‘Nangmah I Inhmangaih Angin I Vêngte I Hmangaih Tûr A Ni’
“A dawttu [thupêk] . . . chu hei hi a ni, ‘Nangmah i inhmangaih angin i vêngte pawh i hmangaih tûr a ni,’ tih hi.” —MT. 22:39.
1, 2. (a) Isua’n thu pêk ropui ber dawttu nia a sawi chu eng nge ni? (b) Eng zawhnate nge kan ngaihtuah ang?
ISUA fiah nân ṭum khat chu Pharisai pakhat chuan: “Zirtîrtu, dân thuah chuan eng thupêk hi nge ropui ber?” tiin a zâwt a. Thuziak hmasa lama kan hmuh tawh angin, Isua chuan: “Lalpa i Pathian chu i thinlung zawng zawngin, i thlarau zawng zawngin i rilru zawng zawngin i hmangaih tûr a ni,” tih chu “thu pêk ropui leh pawimawh ber,” a ni tih a hrilh a. “A dawttu, a anpui chu hei hi a ni, ‘Nangmah i inhmangaih angin i vêngte pawh i hmangaih tûr a ni,’ tih hi,” tiin a sawi belh bawk a ni.—Mt. 22:34-39.
2 Isua chuan mahni kan inhmangaih anga vêngte kan hmangaih a ngaih thu a sawi a. Chuvângin, heti hian kan inzâwt tûr a ni: Kan vêngte chu tu nge ni? Engtin nge kan vêngte hmangaihna kan lantîr theih ang? tiin.
KAN VENGTE CHU TU NGE NI?
3, 4. (a) “Kan vêngte chu tunge ni?” tih zawhna chu Isua’n eng tehkhin thu hmangin nge a chhân? (b) Engtin nge Samari mi chuan rawk leh vuak hrep tuar a, thi lek leka kalsana awm mi pakhat chu a ṭanpui? (A thupui chunga milem en rawh.)
3 Kan hnaiha awm leh ṭhian ṭangkai takte chu kan vêngte angin kan ngai mai thei a. (Thuf. 27:10) Mahse, thiam inchantîr tumtu pakhatin: “Kan vêngte chu tunge ni?” tia a zawh laia, Isua thusawi chu ngaihtuah teh. A chhân nân, Isua chuan Samari mi ṭha tehkhin thu a hrilh a ni. (Luka 10:29-37 chhiar rawh.) Mi pakhat rawk leh vuak hrep tuar a, thi lek leka kalsan chungah chuan Israel puithiam leh Levia mi chu ṭhenawm ṭha tak an nih kan beisei mai thei. Mahse, engmah tihsak lovin an kalsan a. Samari mi—Mosia Dân zahtu, mahse Juda mite’n an hmuhsit tak chuan a ṭanpui hlauh zâwk a ni.—Joh. 4:9.
4 Samari mi ṭha chuan a hliam tihdam nân hriak leh uain a hnawihsak a. Khualbûk vêngtu hnênah chuan duli pahnih, ni hnih hlawh tluk vêl chu a lo enkawl man tûrah a pe a ni. (Mt. 20:2) Chuvângin, hliam tuar tâna vêng, a nih loh leh ṭhenawm dik tak chu hriat a har lo. Isua tehkhin thu chuan kan vêngte chunga khawngaihna leh hmangaihna lantîr tûrin min zirtîr chiang hle a ni.
5. Engtin nge Jehova chhiahhlawhte chuan tûn hnaia leilung chhiatna a thlen khân ṭhenawmte hmangaihna an lantîr?
5 Samari mi ṭha anga mi khawngaih thei tak hmuh chu a harsa ṭhîn a. Hmangaihna pianpui nei lo te, mi kawlhsen te, ṭha duh hauh lote an tamna, he ni ‘hnuhnûng’ hun khirh takah hian a harsa lehzual a ni. (2 Tim. 3:1-3) Entîr nân, leilung chhiatna a thlen laiin dinhmun khirh takte chu a thleng mai thei a. Kum 2012 October chawhnu lama Hurricane Sandy-in New York City a nuai laia thil thleng kha han ngaihtuah teh. Chu khawpui chhûnga thlipuiin nasa taka a nuaina vêng pakhata chêngte chuan electric, intih lumna, leh thil mamawh dangte an neih loh avânga an tawrh mai bâkah, rûkrute’n an thil neihte chu an lâksak bawk a ni. Chu mi vêngah bawk chuan, Jehova Thuhretute chuan anmahni leh mi dangte ṭanpui nân program an buatsaih a. Kristiante chuan an ṭhenawmte an hmangaih avângin chutiang thil chu an ti a ni. Ṭhenawmte hmangaihna lantîr theih dân kawng dangte chu eng nge ni?
ṬHENAWMTE HMANGAIHNA KAN LANTIR THEIH DAN
6. Engtin nge kan thu hrilh hna chu ṭhenawm nihna nên a inkûngkaih?
6 Mite chu thlarau lamah ṭanpui rawh. ‘Pathian Lehkha Thua thlamuanna’ chanchin hrilhin kan ṭanpui a ni. (Rom 15:4) Kan thu hrilhnaa mite hnêna Bible thutak kan hrilh hian an ṭhenawmte kan ni tihna a ni. (Mt. 24:14) “Beiseina Pathian” aṭanga chhuak Lalram thuchah kan puang chhuak thei chu kan va nihlawh tak êm!—Rom 15:13.
7. Dân Rangkachak chu eng nge ni a, chu mi zawm avâng chuan engtin nge malsâwm kan nih?
7 Dân Rangkachak zui rawh. He dân hi Tlâng Chunga Isua Thusawi: “Thil engkim miin in chunga an tiha in duh tûr ang apiang chu, mi chungah pawh ti ve rawh u; chu chu Dân thu leh Zâwlneite thu a ni rêng si a,” tihah hian kan hmu thei a ni. (Mt. 7:12) Isua fuihna anga mi dangte kan cheibâwl hian, “Dân thu” (Genesis aṭanga Deuteronomy) leh “Zâwlneite thu” (Hebrai Pathian Lehkha Thua hrilh lâwkna lehkhabu) phêna thil awm milin kan awm tihna a ni a. Chûng thuziakte aṭang chuan mi dang hmangaihtute chu Pathianin mal a sâwm tih a lang chiang a ni. Entîr nân, Isaia hmangin Jehova chuan: “Dik takin ro rêl ula, fel takin ti rawh u: . . . Chutiang ti mi . . . chu, a eng a thâwl e,” tiin a sawi a. (Is. 56:1, 2) Kan ṭhenawmte chunga hmangaih leh dik taka thil kan tih avângin nasa taka malsâwm kan ni.
8. Engvângin nge kan hmêlmate kan hmangaih ang a, chutianga kan tih chuan eng thil nge thleng thei?
8 I hmêlmate hmangaih rawh. Isua chuan heti hian a sawi a ni: “‘I vêngte hmangaih la, i hmêlma haw rawh,’ an ti tih in hre tawh. Kei erawh chuan ka hrilh a che u, in hmêlmate chu hmangaih ula, a tiduhdahtu che u chu ṭawngṭaisak rawh u, in Pa vâna mi fate in nih theih nân,” tiin. (Mt. 5:43-45) Tirhkoh Paula pawhin: “I hmêlma a rilṭâm chuan ei tûr pe rawh, a tuihâl chuan in tûr pe rawh,” tia ziakin chu thu tho chu a sawi a ni. (Rom 12:20; Thuf. 25:21) Mosia Dânah, a hmêlma ran chu a thil phurhin a delh beh chuan a ṭanpui tûr a ni a. (Ex. 23:5) Chutianga thil an tih dunna chuan lo inhmêlma tawhte pawh ṭhian ṭhaah a siam thei a ni. Kristian hmangaihna kan lantîr avângin kan hmêlma tam takte chuan kan lakah rilru ṭha an put phah thei a Kan hmêlma, nasa taka min tiduhdahtute hial chungah pawh hmangaihna kan lantîr avânga an zînga ṭhenkhatin Kristianna dik an pawm chuan kan va lâwm dâwn êm!
9. Kan unau tuemaw nêna inremna siam chungchângah Isua’n eng nge a sawi?
9 ‘Mi zawng zawng nêna inremna ûm rawh.’ (Heb. 12:14) Isua’n: “Maichâm bula i thilpek i hlan lai ngeia i unauvin i chungah lungnih lohna a nei tih i hriat chhuah leh chuan, chuta maichâm hmaah chuan i thil pêk chu hnutchhiah la, kal langin i unau rem zet la, chu mi hnuah chuan i thilpêk chu rawn hlân rawh,” tia a sawi avângin mi zawng zawngah chuan kan unaute pawh an tel ngei a ni. (Mt. 5:23, 24) Kan unau tuemaw chunga hmangaihna kan lantîr a, amah nêna inremna siam tûra hma kan lâk vat chuan Pathianin mal min sâwm ang.
10. Engvângin nge mi dangte dik lohna kan zawn loh vang?
10 Mi dangte dik lohna zawng suh. Isua chuan heti hian a sawi a ni: “Sawisêl suh u, sawisêla in awm loh nân. In sawisêl ang bawkin an sawisêl ang che u; in tehna ngai bawkin an tehsak leh ang che u. Tin, engatinge mahni mita khanchhuk awm chu ngaihtuah si lovin, i unau mita hmawlh tê tak tê awm chu i hmuh ni? Engtin nge i unau hnênah, ‘I mit ata hmawlh tê tak tê kha mi lâk chhuahtîr rawh,’ i tih theih ang? ngai teh, nangma mit ngeiah khanchhuk a awm reng si a. Mi vervêk! i mit ata khanchhuk kha la chhuak hmasa rawh; chutichuan i unau mit ata hmawlh tê tak tê lâk chhuah tûr chu fiah takin i hmu ang,” tiin. (Mt. 7:1-5) Dik lohna lian tak kan neih theih laia mi dangte dik lohna tê tham takte sawisêl lo tûra min hrilhna thiltithei tak a va ni êm!
ṬHENAWMTE HMANGAIHNA LANTIR DAN KAWNG ṬHA BER
11, 12. Eng kawng ṭha berin nge kan ṭhenawmte hmangaihna kan lantîr?
11 Ṭhenawmte kan hmangaihna chu kawng ṭha bera lantîr kan duh a. Chutianga kan tih theih dân ṭha ber chu Ram chanchin ṭha hrilh a ni tih Isua chuan min zirtîr a. (Lk. 8:1) Isua chuan amah zuitute chu “hnam tina mi zirtîrahte siam” tûrin thu a pe a ni. (Mt. 28:19, 20) Chu thupêk hlen chhuahna hmangin kan ṭhenawmte chu boralnaa hruaitu kawng zau tak kalsan a, nunnaa hruaitu kawng zîma kal tûra ṭanpui kan tum a ni. (Mt. 7:13, 14) Chutianga thawhrimna chu Jehova’n mal a sâwm tih rinhlelh rual a ni lo.
12 Isua angin, keini pawhin mite chu an thlarau lam mamawh hre tûrin kan ṭanpui a. (Mt. 5:3) Chu chu ṭha taka lo chhâng lêttute hnêna “Pathian chanchin ṭha” hrilhna hmangin kan ti a ni. (Rom 1:1) Lalram thuchah pawmtute chu Isua Kristaah Pathian nên inremin an lo awm ta a. (2 Kor. 5:18, 19) Chanchin ṭha hrilhna hmangin ṭhenawmte hmangaihna chu kawng pawimawh berin kan lantîr a ni.
13. Lalram thuchhuahtute anga kan thiltih chu engtin nge i ngaih?
13 Tlawhkîr leh in lama Bible zirpui neih nâna ṭha taka inbuatsaihin mite chu Pathian tehna felte mila nung tûrin kan ṭanpui thei a ni. Chu chuan Bible zirlai nunah inthlâk thlengna nasa tak a thlentîr thei a. (1 Kor. 6:9-11) Pathianin “chatuana nun duhna rilru dik tak” neite chu a ṭûl anga inthlâk danglam a, amah nêna inlaichînna hnai tak nei tûra a ṭanpui dân hmuh chu a phûrawm takzet a ni. (Tirh. 13:48, NW) Mi tam takte beidawnna chu hlimnain a thlâk a, ṭûl lo taka lunghnualna chu kan Pa vâna mi rin nghehnain a thlâk bawk a ni. Mi tharte’n thlarau lamah hma an sâwn hmuh chu a va nuam êm! Lalram thuchhuahtute kan nih angin, kawng ṭha thei ang bera kan ṭhenawmte chunga hmangaihna lantîr chu malsâwmna a ni tih i pawm lâwm ni?
PAULA’N HMANGAIHNA A HRILHFIAH DAN
14. Engtin nge 1 Korinth 13:4-8-ah Paula’n hmangaihna a hrilhfiah?
14 Paula’n Pathian thâwk khuma hmangaihna dik tak a hrilhfiah dân pawh hi a ṭha hle a. Paula sawi hmangaihna chu ṭhenawmte nêna kan indâwrnaah kan lantîr chuan, chu chuan harsatna tam tak lakah min vênghim thei a, Pathian malsâwmna kan chungah a thlentîr thei bawk a ni. (1 Korinth 13:4-8 chhiar rawh.) Paula’n hmangaihna chungchâng a sawi chu tawitêa ennawnin, kan ṭhenawmte nêna kan inlaichînnaa kan nunpui theih dân i lo en ang u.
15. (a) Engvângin nge dawhthei leh ngilnei tak kan nih ang? (b) Infak lo leh uang lo kan nih chhan tûr chu eng nge?
15 “Hmangaihnain a dawhthei a, ngil a nei bawk ṭhîn.” Pathianin mihring ṭha famkim lote a dâwrnaah dawhtheihna leh ngilneihna a lantîr ang bawkin, mite’n thil an tihsual a, ngilnei lo leh hawihhâwm lo taka an awm hunah pawh dawhthei leh ngilnei taka kan awm a ngai a ni. ‘Hmangaihnain a îtsîk loh’ avângin, hmangaihna dik tak chuan mi dangte thil neih emaw, kohhrana an chanvote emaw ît lo tûrin min ṭanpui ang. Chu bâkah, hmangaihna kan neih chuan, kan infak lo vang a, kan uang hek lo vang. “Mi indah chung leh rilru chapo, mi suaksual khawnvâr hi sual a ni,” si a.—Thuf. 21:4.
16, 17. Engtin nge 1 Korinth 13:5, 6 mila thil kan tih theih?
16 Hmangaihna chuan kan ṭhenawmte chunga hawihhawm tak min nihtîr ang. Dâwt kan hrilh lo vang a, an thil kan rûksak lo vang a, Jehova dânte leh thu bulte kalh zâwngin eng mah kan ti lo vang. Hmangaihna chuan mi dangte ngaihsakna lantîr lohna leh mahni chauh inngaihtuahna lakah min vênghim ang.—Phil. 2:4.
17 Hmangaihna dik tak chu awlsam takin a thinur lo va, mite’n kan chunga hmangaihna nei lo taka thil an tihte lehkhabua chhinchhiah ang maiin, ‘sual lam a ngaihtuah lo.’ (1 Thes. 5:15) Huatna kan pai chuan kan chungah Pathian a lâwm lo ang a, mahni leh mi dang kan tina thei a ni. (Lev. 19:18) Hmangaihna chuan thutak lâwm tûrin min ṭanpui a, min hawtu pawh ni se, dik lo taka cheibâwl leh rorêlsak a nih chuan “fel lohna lâwm lo” tûrin min ṭanpui bawk a ni.—Thufingte 24:17, 18 chhiar rawh.
18. Hmangaihna chungchângah 1 Korinth 13:7, 8 aṭangin eng nge kan zir?
18 Paula’n hmangaihna a sawifiah zawmna hi ngaihtuah teh. Hmangaihna chuan “engkim a tuar hrâm hrâm” tih a sawi a. Mi tuemawin min tih thinrim a, ngaihdam a dîl chuan hmangaihna chuan ngaidam tûrin min chêttîr a ni. Hmangaihna chuan Pathian Thua awm “engkim a ring a,” thlarau lam chaw kan dawnte chu min ngaihhluttîr. Hmangaihna chuan Bible-a chhinchhiah “engkim a beisei” a, kan beisei chhan mi dangte hrilh tûrin min chêttîr bawk. (1 Pet. 3:15) Dinhmun harsa tak hnuaiah pawh thil ṭha ber a thlen theih nân kan ṭawngṭai a, kan beisei bawk a ni. Mite’n kan chunga thil sual an ti emaw, min tiduhdah emaw, fiahna dang kan tuar emaw pawh ni se, hmangaihna chuan “engkim a tuar chhuak ṭhîn.” Chu bâkah, “hmangaihna hi engtikah mah a reh lo vang.” Thuâwih mihringte chuan kumkhuain an lantîr dâwn a ni.
NANGMAH I INHMANGAIH ANGIN I VENGTE HMANGAIH ZAWM ZEL RAWH
19, 20. Eng Bible zilhnate’n nge kan ṭhenawmte hmangaihna lantîr zawm zêl tûra min chêttîr ang?
19 Bible zilhnate zâwmin, kan ṭhenawmte hmangaihna chu kan lantîr zawm zêl thei a. Chutiang hmangaihna chuan kan hnam puite chauh ni lovin, mi zawng zawng a huam vek a ni. Isua’n: “Nangmah i inhmangaih angin i vêngte pawh i hmangaih tûr a ni,” tiin a sawi tih kan hriat reng a ngai bawk. (Mt. 22:39) Pathian leh Krista chuan kan ṭhenawmte hmangaih tûrin min beisei a. Kan ṭhenawmte nêna inkaihhnawih thil engemaw a thlen hunah tih tûr chiah kan hre lo a nih chuan, a thlarau thianghlim hmanga Pathian ṭanpuina dîlin i ṭawngṭai ang u. Chutianga tihna chuan Jehova malsâwmna a thlen ang a, hmangaihna nei taka thilti tûrin min ṭanpui bawk ang.—Rom 8:26, 27.
20 Mahni kan inhmangaih anga vêngte hmangaih tûra thupêk chu “lal dân” tia sawi a ni a. (Jak. 2:8) Mosia Dâna thupêk ṭhenkhat a sawi lan hnuah Paula chuan: “Thupêk dang la awm rêng rêngte hi, ‘Nangmah i inhmangaih angin i vêngte i hmangaih tûr a ni,’ tih hian a khai khâwm vek si a. Hmangaihnain vêngte a tikhawlo ngai lo va; chuvângin hmangaihna hi dân zawh famkimna a ni.” tiin a sawi a ni. (Rom 13:8-10) Chuvângin, ṭhenawmte hmangaihna chu kan lantîr zawm zêl a ngai a ni.
21, 22. Engvângin nge Pathian leh kan ṭhenawmte kan hmangaih ang?
21 Kan ṭhenawmte hmangaihna kan lantîr zawm zêl a ngaih chhan kan chhût hian, Isua’n a pa chuan: “Mi sualte leh mi ṭhate chungah chuan a nî a chhuahtîr ṭhîn a, mi felte leh mi fel lote chungah pawh ruah a sûrtîr ṭhîn,” tia a sawi hi ngaihtuah a ṭha a ni. (Mt. 5:43-45) Mi fel an ni emaw, ni lo emaw pawh ni se, kan ṭhenawmte chungah hmangaihna kan lantîr a ngai a. A hmaa kan hmuh tawh angin, chutiang hmangaihna lantîr dân pawimawh ber chu Lalram thuchah hrilh hi a ni. Ṭhenawmte’n chanchin ṭha chu ngaihhlutna dik tak nêna an chhân lêt chuan malsâwmna an va dawng nasa dâwn êm!
22 Tîmna nei miah lova Jehova hmangaih chhan tûr tam tak kan nei a. Ṭhenawmte hmangaihna kan lantîr theih dân kawng tam tak a awm bawk a. Pathian leh kan ṭhenawmte hmangaihna lantîrin, Isua thusawi pawimawh takte zahna kan lantîr a ni. A pawimawh ber chu kan Pa vâna mi Jehova kan tilâwm hi a ni. (w14-E 06/15)