Carta kubʼ ttzʼibʼin Judas
1 Aqine Judas, terman Santiago ex jun tmajen Jesucristo, in xi ntzʼibʼine carta lu kye qeju o che jaw skʼoʼn tuʼn Qman Dios ex kʼujlaʼn qe tuʼn, ex o che ok t-xqʼuqin tuʼn kyten junx tukʼil Jesucristo:
2 Kuchiwt kubʼ tyekʼin Dios mas qʼaqʼbʼil tkʼuʼj kyiʼje ex tkʼujlabʼil, ex tuʼn ttzaj tqʼoʼn mas mujbʼabʼil kyxole.
3 Aqeye erman kʼujlaʼn qeye wuʼne, tnejel ma kubʼ nximane tuʼn t-xi ntzʼibʼine kyeye tiʼj tzeʼn qo kletel tuʼn Dios. Pero jaʼlo ma tzʼel nnikʼe tiʼj qa nim toklen tuʼn t-xi nqʼamaʼne kyeye tuʼn tok tilil kyuʼne tukʼil tkyaqil kyipumale tuʼn miʼn tnaj qʼuqbʼil kykʼuʼje aju xi qʼoʼn te jumajx kye skʼoʼn maj.* 4 Porke mintiʼ ma tzʼel kynikʼe tiʼj qa ma che okx junjun xinaq* kyxole aqeju ma tzikʼ ambʼil tkubʼlen qʼoʼn kysentens* tuʼn tyol Dios. Mintiʼ in che respetarin xinaq lu te Dios ex in najbʼen t-xtalbʼil kyuʼn tuʼn tkubʼ kybʼinchaʼn il aju mintiʼ in tzaj kychʼixwi tiʼj.* Ax ikx mintiʼ in che ten tzʼaqli twitz oʼkxku Qajaw Jesucristo.
5 Maske ya ojtzqiʼnxix kyuʼne aju chin yolile tiʼj, waje tuʼn t-xi nnaʼne kyeye qa klet jun tnam tuʼn Jehová* toj txʼotxʼ te Egipto. Pero yajxitl e kubʼ tnajsaʼn kykyaqil qeju mintiʼ ok qeʼ kykʼuʼj tiʼj. 6 Atzun kye anjel kyaj kyqʼoʼn lugar jatumel in che anqʼin ex aju kyoklen tzaj tqʼoʼn Dios, o che kubʼ kʼaloʼn toj qlolj kyuʼn kaden mlay che kubʼ laqj tzmaxi aj kyok toj juicio toj qʼij nim toklen. 7 Ax jlu bʼaj kyiʼj xjal te Sodoma ex Gomorra ex qe tnam tok kytxlaj. Kubʼ kybʼinchaʼn nim yaẍbʼil* ex xi kybʼinchaʼn tajbʼil kychibʼjal maske mintiʼ in tzaj tqʼoʼn ley ambʼil kye. Ex tej tkubʼ qʼoʼn kykastiw tuʼn kynaj tuʼn qʼaqʼ te jumajx, kubʼ kyqʼoʼn jun nya bʼaʼn ejemplo qwitz.
8 Maske ikju, kukx in che ximen xinaq lu tiʼj nya bʼaʼn, in bʼaj kytzʼilsaʼn kyxmilal ex kye txqantl, mintiʼ in nok kyqʼoʼn kyoklen qeju in che kawin kyibʼaj ex in che yolin nya bʼaʼn kyiʼj qeju o txi qʼoʼn kyoklen tuʼn Dios. 9 Pero junxitl tmod arcángel* Miguel kubʼ tyekʼin tej mintiʼ mojeʼ twi tyol tukʼil Tajaw il tiʼj t-xmilal Moisés. Mintiʼ xi tqʼamaʼn jun nya bʼaʼn yol te,* sino tqʼama: «Awt Jehová* txi kawin teya». 10 Atzun kye xinaq lu in che yolin nya bʼaʼn tiʼj tkyaqilju mintiʼ in nel kynikʼ tiʼj. Pero aju in nel kynikʼ tiʼj ik tzeʼn kye txkup, in che naj tuʼn.
11 ¡Lasmi kywitz! Porke ma che ok lepeʼ tiʼj tbʼinchbʼen Caín ex ma che el txalpuj ik tzeʼn te Balaam noq tuʼnju in che jyon tiʼj jun chojbʼil kye. Ex ma che naj tuʼnju in che yolin nya bʼaʼn kyiʼj qeju at kyoklen kyibʼaj ik tzeʼn bʼant tuʼn Coré. 12 In che ok xinaq lu ik tzeʼn abʼj ewin tjaqʼ aʼ aj kywaʼn junx kyukʼile kyoj nintz waʼn in kubʼ kybʼinchaʼne tuʼn tkubʼ kyyekʼine kykʼujlabʼile kyxolxe, ik tzeʼn qe pastor mintiʼ kychʼixwi ex oʼkx in che ximen tiʼj kykʼuʼj, ik tzeʼn qe muj mintiʼ jbʼal qʼiʼn kyuʼn ex in chex iqin tuʼn kyqʼiqʼ noq jaxku tumel, ex ik tzeʼn qe tzeʼ mintiʼ in nel kywitz toj tqʼijlalil aqeju o che kubʼ tzqij ex o jatz xbʼoqin kylokʼ. 13 In che ok ik tzeʼn mar in xpulin ex aju kymod chʼixbʼajil ik tzeʼn espuma in kyaj ten ttzi mar ex ik tzeʼn qe cheʼw in che el txalpuj. O che kubʼ tqʼoʼn Dios toj jun lugar puro qlolj ex atz che tel te jumajx.
14 Ax ikx yolin Enoc kyiʼj, aju twuqin xinaq tzajni tiʼj Adán tej tqʼama profecía jlu: «Lu Jehová* tzul kyukʼil nim mil t-anjel 15 tuʼn kyok kykyaqil xjal toj juicio tuʼn ex tuʼn tkubʼ tyekʼin nya bʼaʼn in bʼant kyuʼn kykyaqil qeju mintiʼ in nok kyqʼoʼn toklen. In bʼant jlu tuʼn Dios tuʼnju in kubʼ kybʼinchaʼn alkyexku il ex tuʼnju in che yolin nya bʼaʼn tiʼj».
16 Tkyaqilju in nikʼ toj kyanqʼibʼil xinaq lu nya bʼaʼn in nela toj kywitz ex in che anqʼin ik tzeʼnx kyajbʼil. In jaw kynimsan kyibʼ aj kyyolin ex in che yolin bʼaʼn kyiʼj txqantl* noq tuʼn tkambʼet jun tiʼ kyuʼn.
17 Pero atzun kyeye erman kʼujlaʼn qeye wuʼne, bʼaʼn tuʼn ttzaj kynaʼne qe yol kyaj kyqʼamaʼn t-apóstol Qajaw Jesucristo. 18 Kukx xi kyqʼamaʼn jlu kyeye: «Kyoj bʼajsbʼil tqʼijlalil* che tel xjal ok che xmayil tiʼjju bʼaʼn ex kxel kybʼinchaʼn nya bʼaʼn kyajbʼil». 19 Mintiʼ in che onin xinaq lu tuʼn tten mujbʼabʼil, in che ok ik tzeʼn qe txkup ex mintiʼ espíritu santo* kyukʼil. 20 Pero atzun kyeye erman kʼujlaʼn qeye wuʼne, che weʼkuye toj kyokslabʼile xjan ex che naʼne Dios tukʼil tonbʼil espíritu santo. 21 Iktzun tten kukx che tele toj tkʼujlabʼil Dios, akux in che ayone tiʼj qʼaqʼbʼil tkʼuʼj Qajaw Jesucristo aju tzul tqʼoʼn kychwinqlale te jumajx. 22 Ax ikx bʼaʼn tuʼn kukx ttzaj qʼaqʼin kykʼuʼje kyiʼj qeju in che dudarin tiʼjju nimen kyuʼn 23 ex che kyjakʼume tuʼn miʼn kynaj.* Ex qʼaqʼantz kykʼuʼje kyiʼj junjuntl, pero kyxqʼuqink kyibʼe, kyikʼumele kyxbʼalun o bʼaj tzʼilix tukʼil kybʼinchbʼen nya bʼaʼn.
24 Pero at tipumal Dios tuʼn t-xqʼuqin kyiʼje tuʼn miʼn kykubʼ tzʼaqe toj il ex tuʼn tonin kyiʼje tuʼn kytene saq twitz tukʼil nim tzalajbʼil. 25 Oʼkx jun Dios at ex o tzʼajbʼen Qajaw Jesucristo tuʼn tuʼn qklet. Bʼaʼn tuʼn tjaw nimset ex tuʼn kukx tten toklen te jumajx, tipumal ex tkawbʼil, atxix ojtxe, jaʼlo ex te jumajx. Amén.