Mi Dangte Chu An Nih Theih Chin Tûr Thleng Tûrin Ṭanpui Rawh
“Ka mita en reng chung chein rem ka ruatsak zêl ang che.”—SAM 32:8.
1, 2. Engtin nge Jehova chuan lei lama a chhiahhlawhte chu a thlîr?
NU LEH pate chuan an fa naupangte infiam lai an enin, pianpui theihna an neih chu mak an ti fo ṭhîn. Chutiang chu i tawng ve tawh em? Naupang pakhat chu infiam mi tak a nih laiin, a unau dang chuan lem ziak leh thil siam a thiam zâwk pawh a ni thei bawk. Naupangte theihna chu engpawh ni se, nu leh pate tân chuan an chem kalzâwng tûr hmuh chhuah chu a nuam a ni.
2 Jehova pawhin lei lama a fate chu a ngaihsak hle a. Tûn laia a chhiahhlawhte chu “hnam tinrênga thil hlute” angin a hmu a ni. (Hag. 2:7, NW) A bîk takin an rinna leh an inpumpêkna avânga hlu an ni a. Mahse, tûn laia Thuhretute zîngah chuan theihna chi hrang hrang nei an awm tih i hmu mai thei a. Unaupa ṭhenkhat chuan vântlâng hmaa thusawi an thiam hle laiin, mi dangte chuan thil huaihawt vêl an thiam hle thung. Unaunu tam takte chuan ṭawng dang an zir thiam hmain, chu chu rawngbâwlnaah an hmang ṭangkai hle a. Mi dangte erawh chu fuih ngaite fuihnaah emaw, dam lote enkawlnaah emaw entawn tûr ṭha tak an ni thung. (Rom 16:1, 12) Chûng mite nêna kohhrana kan awm khâwm avâng chuan kan lâwm hle a ni lâwm ni?
3. He thuziakah hian eng zawhnate nge kan ngaihtuah ang?
3 Mahse, ṭhalaite emaw, baptisma chang tharte emaw tiamin Kristian unau ṭhenkhat chu kohhranah an la tlângnêl lo hle a. Chûng unaute chu an nih theih chin tûr thleng tûrin engtin nge kan ṭanpui theih ang? Jehova entawnin, an ṭhatna lai chu engvângin nge hmuh kan tum zâwk loh vang?
JEHOVA’N A CHHIAHHLAWHTE MIZE ṬHA LAI A HMU
4, 5. Engtin nge Rorêltute 6:11-16-a thuziak chuan Jehova’n a chhiahhlawhte nih theih chin tûr a hmu tih a târ lan?
4 Jehova chuan tûna a chhiahhlawhte neih mize ṭha laite chauh ni lovin, nakina an la nih theih chin tûrte pawh a hmu tih Bible thuziak tam tak chuan a târ lang chiang hle a. Entîr nân, Midian-ho awp behna laka Pathian mite chhuah zalên tûra Gideona thlan a nih khân, vântirhkohvin: “Nang mi chak huaisen, LALPA chu i hnênah a awm e,” tia chibai a bûk khân mak a ti ngawt ang. Chutih lai chuan Gideona chu “chak,” a intih hmêl loh hle a. Hlauhthâwnna leh tling lo nia inhriatna a neih chu a sawi chhuak hial a ni. Mahse, a hnua Jehova nêna an inbiakna chuan a inthlîr dân aia ṭhain Jehova chuan a chhiahhlawh chu a thlîr tih a târ lang a ni.—Rorêltute 6:11-16 chhiar rawh.
5 Jehova chuan Gideona theihna chu a hmuh avângin Israelte chhan chhuak tûrin a ring tâwk a ni. A chhan pakhat chu, Jehova vântirhkoh chuan Gideona’n a chakna zawng zawng nêna buh a vuak dân a lo hmuh tawh vâng a ni. Vântirhkoh rilru latu deuh thil dang pawh a la awm bawk a. Bible hun lai chuan, lo neitute chuan thlîin buh sî a chhêm len nghâl theih nân tualzâwlah buh an vaw ṭhîn a. Mak tak maiin, Gideona chuan Midian-hote hmuh theih loh tûrin grêp sâwrna khurah a rûkin a vua a ni. A va fing thiam êm! Jehova mithmuhah Gideona chu lo neitu fîmkhur tak a nih bâkah, mi fing tak a ni bawk chu thil mak a ni lo. Ni e, Jehova chuan a nih theih chin tûr chu a hmu a, a zirtîr ta a ni.
6, 7. (a) Engtin nge Jehova chuan Israel mi ṭhenkhatte ang lo takin zâwlnei Amosa chu a thlîr? (b) Amosa chu mi mâwl mai a ni lo tih engin nge târ lang?
6 Chutiang bawkin, zâwlnei Amosa chungchângah pawh Pathian Jehova’n a chhiahhlawhte chu mite ngaihah pawimawhna nei lo, mi challang lo angin lang mah se, an nih theih chin tûr a hriatzia a lang a ni. Amosa chuan berâm rual enkawltu leh mi retheite tâna chaw anga ngaih theipui enkawltu a nih thu a sawi a. Jehova’n uire hmang Israel hnam sâwm lalramte demna thu sawi tûra Amosa a ruat khân, Israel mi ṭhenkhatte chuan tling lo takah an ngai mai thei a ni.—Amosa 7:14, 15 chhiar rawh.
7 Amosa chu thingtlâng khaw tê taka mi ni mah se, a hun laia hnam chîn dân leh a hun laia rorêltute chanchin a hriatna chuan mi mâwl mai a ni lo tih a târ lang. Israel ram dinhmun chu a hriat chian hmêl hle a, sumdâwngtu a dâwr ṭhinte aṭangin an ṭhenawm hnamte chanchin chu a hria pawh a ni thei ang. (Amos. 1:6, 9, 11, 13; 2:8; 6:4-6) Tûn laia Bible lama mi thiam ṭhenkhat chuan Amosa lehkha ziah thiamzia chu an fak a ni. Ani chuan thu mâwlmang takte chu thiltithei takin a hmang a. Puithiam dik lo tak Amazia huai taka a chhân dân chuan Jehova’n mi dik tak a thlanzia leh atîra lang sâr lo tak a theihnate a hman theih dân a nemnghet a ni.—Amos. 7:12, 13, 16, 17.
8. (a) Pathianin Davida chu eng nge a tiam? (b) Engvângin nge Sâm 32:8-a thu chu inrintâwkna tlachham leh an theihna neih ring zo lote tân a thlamuanthlâk?
8 Ni e, Jehova chuan a chhiahhlawh tinte nih theih chin tûr chu a hmu a. Lal Davida chu a kaihruaiin, ‘a mitin a en reng’ dâwn tih a tiam a ni.’ (Sâm 32:8 chhiar rawh.) Chu chu min tichaktu tûr a nih chhan i hria em? Inrintâwkna tlachham mah ila, Jehova chuan kan tih theih loh tûr anga kan ngaihte leh kan suangtuah phâk bâk thiltumte tipuitling tûrin min ṭanpui thei a ni. Nu leh pate’n kal zir ṭan tîr an fa chu an kaihruai angin Jehova chuan thlarau lama hma kan sâwn chhoh zêl lai hian min kaihhruai a inhuam a ni. Kan nih theih chin tûr thleng thei tûra min ṭanpui tûrin kan Kristian unaute pawh a hmang thei bawk. Engtin nge?
MI DANGTE ṬHATNA LAI EN RAWH
9. Engtin nge Paula’n unaute tâna ṭha tûr “en” tûra a fuihna chu kan zawm theih ang?
9 Paula chuan Kristian zawng zawngte chu an unaute tâna ṭha tûr “en” tûrin a fuih a ni. (Philippi 2:3, 4 chhiar rawh.) Paula zilhnain a tum tak chu mi dangte theihna neih kan hmuhsakin, kan pawmsak tûr tihna a ni. Mite’n hmasâwnna kan neih min hmuhsak hunah engtin nge kan awm? Chu chuan hmasâwn zêl tûr leh a ṭha thei ang bera thil ti tûrin min chêttîr ṭhîn. Chutiang bawkin, kan unaute hlutna kan pawm hunah thlarau lama ṭhang duang a, hmasâwn tûrin kan ṭanpui a ni.
10. Tute’n nge a bîk takin kan ngaihsakna mamawh mai thei?
10 Tute’n nge a bîk takin kan ngaihsakna mamawh mai thei? Kan vai hian a bîk taka ngaihsakna mamawh châng kan nei ngei mai. Chuti chung pawhin, ṭhalaite emaw, baptisma chang thar unaute emaw chuan kohhran thiltihahte an tel a ngai tih an hre tûr a ni. Chu chuan kan zîngah hmun pawimawh tak an chang tih hrethiam tûrin a ṭanpui ang. Kawng lehlamah, chûng unaute kan hriatthiam lohna chuan Pathian Thuin ti tûra a fuih, mawhphurhna tam lehzual chang tûra duhna an neih chu a dang bet thei a ni.—1 Tim. 3:1.
11. (a) Engtin nge kohhran upa pakhatin tleirâwl pakhat chu a zahna tireh tûra a ṭanpui? (b) Julien-a thiltawn aṭangin zir tûr eng nge i hmuh?
11 Ngaihsakna lantîrna lo hlâwkpui tawhtu kohhran upa pakhat, Ludovic-a chuan: “Unaupa pakhat chunga ngaihsak tak zetna ka han lantîr chuan, hma a sâwn chak phah a ni,” tiin a sawi a. Tleirâwl zakzum tak Julien-a chungchângah Ludovic-a chuan heti hian a sawi bawk a ni: “Julien-a chu a chêt khawr ṭhin avângin, a awm dân chu a pângngai lo thei hle a. Mahse, mi ngilnei tak a niin, kohhrana mi dangte ṭanpui a duh tak zet tih ka hmu thiam a ni. Chuvângin, sawisêl tum aiin, a mize ṭhate ngaihtuahin fuih ka tum ta zâwk a ni,” tiin. A hnuah Julien-a chu kohhranho rawngbâwltu ni tûrin a tling ta a, regular pioneer a thawk mêk a ni.
AN NIH THEIH CHIN TUR THLENG TURIN ṬANPUI RAWH
12. Mi tuemaw a nih theih chin thleng tûra ṭanpui tûrin eng mize hlu tak nge neih ngai? Entîrna pe rawh.
12 Mi dangte nih theih chin thleng tûra ṭanpui tûr chuan thil hre thiam tak kan nih a ngai a. Julien-a thiltawnin a târ lan angin, mize ṭha leh thiamna miin a neih chhoh tûrte hre tûr chuan a tlin lohna laite chu kan en khûm a ngai a. Chu chu Isua’n tirhkoh Petera a thlîr dân nên a inang a ni. Patera chuan innghahna tlâk lo tak anga lan châng nei mah se, Isua chuan lung nghet tak ang a la nih tûr thu a sawi lâwk a, Petera tih awmzia chu lungpui tihna a ni.—Joh 1:42.
13, 14. (a) Engtin nge Barnaba’n tleirâwl Marka chungah hriat thiamna a lantîr? (b) Engtin nge unaupa tleirâwl pakhat chuan Marka dawn ang ṭanpuina a dawn chu a hlâwkpui? (A thupui chunga milem en rawh.)
13 Barnaba pawhin Johana, a Rom hming Marka an tiha chungah chutiang bawka hriatthiamna chu a lantîr a ni. (Tirh. 12:25) Paula chuan Barnaba nêna missionary an zin ṭum khatnaah, Marka chu “rawng bâwl” tûrin an hruai ve a. Mahse, Pamphulia ram an thlen chuan, Marka chuan an mamawh lai takin a ṭhiante chu a kîrsan ta thut mai a. A tel lovin hmâr lam, suamhmangte awmna hmun nia hriat lâr tak hmun chu an paltlang a ngai ta a ni. (Tirh. 13:5, 13) Mahse, Marka mize nghet lo tak chu en khûmin, zirtîr zawm theihna hun remchâng a zawng a ni ngei ang. (Tirh. 15:37-39) Chu chuan Marka chu Jehova rawngbâwltu puitling tak ni tûrin a ṭanpui a ni. Ngaihvenawm takin, Rom khuaa Paula tân ina a awm lai khân Marka chu a bulah awmin, Kolossa kohhrana Kristiante chibai bûkna lehkha a thawn pui a, Paula chuan a fak hle nghe nghe a ni. (Kol. 4:10) Paula’n Marka ṭanpuina a dîl laia Barnaba lâwm dân tûr chu han ngaihtuah teh.—2 Tim. 4:11.
14 Upaa ruat thar Alexandria-a chuan unaupa pakhatin amah a hriat thiamna a hlâwkpui dân chu heti hian a sawi leh a ni: “Ka la naupan deuh lai chuan, mipui hmaa ṭawngṭai chu harsa ka ti hle ṭhîn. Upa pakhat chuan ka inbuatsaih theih dân leh rilru hahdam zâwka ka awm theih dân chu min hrilh a. Ṭawngṭai tûra min koh tâwpsan mai lovin, thlawh hma rawngbâwlna atâna inkhâwmna neihah ṭawngṭai theihna hun remchâng min pe zâwk ṭhîn a. A hnuah chuan inrin tâwkna ka nei lehzual a ni,” tiin.
15. Engtin nge Paula chuan a unaute a ngaihhlutzia chu a sawi chhuah?
15 Kristian dangte mize ṭha kan hmuh hunah, kan ngaihhlutzia kan sawi chhuak em? Paula chuan Rom bung 16-ah an mize ṭhate avânga a hlut Kristian unau 20 aia tamte chu a ziak chhuak a. (Rom 16:3-7, 13) Entîr nân, ani chuan Andronika leh Junia te chuan amah aia Krista rawng an bâwl rei tawh zâwk avâng leh an chhelna avângin a fak a ni. Paula pawhin Rufa nu chu a fak hle a, chu chu amah hmangaih taka a lo enkawl ṭhin vâng a ni ngei ang.
16. Naupangte kan fakna chuan eng rah nge a chhuah theih?
16 Tih tak zeta mite kan fakna chuan rah ṭha a chhuah thei a. France rama awm mipa naupang Rico-a, a rinna ṭâwmpui lotu a pa’n baptisma chan a phal loh avânga lunghnual chungchâng hi han ngaihtuah teh. Rico chuan Jehova rawngbâwl tûr chuan kum a tlin phawt a ṭûl niin a ngai a. School-ah nuihsawhna a tawh avângin a lungngai bawk a ni. Chu naupang Bible zirpui tûra tih kohhran upa Frédéric-a chuan heti hian a sawi a ni: “Chutiang dodâlnate chuan a rinna sawi chhuak tûr khawpin a huaisen tih a târ lan avângin Rico chu ka fak a ni,” tiin. Chûng fakna thute chuan Rico-a chu entawn tlâk taka awm reng tûrin a tichak a, a pa hnaih lehzual tûrin a ṭanpui a. Tichuan, kum 12 mi niin baptisma a chang ta a ni.
17. (a) Kan unaute chu hmasâwn zêl tûrin engtin nge kan ṭanpui theih ang? (b) Missionary pakhat chuan unaupa tleirâwlte chu engtin nge ngaihsakna a lantîr a, chu chuan eng rah nge a chhuah?
17 Ṭha taka chanvo an tih vâng emaw, fak tlâk taka an thawhrim vâng emawa kan Kristian unaute chunga lâwmna kan târ lan apiang hian anni chu Jehova rawng tam lehzuala bâwl tûrin kan tiphûr a ni. France ram Bethel-a kum tam tak rawng lo bâwl tawh Sylvie-ia chuan unaunute pawhin unaupate an fak theih thu a sawi. Unaunute chuan unaupate hmuh hmaihte chu an hmu fo ṭhîn a. Ani chuan: “Mite fak hi ka tih ngei tûr angah ka ngai a ni,” tiin a sawi belh. (Thuf. 3:27) French ram Guiana hmuna awm missionary pakhat Jérôme-a chuan tlangvâl tam takte chu missionary ni thei tûrin a ṭanpui a ni. Ani chuan: “Unaupa tleirâwlte chu an thu hrilh rawngbâwlna, a nih loh leh chhânna ṭha tak an pêk avânga ka fak hian inrintâwkna an nei lehzual ṭhîn tih ka hmu a. Chu mi avâng chuan theihna nasa lehzual an nei chho a ni,” tiin a sawi.
18. Engvângin nge unaupa tleirâwlte thawhpui chu a hlâwk?
18 Kan Kristian unaute chu anmahni thawhpuina hmangin thlarau lama hmasâwnna nei tûrin kan chawk phûr thei a. Upa pakhat chuan unaupa tleirâwl computer hmang thiam tak pakhat chu jw.org aṭanga thil ṭhenkhat print chhuak tûrin a ti pawh a ni thei a, chu chu computer nei lo tarte tân a ṭangkai hle thei a ni. Kingdom Hall-a hna i thawh hunah engvângin nge unaupa tleirâwl chu thawhpui tûr chea i sâwm loh vang? Chutianga hma i lâkna chuan tleirâwlte chu belh chian leh fak theihna hun ṭha a siamsak ang che a, a rah chhuah i hmu thei bawk ang.—Thuf. 15:23.
HMA LAM HUN ATAN INRUAHMAN RAWH
19, 20. Engvângin nge mi dangte chu hmasâwn tûrin kan ṭanpui ang?
19 Jehova’n Israel mite hruai tûra Josua a ruat khân, Mosia chu Josua “fuih” leh “tichak” tûrin thu a pe a ni. (Deuteronomy 3:28 chhiar rawh.) Khawvêl pum huap kohhranah hian mite an rawn lût tam tawlh tawlh a. Upate chauh ni lo, thiltawn ngah unau zawng zawngte chuan unaupa tleirâwlte leh mi tharte chu an nih theih chin thleng tûrin an ṭanpui thei a ni. Chutiang chuan mi tam zâwkte chu hunbi kima rawngbâwlin, “mi dangte zirtîr” tûrin an tling dâwn a ni.—2 Tim. 2:2.
20 Kohhran din ngheh tawh takah kan awm emaw, kohhran anga din theih tûr khawpa hmasâwn mêk group-têah kan awm emaw pawh ni se, hma lam hun tûr atân i inruahman ang u. Chu mi tih theih dân ber chu a chhiahhlawhte ṭhatna lai en rengtu Jehova entawn hi a ni. (w14-E 06/15)
a Hming thlâk a ni.