‘Pathian Duhzâwng Tih Ni Rawh Se’
1. Kum 2012 rawngbâwl kum atâna special inkhâwmpui thupui tûr chu eng nge ni a, engvângin nge chu thu kan ngaihtuah chu thil inâwm tak a nih?
1 Jehova duhzâwng a nih avânga siam kan ni a. (Thup. 4:10, 11) Chuvângin, Pathian duhzâwng kan zir a, kan tih loh chuan kan nun chhan tihhlawhtlin theih a ni lo vang. “Tisa leh rilru duhzâwng” leh “Jentailte duhzâwng” tih kan duh ṭhinna chu kan do reng a ngaih avângin, chu chu thil awlsam a ni lo. (Eph. 2:3; 1 Pet. 4:3; 2 Pet. 2:10) Pathian ṭanpuina tel lo chuan, “Diabola thanga âwk, a duh zâwng a tihtîr ṭhinte” kan nih mai pawh a hlauhawm thei a ni. (2 Tim. 2:26, C.L. Re-edited.) Kum 2012 rawngbâwl kum atâna special inkhâwmpui thusawi tûrte chuan Lal ṭawngṭainaa a hmasa lam pathumna, ‘I duhzâwng tih ni rawh se’ tih nêna inmila thil ti tûrin min ṭanpui ṭheuh ang.—Mt. 6:9, 10.
2. Inkhâwmpui thusawiah eng zawhnate nge chhân a nih ang?
2 Heng Zawhnate Hi Chhân A Ni Ang: Inkhâwmpui thusawi i ngaihthlâk laiin hêng zawhna: Pathian Thu ngaihthlâk ang tluka pawimawh dang eng nge awm? Engtin nge Pathianin ti tûra min duhte chu kan hriat theih ang? Engvângin nge mi zawng zawng ṭanpui tûra kan inhuam a ngaih? Engtin nge nun hlawhtling leh lungâwithlâk tak kan neih theih? Ṭhalaite u, Jehova hnênah eng nge in lantîr ngai? Pathian duhzâwng tihna aṭangin eng hlâwkna nge lo awm? Engvângin nge mi dangte kan tihchak leh kan fuih chu a hmanhmawh thlâk? tih chhânate hi hriat lo tum ang che.
3. Engtin nge special inkhâwmpui thusawite chu kan hlâwkpui lehzual theih ang?
3 Inkhâwmpuia tel ngei tûr leh thusawite ngun taka ngaithla tûrin inbuatsaih rawh. Bethel aiawhtu emaw, bial kantu emaw chu khuallian thusawitu a ni thei ang. Nupui nei a nih chuan inkhâwmpui ṭan hma leh bân hnuah te an nupain kâwm hlim ṭhîn ang che u. “Ngaithla a, theihnghilh leh mai ṭhîntu” in nih loh nân ina in hâwn hunah in thu ngaihthlâkte chu chhûngkuain ennawn leh ula, Pathian duhzâwng mila hna in thawh lehzual theih dân sawiho ang che u.—Jak. 1:25.
4. Engvângin nge Pathian duhzawng dah pawimawh ber chu thil pawimawh tak a nih?
4 Kan hma lawkah hian mahni duhzâwng ûmtute leh Jehova duhzâwng tih hnâwltute chu tihboral an ni dâwn a. (1Joh. 2:17) Chuvângin, Pathian Jehova’n a duhzâwng kan dah pawimawh ber theih nâna min ṭanpuitu tûr a hun taka he hriattîrna a buatsaih hi kan va lâwm tak êm!