Qe tbʼanel noticia kubʼ ttzʼibʼin Mateo
1 Atzun lista lu kyiʼj tfamiliar Qajaw Jesucristo,* aju tzajni kyiʼj toj tja David. Atzunte David tzajni kyiʼj toj tja Abrahán.
ok Isaac te tman Jacob;
ok Jacob te tman Judá ex qe terman;
3 ok Judá te tman Pérez ex Zérah ex aju tbʼi kytxuʼ Tamar;
ok Pérez te tman Hezrón;
ok Hezrón te tman Ram;
4 ok Ram te tman Aminadab;
ok Aminadab te tman Nahsón;
ok Nahsón te tman Salmón;
5 ok Salmón te tman Boaz ex aju tbʼi ttxuʼ Rahab;
ok Boaz te tman Obed ex aju tbʼi ttxuʼ Rut;
atzunte Obed ok te tman Jesé;
6 ex ok Jesé te tman rey David.
Ok David te tman Salomón ex atzun ttxuʼ a t-xuʼjil Urías;
7 ok Salomón te tman Rehoboam;
ok Rehoboam te tman Abías;
ok Abías te tman Asá;
8 ok Asá te tman Jehosafat;
ok Jehosafat te tman Jehoram;
ok Jehoram te tman Uzías;
9 ok Uzías te tman Jotán;
ok Jotán te tman Acaz;
ok Acaz te tman Ezequías;
10 ok Ezequías te tman Manasés;
ok Manasés te tman Amón;
ok Amón te tman Josías;
11 ok Josías te tman Jeconías ex qe terman toj ambʼil tej kyxi qʼiʼn judiy toj tnam Babilonia.
12 Tej kyten toj Babilonia, ok Jeconías te tman Sealtiel;
ok Sealtiel te tman Zorobabel;
13 ok Zorobabel te tman Abiud;
ok Abiud te tman Eliaquim;
ok Eliaquim te tman Azor;
14 ok Azor te tman Sadoc;
ok Sadoc te tman Aquim;
ok Aquim te tman Eliud;
15 ok Eliud te tman Eleazar;
ok Eleazar te tman Mattán;
ok Mattán te tman Jacob;
16 atzunte Jacob ok te tman José aju tchmil María. Ex ok María te ttxuʼ Jesús, aju ok qʼoʼn tbʼi te Cristo.
17 Atzun kykyaqil mambʼaj lu e ten: 14 kybʼet atxix toj tqʼijlalil Abrahán tuʼn tpon toj tqʼijlalil David, e ten juntl 14 toj tqʼijlalil David tuʼn tpon toj ambʼil tej kyxi qʼiʼn judiy toj Babilonia ex e ten juntl 14 tej kyten toj Babilonia tuʼn tpon bʼaj toj tqʼijlalil Cristo.
18 Atzun jlu bʼaj tej naʼmxtoq tul itzʼj Jesucristo. Otoq kyaj bʼant tiʼj tyol José tuʼn tkubʼ mojeʼ tukʼil María. Pero tej naʼmxtoq kyanqʼin junx, ok ten tal María tuʼn espíritu santo.* 19 Tuʼn jlu, kubʼ t-ximen José toj ewaj tuʼn ya miʼn tkubʼ mojeʼ* tukʼil. Pero tajtoq tuʼn t-xi tbʼinchaʼn aju bʼaʼn ex nyatoq taj tuʼn tkubʼ tchʼixwi María kywitz txqantl. 20 Pero tej otoq ximen tiʼj jlu, de repente kubʼ tyekʼin tibʼ t-anjel Jehová* twitz toj jun witzikʼ ex xi tqʼamaʼn jlu te: «Aya José tkʼwal David, miʼn xobʼa tuʼn t-xi tiʼna María tjaya ex tuʼn tok te t-xuʼjila tuʼnju ma tzʼok ten tal tuʼn espíritu santo. 21 Tzul itzʼj jun tal ex kʼokel tqʼoʼna tbʼi te Jesús,* porke a kkolil tiʼj ttnam kyiʼj il o che bʼant tuʼn». 22 Bʼaj tkyaqil jlu tuʼntzun tjapun kywi yol kyaj tqʼamaʼn Jehová. Toj ambʼil ojtxe ajbʼen jun tprofeta tuʼn tuʼn ttzaj tqʼamaʼn jlu: 23 «Kʼokel ten tal jun txin naʼmx tkubʼ ten tukʼil jun xinaq* ex aj tul itzʼj kʼokel qʼoʼn tbʼi kyuʼn xjal te Emmanuel», a tzʼelpuna «at Dios qukʼil».
24 Tej tel twatl José, xi tbʼinchaʼn aju xi tqʼamaʼn t-anjel Jehová* te ex xi tiʼn María tja tuʼn tok te t-xuʼjil. 25 Pero mintiʼ kubʼ ten tukʼil tzmaxi tej tul itzʼj tal. Ex ok tqʼoʼn José tbʼi te Jesús.