Zirtirna Dik Lo 3: Mi Ṭha Zawng Zawng Vanah An Kal Vek

He zirtîrna dik lo hi khawi aṭanga lo chhuak nge? Isua tirhkohte an thih hnu, C.E. kum zabi pahnihna ṭantîr vêl khân, Sakhaw Hruaitu (Church Fathers) hmasate chu an rawn challang chho va. An thu zirtîr dân chungchângah, the New Catholic Encyclopedia (2003), Volume 6, phêk 687-na chuan: “Thih huna taksa chhuahsantu thlarau chu a ṭûl ang anga then thianghlim a nih hnu chuan vân nun nuam tak pêk nghâl a ni tih hi zirtîr dân tlâng lâwn tak a ni,” tiin a sawi.

Bible-in eng nge a sawi? “Thuhnuairawlhte chu an eng a thâwl e; lei hi an la rochung dawn si a.”—Matthaia 5:5.

Isua’n a zirtîrte hnênah an tân vânah “hmun [a] siam” dâwn tih tiam mah se, mi fel zawng zawng chu vânah an kal lo tih a târ lang bawk. (Johana 3:13; 14:2, 3) Pathian duhzâwng chu ‘vâna an tih anga leia tih’ ni tûrin a dîl a ni lo vem ni? (Matthaia 6:9, 10) A nihna takah chuan, mi felte chuan chûng beisei tûr pahnihte zînga a eng emaw zâwk chu an chang ang. Mi tlêm tête chuan vânah Isua nên ro an rêl ang a, a tam zâwkte chu leiah chatuanin an nung ang.—Thu Puan 5:9, 10.

Hun a lo inher zêl chuan, church hmasa (early church) chuan lei lam a thlîr dân chu a rawn thlâk chho va. Chu chuan eng nge a rah chhuah? “Church chuan Pathian Ram a beiseina chu a thlâk chho tial tial a ni,” tiin The New Encyclopædia Britannica chuan a sawi. Church chuan ‘khawvêla mi ni lo’ tûra Isua’n a hnungzuite a vaukhânna chiang tak chu pawisa lovin, politics-a inhnamhnawhin an thuneihna chu an sawh nghet ṭan a ni. (Johana 15:19; 17:14-16; 18:36) Rom Lal Constantine-a thununna hnuaiah chuan, church chuan a thurin ṭhenkhat chu a phatsan a; chûng zîngah chuan Pathian nihna dik tak pawh a tel a ni. (w09-E 11/01)

Hêng Bible chângte nên hian khaikhin rawh: Sâm 37:10, 11, 29; Johana 17:3; 2 Timothea 2:11, 12

ZIRTIRNA DIK CHU:

Mi ṭha a tam zâwkte chu vânah ni lovin, leiah chatuanin an nung ang

[Phêk 6-naa Milem Hawhtîrtu]

Art Resource, NY