Naupang Rogelio-a ngaih dân chu i ṭawmpui em? A hnuaia târ lan ngaih dân zînga a eng ber hi nge dika i rin?

• Setana chu a awm tak tak lo; sual chhinchhiahna mai a ni.

• Setana chu a awm tak tak a; mahse mihringte a ngaihsak meuh lo.

• Setana chu mihringte nasa taka thununtu thlarau thil siam thiltithei tak a ni.

Hêng ngaih dânte hian thlâwptu mi maktaduai tam tak a nei ṭheuh va. Mahse, a eng ber hi nge dik tih hriat chu a pawimawh tak zet em? Awle, Setana a awm lo a nih chuan, awm tak tak anga ngaitute chu bumin an awm tihna a ni ang a. Setana chu awm mah se, mihringte a ngaihsak lo a nih chuan, mi tam tak chu chhan awm lovin an hlau thlâwn tihna a ni ang. Amaherawhchu, Setana chu mite thiam taka bum kualtu a nih chuan, mi tam takte ngaih aiin a hlauhawm zâwk daih tihna a ni thung ang.

Hêng zawhnate Bible-in a chhân dân hi i lo ngaihtuah ang u: Setana chu tu nge, a nih loh leh eng nge a nih? Sual sawina mai nge ni a, thlarau thil siam zâwk? A awm ngei a nih chuan, Setana chu i tân a hlauhawm em? A hlauhawm a nih chuan, a lakah engtin nge i invên theih ang? (w14-E 11/01)

A chanchin Bible-a kan chhiar Setana tih hi sual zawng zawng chhinchhiahna mai a ni, tia sawi chu a awlsam ang reng a. Mahse, chu chu Bible zirtîrna dik tak a ni em? Chutiang chu ni ta se, engvângin nge Bible chuan Setana chu Isua Krista leh Pathian Engkimtitheia nêna inbia anga a sawi? Chutianga an inbiakna pahnih chungchâng chu i lo ngaihtuah ang u.

SETANA’N ISUA A BIAK LAI KHAN

Isua’n a rawngbâwlna a ṭan khân, Diabola chuan vawi thum thlêm a tum a. A hmasain, Setana chuan Isua chu a rilṭâmna tireh a, Pathian pêk thiltihtheihna chu mahni tâna hmang tûrin a thlêm a. A dawtah, Diabola chuan Isua chu a nun âtthlâk taka thâp tûr leh mahni inchawimawi tûrin a cho va. A tâwpah, Setana chuan Isua hnênah vawi khat chibai a bûk chuan khawvêl ram zawng zawng chunga thu neihna a pe dâwn tih tiamin a thlêm a ni. Isua chuan fing vervêk taka thlêmna pathum chu Bible ṭanchhanin a hnâwl vek a ni.​—⁠Matthaia 4:​1-11; Luka 4:1–13.

A nih leh, Isua chu tu nên nge an inbiak? Amaha awm sualna nên em ni? Bible sawi dân chuan, Isua chu “kawng tinrênga thlêmna tâwk tawh, sual erawh chu sual lo” a ni. (Hebrai 4:15) Bible chuan: “Ani chuan thil rêng a tisual lo va, a kaah ngamthlêmna a awm hek lo,” a ti bawk. (1 Petera 2:22) Isua chu a ṭha famkim reng a, rinawmna a vawng nghet tlat a ni. Amahah chuan sualna engmahin zung a kaih a phal ngai lo. Chuvângin, Isua chuan amaha awm sual engemaw a be lo va; mi tak tak tuemaw a bia tih a chiang hle a ni.

Chu an inbiakna chuan Setana chu mi tak tak a ni tih finfiahna dang a pêk belhchhah a ni.

• Diabola’n Isua hnênah vawi khat chibai a bûk chuan khawvêl chunga thu neihna pêk a tum tih hre chhuak leh la. (Matthaia 4:​8, 9) Setana chu awm tak tak lo ta se, he a thil pêk tum hian awmzia a nei lo vang. Chu bâkah, Isua chuan chutiang thu neihna nasa tak nei anga Setana inchhâlna chu a hnial lo.

• Isua’n thlêmnate a hnâwl hnuah, Diabola chuan “a remchân hun atân a kalsan ta a.” (Luka 4:13) Hetah hian Setana chu a khawi zâwk nge a an? Sual nihna nge ni a, hmêlma sual tak, mi beih tum ngar ngartu zâwk?

• Isua chu “vântirhkohten a rawng an bâwlsak” tih hre reng ang che. (Matthaia 4:11) Chûng vântirhkohte chu Isua mamawh fuihna leh ṭanpuina petu thlarau mi tak tak an ni em? An ni tih a chiang hle. Chuti chu, Engvângin nge Setana chu thlarau mi awm tak tak a ni tih bâk loh chu thil dang anga kan ngaih tehlul ang?

SETANA’N PATHIAN A BIAK LAI KHAN

Entîrna pahnihna chu Pathian ṭih mi Joba chanchin nêna inkûngkaihna a ni a. Chu chanchin ziak chuan Pathian leh Diabola’n ṭum hnih lai inbiakna a neih thu a sawi a ni. A ṭum hnihin Pathianin Joba rinawmna chu a fak ve ve a ni. Setana chuan Joba chu mahni hmasialna avânga Pathian rawngbâwl a ni, a ti tlat a; thu danga sawi chuan Pathianin Joba rinawmna chu a leiin a lei a ni a tihna a ni. A nihna takah chuan, Diabola chu Pathian aia Joba chanchin hre tam zâwkah a inchhâl a ni. Jehova chuan Setana chu Joba thil neihte, a fate, leh a hrisêlnate thlenga a tihchhiatsak a phal ta a.a A hnuah, Jehova chu Joba chungchângah a dik zâwk tih a rawn lang chhuak a, Setana chu dawthei a nihzia finfiah a ni ta. Pathian chuan Joba rinawmna chu mal a sâwm a ni.​—⁠Joba 1:​6-12; 2:​1-7.

Kan târ lan tâk Pathian leh Setana inbiaknaah chuan Jehova chuan amaha awm sual chu a bia em ni? Bible chuan: “Pathian zawng a kawng chu a ṭha famkim a,” tiin a sawi a. (2 Samuela 22:31) Pathian Thu chuan: “Lalpa Pathian, Engkimtitheia . . . chu, a thianghlim e, a thiang hlim e, a thianghlim e,” tiin a sawi bawk. (Thu Puan 4:⁠8) Thianghlim tih chu tak, bawlhhlawh lo, sual laka fimhlîm tihna a ni. Jehova chu a ṭha famkimin, sawisêlbo a ni a. Sualna mizia engmah a nei thei lo.

Thenkhat chuan Joba pawh chu mi awm tak tak a ni lo va, chuvângin an inbiakna zawng zawng chu a ngial a ngana lâk chi a ni lo, an la ti mai thei a. Mahse, chu chuan awmzia a nei em? Bible châng dangte chuan Joba chu mihring awm tak tak a ni tih a târ lang. Entîr nân, Jakoba 5:​7-11-ah chuan Joba chu harsatna tawh huna chhel tûra Kristiante chêttîr nân leh chutiang chhelna chu Pathian Jehova’n a lâwmzia hriattîr nâna hman a ni tih kan hmu a ni. Joba chu mi tak tak a nih loh va, Setana beihna pawh chu thu phuahchawp mai mai ni sela chuan, chu entîrna chu eng atân mah a ni lo vang. Chu bâkah, Ezekiela 14:​14, 20-a mi fel pathum târ lante zîngah chuan Joba pawh a tel a. Nova leh Daniela te ang bawkin Joba chu mi awm tak tak a ni a, rinna nasa tak nei mi a ni. Joba chu mihring awm tak tak a nih si chuan amah beia tiduhdahtu pawh a awm tak tak dâwn lâwm ni?

Bible chuan Setana hi thlarau taksa nei mi awm tak tak angin a sawi tih a chiang hle. Mahse, heti hian i ngaihtuah mai thei, ‘Tûn lai khawvêl changkâng takah hian kei leh ka chhûngkuate tân Setana chu a hlauhawm em?’ tiin.

KAN HUN LAIAH ENG NGE NI?

I awmna khawpuiah mi sual pâwl khat an rawn lût thut angah han ngaihruat teh. Mi mal sahimna leh ṭhenawm khawvêng nunphung a tla hniam ang tih chu a chiang a ni. Tûna kan sawi tâk nêna thuhmun dinhmun dang chu han ngaihtuah teh: Setana leh a ramhuaite​—⁠Setana ang bawka Pathian laka hel leh awm tak takte​—⁠chu leia paih thlâk an ni. A sawhkhâwk chu eng nge ni ta ang? Tualchhûng leh khawvêl puma chanchin thar i hmuhte hi han ngaihtuah teh.

• Khawvêl puma tihtâwp tum a ni chung pawhin, âtthlâk taka tharum thawhna hi a pung chho telh telh tih i hmu em?

• Nu leh pa tam takte’n an ngaimawh chung pawhin, film-ahte chuan dawithiamna lam a hluar chho telh telh tih i hmu em?

• Humhim tûra ṭan lâk nasat a ni chung pawhin, chhehvêl boruak tihchhiat nasat leh thing leh maute tihchereu nasat a ni tih i hmu em?

• Mihringte hian dik lohna nasa tak an neiin, chakna engemaw tak hian chhiatna lamah a nawrlui tlat niin a lang em?

Tûn lai buainate phêna awm nia Bible-in a sawi chu lo chhinchhiah ang che: “Drakon lian pui, rûlpui tar Diabola leh Setana an tih, khawvêl zawng zawng bumtu chu an paih thla ta a; leiah an paih a, a tirhkohte pawh an paih thla tel ve a. . . . Lei leh tuifinriat chung a pik e! Diabola chuan hun tlêm tê chauh a nei tih a inhriat avânga thinur êm êma in hnêna a lo chhuk tâk avângin,” tih hi. (Thu Puan 12:​9, 12) Finfiahnate an ngaihtuah chian hnuah mi tam tak chuan Setana chu khawvêl thunun tlattu thlarau thil siam hlauhawm tak a ni tiin thu tâwp an siam a ni.

A lak ata vênhim i nih theih dân tûr chu i ngaihtuah mai thei a. Chu chu ngaihtuah tham tak a ni. A dawta thuziak hian ṭanpuina sâwt tak a pe ang che. (w14-E 11/01)

Carbon monoxide ang bawkin, Setana chu hmuh theih loh, mihringte tâna chhui chhuah harsa tak leh hlauhawm tak a ni a. Mahse, Pathian chuan min thlahthlam lo. A hnuaia Pathian thilpêkte i hman ṭangkai chuan Setana chu i hlauh a ngai lo vang.

Duhthlan theihna. Jakoba 4:7 chuan : “Diabola dodâl rawh u, tichuan a tlân bosan ang che u,” tiin min hrilh a. Setana chuan thiltithei hle mah se, i thiltih duh lohte ti tûrin a tilui thei lo che a. Duhthlan tûr i nei a ni. Petera thawn khat 5:9 chuan: “Ring nghet taka awmin [Diabola] chu do rawh u,” tiin a sawi. Isua’n Setana thlêmna vawi thum lai a hnâwl ṭhak hnuah Setana chuan a kalsan tih hre reng rawh. (Matthaia 4:11) Chutiang bawkin, Setana beihna do chu i thlang thei a ni.

Pathian nêna inṭhianna. Jakoba 4:8 chuan “Pathian hnaih” tûrin min fuih a. Pathian Jehova ngei chuan amah nêna inṭhianna ṭha tak nei tûrin a sâwm che a ni. Engtin nge a ṭhian i nih theih ang? Kawng ṭha ber chu Bible aṭanga a chungchâng tam lehzuala zir hi a ni. (Johana 17:⁠3) Jehova chungchâng i zirna chuan amah hmangaih tûrin a chêttîr ang che a, chu hmangaihna chuan a duhzâwng ti tûrin a chêttîr lehchhâwng ang che. (1 Johana 5:⁠3) I Pa vâna mi i hnaih chuan, engtin nge a chhân lêt ang che? Jakoba chuan: “[Pathianin] a hnaih ang che u,” tiin a sawi zawm a ni.

Vênghim tûra tiamna. Thufingte 18:​10-ah chuan: “[Jehova] hming chu kulhpui a ni a, mi fel chu a tlân lût ṭhîn a, a him ṭhîn,” tiin kan chhiar a. Mahse, chu chu Pathian hming chu vânneihna thil tlereuh tihna erawh a ni lo. Pathian hming zahtu dik takte chuan engtik hunah pawh a vênhimna an dîl thei tihna a ni.

Bible entîrna. Tirhkohte 19:19 chuan Ephesi khuaa Kristiana inlet tharte chungchângah thu bengvârthlâk engemaw tak min hrilh a: “Dawihmang a ṭhen tam tak pawhin an lehkhabute an rawn la khâwm a, mi zawng zawng mithmuhah an hâl ta a, tin, a man an chhût a, chêng sîngnga niin an hria,” tiin.a Chûng Kristiante chuan dawithiamna nêna inkûngkaih an thil neih engpawh chu eng ang khawpa man to pawh ni se, an tiboral vek a ni. Chu entîrna chu tûn laiah kan tân a ṭangkai hle thei ang. He khawvêl hi thlarau khawvêl lam thil leh dawithiamna nên a inchiahpiah hle a. Pawina nei lo tûra lang dawithiamna hmanrua leh thiltihte pawhin mi chu ramhuai thununna hnuaiah a awmtîr thei a. Engpawh huama chutiang thilte i nun ata i dah bo chu a pawimawh hle a ni.​—⁠Deuteronomy 18:​10-12.

Thuziak hmasa bera a chanchin kan sawi tâk Rogelio-a chuan kum 50 mi a nih thlengin Diabola a awm tih a ring lo va. Mahse, a thlîr dân chu a ngaihtuah nawn leh a ni. Engvângin nge? Ani chuan: “Ka dam chhûnga a vawikhatna atân Bible ka lei a. Bible thu hriatthiamna chuan Diabola a awm tak tak tih min rin nghehtîr a. Chu hriatna chuan, a thununna thang lakah min vênghim a ni,” tiin a sawi a ni.

Setana a awm tawh loh hun tûr chu hmuh i châk em? I hmu thei dâwn a ni. Bible chuan mi tam tak bumtu Diabola nakin hun tûr chu ‘mei leh kât dîlah chuan paih’ a ni ang tih a sawi lâwk a. (Thu Puan 20:10) Mahse, mei alh tak tak leh kât chuan hmuh theih loh thlarau thil siamte chu a kâng thei lo va. Chuvângin, mei dîl chuan chatuanna tihboralna a entîr a ni. Setana chu chatuan atân a boral hlen tawh ang a. Pathian hmangaihtute tân chuan a va hlimawm dâwn tak êm!

Chu mi hun a lo thlen hma chuan, Jehova leh a kawng chanchinte a tam thei ang berin zir zêl rawh.b A tâwpa, “Sentana chu a awm tak tak lo!” tia sawi theih huna i awm dân tûr chu mitthla ang che. (w14-E 11/01)