Qe tbʼanel noticia kubʼ ttzʼibʼin Lucas

5 Jun maj, waʼltoq Jesús ttzi lago te Genesaret* ex ok kychmon kyibʼ nim xjal tiʼj tuʼn tok kybʼiʼn tyol Dios. 2 Ex ok tkeʼyin Jesús kabʼe bark ttzi lago. Otoq che kuʼtz xjal tzyul pescad kyoj ex in che txʼajon tiʼj kyred. 3 Entonces jax Jesús toj jun kyxol bark ex xi tqanin te Simón aju tajaw bark tuʼn tokx tlaqʼbʼaʼn chʼintl toj aʼ. Kubʼ qeʼ toj ex xi tzyet tuʼn tqʼon xnaqʼtzbʼil kye xjal. 4 Tej tbʼaj yolin Jesús xi tqʼamaʼn te Simón: «Laqʼekxa toj lago ex kyxonkuxe red toj aʼ tuʼntzun ttzyet pescad kyuʼne». 5 Pero xi ttzaqʼweʼn Simón te: «Xnaqʼtzal, ma qo aqʼunane tkyaqil qonikʼen ex mintiʼ jun pescad ma tzyet quʼne, pero noq tuʼnju ma tzaj tqʼamaʼna kbʼelex nqʼoʼne red juntl maj». 6 Tej tbʼant jlu kyuʼn, tzyet* nimxix pescad kyuʼn ex xi tzyet tuʼn tel laq kyred. 7 Tuʼntzunju xi kyyekʼin kyqʼabʼ kye kyukʼil ateʼ toj juntl bark tuʼn kypon onil kye. Noj kabʼe bark kyuʼn tukʼil nim pescad ex xi tzyet tuʼn kyxi mulqʼaj toj aʼ. 8 Tej tok tkeʼyin Simón Pedro jlu, kubʼ ẍmejeʼ twitz Jesús ex xi tqʼamaʼn te: «Tat, paʼmil tibʼa wiʼje porke jun xjal aj il qine». 9 Tqʼama Simón jlu tuʼnju jaw labʼin junx kyukʼil xjal ateʼ tukʼil tiʼj tkyaqil pescad tzyet kyuʼn. 10 Ax ikx jaw labʼin Santiago ex Juan, qe tkʼwal Zebedeo, aqeju e aqʼunan junx tukʼil Simón. Pero xi tqʼamaʼn Jesús te Simón: «Ya miʼn xobʼa. Toj qʼij jaʼlo, kjyola kyiʼj xjal ik tzeʼn in che jyet pescad tuʼna». 11 Tej tetz kyiʼn qe bark ttzi lago juntl maj, kyaj kyqʼoʼn tkyaqil ex e ok lepeʼ tiʼj Jesús.

12 Juntl maj, tej attoq Jesús toj jun tnam, pon jun xinaq* tukʼil aju otoq tzʼok noj tiʼj t-xmilal tuʼn lepra. Tej tok tkeʼyin xjal Jesús, kubʼ ẍmejeʼ twitz txʼotxʼ ex ok ten kubʼsal twitz: «Tat, ojtzqiʼn wuʼne qa jaku chin kubʼ tqʼanina* qa taja». 13 Tuʼntzunju, xi tnuqpiʼn Jesús tqʼabʼ, ok tmakoʼn ex xi tqʼamaʼn te: «Waje, ok kbʼantela». Ex jurat el lepra tiʼj xinaq. 14 Pero xi tqʼamaʼn Jesús te xinaq tuʼn miʼn txi tqʼamaʼn kye txqantl. Ex xi tqʼamatl jlu te: «Oʼkx txiʼya tukʼil pal ex qʼinxa ofrenda kyaj tqʼamaʼn Moisés tuʼntzun tok kykeʼyin qa otoq bʼanta». 15 Mas ok ojtzqiʼn Jesús kyuʼn xjal ex nim qe xjal ok kychmon kyibʼ tuʼn tok kybʼiʼn ex tuʼn kykubʼ tqʼanin. 16 Atzunte Jesús kukxtoq in xi naʼl Dios kyoj lugar najchaq ateʼ.

17 Jun kyxol qʼij lu, tej t-xi tqʼoʼn Jesús xnaqʼtzbʼil toj jun ja, e pon junjun fariseo ex junjun xnaqʼtzal tiʼj Ley ex e kubʼ qeʼ atz. Otoq che tzaj toj Galilea, toj Judea ex toj Jerusalén. Ex tzaj tqʼoʼn Jehová* tipumal tibʼaj Jesús tuʼn tkubʼ tqʼanin qe yabʼ. 18 Entonces e pon junjun xinaq tukʼil jun xjal mintiʼ in bʼant tyukch ex iqin kyuʼn twitz jun camilla. Kyajbʼiltoq tuʼn tokx kyiʼn toj ja ex tuʼn tkubʼ kyqʼoʼn twitz Jesús. 19 Pero mintiʼ kanet tumel kyuʼn tuʼn kypon tukʼil Jesús tuʼnju ateʼtoq nim xjal. Tuʼntzunju, e jax twi ja ex kux kyqʼoʼn xjal twitz camilla tuʼn tkuʼpin twitz Jesús kyxol xjal. 20 Tej tok tkeʼyin qa ok qeʼ kykʼuʼj tiʼj Dios, xi tqʼamaʼn te xinaq mintiʼ in bʼant tyukch: «Amiw, ma che kubʼ najsaʼn tila». 21 Tej tok kybʼiʼn escriba ex fariseo jlu, e ok ten ximel tiʼj ex kyqʼama: «¿Tiʼ toklen xjal lu tuʼn t-xmayin tiʼj Dios? ¿Nyapetzun oʼkx Dios jaku kubʼ tnajsaʼn qil?». 22 Pero el tnikʼ Jesús tiʼjju in che ximen tiʼj ex xi tqʼamaʼn kye: «¿Tiʼ in che ximane tiʼj toj kyanmiye? 23 ¿Tiʼ mas fácil tuʼn tbʼant? ¿Tuʼn t-xi nqʼamaʼne te xjal ‹ma che kubʼ najsaʼn tila› moqa tuʼn t-xi nqʼamaʼne te ‹weʼktza ex bʼeta›? 24 Pero tuʼn tok kykeʼyine qa at toklen Tkʼwal Xinaq tuʼn tkubʼ tnajsaʼn kyil xjal tzalu twitz txʼotxʼ...». Tuʼntzunju xi tqʼamaʼn te xjal mintiʼ in bʼant tyukch: «Kxel nqʼamaʼne teya tuʼn tjaw weʼya, qʼinxa tcamilla ex txiʼya tjaya». 25 Entonces jaw weʼ xinaq kywitz, xi tiʼn tcamilla jatumel kubʼ qʼoʼn ex jaw tnimsaʼn Dios tej tmeltzʼaj tja. 26 Tej tok kykeʼyin kykyaqil xjal jlu, e jaw labʼin ex nim e tzaj xobʼ. Xi tzyet tuʼn tjaw kynimsaʼn Dios ex kyqʼama: «¡Tbʼanel aju ma tzʼok qkeʼyine toj qʼij jaʼlo!».

27 Tej tbʼaj tkyaqil jlu, etz Jesús toj lugar aju ex ok tqʼoʼn twitz tiʼj jun xjal in cobrarin impuesto aju Leví tbʼi. Atztoq qʼuqli toj lugar jatumel in che cobrarin xjal impuesto ex xi tqʼamaʼn jlu te: «Lepeka wiʼje». 28 Entonces kyaj tqʼoʼn Leví tkyaqil, jaw weʼ ex ok lepeʼ tiʼj Jesús. 29 Yajxitl kubʼ tbʼinchaʼn Leví jun wabʼj tej tpon Jesús tja. E waʼn* nim xjal in che cobrarin impuesto junx kyukʼil ex junjuntl xjal. 30 Tuʼntzunju xi kyqanin fariseo ex qe escriba e ten kyukʼil kye tdiscípulo Jesús: «¿Tiquʼn in che waʼne ex in che kʼane junx kyukʼil xjal in che cobrarin impuesto ex qe xjal in che bʼinchan il?». 31 Tej tok tkeʼyin Jesús jlu xi tqʼamaʼn kye: «Qe xjal mintiʼ jun yabʼil kyiʼj, nya il tiʼj tuʼn kyxiʼ tukʼil jun doctor sino oʼkx qe xjal yabʼ. 32 Mintiʼ ma chin ule txkol kye xjal tzʼaqli tuʼn tajtz tiʼj kyanmi, sino aqeju in che bʼinchan il».

33 Xitzun kyqʼamaʼn te Jesús: «Kukx in che ayunarin tdiscípulo Juan ex in che kubʼsan twitz Dios, ex axju in bʼant kyuʼn fariseo. Atzun qe teya tdiscípulo in che waʼn ex in che kʼan». 34 Xi ttzaqʼweʼn Jesús kye: «Mlay bʼant tuʼn t-xi kyqʼamaʼne kye tamiw novio tuʼn tok ayuno kyuʼn qa kukx at kyukʼil. 35 Pero kpol jun qʼij kʼeletz qʼiʼn novio kyxol ex kxel tzyet tuʼn tok ayuno kyuʼn toj ambʼil lu».

36 Ax ikx xi tqʼamaʼn ejemplo lu kye: «Mintiʼ in najbʼen jun piẍ tela akʼaj tuʼn jun xjal tuʼn tok tslepin* tiʼj jun xbʼalun ttxʼaqin. Qa ma bʼant jlu tuʼn, jaku tzʼel laq xbʼalun tuʼn tela akʼaj. Ex nya bʼaʼn kjel tela akʼaj tukʼil ttxʼaqin xbʼalun. 37 Ax ikx mintiʼ in kux tqʼoʼn jun xjal akʼaj vin kyoj ttxʼaqin bols te cuero. Qa ma bʼant jlu tuʼn, jaku che el laq ttxʼaqin bols tuʼn vin akʼaj ex jaku tzʼel qojl, atzun kye ttxʼaqin bols ya mintiʼ kyajbʼen. 38 Tuʼntzunju, in kux qʼet vin akʼaj kyoj akʼaj bols te cuero. 39 Aj t-xi tkʼaʼn jun xjal ojtxe vin, ya nya taj tuʼn t-xi tkʼaʼn akʼaj vin porke in kubʼ t-ximen: ‹Mas kʼokʼj ojtxe vin›».