Bible Hi Hriat Thiam Theih A Ni Em?

“Chawlhni apiangin chhûngkuaa Bible chhiarna kan nei ṭhîn a. Chhiar nuam chu ka ti hran lo. Bible hi Pathian Thu a ni tih ring mah ila, ka chhiarte zînga a tam zâwk chu ka hre thiam meuh lo.”—Steven-a, Britain.

“Kum 17 mi ka nih laiin, Bible chhiar ka tum chhin a. Hriat thiam a harsa êm a, ka bânsan daih.”—Valvanera-i, Spain.

“Katholic ka nih anga Bible chhiar chhuah ngai nia ka hriat avângin vawi khat chu ka chhiar chhuak ve a. Kum thum ngawt ka han hman chu le! Mahse, hriat thiam ka nei mang meuh lo.”—Jo-Anne-i, Australia.

BIBLE chuan khawvêla lehkhabu lâr ber nihna a la hauh reng a. Lehkhabu zawng zawng zînga hralh tla ber, mi tam zâwkte hmuh theih, ṭawng chi hrang hranga lehlin tam ber a ni a, tûnah phei chuan a lehkhabu mai bâkah audio cassette te, CD leh DVD tea hmuh theihin a awm tawh a ni. Mahse, Bible nei tam tak chuan hriat thiam harsa an ti a. Hriat thiam harsa i ti ve em?

Bible Ziaktu Chuan A Thu Kan Hriat Thiam A Duh Em?

“Pathian Lehkha Thu zawng zawng hi Pathian thâwk khuma pêk a ni,” tiin Bible chuan a sawi a. (2 Timothea 3:16) Ni e, Pathian Jehova chu Bible Ziaktu a ni. Ani chuan a Thu chu kan hriat thiam a duh em? Nge, sakhaw hruaitute leh Bible zirlaite tih chauh loh, mi dangte tân chuan hriat thiam theih loh tûrin a siam lui hrim hrim zâwk?

Hêng a hnuaia Bible châng târ lante hi ngaihtuah teh:

“He thupêk, tûna ka pêk che u hi in tân a har lutuk lo va, a hlat lo bawk che u a ni.”—Deuteronomy 30:11.

“I thu hrilhfiah hian mite a tiêng a; mi mâwlte chu a hriat thiamtîr ṭhîn.”—Sâm 119:130.

“Chu mi lai tak chuan Isua chu thlarau thianghlimah a lâwm êm êm a, ‘Aw ka Pa, lei leh vân Lalpa, nangin mi fing leh mi bengvârte hnênah hêng thu hi i zêp a, nausênte hnêna i puan avâng hian ka fak a che.’”—Luka 10:21.

Bible Ziaktu chuan a Thu i hriat thiam chu a duh tak zet a. Amaherawhchu, mi rilru ṭha tam takte’n he lehkhabu hi hriat thiam harsa an la ti reng a ni. Engin nge ṭanpui thei ang che? A dawta thuziakte hian Bible hre thiam tûra ṭanpui theitu che, thurâwn pathum chu a târ lang a ni. (w09 7/1)