Qe tbʼanel noticia kubʼ ttzʼibʼin Mateo

18 Tej tbʼaj jlu, e pon laqʼeʼ tdiscípulo Jesús tukʼil ex xi kyqanin te: «¿Alkye mas nim toklen toj Gobierno in tzaj toj kyaʼj?». 2 Tuʼntzunju, tzaj ttxkoʼn Jesús jun tal kʼwal ex kubʼ tqʼoʼn kyxol. 3 Ex xi tqʼamaʼn jlu kye: «Ax tok kxel nqʼamaʼne kyeye, mlayx che okxe toj Gobierno in tzaj toj kyaʼj qa mintiʼ ma che oke ik tzeʼn qe tal kʼwal. 4 Tuʼntzunju, alkye ma kubʼ tin tibʼ ik tzeʼn tal kʼwal lu, ktel nim toklen toj Gobierno in tzaj toj kyaʼj. 5 Ex alkye ma tzʼokx tkʼamoʼn jun tal kʼwal ik tzeʼn jlu toj nbʼiye, ax ikx in chin okx kʼamoʼne tuʼn. 6 Pero alkye ma kubʼ tqʼoʼn jun tolsabʼil* kywitz qeju in nok qeʼ kykʼuʼj wiʼje aʼyeju in che ok ik tzeʼn qe tal kʼwal, maslo bʼaʼn tuʼn tok kʼaloʼn jun nintz abʼj* tiʼj tqul ex tuʼn tkux xoʼn toj mar.

7 ¡Lasmi kywitz xjal in kubʼ kyqʼoʼn tolsabʼil toj kybʼe txqantl! Ikju, ok che tel xjal kbʼel kyqʼoʼn tolsabʼil kywitz txqantl, pero lasmi kywitz qeju ma bʼant jlu kyuʼn. 8 Tuʼntzunju, qa in kubʼ tzʼaqa toj il tuʼn tpaj tqʼabʼa moqa tuʼn tpaj tqana, txʼemila ex xoʼmixa najchaq. Mas bʼaʼn tuʼn tkambʼet chwinqlal tuʼna mintiʼ jun tqʼabʼa moqa jun tqana, twitzju tuʼn tkubʼ najsaʼna te jumajx tuʼn qʼaqʼ tukʼil kykabʼil tqʼabʼa ex tqana. 9 Ax ikx qa in kubʼ tzʼaqa toj il tuʼn tpaj jun tbʼaqʼ twitza, qʼimetza ex xoʼmixa najchaq. Mas bʼaʼn tuʼn tkambʼet chwinqlal tuʼna mintiʼ jun tbʼaqʼ twitza, twitzju tuʼn tkubʼ najsaʼna toj Gehena* te qʼaqʼ tukʼil kykabʼil tbʼaqʼ twitza. 10 Kyxqʼuqink kyibʼe tuʼn miʼn tel kyikʼune jun kyxol qeju in che ok ik tzeʼn qe tal kʼwal. Porke kxel nqʼamaʼne kyeye qa aʼyeju ky-anjel ateʼ toj kyaʼj kukx in nok kykeʼyin twitz* Nmane at toj kyaʼj. 11* ——

12 ¿Tiʼ kyxime tiʼj? Qa ateʼ 100 trit* jun xjal ex qa ma txi tzpet jun, ¿mlaype che kyaj tqʼoʼn 99 twi witz ex kʼokel ten jyolte aju otoq txi tzpet? 13 Ex aj tkanet tuʼn, kxel nqʼamaʼne kyeye qa mas ktzalajel tiʼj kywitz qeju 99 mintiʼ e xi tzpet. 14 Ax jlu in bʼaj tukʼil Nmane at toj kyaʼj, nya taj tuʼn t-xi tzpet jun kyxol qeju in che ok ik tzeʼn qe tal kʼwal.

15 Tuʼntzunju qa ma tzʼok tbʼinchaʼn jun termana nya bʼaʼn tiʼja, txiʼya yolil tukʼil tjunalxa ex qʼamanxa te alkye nya bʼaʼn ma bʼant tuʼn.* Qa ma txi tbʼiʼn tyola, ma kambʼet termana tuʼna. 16 Pero qa mintiʼ ma txi tbʼiʼn tyola, qʼinxa jun moqa kabʼe xjal tukʼila tuʼntzun tel tkyaqil toj qʼanchaʼl tuʼn kyyol kabʼe moqa oxe testiw. 17 Qa mintiʼ ma txi tbʼiʼn kyyol, qʼamanxa te congregación. Ex qa mintiʼ ma txi tbʼiʼn congregación, kyqʼonke ik tzeʼn jun xjal kye txqantl nasyon ex qeju in che cobrarin impuesto.

18 Ax tok kxel nqʼamaʼne kyeye, tkyaqilju kʼokel kykʼaloʼne tzalu twitz txʼotxʼ, ya otoq tzʼok kʼaloʼn toj kyaʼj. Ex tkyaqilju kʼelel kytzaqpiʼne tzalu twitz txʼotxʼ, ya otoq tzʼel tzaqpiʼn toj kyaʼj. 19 Ax ikx kxel nqʼamaʼne kyeye, qa de acuerdo ateʼ kabʼe kybʼete tzalu twitz txʼotxʼ tuʼn kynaʼn Dios tiʼj jun tiʼ nim toklen, jaku tzʼok qeʼ kykʼuʼje tiʼj qa tzul qʼoʼn kyeye tuʼn Nmane at toj kyaʼj. 20 Porke jatumel in nok kychmon kyibʼ kabʼe moqa oxe xjal toj nbʼiye, atine kyxol».

21 Pontzun laqʼeʼ Pedro tukʼil Jesús ex xi tqanin te: «Tat, qa ma tzʼok tbʼinchaʼn jun wermane nya bʼaʼn wiʼje, ¿jteʼ maj kbʼel nnajsaʼne til? ¿Oʼkxpe 7 maj?». 22 Xi ttzaqʼweʼn Jesús te: «Miʼn, nya oʼkx 7 maj, sino 77 maj.

23 Tuʼntzunju, in nok Gobierno in tzaj toj kyaʼj ik tzeʼn jun rey kubʼ t-ximen tuʼn tbʼaj tbʼinchaʼn kwent kyukʼil tmajen. 24 Tej tok ten bʼinchal kwent, pon qʼiʼn jun majen tukʼil aju 10 mil talento* tkʼas te. 25 Tuʼnju mintiʼ tpwaq majen tuʼn t-xi tchjoʼn tkʼas, xi tqʼoʼn rey orden tuʼn t-xi kʼayin junx tukʼil t-xuʼjil, qe tkʼwal ex tkyaqilju at te tuʼntzun tchjet tkʼas. 26 Tej tok tbʼiʼn majen jlu, kubʼ ẍmejeʼ twitz* rey ex xi tqʼamaʼn te: ‹Ten tpasensa wiʼje ex kxel nchjoʼne tkyaqil nkʼase teya›. 27 Tuʼntzunju tzaj qʼaqʼin tkʼuʼj rey tiʼj tmajen, xi ttzaqpiʼn ex kubʼ tnajsaʼn tkʼas. 28 Pero tej tetz tzaqpiʼn majen lu, kanet juntl majen tuʼn aju 100 denario* tkʼas te. Tzaj ttzyuʼn, ok tjatzʼoʼn tqul ex xi tqʼamaʼn te: ‹¡Chjontza tkyaqil tkʼasa weye!›. 29 Pero kubʼ ẍmejeʼ juntl majen twitz, ok ten kubʼsal ex tqʼama jlu: ‹Ten tpasensa wiʼje, kxel nchjoʼne nkʼase teya›. 30 Pero mintiʼ xi tbʼiʼn tyol. Sino xi tqʼamaʼn tuʼn tokx qʼoʼn pres tzmaxi aj tchjet tkʼas tuʼn. 31 Tej tok kybʼiʼn txqantl majen aju otoq bʼaj, tzaj nim kybʼis ex xi kyqʼamaʼn tkyaqil te rey. 32 Tuʼntzunju, tzaj txkoʼn majen tuʼn rey ex xi tqʼamaʼn te: ‹¡Aya majen nya bʼaʼn! Ma kubʼ nnajsaʼne tkʼasa tuʼnju kubʼsana nwitze. 33 ¿Tiquʼn mintiʼ ma tzaj qʼaqʼin tkʼuʼja tiʼj tukʼila ik tzeʼn weye ma tzaj qʼaqʼin nkʼuʼje tiʼja?›. 34 Tuʼn jlu, tzaj nimxix tqʼoj rey ex xi tqʼoʼn orden tuʼn tokx qʼoʼn majen toj cárcel tzmaxi aj tchjet tkyaqil tkʼas tuʼn. 35 Atzun jlu kbʼantel tuʼn Nmane at toj kyaʼj kyukʼile qa mintiʼ ma kubʼ kynajsaʼne kyil kyermane tuʼn tkyaqil kyanmiye».