Pathian rorêlna hnuaiah chuan, thil siam zawng zawng chu an inpumkhatin, an inrem

Engvângin Nge Pathian Ram Kan Mamawh?

Mihring nupa tuak hmasa ber siam an nih khân, Jehova tih hming pu, min Siamtu chu Rorêltu awm chhun a ni a. Ani chuan hmangaihna nei takin ro a rêl a. Mihringte chênna atân in mawi tak Eden huan a siam a. Ei tûr hnianghnâr takte pawh a pe a ni. Chu bâkah, hna awmze nei tak thawh tûr pawh a pe bawk. (Genesis 1:28, 29; 2:8, 15) Mihringte chuan Pathian rorêlna duhawm tak hnuaia an intukluh chhûng chu remna an chên ang.

Adama’n Evi pêk ei phal loh theirah a keng. — Mihring hmasa berte chuan Pathian chu an Rorêltu atân an hnâwl

A hnua Diabol Setana tia koh vântirhkoh hel pakhat chuan Pathianin rorêl tûra dikna a neih chu a cho tih Bible-in min hrilh a. Ani chuan mihringte chu Pathian kaihhruaina leh rorêlna tel lovin an hlim zâwk ang tih a sihhmuh a ni. Lungchhiatthlâk takin, kan nu leh pa hmasa ber, Adama leh Evi chuan Setana thusawi chu âwihin Pathian lakah an hel ta a.—Genesis 3:1-6; Thu Puan 12:9.

Adama leh Evi’n Pathian chu an Rorêltu atâna an hnâwl avângin, an chênna in Paradis leh hrisêlna ṭha famkima chatuana nun theihna chu an chân ta a. (Genesis 3:17-19) An thu tlûkna siam chuan a hnua an thlahte chungah pawh nghawng a nei a ni. Bible chuan Adama thil tihsual avângin, “sual khawvêlah a lût a, sual avângin thihna a lût bawk,” tiin a sawi. (Rom 5:12) Sual chuan sawhkhâwk râpthlâk tak dang pawh a thlen a ni: “Mi, mi dang chungah pawi khawpin a intilal ṭhîn.” (Thuhriltu 8:9) Thu danga sawi chuan, mihringte’n mahnia ro an inrêlna hian buaina tam tak a thlen a ni.

MIHRINGTE RORELNA A INṬAN

Nimroda chu mi chapo tak angin a ding. A hnung lamah, mite chuan in an sa. — Nimroda chu Jehova lakah a hel

Bible-a chhinchhiah mihringte zînga rorêltu hmasa ber chu Nimroda a ni a. Ani chu Jehova rorêlna lakah a hel a ni. Nimroda hun aṭang tawhin, mihring thuneitute chuan an thuneihna chu dik lo takin an hmang a. Kum 3,000 vêl kalta khân, Lal Solomona chuan: “Hnehchhiaha awmte mittui te chu, thlamuantu an nei lo ve; anmahni hnehchhiahtute chuan thiltihtheihna an nei a,” tiin a ziak a ni.—Thuhriltu 4:1.

Tûn laiah pawh mihringte rorêl dân chu a la danglam chuang lo. Kum 2009-a tihchhuah United Nations thuziak pakhat chuan rorêlna ṭha lo chu “khawvêla suahsualna a thlen chhan ber zînga pakhat” a ni tih a sawi.

HMALAK HUN!

Khawvêl hian rorêltu ṭha zâwk leh sawrkâr ṭha zâwk a mamawh a. Chu tak chu min Siamtu thutiam a ni!

Milem: Mihring sawrkârna avânga thilthlengte. 1. Asia rama hmeichhe pakhat chu kawng ṭawp takah ṭhuin a fa ṭap lai a pawm. 2. Damdawi ina mu, dam lo kum upa tak. 3. Sipaite chuan indona hmunah an silai an kâp. 4. Kawng zawh thinrim takte chu puan zar kengin a au. 5. Nu pakhat leh a fanu chu an in hmaah an ding a, in hma lam kawngkâr dârthlalang keh an hmu. 6. Mei hruite leh meikhu chhuahna sâng takte awmna meikhu-a khat khawpui. — Mihring sawrkâr ṭha ber berte pawhin mihringte buaina khirh tak takte chu an chingfel thei lo

Pathian chuan mihringte rorêlna zawng zawng thlâktu tûr Ram, a nih loh leh sawrkâr pakhat a din a, chu chu “kumkhuain a ding reng ang.” (Daniela 2:44) Chu Ram chu mi maktaduai tam takin ṭawngṭaiin an dîl a ni. (Matthaia 6:9, 10) Mahse, chu sawrkâr chunga rorêltu tûr chu Pathian a ni lo. Pathianin mihring anga nung tawh mi pakhat chu Rorêltu atân a ruat zâwk a ni. A nih leh, Pathian mi ruat chu tu nge ni?