Thihna Hi Tâwp Hlenna A Ni Lo!

Bethani khua hi khaw te tak tê a ni a, Jerusalem aṭang chuan mêl hnih (3 km) vêla hla a ni. (Johana 11:18) Chutah chuan Isua thih hma chawlhkâr engemaw zât lekah thil râpthlâk tak a thleng a. Isua ṭhian ṭha takte zînga mi Lazara chu nasa taka na thutin a thi ta a ni.

Isua chuan chu chanchin a han hriat chuan, a zirtîrte hnênah Lazara a muhîl a, kaitho tûrin a kal dâwn tih a hrilh a. (Johana 11:11) Mahse, A zirtîrte chuan a thusawi an hre thiam lo va, chuvângin Isua chuan: “Lazara a thi a ni,” tiin chiang takin a hrilh ta a ni.—Johana 11:14.

An phûm hnu ni liah, Isua chu mitthi ta farnu Marthi thlamuan tûrin Bethani khua chu a thleng ta a. Marthi chuan a hnênah: “Lalpa, heta awm ni la chu ka nuṭa a thi lo tûr,” a ti a. (Johana 11:17, 21) Isua chuan: “Kei hi thawhlehna leh nunna chu ka ni; tupawh mi ring chu thi mah sela a nung reng ang,” tiin a chhâng a ni.—Johana 11:25.

Hêng a thusawite hi a ruak ngawt a ni lo tih entîr nân, Isua chuan thlân chu va hnaihin aw ring takin: “Lazar, lo chhuak rawh,” a ti a. (Johana 11:43) Chutah, mitthi chu a lo chhuak a, a lo thlîrtute chuan mak an ti hle a ni.

A hmain Isua chuan a lo berah pawh mi pahnih a kaitho tawh a. Ṭum khat chu, Jaira fanu hmeichhe naupang thi tawh chu a kaitho a ni. Isua’n a kaihthawh hma lawkah, ani pawh chu a muhîl niin a sawi bawk a ni.—Luka 8:52.

Isua chuan Lazara leh Jaira fanute thihna chu muthilhna nên a khainkhin tih chhinchhiah ang che. Chu chu tehkhinna inhmeh tak a ni. Engvângin nge? Muhîl chuan engmah a hre thei lo va, natna leh hrehawm tawrhna ata chawlh hahdamna sawi nân a inhmeh hle a ni. (Thuhriltu 9:5; “Thihna Chu Tui Taka Muthilh Ang A Ni” tih bâwm chu en rawh.) Isua zirtîr hmasate chuan mitthite dimhmun dik tak chu an hre chiang hle. “Isua hnungzuitute tân chuan thihna hi muthilhna a ni a, rinna avânga thite tân chuan . . . thlân chu chawlhna hmun a ni,”a tiin the Encyclopedia of Religion and Ethics chuan a sawi a ni.

Mitthite chu thlânah an muhîl a, hrehawm an tuar lo tih hriatna chuan min thlamuan hle. Thihna hi hriat thiam theih loh thil a nih tawh loh avângin, kan pâwngpaw hlauh a ngai tawh lo a ni.

“MI A THIH CHUAN A NUNG LEH ANG EM NI?”

Tui taka mut hi nuam ti hle mah ila, tuin nge chantuana mut hlen chu duh ang? Thlâna muhîl mitthite chu Lazara leh Jaira fanute angin an lo tholeh ang tih beiseina eng nge kan neih?

Thlahtu Joba chuan a thi dâwn hnai tih a hriat khân chu zawhna chu a zâwt a ni: “Mi a thih chuan a nung leh ang em ni?” tiin.—Joba 14:14.

Pathian Engkimtitheia hnênah, Joba chuan ama zawhna vêk chu heti hian chhâng a: “Mi ko vang a, keiin ka chhâng ang che; i kut hnathawh i ngaina a ni,” tiin. (Joba 14:15) Joba chuan Jehova’n A chhiahhlawh rinawmte kaihthawh hun tûr A nghâkhlel tih hre chhiang hle nia inhriatna a nei a. Chu chu Joba duhthusâm thil mai a ni em? Ni lo ve.

Isua’n mitthite a kaihthawhna chuan Pathianin ani chu thihna chunga thu neihna a pe tih a lang chiang a. Dik takin, Bible chuan Isua’n “thihna leh mitthi khaw chabite” a nei tawh tih a sawi. (Thu Puan 1:18) Chuvângin, Isua chuan Lazara thlân lung chawi sawn tûra thu a pêk ang khân, thihna kawngkhâr pawh a hawng tawh dâwn a ni.

Bible chuan he thawhlehna thutiam hi a sawi nawn fo va. Vântirhkoh pakhat chuan zâwlnei Daniela hnênah: “I hahchâwl ang a, tâwpna a lo thlen hunah i awmna tûr hmun ruatah chuan i awm dâwn nia,” a ti a. (Daniela 12:13, C.L. Re-edited) Isua chuan thawhlehna thutiam pawm duh lo Juda sakhaw hruaitu Saddukaite hnênah chuan: “Pathian Lehkha Thu leh Pathian thiltihtheihna in hriat loh avângin in ngai sual ṭhîn a ni,” tiin a hrilh a. (Matthaia 22::23, 29) Tirhkoh Paula chuan: “Mi felte leh fel lote thawhlehna a awm ang tih Pathian lamah ka beisei,” tiin a sawi bawk.—Tirhkohte 24:15.

ENGTIKAH NGE MITTHITE AN THAWHLEH ANG?

Engtikah nge he mi felte leh fel lote thawhlehna chu a lo thlen ang? Vântirhkoh chuan mi fel Daniela hnênah “tâwpna a lo thlen hunah” a tholeh dâwn tih a hrilh a ni. Chutiang bawkin, Marthi chuan a nuṭapa Lazara chu “ni kin nia thawhlehnaah chuan a tho leh ang,” tih a ring a ni.—Johana 11:24.

Bible chuan he ‘ni kin ni’ hi Krista Lalram awpna nên a thlun zawm a ni. Paula chuan: “A hmêlma zawng zawng a ke hnuaia a dah hma loh chuan ani [Krista] chu lalah a awm tûr rêng a ni si a. Hmêlma hnuhnûng ber tihbova awm tûr chu thihna hi a ni,” tiin a ziak a ni. (1 Korinth 15:25, 26) Hei hi Pathian Ram lo thleng tûr leh chu miin Pathian duhzâwng leia ti tûra kan ṭawngṭai chhan tûr a ni tak zet a ni.b

Joba’n a hriat chian angin, Pathian duhzâwng chu mitthite kaihthawh hi a ni a. Chu mi nî a lo thlen hunah chuan thihna chu tihbovin a awm tak zet ang a. Mihring tumahin, ‘Thihna hi tâwp hlenna a ni em?’ tih chu an ngaihtuah buai tawh lo vang. (w14-E 01/01)