Qe tbʼanel noticia kubʼ ttzʼibʼin Mateo

25 In nok Gobierno in tzaj toj kyaʼj ik tzeʼn diez txin* xi kyiʼn kykandil ex e etz ayol tiʼj novio. 2 Jweʼ kyxol mintiʼ kynabʼil, atzun juntl jweʼ ten kynabʼil. 3 Aʼyeju txin mintiʼ ten kynabʼil xi kyiʼn kykandil, pero mintiʼ xi kyiʼn aseyt. 4 Atzun kye txin ten kynabʼil nya oʼkx xi kyiʼn kykandil, sino ax ikx xi kyiʼn aseyt toj tkubʼil. 5 Tuʼnju mintiʼtoq in pon novio, tzaj watl toj kywitz kykyaqil ex e ikʼ jtan. 6 Tej ttzaj medianoche, e jaw schʼiʼn xjal ex kyqʼama jlu: ‹¡Lu novio ma tzul! ¡Che tzaje kʼamolte!›. 7 E jawtzun weʼ kykyaqil txin ex bʼaj kybʼinchaʼn kykandil. 8 Atzun kye txin mintiʼ ten kynabʼil xi kyqʼamaʼn kye qeju at kynabʼil: ‹¿Jakupe tzaj kyqʼoʼne chʼin qeye q-aseyt? Porke ya chʼix tkubʼ yupj qkandile›. 9 Pero xi kytzaqʼweʼn qeju txin at kynabʼil kye: ‹Miʼn, porke mlay kanun aseyt qxol qkyaqilx. Mas bʼaʼn tuʼn kyxiʼye laqʼolte jatumel in kʼayinjtz›. 10 Pero ul novio tej kyxiʼ txin mintiʼ kynabʼil laqʼol aseyt. Aqeju txin otoq bʼaj kybʼinchaʼn kyten e okx junx tukʼil novio toj nintz waʼn toj boda ex etz jupuʼn pwert. 11 Yajxitl e pon txin mintiʼ kynabʼil ex kyqʼama: ‹¡Tat, tat, jaqonkxa pwert qwitze!›. 12 Atzunte novio xi ttzaqʼweʼn kye: ‹Ax tok kxel nqʼamaʼne kyeye, mintiʼ ojtzqiʼn qeye wuʼne›.

13 Tuʼntzunju kukx che xqʼuqine, porke mintiʼ ojtzqiʼn kyuʼne alkye qʼij ex alkye or.

14 Ax ikx in nok Gobierno in tzaj toj kyaʼj ik tzeʼn jun xinaq viajarin toj juntl lugar. Naʼmxtoq txi tzyet tuʼn tviajarin, tzaj ttxkoʼn qe tmajen ex kyaj tqʼoʼn tkyaqilju at te toj kykwent. 15 Xi tqʼoʼn jweʼ talento* moneda te plata te jun tmajen, atzunte juntl xi tqʼoʼn kabʼe ex xi tqʼoʼn jun te juntl tmajen. Teyele junjun xi tqʼoʼn ik tzeʼnx tzʼaqʼunan ex xi tzyet tuʼn tviajarin. 16 Aju majen xi qʼoʼn jweʼ talento te, ok ten negosyaril ex kambʼet jweʼtl talento tuʼn. 17 Ax ikx te majen xi qʼoʼn kabʼe talento te, kambʼetl kabʼe talento tuʼn. 18 Pero atzunte majen xi qʼoʼn jun talento te, xiʼ ex kux tlakuʼn jun jul jatumel kux tewin tpwaq* tpatrón.

19 Tej tikʼ nim ambʼil, meltzʼaj patrón ex xi tqanin kye tmajen tuʼn t-xi kyqʼoʼn kwent te. 20 Tej tpon majen xi qʼoʼn jweʼ talento te, pon tiʼn jweʼtl ex xi tqʼamaʼn te tpatrón: ‹Patrón, tzaj tqʼoʼna jweʼ talento weye ex ma kambʼet jweʼtl wuʼne›. 21 Xi ttzaqʼweʼn tpatrón te: ‹¡Tbʼanel aqʼuntl, jun tbʼanel majena ex jaku tzʼok qeʼ nkʼuʼje tiʼja! Tuʼnju ma bʼant jun tbʼanel aqʼuntl tuʼna maske nya nim ma txi nqʼoʼne toj tkwenta, mas nim kxel nqʼoʼne toj tkwenta jaʼlo. Tuʼntzunju, tzalaja junx wukʼile›. 22 Yajxitl pon majen xi qʼoʼn kabʼe talento te ex xi tqʼamaʼn te tpatrón: ‹Patrón, tzaj tqʼoʼna kabʼe talento weye ex ma kambʼetl kabʼe wuʼne›. 23 Atzunte tpatrón xi ttzaqʼweʼn te: ‹¡Tbʼanel aqʼuntl, jun tbʼanel majena ex jaku tzʼok qeʼ nkʼuʼje tiʼja! Tuʼnju ma bʼant jun tbʼanel aqʼuntl tuʼna maske nya nim ma txi nqʼoʼne toj tkwenta, mas nim kxel nqʼoʼne toj tkwenta jaʼlo. Tuʼntzunju, tzalaja junx wukʼile›.

24 De último pon majen xi qʼoʼn jun talento te ex xi tqʼamaʼn te tpatrón: ‹Patrón, ojtzqiʼn wuʼne qa kyuw tmoda ex qa in jaw tchmoʼna twitz awal jatumel mintiʼ kux tawaʼna ex jatumel mintiʼ xi tchituna iyaj. 25 Tuʼntzunju, in tzaj xobʼe ex in xiʼye ewil te talento toj txʼotxʼ. Lu tpwaqa lu›. 26 Atzunte tpatrón xi ttzaqʼweʼn te: ‹Aya majen nya bʼaʼn ex kyʼaj. Qa ojtzqiʼntoq tuʼna qa in jaw nchmoʼne twitz awal jatumel mintiʼ kux wawane ex jatumel mintiʼ xi nchtone iyaj, 27 ¿tiquʼn mintiʼ xiʼya qʼolte npwaqe toj bank? Ex tej ma chin ule, mawtlo tzaj qʼoʼn npwaqe junx tukʼil t-interés›.

28 Ex tqʼamatl patrón jlu: ‹Kyiʼmele talento te ex kyqʼonxe te majen qʼiʼn diez talento tuʼn. 29 Porke kxel qʼoʼn mas teju xjal at nim te ex mas nim ktel te. Atzunju xjal noq chʼin at te, axpe ikx kʼelel qʼiʼn aju chʼin at te. 30 Ex aju majen mintiʼ tajbʼen, kyxoʼmixe toj qlolj jatumel kjawil oqʼ ex kbʼel ttxʼaʼn twitz teʼ›.*

31 Aj tul Tkʼwal Xinaq tukʼil nim toklen ex kykyaqil anjel tukʼil, ok kbʼel qeʼ toj tbʼanelxix tqʼuqbʼil. 32 Ex che okel chmoʼn kykyaqil nasyon twitz. Che elel tpaʼn qe xjal ik tzeʼn in bʼant tuʼn jun pastor kyukʼil rit* ex qe chiv. 33 Che kbʼel tqʼoʼn qe rit toj tderecha, atzun qe chiv toj t-izquierda.

34 Ex kxel tqʼamaʼn Rey kye qeju ateʼ toj tderecha: ‹Che tzaje aqeye o che tzaj kʼiwlaʼn tuʼn Nmane ex kykʼamonxe Gobierno o bʼaj bʼinchaʼn kyeye atxix tej tkubʼ bʼinchaʼn twitz txʼotxʼ.* 35 Porke tej ttzaj weʼyaj wiʼje, tzaj kyqʼoʼne nwaye. Ax ikx tej ttzaj kʼaj wiʼje, tzaj kyqʼoʼne nkʼaʼye. Ex maske mintiʼ ojtzqiʼn qine kyuʼne, in nokx kykʼamoʼne toj kyjaye. 36 Tej mintiʼ nxbʼalune,* tzaj kyqʼoʼne nxbʼalune. Ax ikx in nok kyxqʼuqine tej ttzaj yabʼil wiʼje. Ex e pone visitaril weye tej wokx qʼoʼne toj cárcel›. 37 Atzun qe xjal tzʼaqli kxel kytzaqʼweʼn: ‹Tat, ¿toj alkye ambʼil ok qkeʼyine qa tzaj weʼyaj tiʼja ex xi qqʼoʼne twaya? ¿Ex toj alkye ambʼil ok qkeʼyine qa tzaj kʼaj tiʼja ex xi qqʼoʼne tkʼaʼya? 38 ¿Toj alkye ambʼil oka te jun xjal mintiʼ ojtzqiʼn quʼne ex okx qkʼamoʼna toj qjaye? ¿Toj alkye ambʼil ok qkeʼyine qa mintiʼ t-xbʼaluna ex xi qqʼoʼne t-xbʼaluna? 39 ¿Ex toj alkye ambʼil ok qkeʼyine qa yabʼ taʼya ex qa okx qʼoʼna pres ex o pone visitaril teya?›. 40 Atzunte Rey kxel ttzaqʼweʼn kye: ‹Ax tok kxel nqʼamaʼne kyeye, tkyaqilju ma tzʼok kybʼinchaʼne kyiʼj qeju wermane mas tal chʼin, wiʼje ma tzʼok kybʼinchaʼne›.

41 Atzun kye qeju ateʼ toj t-izquierda kxel tqʼamaʼn kye: ‹Kypaʼmil kyibʼe wiʼje. Ma kubʼ qʼoʼn kysentense tuʼn Dios. Ex kyxiʼye toj qʼaqʼ in kubʼ tnajsaʼn tkyaqil te jumajx,* aju o kubʼ bʼinchaʼn te Tajaw il ex kye tdemonio.* 42 Porke tej ttzaj weʼyaj wiʼje, mintiʼ tzaj kyqʼoʼne nwaye. Ex tej ttzaj kʼaj wiʼje, mintiʼ tzaj kyqʼoʼne nkʼaʼye. 43 Tej in noke te jun xjal mintiʼ ojtzqiʼn kyuʼne, mintiʼ in nokx kykʼamoʼne toj kyjaye. Tej mintiʼ nxbʼalune, mintiʼ tzaj kyqʼoʼne nxbʼalune. Ex mintiʼ e xqʼuqine wiʼje tej ttzaj yabʼil wiʼje ex tej wokx qʼoʼne toj cárcel›. 44 Atzun kye kxel kytzaqʼweʼn te: ‹Tat, ¿toj alkye ambʼil ok qkeʼyine qa at weʼyaj tiʼja ex qa at kʼaj tiʼja ex mintiʼ xi qqʼoʼne onbʼil teya? ¿Toj alkye ambʼil mintiʼ xi qqʼoʼne onbʼil teya tuʼnju mintiʼ ojtzqiʼna quʼne, tej mintiʼ t-xbʼaluna, tej ttzaj yabʼil tiʼja ex tej tokx qʼoʼna toj cárcel?›. 45 Pero kxel ttzaqʼweʼn kye: ‹Ax tok kxel nqʼamaʼne kyeye, tkyaqilju mintiʼ ma tzʼok kybʼinchaʼne kyiʼj qeju wermane mas tal chʼin, mintiʼ ma tzʼok kybʼinchaʼne wiʼje›. 46 Tuʼntzunju che kbʼel najsaʼn* xjal lu te jumajx, atzun qeju tzʼaqli tzul qʼoʼn kychwinqlal te jumajx».