hnaih tûrin hun tam lehzual an hmang thei a ni.
2. Dân ang taka inneih a hlâwkna ṭhenkhat chu eng nge ni?
Inneihna pawh hian kawppui neih lohna ang bawkin hlâwkna danglam tak a nei a. Bible chuan: “Pahnih chu pakhat ai chuan an ṭha zâwk,” tiin a sawi a ni. (Thuhriltu 4:9) Hei hi a bîk takin an inneihnaa Bible thu bulte nunpuitu Kristiante chungah a thleng dik a ni. Dân ang taka innei nupate chuan inhmangaih a, inzah tawn a, inngaina tawn tûrin thu an thlung a. Chuvângin, innei lova khawsa dûn satliah maite ai chuan him lehzual niin an inhria a ni. Chu bâkah, inneihna chuan chhûngkaw dinnaah lungphûm nghet tak a neihtîr bawk.
3. Engtin nge Jehova chuan inneihna a thlîr?
Pathian Jehova chuan mihring hmasa berte a inneihtîr khân heti hian a sawi a ni: “Mipain a nu leh a pa a kalsan ang a, a nupui a vuan ang,” tiin. (Genesis 2:24) Jehova chuan nupate chu an dam chhûng zawnga inhmangaih tawn tûr leh chêng dûn reng tûrin a duh a. Inṭhen a phalna awmchhun chu a tuemaw zâwk uirêna vâng chauhvin a ni. Chutiang dinhmunah Jehova chuan a sual lotu zâwk chu a kawppui ṭhen theihna a pe a ni.a (Matthaia 19:9) Jehova chuan Kristiante zîngah kawppui pakhat aia tam neih a phal lo.—1 Timothea 3:2.
ZIR BELHIN HMUH BELH RAWH
Kawppui i nei emaw, nei lo emaw pawh ni se, i hlim theih dân—leh Jehova i tihhlim theih dân—hria ang che.
4. Kawppui nei lova awmna thilpêk chu ṭha takin hmang rawh
Isua chuan kawppui nei lova awm chu thilpêk angin a thlîr a. (Matthaia 19:11, 12) Matthaia 4:23 chhiarin, he zawhna hi sawiho vang che u:
Engtin nge Isua chuan kawppui nei lova awmna thilpêk chu a Pa rawngbâwl nân leh mi dangte ṭanpui nâna a hman?
Kristiante chuan Isua angin kawppui nei lova awmna thilpêk chu an hmang thei a ni. VIDEO chu chhuah la, a hnuaia zawhna hi sawiho vang che u.
Eng kawngin nge Kristiante chuan kawppui nei lova an awmna chu ṭangkai taka an hman theih?
I lo hre tawh em?
Bible chuan nupui pasal nei tûra kum bithliah chin a sawi lo va. Mahse, mi chu thu tlûkna dik lo siamtîr theitu mipat hmeichhiatna lama châkna a nasat hun, “a tleirâwl pârmawina” a pelh thleng nghâk tûrin a fuih a ni.—1 Korinth 7:36, Baptist Mid-Mission Translation.
5. I kawppui tûr fing takin thlang rawh
I kawppui tûr thlan chu thu tlûkna i siam theih azawnga pawimawh berte zînga mi a ni a. Matthaia 19:4-6, 9 chhiarin, he zawhna hi sawiho vang che u:
Engvângin nge Kristian chuan nupui pasal neih a hmanhmawh loh vang?
Bible chuan kawppui atâna ṭhate neih ngai miziate hre tûrin a ṭanpui thei che a. Eng dang zawng aiin i kawppui atân Jehova hmangaihtu zawng rawh.b Korinth thawn khat 7:39 leh 2 Korinth 6:14 chhiar la. Tichuan, hêng zawhnate hi sawiho vang che u:
Engvângin nge kan Kristian unaute chauh nupui pasalah kan neih ang?
Jehova hmangaih lotu nupui pasala kan neih chuan ani chu engtin nge a awm i rin?
Ran inang lo pahnihin nghâwngkawl an bah dun hian hrehawm an tuar ang. Chutiang bawkin, ring lotu kawppuia nei Kristian chuan harsatna tam tak a tâwk dâwn a ni
6. Inneihna chu Jehova thlîr dân angin thlîr rawh
Hmân lai Israel huna mipa ṭhenkhat chuan mahni hmasialna avângin an nupuite chu an ṭhen a. Malakia 2:13, 14, 16 chhiarin, he zawhna hi sawiho vang che u:
Engvângin nge Jehova’n chhan dik lo tak avânga inṭhen chu a huat?
Uirêna leh inṭhenna chuan sual nei lo a kawppui leh fanaute rilru natna a thlen
VIDEO chu chhuah la, a hnuaia zawhna hi sawiho vang che u.
Ring lotu kawppui nei i nih chuan, in inneihna hlawhtling tûrin eng nge i tih theih?
7. Inneihna chungchânga Jehova tehnate chu zâwm rawh
Mi chuan inneihna chungchânga Jehova tehnate zâwm tûrin theih tâwp a chhuah a ngai thei a.c Mahse, Jehova chuan chutianga titute chu mal a sâwm a ni. VIDEO chu chhuah rawh.
Hebrai 13:4 chhiarin, hêng zawhnate hi sawiho vang che u:
Inneihna chungchânga Jehova tehnate chu a inâwmin i hria em? Engvângin nge?
Jehova chuan Kristiante chu an inneihna leh an inṭhenna chungchângah ram tam taka tualchhûng thuneitute’n an mite an phût anga dân anga ti tûrin a beisei a ni. Tita 3:1, 2 chhiarin, he zawhna hi sawiho vang che u:
Nupui pasal nei tawh i nih chuan, in inneihna chu sawrkârin dân anga a hriatpui a ni tih i chiang em?
MI ṬHENKHAT ZAWHNA: “Engah nge inneih kher a ngaih? An chêng dûn thei mai lâwm ni?”
Engtin nge i chhân ang?
KHAIKHAWMNA
Kawppui neih leh neih loh chu Jehova thilpêk a ni ve ve a. Jehova duh zâwng nêna inmila hman a nih chuan, a enga pawh hian hlimna a thlen thei.
Ennawnna
Engtin nge mi chuan kawppui a neih lohna chu a ṭha thei ang bera a hman theih?
Engvângin nge Bible-in Kristian unaute chauh nei tûra min tih?
Bible-in inṭhen theih chhan awmchhun nia a sawi chu eng nge ni?
HRIAT BELH NAN
“Lalpaa awm mi” chauh nei tih awmzia chu eng nge ni?
Inngaihzâwnna leh inneihna chungchânga thu tlûkna dik siam thei tûra ṭanpui thei che chanchawp video pahnih en rawh.
Unaupa pakhatin a thil chân tawh zawng zawng aiin Jehova thilpêk a dawn chu a hlu zâwk tih a hriat chhan en rawh.
Mi chuan inṭhen emaw, awm hran emaw a thlan hmain eng thilte nge ngun taka a ngaihtuah ang?
“‘Pathianin A Zawm Tawh Chu’ Chawimawi Rawh” (Vênnainsâng, December, 2018)
b Hnam dân ṭhenkhatah nu leh pate chuan an fate nupui pasal tûr an thlansak ṭhîn a. Chutiang dinhmunah chuan hmangaihna nei tak nu leh pate chuan an fate kawppui tûr an thlan hunah sum leh pai leh an dinhmun lam ni lovin, Jehova an hmangaihna lam an ngaihtuah hmasa tûr a ni.
c Dân anga inneihna awm lova mi tuemaw i chênpui a nih chuan, i ṭhen dâwn nge, i nei dâwn tih chu i mi mal thu tlûkna a ni.