Hetianga ngaih dân nei hi Christopher-a te, Hannah-i te leh Gina-i te chauh an ni lo. Khawvêl hmun hrang hranga mi tam takte chuan Pathianin anni chu ṭhian angin a thlîr tih an ring tlat a ni. Chutiang chuan i inring ve em? Pathian hnaih niin i inhria em? Amah hnaih emaw, hnaih lehzual emaw i duh em? ‘Mihring ve mai tân chuan Pathian Engkimtitheia nêna inlaichînna ṭha tak neih chu thil theih a ni tak zet ang em? A nih theih chuan engtin nge ni ang?’ tiin i ngaihtuah mai thei a ni.

PATHIAN CHU HNAIH THEIH A NI

Bible sawi dân chuan, Pathian nêna mi mal inlaichînna ṭha tak chu neih theih a ni a. Pathianin Hebrai mite thlahtu Abrahama chu “ka ṭhian” tiin a ko tih a sawi a ni. (Isaia 41:⁠8) Jakoba 4:​8-a chhinchhiah: “Pathian hnaih rawh u, tichuan anin a hnaih ang che u,” tih sâwmna duhawm tak hi chhinchhiah ang che. Chuvângin, Pathian nêna inlaichînna ṭha​—⁠inṭhianna​—⁠chu neih theih a ni tih a chiang hle. Mahse, Pathian chu hmuh theih a ni si lo va, engtin nge amah hnaih a, inlaichînna ṭha i neih theih ang?

Chu zawhna chhân nân, mihring inṭhianna ṭhan chhoh dân hi ngaihtuah ang che. Mi pahnih inkâra inṭhianna chu hming inhriatna aṭangin a inṭan tlângpui ṭhîn. Chutah, an inbe pawh ṭhînin, an ngaihtuahna te, an rilru te an inhrilh a, an inṭhianna chu a ṭhang chho a ni. Tin, thil engemaw intihsak tawn an tum hian, an inṭhianna chu a nghet lehzual a ni. Pathian nêna inlaichînna ṭha neih dân pawh chutiang bawk chu a ni. A nih dân i lo en ang u. (w14-E 12/01)

A hming i hriat loh ṭhian ṭha tuemaw i nei em? I neih a rinawm lo. Bulgarian hmeichhia Irina-i chuan: “A hming i hriat loh chuan Pathian hnaih chu thil theih a ni lo,” tiin a sawi a, chu chu a dik hle. Thuziak hmasaa târ lan tawh angin, Pathianin amah hnaih tûra a duh che chu a lâwmawm hle a. Chuvângin, ani chuan Bible hmangin: “Kei JEHOVA ka ni,” tiin a rawn inhmêlhriattîr a tih theih a ni.​—⁠Exodus 6:⁠2.

Pathian hming i hriat leh i lam chu Jehova tân a pawimawh em? Hei hi ngaihtuah rawh: Tetragrammaton tia hriat Hebrai hawrawp pali-a ziak Pathian hming chu atîra ziak Hebrai Bible-ah chuan vawi 7,000 dâwn lai a lang a. Chu chu Bible-a lang hming dang zawng aiin a lang zing zâwk hle a ni. Hei hian, Jehova’n a hming hriaa lam tûrin min duh tih a târ lang chiang hle.a

Mahse, ṭhenkhat chuan Pathian chu thianghlim tak leh engkimtithei a nih avângin, a hming lam chu zah lohnaah an ngai mai thei. I ṭhian ṭha tak hming chu zah lo taka i lam mai mai ngai loh ang bawkin, Pathian hming chu zah lo taka lam mai mai tûr zawng a ni lo ngei mai. Mahse, Pathian Jehova duhzâwng chu amah hmangaihtute’n a hming chawimawi a, mi dangte an hriattîr chu a ni. (Sâm 69:30; 96:​2, 8) Isua’n a hnungzuitute chu: “Kan Pa vâna mi, i hming zahawm rawh se,” tia ṭawngṭai tûrin a zirtîr tih hre reng ang che. Pathian hming hriattîrna hmanga tihzahawm, a nih loh leh tihthianghlimna kawngah kan tel thei a, chutianga tihna chuan amah min hnaih lehzualtîr a ni.​—⁠Matthaia 6:⁠9.

Bible chuan Pathianin “a hming ngaihsaktute” chu ngaihsakna a pe bîk tih a târ lang a. (Malakia 3:16) Chutiang mite chungchângah, Jehova chuan: “Ka hming a hriat avângin hmun sângah ka hlâng ang. Ani chuan mi ko vang a, tichuan ka chhâng ang; kei chu a mangan lai chuan a hnênah ka awm ang,” tiin a tiam a ni. (Sâm 91:​14, 15) Chuvângin, amah nêna inlaichînna ṭha neih kan duh chuan Jehova hming hriat leh lam chu thil pawimawh tak a ni. (w14-E 12/01)

An dinhmun azirin, mi chuan an ṭhian ṭhate chu hmaichhanah emaw, phone te, e-mail te, video te, a nih loh leh lehkha thawnte emawin a be pawh ṭhîn a. Chuvângin, Pathian hnaih tûr chuan amah nêna kan inbiak pawh ṭhin a ngai a ni. Mahse, chu chu eng anga tih tûr nge ni ang?

Ṭawngṭaiin Jehova kan be thei a. Mahse, Pathian hnêna ṭawngṭaina chu kan ṭhiante nêna tîtîna satliah ang a ni lo. Kan ṭawngṭai hian lei leh vâna Ropui Ber, min Siamtu kan bia a ni tih kan hre tûr a ni a. Hei hian chhûngril taka zahna nêna ṭawngṭai tûrin min min chêttîr tûr a ni. Kan ṭawngṭainate Pathian ngaihthlâksak ni tûr chuan a thil phût engemawte kan zawm a ngai bawk. Chûng zînga pathumte chu hêng hi a ni.

A hmasa berin, ṭawngṭaina chu Pathian Jehova hnênah chauh hlan tûr a ni​—⁠Isua, “mi thianghlim,” a nih loh leh milem hnêna hlan tûr a ni lo. (Exodus 20:​4, 5) Bible chuan: “Engkimah ṭawngṭai leh dîlin, lâwmthu hril tel zêlin, in duhnate chu Pathian hnênah hriattîrin awm zâwk rawh se,” tiin a sawi. (Philippi 4:⁠6) A pahnihnaah chuan, ṭawngṭaina chu Pathian Fapa, Isua Krista hminga hlan tûr a ni. Isua ngeiin heti hian a sawi: “Keimaha kal lo chu tumah Pa hnênah an thleng ngai lo,” tiin. (Johana 14:⁠6) A pathumna chu, kan ṭawngṭaina chu Pathian duhzâwng nên a inmil tûr a ni. Bible chuan: “Engpawh a duhzâwng anga kan dîl chuan anin min ngaihthlâksak ṭhin hi,” tiin a sawi.a​—⁠1 Johana 5:⁠14.

Inlaichînnaah mi pakhat chauhvin thu a sawi reng chuan a ṭha rei lo vang. Ṭhian ṭhate chuan inbiak pawh tawn nuam an tih ang bawkin, Pathian kan inbiaktîr tûr a ni a, a thusawite chu kan ngaithla bawk tûr a ni. Pathian min biak dân i hria em?

Tûn lai hian, Pathian Jehova chuan a Thu ziak, Bible hmangin min “bia” a. (2 Timothea 3:​16, 17) Engvângin nge chutianga kan sawi theih? Entîr nân: I ṭhian ṭha hnên aṭangin lehkha thawn i dawng a. I chhiar zawh chuan, mi dangte hnênah phûr takin, “Tûn mai khân ka ṭhian hnên aṭangin chanchin ka hre chiah a!” tiin i sawi mai thei. Mahse, in inbiak pawhna chu ṭawngkama inbiakna ni lovin, lehkha thawna inbiak pawhna a ni. Chutiang bawkin, Bible i chhiar hian Jehova’n a bia che tihna a ni. Chuvângin, thuziak hmasa bera târ lan tâk Gina-i chuan, “Pathianin a ṭhian anga min thlîr ka duh chuan, kan hnêna a ‘lehkha min thawn’​—⁠Bible​—⁠hi ka bih chiang tûr a ni,” tiin a sawi. Tin, heti hian a sawi belh a ni, “Nî tina Bible chhiarna chuan Pathian min hnaih zualtîr a ni,” tiin. Nî tina a Thu, Bible chhiarin, Jehova nên in inbe ṭhîn em? Chutianga i tihna chuan Pathian hnaih lehzual tûrin a ṭanpui ang che. (w14-E 12/01)

“I duh apiang sawi rawh, ka tihsak ang che.” Hmêl hriat loh emaw, hmêl hriat satliah mai emaw hnêna chutiang thu hrilh chu i tîm deuh mai thei a. Mahse, i ṭhian ṭha pakhat hnêna chutiang thu sawi chu harsa i ti lo vang. Ṭhian ṭhate chuan an thil phûtte intihsak tawn an duh tlângpui ṭhîn a ni.

Jehova chuan amah betute lâwmna tûr thil a tihsak fo ṭhîn tih Bible chuan a târ lang a. Entîr nân, Pathian nêna inṭhian ṭhatna nei Lal Davida chuan: “Aw LALPA ka Pathian, nangin thilmak i tihte leh, keimahni lam i ngaihtuahnate hi a tam êm êm mai a, . . . chhiar sên rual a ni lo vang,” tiin a sawi a ni. (Sâm 40:⁠5) Chu mai a ni lo, Jehova chuan amah hriatna la nei lote pawh ‘an rilru ei tûr leh lâwmnain a tihkhahsak’ bawk a ni.​—⁠Tirhkohte 14:⁠17.

Jehova chuan mi dangte tihlâwm nuam a tih avângin, Pathian ṭhian ni duhte chuan a “thinlung tilâwm” thei thilte chu an ti ang tih beisei chu a âwm hle. (Thufingte 27:11) Mahse, Pathian tilâwm tûrin eng nge i tih ang? Bible chuan: “Thil tihṭhat leh thilphal hi theihnghilh suh u; chutiang inthawina chungah chuan Pathian a lungni êm êm si a,” tiin a sawi a ni. (Hebrai 13:16) Chu mi awmzia chu thil ṭha tih leh thilphalna ringawt hi Jehova tihlâwm nân a tâwk tihna a ni em?

Bible chuan: “Rinna lovin ama lâwmzâwng mi nih rual a ni lo,” tiin a sawi a. (Hebrai 11:⁠6) ‘Abrahama chuan Pathian a rin’ hnuah chauh a ni, “Pathian ṭhianah vuahin” a awm ni. (Jakoba 2: 23) Isua Krista chuan Pathian malsâwmna dawng tûr chuan ‘Pathian rin’ tlat a ngai tih a sawi uar bawk. (Johana 14:⁠1) Chuvângin, Pathianin ama lama a hîpte laka a beisei rinna chu engtin nge i neih theih ang? Pathian Thu, Bible zir ziahna aṭangin i ṭan thei a ni. Chutianga i tih chuan, ‘a duhzâwng hriat famkimna’ i nei ang a, chutiang chuan ‘kawng tinrênga amah tihlungawi’ dân i hria ang. Tichuan, Pathian Jehova hriatna dik i neih chhoh va, a thil phût fel takte i hriat chuan amah i rinna chu a ṭhang chho ang a, ani chuan a hnaih lehzual ang che.​—⁠Kolossa 1: 9, 10. (w14-E 12/01)

Pathian hnaih tûrin eng nge i tih theih? Pathian nêna inlaichînna ṭha nei tûra i tih theih a hnuaia târ lante hi kan ngaihtuah tawh a ni:

1. Pathian hming Jehova tih hriat leh lam.

2. Ṭawngṭaina leh a Thu, Bible zirna hmanga amah nêna inbiak pawh ṭhin.

3. Pathian Jehova lâwm zâwng tih rengna.

Hêng tehnate aṭangin, Pathian hnaih thei tûra thiltih ngaite i ti niin i sawi thei ang em? Hmasâwn ngaihna lai nei niin i inhria em? Theih tâwp chhuaha ṭan lâk a ngai ngei ang; mahse, a rahchhuah chu ngaihtuah ang che.

United States-a awm Jennifer-i chuan: “Pathian nêna inlaichînna ṭha nei tûra ṭan lâkna eng pawh chu a manhla a ni. Chu inlaichînna chuan malsâwmna tam tak: Pathian rinchhan zâwkna te, a mizia hriatthiam lehzualna te, leh a pawimawh berah chuan hmangaih lehzualna te a thlen a. Hei aia nun kawng ṭha zâwk a awm thei lo!” tiin a sawi.

Pathian nêna inlaichînna ṭha neih i duh chuan, Jehova Thuhretute chuan ṭanpui che an châk hle ang. A thlâwna Bible zirpui tûr chein ruahmanna an siam thei a. Tualchhûng Kingdom Hall-a Bible zira inkhâwmnaa tel tûra sâwm i ni bawk a, chutah chuan Pathian nêna an inlaichînna ngaihlutute nêna inkawmna chu i nei thei ang.a Chutianga i tih chuan, fakna hla phuahtu angin nang pawhin: “Kei atân erawh zawng Pathian hnaih hi a ṭha a ni,” tiin i sawi thei ang.​—⁠Sâm 73:28. ▪ (w14-E 12/01)