Apah sè Bâkal Èalamè Aghâma è Budhi Arè?

1. Apah kabbhi aghâma ngajhâri sè bendhâr?

Bâdâ rèng-orèng sè tolos neng kabbhi aghâma. Kabhâr beccèʼân, Allah Yèhuwa ngoladhi bân mardhuliaghi rèng-orèng jârèya. Tapè cèʼ èmanna, kadhâng aghâma dâddhi alasân kaangghuy ngalakonè kajahaddhân. (2 Korintus 4:3, 4; 11:13-15) Bâdâ aghâma sè roʼ-noroʼ tèroris, matèʼè bânnyaʼ orèng, perrang, bân nganèyajâ naʼ-kanaʼ. Parkara rèya pastè masossa atèna rèng-orèng sè parcajâ ka Allah Yèhuwa!​—Bâca Matiyus 24:3-5, 11, 12.

Aghâma sè bendhâr moljhâaghi Allah Yèhuwa. Tapè, aghâma sè palsu aghâbây Allah Yèhuwa taʼ kasokan. Aghâma sè palsu taʼ ngajhâri pangajhârân Kètab Soccè, contona pangajhârân tentang Gustè Allah bân kabâdâân orèng matè. Allah Yèhuwa terro rèng-orèng ajhâr apah sè bendhâr tentang abâʼNa dâri Kètab Soccè.​—Bâca Yehezkiel 18:4; 1 Timotiyus 2:3-5.

2. Apah sè bâkal èalamè aghâma è budhi arè?

Allah Yèhuwa taʼ bisa ètèpo biʼ aghâma sè ngako narèsnaè abâʼNa. Namong, sabendhârrâ narèsnaè dunnya sè èkobâsanè Setan. (Yakobus 4:4) Neng Kètab Soccè aghâma palsu èsebbhut ”Babilon Rajâ”. Babilon yâ-arèya kottha neng jhâman lambâʼ sè dâddhi asalla aghâma palsu saellanna banjhir rajâ jhâman Nuh. Sakejjâʼaghi, Allah Yèhuwa bâkal mamosnah aghâma sè nèpo bân nyèksa manossa.​—Bâca Wahyu 17:1, 2, 5, 16, 17; 18:8.

Tapè, ghiʼ bâdâ kabhâr beccèʼ laènna. Allah Yèhuwa taʼ kaloppaè ka rèng-orèng sè tolos atèna bân ghiʼ noroʼ aghâma palsu è sakobhângnga dunnya. Allah Yèhuwa narèʼ rèng-orèng jârèya sopajâ kaloar dâri aghâma palsu kaangghuy ajhâr Kètab Soccè.​—Bâca Mikha 4:2, 5.

3. Apah sè kodhu èlakonè rèng-orèng sè tolos atè?

Allah Yèhuwa pardhuli ka rèng-orèng sè narèsnaè apah sè beccèʼ bân sè bendhâr. Allah Yèhuwa jhughân nyoro rèng-orèng jârèya kaloar dâri aghâma palsu. Rèng-orèng sè narèsnaè Allah Yèhuwa kodhu ikhlas kaangghuy nyennângaghi Gustè Allah kalabân kaloar dâri aghâma palsu.​—Bâca Wahyu 18:4.

Neng jhâman sul-rasulla Nabi Isa, rèng-orèng sè tolos atè sennâng ngèdingaghi kabhâr beccèʼ dâri sul-rasulla Nabi Isa. Rèng-orèng jârèya ajhâr carana odiʼ sasuai kasokanna Allah Yèhuwa. Rèya jhâlân odiʼ sè mabhunga atè, sè aberriʼ tojjhuwân bân pangarâbbhân. Kaulâ kodhu nèro rèng-orèng jârèya polana ngèdingaghi bân ngotamaʼaghi Allah Yèhuwa dâlâm odiʼ rè-saarèna.​—Bâca 1 Tesalonika 1:8, 9; 2:13.

Allah Yèhuwa narèma rèng-orèng sè kaloar dâri aghâma palsu, bân ngonjhâng rèng-orèng kaangghuy akompol kalabân ommaddhâ. Mon Bâʼna narèma onjhângngânNa, Bâʼna bâkal dâddhi sahabaddhâ, dâddhi ommaddhâ, bân ollè odiʼ salanjhângnga neng Firdaus.​—Bâca Markus 10:29, 30; 2 Korintus 6:17, 18.

4. Arapah kabbhi orèng sè odiʼ neng bhumè bisa anga-bhunga?

Aghâma palsu bâkal èpamosnaʼah. Tantona, rèya kabhâr beccèʼ sè mabhunga atè. Tadâʼ polè aghâma palsu, sè co-ngoco bân mamèsa ommat manossa. Sakabbhina orèng bâkal èpasèttongnga dâlâm ibâdâ ka Allah sè bendhâr yâ-arèya Allah Yèhuwa. ​—Bâca Wahyu 18:20, 21; 21:3, 4.