Qe tbʼanel noticia kubʼ ttzʼibʼin Marcos

4 Ok ten Jesús qʼol xnaqʼtzbʼil juntl maj kye xjal ttzi mar. Tuʼnju ok kychmon kyibʼ nim xjal tiʼj, jax toj jun bark, kubʼ qeʼ toj ex okx laqʼeʼ chʼin toj mar. Atzun kye xjal, ax e kyaj ten ttzi mar. 2 Entonces xi tzyet tuʼn t-xi tqʼoʼn xnaqʼtzbʼil kye kyukʼil nim ejemplo. Tej t-xi tqʼoʼn xnaqʼtzbʼil kye tqʼama jlu: 3 «Chin kybʼintze. Jun maj, xiʼ jun xjal awal. 4 Tej tzmatoq in nawan, e kubʼ tzʼaq junjun iyaj ttxlaj bʼe. Pero e ul junjun pájaro ex xi kywaʼn. 5 Atzun junjuntl iyaj, e kubʼ tzʼaq kyxol abʼj ex jurat jawil kywiʼ porke nya nim tpimil txʼotxʼ. 6 Pero e kubʼ tzʼeʼy tuʼn tipumal tqan qʼij ex e kubʼ tzqij porke nya nim tlokʼ. 7 Atzun junjuntl iyaj e kubʼ tzʼaq kyxol chʼiʼx kʼul, pero kyaj awal tjaqʼ chʼiʼx kʼul tej tchʼiy. Tuʼntzunju ya mintiʼ el twitz. 8 Pero ateʼ junjuntl iyaj e kubʼ tzʼaq toj tbʼanel txʼotxʼ, jawil kywi ex e chʼiy. Ex xi tzyet tuʼn tel kywitz, ateʼ junjun tzaj kyqʼoʼn 30 mas twitzju otoq kux awet, junjuntl tzaj kyqʼoʼn 60 ex junjuntl 100». 9 Ex tqʼamatl Jesús: «Alkye at tẍkyin tuʼn tbʼin, bʼinx qe yol lu».

10 Tej kyikʼ bʼet xjal, aqeju e kyaj ten tukʼil Jesús ex qeju Doce xi kyqanin te tiʼ tzʼelpuna ejemplo ajbʼen tuʼn. 11 Atzunte xi ttzaqʼweʼn kye: «O tzaj tqʼoʼn Dios ambʼil kyeye tuʼn tel kynikʼe kyiʼj t-xnaqʼtzbʼil e kubʼ ewin tiʼj Tgobierno. Atzun kye txqantl in xi nqʼoʼne xnaqʼtzbʼil kye kyukʼil ejemplo. 12 Tuʼntzunju, maske in nok kykeʼyin aju in bʼant wuʼne mlay tzʼel kynikʼ tiʼj, ex maske in nok kybʼiʼn aju in xi nqʼamaʼne mlay tzʼel kynikʼ tiʼj. Iktzun tten mlayx che meltzʼaj tukʼil Dios ex mlay kubʼ najsaʼn kyil». 13 Ax ikx xi tqʼamaʼn Jesús kye: «Qa mintiʼ ma tzʼel kynikʼe tiʼj ejemplo lu, ¿tzeʼn kʼelel kynikʼe kyiʼj txqantl?

14 Aju xjal in xiʼ awal, in kux tawaʼn tyol Dios.* 15 Ateʼ junjun xjal in che ok ik tzeʼn iyaj kubʼ tzʼaq ttxlaj bʼe. Aj tok kybʼiʼn tyol Dios, in nul Satanás ex in jatz tiʼn iyaj otoq kux awaʼn toj kyanmi. 16 Atzun junjuntl xjal in che ok ik tzeʼn iyaj kux awan t-xol abʼj. In xi kybʼiʼn tyol Dios ex in xi kyokslaʼn tukʼil tzalajbʼil, 17 pero tuʼnju mintiʼ in xi tlokʼ iyaj toj kyanmi oʼkx in nok tilil kyuʼn toj jun ambʼil. Tuʼntzunju, in kyaj kytzaqpiʼn kyokslabʼil* aj kyok weʼ kywitz problem moqa aj tok bʼinchaʼn nya bʼaʼn kyiʼj noq tuʼnju xi kyokslaʼn tyol Dios. 18 Ateʼ junjuntl xjal in che ok ik tzeʼn iyaj kux awan t-xol chʼiʼx kʼul. In xi kybʼiʼn tyol Dios, 19 pero in tzaj bʼaj kykʼuʼj tiʼj kyanqʼibʼil toj ambʼil jaʼlo,* in che kubʼ sbʼuʼn tuʼn tipumal qʼinumabʼil ex junjuntl tiʼ in pon kykʼuʼj tiʼj. Tuʼn jlu, ya mintiʼ in chʼiy iyaj ex mintiʼ in nel twitz. 20 De último, ateʼ junjuntl xjal in che ok ik tzeʼn iyaj kux awaʼn toj tbʼanel txʼotxʼ. In xi kybʼiʼn tyol Dios ex in xi kyokslaʼn tukʼil tzalajbʼil. Ex in nel kywitz, ateʼ junjun in tzaj kyqʼoʼn 30 mas twitzju otoq kux awaʼn, ate junjuntl 60 ex junjuntl 100».

21 Ax ikx xi tqʼamaʼn jlu kye: «Mintiʼ in tzaj tiʼn jun xjal jun kandil tuʼn tokx tqʼoʼn tjaqʼ chiʼl* moqa tuʼn tokx tqʼoʼn tjaqʼ watbʼil. Sino in tzaj tiʼn tuʼn tkubʼ tqʼoʼn toj jun lugar jatumel qʼanchaʼl. 22 Porke tkyaqilju ewin taʼ kʼelel toj qʼanchaʼl ex tkyaqilju nya ojtzqiʼn kʼelel kynikʼ txqantl tiʼj. 23 Alkyeju at tẍkyin bʼaʼn tuʼn t-xi tbʼiʼn qe yol lu».

24 Ex xi tqʼamaʼntl jlu kye: «Kyqʼonk kywiʼye tiʼjju in nok kybʼiʼne. Alkye malbʼil in najbʼen kyuʼne axtzun kʼajbʼel kyukʼile, ex tzul qʼoʼn chʼintl tibʼaj kyeye. 25 Porke tzul qʼoʼn mas teju xjal at nim te. Atzunju xjal at chʼin te, axpe ikx kʼelel qʼiʼn aju chʼin at te».

26 Ax ikx tqʼamatl Jesús jlu: «In nok Tgobierno Dios ik tzeʼn jun xinaq in kux tawaʼn iyaj toj txʼotxʼ. 27 In xiʼ jtal te qonikʼen ex in jaw weʼ te prim. Atzunte awal, in jawil twiʼ ex in chʼiy maske mintiʼ ojtzqiʼn tuʼn xinaq tzeʼn in bʼaj jlu. 28 Ex ax txʼotxʼ in tzaj qʼonte twitz. Tnejel in chʼiy tqan awal, yajxitl in yekʼin twitz ex te último in bʼant twitz awal. 29 Aj tbʼant twitz awal, in jaw txʼemin porke ya otoq pon ambʼil tuʼn tjaw chmet».

30 Ex tqʼamatl: «¿Alqukʼil jaku tzʼok qmojbʼaʼn Tgobierno Dios moqa alkye ejemplo jaku tzʼajbʼen quʼn? 31 In nok Tgobierno Dios ik tzeʼn jun tal twitz mostaza. Aj tkux awaʼn, atzun tal iyaj mas tal chʼin at twitz txʼotxʼ. 32 Pero aj tchʼiy, nim tweʼ ex in nok ik tzeʼn jun tzeʼ. In che bʼaj chʼiy tqabʼ, tuʼntzunju in che pon pájaro te twitz kyaʼj klol kyibʼ tjaqʼ t-xlekumal».

33 Ajbʼen nim ejemplo tuʼn Jesús ik tzeʼn jlu tej tyolin tiʼj tyol Dios ex ximen tiʼjju jakutoq tzʼel kynikʼ xjal tiʼj. 34 Puro tukʼil ejemplo* yolin Jesús kyukʼil, pero xi tqʼamaʼn kye tdiscípulo tiʼ tzʼelpun tej kyten kyjunalx.

35 Tej ttzaj qlolj toj qʼij aju, xi tqʼamaʼn Jesús kye tdiscípulo: «Qoʼqe toj juntl plaj mar». 36 Tej kybʼaj yolin kyukʼil xjal, xi kyiʼn Jesús toj bark ik tzenx taʼ. Ax ikx e xiʼ junjuntl bark kyukʼil. 37 Pero de repente tzaj nim kyqʼiqʼ. Jaw pulin aʼ tuʼn kyqʼiqʼ, okx toj bark ex chʼixmi xi mulqʼaj tuʼn. 38 Atzunte Jesús in jtan ttzel tiʼj bark, qejli tibʼaj jun almohada.* Jawtzun kʼasun kyuʼn tdiscípulo ex xi kyqʼamaʼn te: «Xnaqʼtzal, ¿mintiʼpe in nok tkeʼyina qa ok qo kyimel?». 39 Jawtzun weʼ Jesús, xi tkawin kyqʼiqʼ ex xi tqʼamaʼn te mar: «¡Miʼn bʼinchaʼna bulla! ¡Numekuya!». Entonces weʼ kyqʼiqʼ ex kubʼ numeʼ tkyaqil. 40 Yajxitl xi tqʼamaʼn kye: «¿Tiquʼn in che xobʼe? ¿Mintiʼpe in nok qeʼ kykʼuʼje tiʼj Dios?». 41 Pero mas e tzaj xobʼ ex kyqʼama kyxolx: «¿Alkyetzun xinaq lu? Porke ax ikx in xi tnimen kyqʼiqʼ ex mar tyol».