Bible Ṭanchhan Zawhnate Chhânna

Ṭawngṭaina zawng zawng hi Pathianin a ngaithla vek em?

Pathian chuan hnam zawng zawnga mite ṭawngṭaina chu a ngaithla a. (Sâm 145:18,19) A Thu, Bible chuan kan manganna engpawh a hnêna thlen tûrin min fuih a ni. (Philippi 4:6, 7) Mahse, ṭawngṭaina ṭhenkhat chuan Pathian a tilâwm lo va. Entîr nân, ṭawngṭaina hriat bel tawh chham nawn mai maina chuan Pathian a tilâwm lo a ni.—Matthaia 6:7 chhiar rawh.

Pathian Jehova chuan duh rêng vânga a dân pawisa lotute ṭawngṭaina chu a ngaithla duh lo bawk a. (Thufingte 28:9) Entîr nân, Bible hun lai khân tualthattu Israel mite ṭawngṭaina chu a ngaithla duh lo va. Pathian ngaihthlâk ni tûr chuan a thil phût ṭhenkhatte tlin kan tum ngei tûr a ni tih a chiang hle a ni.—Isaia 1:15 chhiar rawh.

Pathian ngaihthlâk ni tûrin eng nge kan tih ngei ngai?

Rinna tel lo chuan ṭawngṭainain Pathian kan hnaih thei lo. (Jakoba 1:5, 6) Ani chu a awm tih leh min ngaihsak tih kan ring tlat tûr a ni. Rinna dik tak chu Pathian Thua hmuh finfiahna leh tiamkamnaah a innghah avângin Bible zirna aṭangin kan rinna kan tichak thei a ni.—Hebrai 11:1, 6 chhiar rawh.

Inngaitlâwm tak leh tihtak zetin kan ṭawngṭai tûr a ni a. Pathian Fapa Isua pawh inngaitlâwm takin a ṭawngṭai a ni. (Luka 22:41, 42) Chuvângin, Pathian hnênah tih tûr hrilh ai chuan, Bible chhiarna aṭangin a thil phûtte hriat thiam kan tum zâwk tûr a ni a. Tichuan, Pathian duhzâwng nêna inmilin kan ṭawngṭai thei a ni.—1 Johana 5:14 chhiar rawh. (w13-E 08/01)