Zawhna Bâwm

◼ Bible zirpui hmasâwn tak chu engtia rei nge kan zirpui ang?

Bible zirpui hmasâwn tak chu lehkhabu pahnih—Bible Zirtîrna Dik Tak Chu Eng Nge Ni? tih leh “Keep Yourselves in God’s Love” —te a zawh thlenga zirpui chu a ṭha ber a. Zirlaiin a bu hniha a zîr zawh hmaa baptisma a chan pawhin, a zawh thlenga zirpui zawm tûr a ni a. Baptisma a chan hnuah pawh a hun te, tlawhkîr te, leh Bible zirna te chu report zawm tûr a ni. Thuchhuahtu dang kan hruai a, zirna a rawn ṭawiâwm chuan a dârkâr chu a chhiar ve thei a ni.—March 2009 Kan Lalram Rawngbâwlna, (English) phêk 2-na chu en rawh.

Mi tharte tân zirna kan tihtâwp hmaa thutaka lungphûm nghet tak neih chu a pawimawh hle. An tawh ngei tûr fiahna laka ding nghet thei tûr chuan, Kristaa “zung kai” leh ‘rinnaa nghet taka’ an awm chu a ngai a ni. (Kol. 2:6, 7; 2 Tim. 3:12; 1 Pet. 5:8, 9) Chu bâkah, mi dangte hlawhtling taka zirtîr tûr chuan ‘thutak hriatna’ dik tak an neih a ngai bawk. (1 Tim. 2:4) Lehkhabu pahnih kan zirpui zawh chuan, anni chu “nunnaa kalna kawngka” zîmah nghet taka kal tûrin kan ṭanpui a ni ang.—Mt. 7:14.

Upate chuan mi tuemaw chu baptisma chang tûra an pawm hmain, Bible zirtîrna thu bulte a hriat fiah leh fiah loh, leh chûngte mila a nun leh nun loh an fiah tûr a ni a. Upate chu lehkhabu pakhatna pawh la zir zo lote chungchâng an ngaihtuah hunah an fîmkhur lehzual tûr a ni. Tuemaw chu baptisma chang tûra a la tling hrih lo a nih chuan, upate chuan nakina a chan theih nân a mamawh ṭanpuina chu an pe ngei tûr a ni.—‘Kal Ula, Zirtîr Siamin, Baptis Rawh U,’ tih lehkhabu tê, phêk 57-60 chu en rawh.

[Phêk 2-naa thu lâk chhuah]

Mi tharte tân thutaka lungphûm ngheh tak neih chu a pawimawh hle