Qe tbʼanel noticia kubʼ ttzʼibʼin Juan

16 Ma txi nqʼamaʼne tkyaqil jlu kyeye tuʼn miʼn chin kyaj kyqʼoʼne.* 2 Che kʼeletz lajoʼne kyuʼn toj ja te kʼulbʼil.* Ex tzul tqʼijlalil kbʼel kyximen xjal qa in che ajbʼen te Dios aj kykubʼ bʼyoʼne kyuʼn. 3 Pero kbʼantel tkyaqil jlu kyuʼn porke mintiʼ ojtzqiʼn Nmane kyuʼn ex mintiʼ ojtzqiʼn qine kyuʼn. 4 Ma chin yoline tiʼj tkyaqil jlu kyukʼile tuʼn ttzaj kynaʼne qa xi nqʼamaʼne kyeye aj tpon qʼij tuʼn tbʼaj.

Mintiʼ ma chin yoline tiʼj jlu kyukʼile tnejel porke atinxtoqe kyukʼile. 5 Pero jaʼlo ma chinxe tukʼilju tzaj samante weye ex ni jun kyxole in tzaj tqanin weye, ‹¿Jatumel ma txiʼya?›. 6 Noq oʼkx in kubʼ kynaʼne bʼis toj kyanmiye tuʼnju ma txi nqʼamaʼne jlu kyeye. 7 Pero chin kyokslanxe, mas bʼaʼn kyeye qa ma chinxe. Porke qa mintiʼ ma chinxe, mlay tzul onil kyeye. Pero qa ma chinxe, tzul nsamaʼne kyukʼile. 8 Ex aj tul, ktzajel tyekʼin alkye kyil xjal, qa in xi nbʼinchaʼne aju tzʼaqli ex alkye in nok toj juicio tuʼn Dios. 9 Tnejel ktzajel tyekʼin alkye kyil xjal, porke mintiʼ in nok qeʼ kykʼuʼj wiʼje. 10 Yajxitl ktzajel tyekʼin qa in xi nbʼinchaʼne aju tzʼaqli, porke ma chinxe tukʼil Mambʼaj ex mlay chin ok kykeʼyintle. 11 Ex de último ktzajel tyekʼin alkye kʼokel toj juicio tuʼn Dios, porke ya ma kubʼ qʼoʼn tsentens aju in kawin twitz txʼotxʼ.

12 At nimku tiʼ tuʼn t-xi nqʼamaʼne kyeye, pero mlay tzʼel kynikʼe tiʼj tkyaqil jaʼlo. 13 Pero aj tul,* aju espíritu santo in tzaj tyekʼin axix tok, kxel tyekʼin tkyaqil axix tok kyeye. Porke nya tex tyol kxel tqʼamaʼn, sino kxel tqʼamaʼn aju ma tzʼok tbʼiʼn ex kxel tqʼamaʼn kyeye tkyaqilju tzul. 14 Chin jawil nimsaʼne tuʼn, porke kxel tqʼamaʼn kyeye aju kʼokel tbʼiʼn wiʼje. 15 Tkyaqilju at te Mambʼaj, ax ikx weye. Tuʼntzunju ma txi nqʼamaʼne kyeye qa kxel tqʼamaʼn kyeye aju kʼokel tbʼiʼn wiʼje. 16 Noq chʼintl ambʼil chin okel kykeʼyine, pero toj chʼintl ambʼil chin okel kykeʼyine juntl maj».

17 Tej tok kybʼiʼn discípulo jlu, ateʼ junjun kyxol kyqʼama: «¿Tiʼ tajbʼil tuʼn ttzaj tqʼamaʼn qe kyukʼil yol lu? ‹Noq chʼintl ambʼil chin okel kykeʼyine, pero toj chʼintl ambʼil chin okel kykeʼyine juntl maj›, ex aj ttzaj tqʼamaʼn qe ‹Porke ma chinxe tukʼil Mambʼaj›». 18 Tuʼntzunju kyqʼama: «¿Tiʼ tajbʼil tuʼn ttzaj tqʼamaʼn kyukʼil yol ‹toj chʼintl ambʼil›? Mintiʼ in nel qnikʼ tiʼjju in tqʼamaʼn». 19 El tnikʼ Jesús tiʼj qa kyajbʼiltoq tdiscípulo tuʼn t-xi kyqanin junjun xjel te, tuʼntzunju xi tqʼamaʼn kye: «¿In xipe kyqanine jlu kyxolxe tuʼn tel kynikʼe tiʼj tiquʼn ma txi nqʼamaʼne kyeye ‹Noq chʼintl ambʼil chin okel kykeʼyine, pero toj chʼintl ambʼil chin okel kykeʼyine juntl maj›? 20 Ax tok kxel nqʼamaʼne kyeye, che jawil oqʼe ex kbʼel kynaʼne bʼis, atzun kye xjal che tzalajel. Knojel kyanmiye tuʼn bʼis, pero kʼokel kybʼise te tzalajbʼil. 21 Aj tpon or tuʼn tul itzʼj tal jun xuʼj,* in tzaj tbʼis porke ma pon ambʼil tuʼn tkubʼ tnaʼn nim tchoʼnal. Pero aj tul itzʼj tal, in nikʼ tnaʼl tchoʼnal tuʼn* porke in tzalaj tiʼj tal ma tzul itzʼj twitz txʼotxʼ. 22 Ax jlu in bʼaj kyukʼile. Jaʼlo in che bʼisune, pero che okel nkeʼyine juntl maj ex kbʼel kynaʼne nim tzalajbʼil toj kyanmiye, ex nijun xjal kʼelel qʼinte tzalajbʼil kyeye. 23 Aj tpon qʼij lu mlay che xjelintle weye. Ax tok kxel nqʼamaʼne kyeye, tkyaqilju ma txi kyqanine te Nmane toj nbʼiye, ktzajel tqʼoʼn kyeye. 24 Naʼmx txi kyqanine jun tiʼ toj nbʼiye, jaʼlo kyqaninxe ex tzul qʼoʼn kyeye tuʼntzun tnoj kyanmiye tuʼn tzalajbʼil.

25 Ma che ajbʼen ejemplo wuʼne tuʼn t-xi nqʼamaʼne jlu kyeye. Pero kpol ambʼil mlaytl che ajbʼen ejemplo wuʼne tuʼn nyoline kyukʼile ex klar chin yolile kyukʼile tiʼj Mambʼaj. 26 Toj qʼij aju, kxel kyqanine tkyaqil te Mambʼaj toj nbʼiye. Pero nya a tzʼelpuna jlu qa aqine chin kxel qaninte te kyxele. 27 Porke kʼujlaʼn qeye tuʼn Mambʼaj tuʼnju ma chin ok kykʼujlaʼne ex tuʼnju ma txi kyokslaʼne qa ma chin tzaje tukʼil Dios. 28 Ma chin tzaje tukʼil Mambʼaj tuʼn wule tzalu twitz txʼotxʼ. Jaʼlo kjel nqʼoʼne twitz txʼotxʼ ex chin meltzʼajele tukʼil Mambʼaj».

29 Atzun kye tdiscípulo xi kyqʼamaʼn te: «Jaʼlo si klarxix in yolina, porke mintiʼ in najbʼen jun ejemplo tuʼna. 30 Ma tzʼel qnikʼe tiʼj jaʼlo qa ojtzqiʼn tkyaqil tuʼna ex qa nya il tiʼj tuʼn t-xjelin jun xjal teya. Tuʼn jlu in xi qokslaʼne qa ma tzaja tukʼil Dios». 31 Xi ttzaqʼweʼn Jesús kye: «¿Mape txi kyokslaʼne? 32 Kybʼintze jlu. Chʼinx tpon or tuʼn kyel oqe, bueno ya ma pon. Che xeʼle kykyaqile kyjaye ex chin kjel kyqʼoʼne njunalxe. Pero nya njunalxe atine porke at Mambʼaj wukʼile. 33 Ma txi nqʼamaʼne jlu kyeye tuʼn miʼn tel kypan kyibʼe wiʼje ex tuʼn tkubʼ kynaʼne axix tok tzalajbʼil. Che okel weʼye twitz sufrimiento twitz txʼotxʼ. Pero, ¡tenx kyipumale!, porke ma kubʼ tiʼj nya bʼaʼn at twitz txʼotxʼ wuʼne».