Qe tbʼanel noticia kubʼ ttzʼibʼin Juan
20 Toj tnejel qʼij toj seman, xiʼ María Magdalena prim ttzi panteón tej naʼmxtoq ttzaj spikʼun ex til qa otoq tzʼel qʼiʼn abʼj ttzi. 2 Tuʼntzunju, xi ojqelan jatumel taʼ Simón Pedro ex tukʼil juntl discípulo kʼujlaʼn tuʼn Jesús ex xi tqʼamaʼn kye: «¡Ma tzʼetz qʼiʼn t-xmilal Qajaw toj panteón, ex mintiʼ ojtzqiʼn quʼne jatumel ma kubʼ qʼoʼn!».
3 Tuʼntzunju xiʼ Pedro tukʼil juntl discípulo toj panteón. 4 E jeʼx ojqelan junx kykabʼil, pero mas ojqelan juntl discípulo twitz Pedro ex tnejel pon toj panteón. 5 Kubʼ mokʼeʼ tuʼn tokx tkeʼyin toj panteón ex til qe piẍ tela te lino, pero mintiʼ okx. 6 Pero tej tpon Simón Pedro, aju tzaj lepeʼ ttzel tiʼj, okx toj panteón ex til qe tela te lino. 7 Nyatoq junx taʼ tela ok qʼoʼn tiʼj twiʼ Jesús kyukʼil txqantl tela, sino otoq bʼaj bʼalqʼiʼn ex otoq kubʼ qʼoʼn part. 8 Yajxitl okx juntl discípulo pon tnejel toj panteón ex til ex xi tokslaʼn aju xi qʼamaʼn kye. 9 Porke naʼmxtoq tel kynikʼ tiʼjju in tzaj tqʼamaʼn tyol Dios qa il tiʼj tuʼn tjaw anqʼin Jesús kyxol kyimni. 10 Tuʼntzunju, e meltzʼaj discípulo kyja.
11 Atzunte María kyaj weʼ twitz panteón ex in noqʼ. Tej tzmatoq in noqʼ, kubʼ mokʼeʼ tuʼn tokx tkeʼyin toj panteón 12 ex til kabʼe anjel tok kyxbʼalun saq ex qʼuqli qeʼ jatumel kyaj qʼoʼn t-xmilal Jesús. Qʼuqlitoq jun jatumel kubʼ ten twiʼ Jesús, atzun juntl jatumel kubʼ ten tqan. 13 Xi kyqanin anjel te María: «Aya xuʼj,* ¿tiquʼn in noqʼa?». Xi ttzaqʼweʼn María kye: «In chin oqʼe porke ma txi qʼiʼn t-xmilal Wajawe ex mintiʼ ojtzqiʼn wuʼne jatumel ma kubʼ qʼoʼn». 14 Tej tbʼaj tqʼamaʼn jlu, ajtz tkeʼyin ex til jun xjal waʼl. Atoq Jesús, pero mintiʼ el tnikʼ tiʼj. 15 Xi tqanin Jesús te: «Aya xuʼj, ¿tiquʼn in noqʼa? ¿Alkye in jyona tiʼj?». Kubʼ t-ximen María qa atoq xjal in xqʼuqin tiʼj jardín, tuʼntzunju xi tqʼamaʼn te: «Tat, qa aya ma txi qʼinte t-xmilal, qʼamantza weye jatumel ma kubʼ tqʼoʼna ex kxel wiʼne». 16 Xi tqʼamaʼn Jesús te: «¡María!». Ex meltzʼaj twitz María ex xi tqʼamaʼn te Jesús toj hebreo: «¡Rabbóni!», (a tzʼelpuna yol lu «xnaqʼtzal»). 17 Xi ttzaqʼweʼn Jesús te: «Miʼn chin kubʼ ttzyuʼna porke naʼmx tpon ambʼil tuʼn nxiʼye tukʼil Nmane. Txiʼya kyukʼil wermane ex qʼamanxa kye: ‹Ma chinxe tukʼil Nmane ex Kymane, tukʼil Ndiose ex Kydiose›». 18 Xitzun María Magdalena kyukʼil tdiscípulo Jesús ex xi tqʼamaʼn jlu kye: «¡Ma wile Qajaw!». Ex xi tqʼamaʼn kye aju xi tqʼamaʼn Jesús te.
19 Tej chʼixtoq tex bʼaj qʼij toj tnejel qʼij te seman, ok kychmon kyibʼ tdiscípulo Jesús toj jun ja ex ok kyqʼoʼn tal pwert porke e tzaj xobʼ kywitz judiy. Entonces kubʼ tyekʼin tibʼ Jesús kyxol ex xi tqʼamaʼn kye: «Tenwt mujbʼabʼil kyxole». 20 Tej tbʼaj yolin Jesús, xi tyekʼin tqʼabʼ ex tjaqʼ t-xuʼk kye. Ex noj toj kyanmi discípulo tuʼn tzalajbʼil tej tok kykeʼyin Qajaw. 21 Xi tqʼamaʼn Jesús juntl maj kye: «Tenwt mujbʼabʼil kyxole. Ik tzeʼn ma chin tzaj samaʼne tuʼn Nmane, ax ikx weye che kxel nsamaʼne». 22 Tej tbʼaj tqʼamaʼn jlu, xi t-xupin kyibʼaj ex xi tqʼamaʼn kye: «Kykʼamonxe espíritu santo. 23 Qa ma kubʼ kynajsaʼne til jun xjal, kbʼel najsaʼn til. Pero qa mintiʼ ma kubʼ kynajsaʼne til, mlay kubʼ najsaʼn til».
24 Atzunte Tomás, jun kyxol qeju Doce ex aju ok qʼoʼn tbʼi te el Gemelo, mi aʼltoq kyukʼil txqantl discípulo tej tpon Jesús. 25 Tuʼntzunju xi kyqʼamaʼn txqantl discípulo te: «¡Ma qile Qajaw!». Pero xi tqʼamaʼn Tomás kye: «Mlayx txi wokslaʼne qa mintiʼ ma tzʼok nkeʼyine jatumel okx qʼoʼn clav toj tqʼabʼ, qa mintiʼ ma tzʼokx nqʼoʼne twi nqʼabʼe jatumel okx qʼoʼn clav toj tqʼabʼ ex qa mintiʼ ma tzʼokx nqʼoʼne nqʼabʼe tjaqʼ t-xuʼk».
26 Tej tikʼ ocho qʼij, juntl maj ok kychmon kyibʼ tdiscípulo Jesús toj jun ja ex attoq Tomás kyukʼil. Maske ex kyjupuʼn pwert tukʼil tal, kubʼ tyekʼin tibʼ Jesús kyxol ex tqʼama: «Tenwt mujbʼabʼil kyxole». 27 Ex xi tqʼamaʼn te Tomás: «Qʼonkxa twi tqʼabʼa tzalu ex keʼyinka nqʼabʼe, ax ikx qʼonkxa tqʼabʼa tjaqʼ nxuʼke. Qeʼk tkʼuʼja tiʼj qa itzʼ qine ex tzʼokslana». 28 Atzunte Tomás xi tqʼamaʼn te: «¡Aya Wajaw ex aya Ndios!». 29 Xi tqʼamaʼn Jesús te: «¿Mape tzʼokslana porke ma chin tila? At tzalajbʼil kye qeju in che okslaʼn maske mintiʼ ma kyil».
30 Ax ikx kubʼ tbʼinchaʼn Jesús txqantl milagro* kywitz tdiscípulo aqeju mintiʼ tzʼibʼin toj uʼj lu. 31 Pero ma kubʼ tzʼibʼin tkyaqil jlu tuʼn tok qeʼ kykʼuʼje tiʼj qa a Jesús Cristo aju Tkʼwal Dios. Ex qa ma tzʼok qeʼ kykʼuʼje tiʼj, jaku ten kychwinqlale noq tuʼn tbʼi.