Apah Kabhâr Beccèʼ Rèya Pajhâd dâri Gustè Allah?

1. Sapah sè ngarang Kètab Soccè?

Kabhâr beccèʼân Kètab Soccè ngocaʼ jhâʼ rèng-orèng bâkal odiʼ neng bhumè salanjhângnga. (Jabur 37:29) Bâdâ 66 buku dâlâm Kètab Soccè. Gustè Allah aghunaʼaghi 40 lalakèʼ kaangghuy nolès. Lèmaʼ buku partama ètolès biʼ Musa ra-kèra 3.500 taon bân buku dhi–budhina ètolès biʼ rasul Yahya lebbhi dâri 1.900 taon sè lambâʼ. Pèkkèran sapah sè ètolès? Pèkkèran Gustè Allah. Carana Gustè Allah adhâbu ka panolès Kètab Soccè lèbât roh kudussâ. (2 Samuel 23:2) Rèng-orèng jârèya nolès pèkkèran Gustè Allah bânnè pèkkèranna dhibiʼ. Dâddhi, sè ngarang Kètab Soccè jârèya Allah Yèhuwa.—Bâca 2 Timotiyus 3:16; 2 Petrus 1:20, 21.

Tèngghu video Pasèra sè Ngarang Kètab Soccè?

2. Dâʼremmah kaulâ bisa yakin jhâʼ Kètab Soccè taʼ toman èobâ?

aulâ bisa yakin jhâʼ Kètab Soccè asalla dâri Gustè Allah polana aramallaghi masa depan kalabân bendhâr bân teppaʼ. Tadâʼ manossa sè bisa ngalakonèna. (Yosua 23:14) Ghun Allah Yèhuwa sè Maha Kobâsa sè tao masa depan manossa kalabân teppaʼ.​—Bâca Yesaya 42:9; 46:10.

Buku dâri Gustè Allah laèn dâri sè laènna. Milyaran Kètab Soccè la èghâbây dâlâm bânnyaʼ bâsa bân bâdâ è man-dimman. Maskè la konah, Kètab Soccè cocok kalabân èlmo pangataowan. Kètab Soccè ètolès biʼ 40 panolès sè bhidhâ tapè èssènna cocok sèttong biʼ laènna.a Kètab Soccè jhughân nolès tentang bellâs asèh, sifaddhâ Gustè Allah sè Maha Kobasâ sè bisa aghâbây odiʼ manossa lebbhi beccèʼ. Sè otama, Gustè Allah sè Maha Kobâsa taʼ ngèdhinè Kètab Soccè èobâ. Bhuktè-bhuktè rèya mayakinaghi bânnyaʼ orèng jhâʼ Kètab Soccè dhâbuna Gustè Allah.​—Bâca Yesaya 40:8; 1 Tesalonika 2:13.

Tèngghu video Arapah Kaulâ Sadhâjâ Yakin Jhâʼ Èssèna Kètab Soccè Bendhâr?

3. Apah èssèna Kètab Soccè?

Èssèna Kètab Soccè kabhâr beccèʼ dâri Gustè Allah. Gustè Allah nyadiaʼaghi masa depan sè beccèʼ ghâbây manossa. Kètab Soccè ajèllassaghi kasempaddhân manossa kaangghuy odiʼ neng Firdaus polè, sè la èlang è jhâman Adam bân Hawa.​—Bâca Wahyu 21:4, 5.

Dhâbuna Gustè Allah jhughân aèssè hokom, tontonan, bân nasèhat. Kètab Soccè jhughân aberriʼ onèng fad-sifaddhâ Gustè Allah sè kaulâ bisa onèng dâri carana Gustè Allah mardhuliaghi manossa. Dâddhi, Kètab Soccè abhânto Sampèyan ngennal Gustè Allah bân ajellassaghi carana semmaʼ ka Allah Yèhuwa.​—Bâca Jabur 19:8, 12; Yakobus 2:23; 4:8.

4. Dâʼremmah carana Sampèyan ngartè èssè Kètab Soccè?

Buku rèya aghunaʼaghi carana Nabi Isa ngajhâri kaangghuy abhânto Sampèyan ngartè èssèna Kètab Soccè. Nabi Isa aghunaʼaghi ayat Kètab Soccè kaangghuy ngajhâr Sampèyan bân ajellassaghi ”maksoddhâ Kètab Soccè”.​—Bâca Lukas 24:27, 45.

Kabhâr beccèʼ dâri Gustè Allah lebbhi lèbur dâri sè laènna. Namong, bânnyaʼ orèng sè taʼ pardhuli, la-mala bânnyaʼ sè peggel bâkto ngèdingaghi. Jhâʼ roʼ-noroʼ. Sampèyan bisa andiʼ arâbbhân odiʼ salanjhângnga mon kennal Gustè Allah.​—Bâca Yahya 17:3.