Chhiartute Zawhna

Fakna hla phuahtu Davida’n Sâm 61:8-a Pathian hming “kumkhuain” a fak ang tia a ziak hi a uar lutuk emaw, thil inâwm lo a ziak emaw tihna a ni em?

Ni lo. Davida ziah chu a dikin a inâwm a ni.

Chumi châng leh chumi nêna inang châng dangte lo ngaihtuah ta ila: “Ka thutiamte ni tin ka hlen theih nân, kumkhuain i hming fakin ka zai ang.” “Aw Lalpa ka Pathian, ka thinlung zawng zawngin ka fak ang chia; i hming hi kumkhuain ka chawimawi ang.” “I hming hi kumkhaw tlaitluanin ka fak ang.”—Sâm 61:8; 86:12; 145:1, 2.

Davida chuan a uar lutuk lo va, thi lo tûrah a inngai bawk hek lo. Ani chuan mihringte an sual avângin an thi ang tia Jehova thupêk chu a hria a. Chu bâkah, Davida chuan mi sual a ni tih a inpawm bawk. (Gen. 3:3, 17-19; Sâm 51:4, 5) Abrahama te, Isaaka te, leh Jakoba-te ang mi rinawmte pawh an thi tih a hria a. Amah ngei pawh a la thi dâwn tih a inhria a ni. (Sâm 37:25; 39:4) Mahse, Sâm 61:8-a a thusawite chuan kumkhuaa—Davida dam chhûnga—Pathian fak a duhzia leh a tumzia a târ lang a ni.—2 Sam. 7:12.

Sâm 18, 51, leh 52-a kan hmuh angin Davida chuan ama tawnhriat ṭhenkhatte a ziak a. Sâm 23-ah ani chuan Jehova chu kaihhruaina, hahdamna, leh vênhimna petu berâm vêngtu angin a sawi a. Davida chu chutiang berâm vêngtu chu a ni. Ani chuan ‘a dam chhûng zawnga’ Pathian rawngbâwl a duh bawk.—Sâm 23:6.

Davida thuziakte chu Jehova’n a thâwk khum avânga ziak a ni tih hre reng bawk ang che. A thuziakah chuan a hnu daiha thleng tûr hrilh lâwknate chungchâng a tel a ni. Entîr nân, Sâm 110-ah Davida chuan a Lalpa chu ‘[Pathian] ding lama’ vâna a ṭhut hun tûr leh thiltihtheihna nasa tak a dawn hun tûr a sawi. Engti tûrin nge? Pathian hmêlmate titlâwm tûr leh leia ‘hnam tin zînga rorêl’ tûrin a ni. Davida chu vân aṭanga rorêl tûr leh “chatuan puithiam” ni tûr Messia thlahtu a ni a. (Sâm 110:1-6) Isua’n Sâm 110-a hrilh lâwkna chu a chungchâng a nih thu leh hma lam hunah thlen famkimna a neih tûr thu a nemnghet a ni.—Mt. 22:41-45.

Ni e, Davida chu a hun lai leh kaihthawh a nih huna chatuana Jehova a fak theih hun tûr chungchâng ziak tûra thâwk khum a ni a. Chu chuan Sâm 37:10, 11, 29 hi hmân lai Israel rama dinhmunte leh Pathianin a thutiamte a thlen famkimtîr huna khawvêl puma lo thleng tûr dinhmunte sawina anga hre thiam tûrin min ṭanpui a ni.—He magazine-a “Ka Hnênah Paradis-ah I Awm Ve Ang,” tih thuziaka paragraph 8-na en rawh.

Sâm 61:8 leh chumi nêna inang châng dangte chuan, Davida’n a thih thlengin Jehova chawimawi a duh tih a târ lang a. Chu bâkah, chu chuan Jehova’n a kaihthawh leh huna Davida thiltih theih tûr chu inâwm takin a târ lang bawk a ni.